Luk 1
1
Luk âsaŋgɛ oŋgwe wee kɛ nɛ Tiyofilus
1Vɛnʉl cɛŋ ɔ̂kan wʉ vásaŋgɛ vɛnalɛvɛ yɛ viyel kɛ imbule ɛyasɛ, 2kɛ ndalɛsɛ vɛnʉl vɛ ɔtʉmʉ vɛ Ofilikpamɛ ôyeni kɛ asi avo tɛla kɛ iheena, kɛ ɔsaŋgɛ kan nɛ asu. 3Mɛ̂yegh vɛnalɛvɛ yee sɛva-sɛva, tɛla sɛ vɛlɛ-hee. Asɔ kâsɛva mɛ, wʉ másaŋgɛ we vɛnalɛvɛ vimem cuwee sɛ vɛ̂lɛ kɛ ɔlɔl-ɔlɔl. Ɔkʉ Tiyofilus, 4mɛ̂yel ase ndalɛsɛ wácil ŋgɛ-ŋgɛ wʉla, vɛnalɛvɛ yɛ wʉyegh ayɛ kɛlɛ cɛb.
Kɛlɛ ase ɛnɛ ɔ̂malɛ Zɔnɛ wʉ abaptaisa vɛnʉl
5Kɛ ɔkambɛlɛ wʉ Helod âlɛ Mɛfʉwa kɛ ɛyaŋ iyɛ Zudiya, ɔnʉl ɔmɔ wʉ asala Ofilikpamɛ alɛ-lɛ. Agɔla ite ala Sakalia, asime kɛ itumu yɛsalana yɛ Abizia. Okeyi ɔna Ɛlɛsabet kpaa, asime kɛlɛ kɛ itumu yɛ Ɛlɔn#1:5 Ɛlɔn alɛ-lɛ wanɛŋgwan wʉ Mosis. Ɛlɔn ɛnɛ âlɛ ɔnʉl wʉ isi wʉ ahee ɛsalana Ofilikpamɛ. Vɛnʉl omwem vɛ ɔlɛ-sala Ofilikpamɛ ôsime kɛlɛ kɛ ɔcʉmbʉlʉ ɔna.. 6Sakalia nɛ Ɛlɛsabet ɔ̂lɛ vɛnʉl vasɛɛvɛ kɛ isi kɛɛ Ofilikpamɛ. Ɔlʉŋwa vobe nɛ vɛnalɛvɛ yɛ Ofilikpamɛ wʉ ɔmɔ âkɔl vo iteni ga. 7Kpa ɔmɔ akol kɛ wanɛ masɛ ɔmɔɔ ga, kici yɛ Ɛlɛsabet âlɛ kɛlɛ ɛkɛm, vo omwem ɔkavɛlɛ kaka.
8Ife ɛmɔ Sakalia alɛ-yele ɔtʉmʉ ɔna ndalɛ ɔnʉl wʉ asala Ofilikpamɛ kɛ Ɛca, kici yɛ itumu ɛna ɛnɛ ɛlɛ-lɛ kɛ ɔtʉmʉ kɛ masaŋga ɔnawɔɔ. 9Ndalɛsɛ kâlɛ kɛlɛ iyeli yɛ vɛnʉl vɛ ɔsala, ɔcɔw Sakalia kɛlɛ kɛ ɛdʉ wʉ ányɔl kɛ Oci Wʉciaana Ɛyʉlʉ kɛ Ɛca iyɛ Ofilikpamɛ, nɛ ásɔŋ mɛgomu mɛ mɛyuŋgwe sɛva. 10Kɛ ɔkambɛlɛ wʉ asɔŋa mɛgomu, ɛyɛŋgɛ iyɛ ɛnʉlʉ icumwe kan ɔswaŋ kɛ mɛveli.
11Wʉ Sakalia âlɛ tɔ kɛ oci wʉ ɔsɔŋa mɛgomu, ɔzɛnda-gbalgbal wʉ Ofilikpamɛ asime kɛ nɔnʉn, alɛ ocoolena kɛ ayana wʉ oci wʉ ɔsɔŋa mɛgomu. 12Ɔkambɛlɛ wʉ Sakalia âyeni ɔn, anyiŋgil, ɛyʉlʉ ɛcia ɔn kaka. 13Kpa ɔzɛnda-gbalgbal wɔɔ akaŋɛ nɔnʉn ala, “Ɛyʉlʉ x-aciaa we ga Sakalia! Ofilikpamɛ ɔ̂ŋgwa mɛveli wuwu. Okeyi wuwu Ɛlɛsabet ámal we wanɛ wʉ ɔnʉmbʉsʉ, nɛ wʉ́ya ɔn ite wʉla Zɔnɛ. 14Áva we nɛ ɛsɛghɛ kɛboonaghɛ, nɛ vɛnʉl cɛŋ kpaa nɛ ɔ́sɛgha kici yɛ ɔ̂mal ɔn. 15Álɛ kɛlɛ ɔnʉmʉnʉl kɛ asi ayɛ Ofilikpamɛ. Ápel va mɛsɔlʉmʉ mɛmɔnɛmɔ matavanamɛ ga tutu. Mʉndʉ wʉ Ofilikpamɛ áyiv ɔn bem-bem sɛnɛ ɔ́mal ɔn. 16Áyel nɛ vɛnʉl vɛ Iselel cɛŋ ɔ́kɛlɛ-lʉŋwa Ɔkʉ Ofilikpamɛ ovo. 17Zɔnɛ álɛ nɛ ɔtavɛ nɛ mʉndʉ wʉ Ɛlazia. Ámbaa nɛ áza kɛ isi, bem-bem sɛnɛ Ɔkʉ Klais ásime. Áfiil asɛma ayɛ vɛziavɛ kɛ nɛ ɔvɔnʉ ovovu, nɛ ɔ́lɛ ndalɛ ɔnʉl ɔmɔɔ. Áyel nɛ vɛnʉl vatavanavɛ itoghu nɛ ɔ́yavɛlɛ, nɛ óhee itesena ndalɛ vɛnʉl vagel-gel. Asɔ, áyel nɛ vɛnʉl vɛ Ofilikpamɛ ɔ́malɛ ɛyɛma ivo sɛva-sɛva, nɛ ɔ́kʉla ɔnʉ.”
18Sakalia âfii ɔzɛnda-gbalgbal wɔɔ ala, “Naa nɛ mácil mɛla kiyee káyel ase? Mawʉ kɛlɛ ɔnʉl wʉkavɛlana, okeyi wamɛ kpaa âkavɛlɛ ye kaka.”
19Ɔzɛnda-gbalgbal akaŋɛ nɛ nɔnʉn ala, “Ɛmɛ kɛlɛ Gebili! Mɛcoolē kɛlɛ kɛ isi kɛɛ Ofilikpamɛ, ɔ̂tɛma mɛ ala mɛ̃tɔwʉ nawe, nɛ mɛ̃vɔlʉ we ɔtɛlɛ wʉsɛɛ wee. 20Kpa sɛ wʉgɔl ga asɔ, wáma-bɛ nɛ wʉ́vuu ɛmʉ ga, kaka nɛ vɛnalɛvɛ yee víyel. Vɛnalɛvɛ yee vɛ́va-lɛ cɛb kɛ ɔkalaka ɔna.”
21Ɛyɛŋgɛ iyɛ ɛnʉlʉ ɛ̂lɛ kɛ ɛkʉlana Sakalia, ɔyaaŋa ndalɛsɛ asivi kɛ Oci Wʉciaana Ɛyʉlʉ. 22Wʉ âsime, abɛ avuu ɛmʉ kɛ navo ga. Asɔ, ôcil ye ala âyen asanɛ ayɛ Ofilikpamɛ kini, kici yɛ âwindighe kɛlɛ avo kɛ navo ndalɛ ɛmama.
23Wʉ ɔkalaka ɔna wʉ ɔtʉmʉ kɛ Ɛca ôkule, akiil za kɛ ɔswaŋ. 24Kaca cɛŋ ga, okeyi ɔna Ɛlɛsabet akʉwa ifo, asime kɛ ɔswaŋ ga, kaka ivolu ɛtaŋɛn. 25Ɛlɛsabet akaŋɛ nɛ ɔmɛnɛ ɔna ala, “Ɔmanɛ kɛɛ Ofilikpamɛ oyel mɛ, káyel nɛ vɛnʉl óde iyelena mɛ icwe. Ɔ̂pɛsa mɛ alia kɛ asi.”
Ɔzɛnda-gbalgbal avɔl ndalɛsɛ vámal Zisɔs
26Wʉ Ɛlɛsabet âlɛ nɛ ifo ivolu ɛtalɛta, Ofilikpamɛ ɔtɛma Ɔzɛnda-gbalgbal wʉ agɔla Gebili wɔɔ kɛ ɔswaŋ wʉ Nazalet, kɛ ɛyaŋ iyɛ Galili, 27kɛ nɛ otule-okeyi wʉ ayav man nɛ ɔnʉmbʉsʉ ga. Otule-okeyi wee agɔla ite ala Malia. Âlɛ kɛ okeyi wʉ ɔnʉl wʉ agɔla ite ala Zosef âlambɛ. Zosef âlɛ kɛlɛ kɛ ɔcʉmbʉlʉ wʉ Devit. 28Ɔzɛnda-gbalgbal aza kɛ nɛ Malia, akaŋɛ nɔnʉn ala, “Makun ãlɛ nawe, owe wʉ Ofilikpamɛ ocowu cɛŋ. Ofilikpamɛ awʉ nawe.”
29Kaza Malia ɛyʉl kaka, afii ɔmɛnɛ ɔna ala, “Ɛtɛfanavɛ yɛ fɛna vɛ̃lɛ yee?” 30Kpa ɔzɛnda-gbalgbal akaŋɛ nɔnʉn ala, “Ɛyʉlʉ x-aciaa we ga Malia, kici yɛ kâsɛva Ofilikpamɛ nawe. 31Wámal wanɛ wʉ ɔnʉmbʉsʉ, nɛ wʉ́ya ɔn ite wʉla Zisɔs. 32Álɛ kɛlɛ ɔnʉmʉnʉl, nɛ ɔ́yɛla ɔn ala Wanɛ wʉ Ofilikpamɛ wʉ obo ofo. Ɔkʉ Ofilikpamɛ óyel ɔn mɛfʉwa, ndalɛ ɛziavɛ ɔna wʉkʉ Devit. 33Álɛ mɛfʉwa wʉ kɛ ɔcʉmbʉlʉ wʉ Ziakɔb kpem-kpem, ɔtʉlʉ ɔnavɛ vákule ga.”
34Malia afii ɔzɛnda-gbalgbal wɔɔ ala, “Káyel kɛlɛ naa, sɛnɛ kiyee káyel? Mawʉ kɛlɛ otule-okeyi, mɛ̂yav man nɛ ɔnʉmbʉsʉ ga.”
35Ɔzɛnda-gbalgbal wɔɔ akaŋɛ nɔnʉn ala, “Mʉndʉ wʉ Ofilikpamɛ áva kɛ nawe, nɛ ɔtavɛ vɛ Ofilikpamɛ wʉ obo ofo nɛ ócile we. Asɔ, wanɛ wʉ wámal wɔɔ, álɛ nɛ ɛcɔcɔɔ ga, nɛ ɔ́yɛla ɔn ala, Wanɛ wʉ Ofilikpamɛ. 36Wanɛŋgwan wuwu Ɛlɛsabet wʉ vɛnʉl ala ábɛ nɛ ámal ga, âkʉwa wanɛ wʉ ɔnʉmbʉsʉ ivolu ɛtalɛta aŋgiee, masɛ akavɛlɛ ye asɔ. 37Ɔmanɛ akɛ kɛɛ afo Ofilikpamɛ ga.”
38Malia akaŋɛ ala, “Mawʉ kɛlɛ ɔnʉl wʉ ɔtʉmʉ wʉ Ofilikpamɛ, kãlɛ kan namɛ ndalɛsɛ wʉkaŋɛ.” Saŋ ɔzɛnda-gbalgbal wɔɔ asɛɛl ɔn, amʉwa.
Malia aza Ɛlɛsabet ozindi
39Kayele sigh ga, Malia aza ŋgʉla-ŋgʉla kɛ ɔswaŋ wʉ ɔ̂lɛ kɛ ɛyaŋ iyɛ Zudiya. Ɔswaŋɛ wɔɔ ɔ̂lɛ kɛ ɔgʉ ɛswa. 40Anyɔl kɛ itimbe iyɛ Sakalia, atɛfa Ɛlɛsabet. 41Wʉ Ɛlɛsabet âŋgwa sɛ Malia atɛfa ɔn, wanɛ asuwe nɛ ɔtavɛ kɛ ɔcɔlʉ ɔna. Mʉndʉ wʉ Ofilikpamɛ ayiv Ɛlɛsabet, 42Ɛlɛsabet atɔw kɛ ɛmʉ iyɛboona ala, “Vicowenavɛ ayɛ nawe vîfo okevi omwem, vicowenavɛ ayɛ kpaa nɛ wanɛ wʉ wámal. 43Kɛlɛ ini ɛnɛ ɔmanɛ kaboonaghɛ kiyee kayel kan namɛ ala, ɛŋgwan wʉ Ɔkʉ wamɛ âva kan namɛ? 44Sɛ mɛŋgwa ɛtɛfanavɛ yumbuvu ase, wanɛ wʉ kɛ ɔcɔlʉ ɔwamɛ âsɛgha ndalɛsɛ asuwe nɛ ɔtavɛ. 45Vicowenavɛ ayɛ kɛ nawe wʉ wʉwa ɛsɛma wʉla, ɔmanɛ kɛɛ Ofilikpamɛ ɔvɔl we káva-lɛ cɛb.”
Ɛciamɛ iyɛ Malia acivili Ofilikpamɛ
46Malia akaŋɛ ala,
“Mɛcivili Ɔkʉ Ofilikpamɛ nɛ ɛsɛma ɛyamɛ imem,
47mʉndʉ wamɛ asɛgha Ofilikpamɛ wʉ ɔwal mɛ,
48kici yɛ ɔ̂wa ɛkʉ
nɛ ɔnʉl ɔna wʉ ɔtʉmʉ wʉ apɛma ɔmɛnɛ ɔna ɛyaŋ.
Hee aŋgiee za kɛ isi, vɛnʉl omwem váyɛla mɛ ala ɔnʉl wʉ Ofilikpamɛ ocowu,
49kici yɛ ɔnʉ wʉ ofo ɔtavɛ ôyel vɛnalɛvɛ yɛboonavɛ kan namɛ.
Ɛcɔcɔɔ ayɛ kɛ nɔnʉnʉ ga.
50Ɔkɔlā isonu kɛ nɛ vɛnʉl vɛ ɔciaa ɔnʉ
kɛ ɛyaŋgɛghɛ nɛ ɛyaŋgɛghɛ.
51Ôyel vɛnalɛvɛ yɛboonavɛ nɛ ɔtavɛ ɔnavɛ.
Ɔ̂tas vɛnʉl vɛ ɔlɛ nɛ mates wʉ ikulu kɛ asɛma avo.
52Ôsimi mɛfʉwa vaboonavɛ kɛ vɛkɔn ivovu,
kpa ôkond vɛnʉl vɛ ɔvɛl ɛmɛnɛ ivo ɛyaŋ.
53Ɔnaā vɛnʉl vɛ ɔlɛ nɛ izonu vɛnalɛvɛ yɛsɛvanavɛ,
kpa ɔkʉŋgʉsʉ vɛnʉl vɛ ɔlɛ nɛ ɛŋgɔl avovo.
54Ôkpend vɛnʉl ɔnavɛ vɛ ɔtʉmʉ, Iselel.
Ɔ̂pɛma okes-anyɛ ɔna kɛ akɔlʉ-isonu ana kɛ navo.
55Ôyel okes-anyɛ wɔɔ nɛ Abɛlaham, ɛziavɛ wasɛ wʉkʉ, nɛ ɔcʉmbʉlʉ ɔna kpem-kpem.”
56Malia âca kɛ nɛ Ɛlɛsabet masɛ ivolu ɛtaalɛ, saŋ akiil za kɛ ɔswaŋ ɔna.
Kɛlɛ ase ɛnɛ ɔ̂malɛ Zɔnɛ wʉ abaptaisa vɛnʉl
57Wʉ ɔkalaka ôbi wʉ Ɛlɛsabet ámal wanɛ ɔna, amal wanɛ wʉ ɔnʉmbʉsʉ. 58Vɛnʉl vɛ ɔcaa kpʉmbɛlaŋ fɛ nɔnʉn nɛ ɔvɔnɛŋgwanɛ ɔnavɛ, ɔŋgwa ndalɛsɛ Ofilikpamɛ ɔkɔl isonu kɛ nɔnʉn cɛŋ, vo kpaa ɔsɛgha ɔlʉŋgʉ nɔnʉn.
59Wʉ afe âbi anyieni, vɛnʉl ɔva ndalɛsɛ vácɛŋg wanɛ ɔnawɔɔ. Ôtese ala váya ɔn ite ala Sakalia, ndalɛ ɛziavɛ ɔna. 60Kpa ɛŋgwan ɔna Ɛlɛsabet atɛna navo ala, “Cioow! Váyɛla ɔn kɛlɛ ala Zɔnɛ.”
61Ɔkaŋɛ nɔnʉn ala, “Ɔnʉl ɔmɔɔ âgɔl man ite iyɔɔ kɛ itumu iyunu ga.”
62Saŋ owindigh ɛziavɛ ɔna kɛ avo, ndalɛsɛ vácil ite iyɛ aliye ala ɔn áya wanɛ ɔnawɔɔ. 63Afii ala ɔ̃na ɔn ɔkpandɛ wʉsaŋgana, asaŋgɛ ala, “Ite ɛna ala Zɔnɛ.” Ɛyʉlʉ ɛcia ɔmɔnɛmɔ. 64Saŋ ɛpʉmb, uno ɔna ovuu, ahee ɛtɔwana nɛ icivilena Ofilikpamɛ. 65Vɛnʉl omwem vɛ ɔcaa kpʉmbɛlaŋ fɛ navo ɔyaaŋɛ, ɛyʉlʉ ɛcia vo kaka kɛ ɔmanɛmanɛ kɛɛ âyeli. Oci ɔmɔnɛmɔ kɛ ɔgʉ wʉ Zudiya kɛ ɛswa, vɛnʉl ɔlɛ ɔtɔwʉ-tɔwʉ kɛ ɛnalɛ yee vimem. 66Ɔnʉl ɔmɔnɛmɔ wʉ âŋgwa vɛnalɛvɛ yee ayaaŋɛ kɛ otu ɔmanɛ wee. Ofii ala, “Otu ɔnʉlʉ wʉ fɛna ɛnɛ wanɛ wee ife áva-lɛ?” Ofii asɔ kici yɛ vɛnʉl ocil ala Ofilikpamɛ awʉ nɔnʉn.
Sakalia acivili Ofilikpamɛ
67Mʉndʉ wʉ Ofilikpamɛ âyivi ɛziavɛ ɔna Sakalia, ahee ɛvɔlana ɔtɛlɛ wʉ Ofilikpamɛ ɔ̂taghɛ kɛ nɔnʉn. Akaŋɛ ala,
68“Icivili ɛ̃lɛ kɛ nɛ Ɔkʉ, Ofilikpamɛ wʉ Iselel,
kici yɛ ɔ̂va-kpend vɛnʉl ɔnavɛ, ɛnɛ ɔwal vo.
69Ɔ̂na asu awal wʉtavana, kɛ ɔcʉmbʉlʉ wʉ ɔnʉl ɔna wʉ ɔtʉmʉ, Devit.
70Ɔ̂vɔlʉ tɛla-tɛla kɛ ino iyɛ vɛnʉl vɛ ɔtɔwa kici ɛna vɛ ɔcɔw,
71ala ɔnʉ ɔ́wal asu kɛ avo ayɛ iŋmeŋi ɛyasɛ
nɛ kɛ avo ayɛ vɛnʉl omwem vɛ ɔcɔna asu.
72Ɔ̂vɔlʉ kpaa ala, ɔnʉ ɔ́lɛ nɛ akɔlʉ-isonu kɛ nɛ vɛziavɛ vasɛvɛ vakʉ,
ɔnʉ ɔpɛma okes-anyɛ ɔna wʉtavana kɛ navo.
73Ôyeli okes-anyɛ wee nɛ ɛziavɛ wasɛ Abɛlaham kɛ ite ɛna
74ala, ɔnʉ ɔ́wal asu kɛ avo ayɛ iŋmeŋi ɛyasɛ, ndalɛsɛ sácivili ɔnʉ nɛ ɛciacialɛ ga,
75nɛ sɛ́lɛ vɛnʉl vagel-gel vɛ oyele ɔmanɛ kɛɛ Ofilikpamɛ olii kɛ afe amem ayɛ sálɛ fan ɔtalɛ wee.
76Owe wanɛ wamɛ, váyɛla we ala Ɔn wʉ atɔwa kici yɛ Ofilikpamɛ wʉ obo ofo,
kici yɛ wáza kɛ isi, nɛ wʉ́malɛ ɔn ɔwaa.
77Kɛlɛ owe ɛnɛ wáte vɛnʉl vɛ Ofilikpamɛ wʉla,
Ofilikpamɛ ógife vo ɛcɔcɔɔ iyɛ oyel, saŋ nɛ ɔ́wal vo.
78Kici yɛ isonu-kɔlʉ nɛ ateŋg wʉ Ofilikpamɛ ɔwasɛ,
ɔ́tɛma ɔnʉl wʉ áwal asu
wʉ álɛ ndalɛ ɛyaŋgɛ yɛ isime kɛ ago,
79nɛ ɛ́yam kɛ vɛnʉl vɛ ɔlɛ kɛ oyindenavɛ,
nɛ vɛ ɔlɛ kɛ anyɛ ayɛ oku,
ɔ́wand akasɛ ayasɛ kɛ ɔwa wʉ makun.”
80Saŋ wanɛ wee ânel kan ɛyʉl, nɛ ɔtavɛ kɛ mʉndʉ. Aca kɛ owemi kaka ife yɛ âsime gbaŋgaŋ, ahee iyelena ɔtʉmʉ ɔna kɛ nɛ vɛnʉl vɛ Iselel.
ప్రస్తుతం ఎంపిక చేయబడింది:
Luk 1: Iceve-Maci
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©️2024 Luke Initiative for Scripture Translation
