Genesỳ 2
2
1Dia vita ny lanitra sy ny tany mbamin’izay rehetra ao aminy. 2Rehefa vitan’Andriamanitra ny asany, dia nitsahatra tamin’izay rehetra nataony Izy tamin’ny andro fahafito. 3Koa notahîn’Andriamanitra sady natokany ny andro fahafito satria io no nitsaharany tamin’ny asany rehetra maha mpahary Azy#2.3 Jereo Eks 20.11; Heb 4.4,10. . 4Izany no tantaran’ny lanitra sy ny tany tamin’ny naharian’Andriamanitra azy.
Ny zaridaina tao Hedena
Fony nanao ny tany sy ny lanitra ny TOMPO Andriamanitra, 5dia tsy mbola nisy kirihitra ny tany, ary tsy nisy ahitra nitsimoka akory, satria tsy mbola nampilatsaka orana tamin’ny tany ny TOMPO Andriamanitra ary tsy mbola nisy olombelona hiasa ny tany. 6Fa loharano nifantsitsitra avy tao amin’ny tany ihany no nanondraka ny velaran-tany manontolo.
7Ary vovoka avy amin’ny tany no nalain’ny TOMPO Andriamanitra, ka nanamboarany olombelona anankiray. Nitsofany fofonaina mahavelona tao am-bavorony, dia tonga manana aina raolombelona. 8Avy eo dia novolen’ny TOMPO Andriamanitra zaridaina tao Hedena, tany atsinanana, mba hametrahany an-draolombelona izay namboariny. 9Nampaniry karazan-kazo tsara tarehy fihinam-boa teo amin’ny tany ny TOMPO Andriamanitra, ka nataony teo afovoan’ny zaridaina ny hazon’aina sy ny hazo fahalalana ny tsara sy ny ratsy#2.9 hazon’aina: ampit Apôk 2.7; 22.2-14. –fahalalana ny tsara sy ny ratsy: dkt hafa ahalalana ny zavatra rehetra (tahaka izany koa ny and 17 sy ny 3.5-22)..
10Ary nisy ony iray nivoaka avy tao Hedena ka nanondraka ny zaridaina. Hatreo izy no nizara ho sampana efatra. 11I Pisôna no anaran’ny sampan-drano voalohany; io no manodidina ny tany Havilà manontolo izay misy ny volamena, 12ary tsara ny volamena tamin’io tany io; tao koa ny ditin-kazo mani-pofona sy ny vatosoa. 13I Gihôna no anaran’ny sampan-drano faharoa, izay manodidina ny tany Kosy #2.13 ny tany Kosy dia heverin’ny sasany fa any Mezôpôtamia. Ny hafa kosa dia mihevitra azy io ho faritany iray any atsimon’i Ejipta (Sodàna na Etiôpia). manontolo. 14I Tigra no anaran’ny sampan-drano fahatelo mandalo any atsinanan’i Asiria. Ary i Eofrata no anaran’ny sampan-drano fahefatra. 15Ary nalain’ny TOMPO Andriamanitra raolombelona ka napetrany tao amin’ny zaridainan’i Hedena mba hanolokolo sy hitandrina azy. 16Ary IZY nandidy an-draolombelona hoe: «Azonao ihinanana avokoa ny voa avy amin’ny hazo rehetra ao amin’ny zaridaina; 17afa-tsy ny avy amin’ny hazo fahalalàna ny tsara sy ny ratsy, satria amin’ny andro izay hihinananao azy dia ho faty tokoa ianao.»
18Dia hoy ny TOMPO Andriamanitra hoe: «Tsy tsara raha irery raolombelona, fa aoka hanaovako mpanampy sahaza azy izy.» 19Tany no nanaovan’ny TOMPO Andriamanitra ny karazam-bibidia sy voro-manidina rehetra, ka dia nentiny teo amin-draolombelona ireny hahitany izay anarana hiantsoany azy. Ary dia izay hanononan-dralehilahy azy no ho anarany. 20Dia nomen-draolombelona anarana ny biby fiompy rehetra sy ny voro-manidina rehetra ary ny bibidia rehetra, kanefa tsy hitany izay mpanampy sahaza azy. 21Ary ny TOMPO Andriamanitra nahatonga an-draolombelona ho sondrian-tory sy ho renoka, dia nalainy ny taolana iray tamin’ny tehezany ka nosoloany nofo. 22Izany taolan-tehezana nalainy tamin-draolombelona izany no namboarin’ny TOMPO Andriamanitra ho vehivavy izay nentiny teo amin-draolombelona. 23Tamin’izay dia hoy raolombelona hoe: «Ity ahay mba mitovy amiko, fa taolana avy amin’ny taolako ity sady nofo avy amin’ny nofoko; hatao hoe vehivavy ity, satria lehilahy no nanalana azy#2.23 vehivavy ity, satria lehilahy no nanalana azy: ny teny hebreo ishah (vehivavy) dia misy itoviana akaiky amin’ny ish (lehilahy) fa ny ah fotsiny no mampiavaka azy..» 24Izany no handaozan’ny lehilahy ny rainy sy ny reniny ka hifikirany amin’ny vadiny, ary hanjary tena iray ihany izy roa#2.24 Jereo Mt 19.5; Mk 10.7-8; 1Kôr 6.16; Ef 5.31..
25Ary nitanjaka ny lehilahy sy ny vadiny nefa tsy nahalala henatra.
ప్రస్తుతం ఎంపిక చేయబడింది:
Genesỳ 2: DIEMDC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Dikanteny Iombonana Eto Madagasikara © Malagasy Bible Society, 2004.
