Luke 24
24
Weyjey
(Matthew 28:1–10; Mark 16:1–8; John 20:1–10)
1Nángtong saal rangnapkha tho, miqnu tang máang bungching náng Jesu hanphung o atim angam kacha shingta tha jikkot ma kata. 2Ning aa máang bungching kalung phang wang long tha thitchol sey ang atha khita. 3Req ning tha máang bungching mong náng wangta; etharin eshina ning aa Teyhungwa Jesu máang tha kap moq angta. 4Ning rapney tungnung atho wani khatpung sam eq ning rel o thok langta. 5Rapney cho eq miqnu tang tha haqna rong bonta, etha ang atho ethi wani aa ning thima batta, “Nim aa chamlang ma atharang miq tha amáang tang katang o bi inn? 6Piq iro ahung; piq ulun sey angta. Piq aa Galilee na nim ma chamta batta phin thi tasik inn. 7‘Miqna Sa sha ngarey miqtang jakna bólq o tatik ma kot chak na, etho saltom o piq wey jey angna.’”
8Etho eshi miqnu tang aa piq raaq tang sha wey tasik ta. 9Etho máang bungching wang wey wel eq, ujiphantey wa asi washey etho adak miqtang thima iri thaji raaq tang raa batta. 10Eshi miqnu tang tha, Mary Magdalene, Joanna etho James nu Mary angta; ning etho adak miqnu tang bara ning jamna angta tang tha rum eq iri raaq tang raa apostle tang thima batta. 11Etharin eshi miqnu tang aa chamta batta tang sha ajat raaq ta apostle tang aa tathinta etho ning aa hanmoq angta. 12Etharin Peter tha tunshat eq máang bungching thináng jol eq kata; piq eshináng ka eq bon eq siin atho esho qhatpung khat chen tashing atha kap khita etho adak chamtho ahung angta. Ethi jio piq chamlang angta thima rapney patja eq him náng welta.
Emmaus lam na qhing
(Mark 16:12,13)
13Eshi saal o Jesu ujiphantey wani tha Emmaus ta ashey qhim thináng kata, bara Jerusalem wang asi ashey phalong tan alo angta. 14Etho lamna ningni chamlang angta tha wantit ta. 15Etho ningni ethi raaq tha wan tit kachey atho, Jesu tho ningni rel o ka eq ningni jamoq rok qhingta. 16Ningni aa piq tha ukhi eq ta etharin sing moq angta. 17Jesu aa ningni thima batta, “Nim ni chamlang raaq wan eq qhingchey shin?”
Ningni tánglang atho tin rapney shit ta. 18Ningni wang ashey, bara Cleopas ta miingta they pitta, “Thaney nap aa Jerusalem na chamlang ang chey atha sammoq tey winwa nang raa hun i?”
19Jesu aa pitta, “Chamlang angta?”
Ningni aa batta, “Nazareth wang Jesu ma chamlang angta tha. Eshi miq tha ashey rangsamal angta, etho Shkewa nia miqtang jakho na piq aa chamta batta etho chamlang somlo ta, eshi tang thaji tha tarong angta. 20Í ajong tingwa tang etho jaktáng o shingtey tang aa piq tha lo eq tatik ma kotta etho bólq o botta. 21Í aa tungmang ti piq aa Israel miqtang raa thalun na! Etharin iritang angta tha thaney wang saltom sey. 22Etho íjamoq tongtey chamtey miqnu tang aa í tapatja taphi; ning thaney rangnap o máang bungching náng kata, 23piq máang tha eshina kap moq angta. Ning aa eshina rangkamwa tang chongta barey piq tha atharang ta ning ma batta etho ning tha thu eq iritang raa í ma batta. 24Í jaktung wang chamtey miqtang máang bung ching náng kata etho miqnu tang aa chamal batta thimal hun khita etho ning atho piq tha khimoq angta.”
25Jesu aa ning ma batta, “Nim ri chamtan ma thom inn, rangsamal tang aa chamlang ta batta phin tang tha itan karel eq han inn. 26Khristo tsamnang ang eq phun amun nang wang sha ang moq i?” 27Etho Asang likwit na Moses likwit wang phang ang eq rangsamal tang likwit nángduk piq tung araaq chamta witta tha Jesu aa ning ma jaqhal eq bat tan ta.
28Ning qhim náng uthok ko sey ang atho, Jesu tha anitom jakho náng weykat tey mal takhi ta; 29etharin ningni aa piq tha táng eq batta, “Rangpal angma sey ta; nang thaney aa íjamoq tongshing u.” Etho piq ning jamoq tong ma kata. 30Piq ning jamoq phaksat ma tong atho, piq aa banlo tha somta etho sunmaan ta raaq ta; etho piq aa banlo tha pin eq ning ma phal kotta. 31Etho ningni miik tha kalta etho ningni they piq tha sing ta, etharin piq tha rikla matwang ta. 32Ningni jaktung o wantit ta, “Piq lamna hiqni ma Asang likwit bat kotaphi tho hiqni tin na waljung aa thimal ang moq angta i?”
33Etho ningni kalo shat eq Jerusalem náng kata bari katang ro wa asi washey jiphantey tang adak miqtang jamoq rongtong ta, etho ning ni ning jamoq tachong ta. 34Etho ningni they batta, “Teyhungwa tha asing hun wey jey ta! Piq Simon jamoq tachong ta!”
35Etho ningni jamoq lamna chamlang angta tha thaji miqtang ma bat kota, etho ningni aa Teyhungwa banlo pin atho kapsing ta tha tho ubat eq ta.
Jesu ujiphantey tang jamoq tachong aa
(Matthew 28:16–20; Mark 16:14–18; John 20:19–23; Acts 1:6–8)
36Ujiphantey tang aa iri raaq raa batchey kamtho, rikla Jesu tha ning jaktung tho thu eq thok langta etho batta, “Nungmay cham tong inn.”
37Ning aa jungban tha khi i ta tathin eq rapney chota. 38Etharin piq aa ning ma batta, “Nim chamlang ma cho inn? Nim tinmong na iri tang nàn ri chamlang ma thupha? 39Ijak nia japha ri siin inn, ira nga hun. Tat lo eq siin phin, etho nim aa sam nin, chammatakoi ashey jungban tha nim aa khi inn thimal uráng nia ungam ahung.”
40Piq aa iri raaq raa bat eq ning ma ujak nia ujapha tha takhi ta. 41Ning aa ethi jio tho jin ruk han moq angta, ning rapney sungrang ta etho rong patja ta; iri rangma piq aa ning ma pitta, “Nim ching na phaksat ching atha i?” 42Ning aa piq ma ajang tashing aa ngaqsa ang aa thiwang pin eq kotta. 43Etho ngaqsa tha som eq ning rel o phak ta.
44Ethi jio, piq aa ning ma batta, “Nga nim jamoq tong taphang tok tho iri tang raa hun bat taphang: Moses thong na, rangsamal tang aa ka shingta eshina etho Psalms likdap na i tung aa raaq chamlang ta batta tang thaji tha asing ang ching.”
45Etho piq aa Asang likwit tha sam ma ning thung tha lakko ta. 46Etho ning ma batta, “Irimal taka ang aa, Khristo ma tsamnang ukap hun eq ching etho saltom o utik wang wey jey ang ching, 47etho Jerusalem wang phang ang eq thaji phan ma tin kaley etho ngarey wang tolchak phanchan piq miing o kotching. 48Nim raa iri tang ma miikkhi tey tang. 49Iwa chamlang ta rangtum shingta sha nga nim ching náng takat pha náng. Etharin aluk wang tarong nim ching náng thuwey moq ling nim aa Jerusalem o hun banching angna.”
Jesu tha mungtan náng sey wáng aa
(Mark 16:19,20; Acts 1:9–11)
50Etho piq aa ning tha ajong samhaq wang thalat eq Bethany ta miing aa thináng solkat ta, etho piq aa ujak tha tun eq ning ma sunmaan kotta. 51Piq aa ning ma sunmaan kot kam tho, piq tha ning jam thiwang tahang eq mungtan thináng tunsom chuwan ta. 52Ning aa piq tha shumnuk eq tin na rapney sungrang eq Jerusalem náng wey welta. 53Etho saltáng Shkewa thima kechu ajong kot eq Rangnuk him na tong ta.
ప్రస్తుతం ఎంపిక చేయబడింది:
Luke 24: Mmmm
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
CC BY-NC-ND 4.0
