Улон-вылон 1
1
1-тӥ ЛЮКЕТ
1Кутсконаз ик Инмар инмез но музъемез кылдытӥз. 2Музъем вылтустэм, тырттэм вал, пыдэстэм ву дунне вылын тём-тём пеймыт улӥз. Инмарлэн Духез вулэн йылтӥз поръяса ветлӥз. 3Соку Инмар шуиз: «Югыт мед луоз». Югыт луиз. 4Югытлык ӟеч луэ шуыса, Инмар адӟиз; соку Инмар югытэз пеймытлэсь висъяз. 5Инмар югытэз нунал шуыса нимаз, нош пеймытэз – уй. Ӝыт вал, ӵукна вал: одӥг нунал.
6Инмар шуиз: «Ву шорын юн-чурыт инты#1:6 юн-чурыт инты – твердь (небесная) мед луоз, со вуэз вулэсь мед висъялоз». [Тазьы ик луиз.] 7Инмар юн-чурыт интыез кылдытӥз: юн-чурыт инты улысь вуэз юн-чурыт инты вылысь вулэсь (ог-огзылэсь) висъяз. Тазьы луиз. 8Инмар юн-чурыт интыез ин шуыса нимаз. [Инмар та умой шуыса адӟиз.] Ӝыт вал, ӵукна вал: кыкетӥез нунал.
9Инмар шуиз: «Ин улысь ву одӥг интые мед люкаськоз, сюйвыл мед потоз». Тазьы ик луиз. [Ин улысь ву ас интыосаз люкаськиз но, сюйвыл потӥз.] 10Инмар сюйвылэз музъем шуыса нимаз, нош вуослэсь огазе люкаськонзэс зарезь шуыса нимаз. Инмар адӟиз, та умой шуыса. 11Инмар шуиз: «Музъем [ас выжыезлы, аслыз укшась] вож узьым, кидыс кизись турын мед будэтоз, музъем вылысь ас выжыезлы укшась кидысо емыш сётӥсь писпу мед будэтоз». Тазьы ик луиз. 12Музъем вож узьым будэтӥз, ас выжыезлы, [аслыз укшась] кидыс кизись турын, ас выжыезлы укшась кидысо емыш сётӥсь писпу будэтӥз. Инмар адӟиз, та умой шуыса. 13Ӝыт вал, ӵукна вал: куинетӥез нунал.
14Инмар шуиз: «[Музъемез югдытон понна,] нуналэз уйлэсь висъян понна, паймымон тодметъёс мед луозы шуыса, вапумъёсты, нуналъёсты, аръёсты тодман понна инлэн юн-чурыт интыяз югыт сётӥсь макеос мед луозы; 15музъемез югдытон понна соос инлэн юн-чурыт инты вылаз югдытыса улӥсьёс мед луозы». Тазьы ик луиз. 16Инмар кык туж бадӟымесь югдытӥсь макеосты кылдытӥз: бадӟымезгес югдытӥсь макеез нуналэн кивалтон понна, пичизэгес югдытӥсь макеез – уен кивалтон понна; кизилиосты кылдытӥз; 17-18музъем вылэ югыт сётон понна, нуналэн но уен кивалтон понна, югытэз пеймытлэсь висъян понна Инмар соосты инбаме пуктӥз. Инмар адӟиз, та умой шуыса. 19Ӝыт вал, ӵукна вал: ньылетӥез нунал.
20Инмар шуиз: «Уяса, нюж кыстӥськыса ветлӥсь улэп лулъёсын вуос мед пачылмозы; музъем вылтӥ, инметӥ тылобурдоос мед лобалозы». [Озьы ик луиз]. 21Инмар бадӟымесь чорыгъёсты кылдытӥз, вуысь асьсэ выжылы укшась вань пӧртэм пумо уяса, нюж кыстӥськыса ветлӥсь улэп макеосты поттӥз, пӧртэм пумо вань тылобурдоосты асьсэ выжылы укшатыса кылдытӥз. Инмар адӟиз, та умой шуыса. 22Соосты Инмар, тазьы шуыса, бакель кариз: «Пиялэ, йылэ, зарезьёсысь вуосты пачылмытэ, тылобурдоос музъем вылэ мед йылозы». 23Ӝыт вал, ӵукна вал: витетӥез нунал.
24Инмар шуиз: «Музъем вылэ пӧртэм пумо, асьсэ выжылы укшась улэп макеос – пудо-животъёс, нюж кыстӥськыса ветлӥсьёс, луд пӧйшуръёс – мед потозы». Тазьы ик луиз. 25Инмар кылдытӥз пӧртэм пумо луд пӧйшуръёсты, пудо-животъёсты, музъем вылтӥ нюж кыстӥськыса ветлӥсьёсты, асьсэ выжылы укшасесь карыса. Инмар адӟиз, та умой шуыса.
26Инмар шуиз: «Асьмелэн тусбуймылы, Асьмелы укшась адямиез кылдытомы; зарезь чорыгъёсын, ин тылобурдоосын, [пӧйшуръёсын,] пудо-животэн, быдэс музъемен, вань нюж, гыж кыстӥськыса ветлӥсьёсын адями кузёяськыса мед улоз». 27Инмар адямиез Аслыз укшатыса кылдытӥз, Инмарлы укшатыса сое кылдытӥз; пиосмуртэн кышномуртэз кылдытӥз. 28Инмар соосты бакель карыса шуиз: «Йылэ, трос луэ, музъемез тырмытэ, сое киулады кутэ; зарезь чорыгъёсын, [пӧйшуръёсын,] ин тылобурдоосын, [котькыӵе пудо-животэн, быдэс музъем вылэн,] вань нюж кыстӥськыса ветлӥсьёсын кузёяськыса улэ». 29Инмар шуиз: «Тани, Мон тӥледлы музъем вылысь кидыс кизись пӧртэм пумо турынъёс сётӥ, кидысо емыш сётӥсь пӧртэм писпуос сётӥ: ваньмыз таос тӥледлы сиыны яралозы; 30нош вань луд пӧйшуръёслы, вань ин тылобурдоослы, музъем вылтӥ нюж ветлӥсьёслы – вань улэп макеослы вож турын-куарез сиёнлы сётӥ». Тазьы ик луиз. 31Инмар адӟиз, Солэн Аслаз вань кылдытэмез, туж умой луэ шуыса. Ӝыт вал, ӵукна вал: куатетӥ нунал.
ప్రస్తుతం ఎంపిక చేయబడింది:
Улон-вылон 1: УДМБИБ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
(c) Библияез берыктонъя Институт, Хельсинки, 2013; 2016
