Mataafa Uumata 3
3
Akkima nama ajajama diishe
1Pinaana a Yaahiwwe Waaqa uume piisa oppa maaka, akatan falqoolayta. Maaka iskatteetase'e kaassade ka kide, “Hela Waaqa keeto luukkata qorosen pora dishima kara ca takka nefo akka addammini ishin dawre?” #kele 12:9; 20:2
2Iskatteetase ka ishi oorisse ka kiite, “Luukkata a qorosen pora dishima kara ca dama in ettaninna; 3ma xoori Waaqa ikide, ‘Luukata qoyroose pora a dishmati otantoppa cooti in daman umma quda nefo in kayan! Ataakkati ittootaneey.’”
4Maaka ka iskatteetaseti oorshe ka kide, “Pakkanna attootan. 5Waaqa wa malla asse ishina' kide, oto luukkata qoyroseti damtaneeyye, akka ildaassin panaman akka wa neeqa ka a paxaara upnaattan ka Waaqa pahanaattan qoota upo malla.”
6Iskatteetase akkima luukkata qoyroseti damta' paxaari ka ilta kela orra satinnitto ka ookuma akkatta orra xasannitto, akka koddite ete akkiteeyye, luukkatase oppa mittite ka damte ka diirtase' xaadi isheetta olli co kuli' daasse ikka dame. 7Ilda ishootta lakki piisa ka panamen. Ikka akkima lulleeti caan upnaaden. Ka haashsha qoyra takka hilteeta kidammoti olmina heddishen ka isi kamma' saapaden.
8Ete kalakalaawte, Attaami isho iskatteetaadi ka ete Yaahiwwe Waaqa qora Edeni karandesa annooyye kamantaadi dakayen. Ka oori qahen ka Yaahiwwe Waaqa turaayye qora Edeni kara' deddekaden. 9Yaahiwwe Waaqa ka Attaami hale ka kide, “Attaami ayshaayye' kitta?”
10Attaami ka kide, “A' qora karan desa annitton nessaayti dakaye ka qootan lulleeti co malla fuure ka ke tura dekade.”
11Yaahiwwe ka ishi' kide, “Akka lulle kitto, ayno ke' lele? Hela qoyrase an ke' kide luukkataadi in damane' damte?”
12Attaami ka kide, “Iskatteetase a akka ana olli kallaatto ana' daasse, isheetta luukkata qoyroseti ana' daashe anka dame.”
13Yaahiwwe Waaqa ka iskatteetase kaassade ka kide, “Ata ini maana' koote?” Iskatteetase ka oorisse ka kiite, “Maaka ana sassapade anka dame.” #Qoro 2ta 11:3; Timo 1ta 2:14
Waaqa opa Attaami qara'e farate
14Yaahiwwe Waaqa ka maaka' kide,
“Qoota sede koote malla, pinaana piita qara ca oppaayye a jiijame' koddita.
Awwe desa piitan desa karittan titmatta ka
haka' kittooyye piita damta.
15Otantaayti ka a iskatteetoseti ka otanta sanynyeetaayti ka a sanynyeetaadi oppa'en paarkaallummaata koda.
Isha mattaayti oppa tuma
atti ka kamdaadi qomta.” #kele 12:17
16Ikka iskatteetaseti' kide,
“Oto inna hittooyye, rakkootan ke qara' koopsha
akka surumtan xaayta;
a koddito ma diirtaayti olliiyyi kallaattaawwe' jaalatta isha ka ke muksha.” #3:16 Ke muksha isha ke olli kallaata jaalada kideeta.
17Ka Attaami' kide,
“Atti dehaamta iskatteetaayti'i' dakayte ka qoyra an damta ke dawre damteey,
ke miidda malla piita a jiijamte a koddito.
haka' kittooyye,
yaalanne piita qara damta. #Ip 6:8
18Piita ke malla qeeyya ka miissa dehissa.
Akka wa aylatte' damta.
19Haka piisse a oppa uumamte oppopa oorritto kara'e,
dititaayti' damta.
Piitoppaayye' deeteey,
piitoppopaawwe' oorta.”
20Attaami iskatteetaadi qoota aayya a uumata piisa' koddite malla, “Hewaani” kide ka maxxa isheetta' kode. 21Yaahiwwe Waaqa koka ohaata' kode ka Attaami isho iskatteetaadi quda' uwwishe.
Waaqa Attaami ka Hewaani Kenneti oppaayye daane
22Sekkammaayye Yaahiwwe Waaqa ka kide, “Amma i'akkitene! Attaami ino mina'ew wa a neeqa ka a paxaara upnaade. Amma nefo oton qoyroose caatta daanno damaayye in to'ooy, akka qoyroose caatta daanno in dammin ka haka paraparati in kallaannini'i, a qara dawramto.” #kele 22:14 23Semmalla nama akka piitase a oppa de'e aylado'e, Yaahiwwe Waaqa ka Kennetippaayye ishootta sookshe. 24Waaqa Poqalla ka oori Attaami kamma daane. Akka nama qoyroose a caatta kapa in kaynini'i, Waaqa erkampattowwa a Kirupeeli kidamma ka koraateta a apitta' mina opaynitto ka kara kakkallitto eenna Kennetiti qinda piirtotatin xaaye ikka tooytini.
ప్రస్తుతం ఎంపిక చేయబడింది:
Mataafa Uumata 3: MaQu
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
