Pin'ilʋg 9
9
Wina'am maal nɔnaar nɛ Noa si'em
1Ka Wina'am niŋ Noa nɛ o biis la bareka ka yɛli ba ye, “Du'ami ka nɔbigi pɛ'ɛli teŋgbauŋ la. 2Bʋnkɔnbid wʋsa na zɔɔ ya dabiem, bʋnkɔnbid nɛ niis nɛ zimi nɛ banɛ vuud teŋin la wʋsa, bɔzugɔ m nɔki ba niŋi ya nu'usin, 3ye ba an diibi tisi ya. Nwɛnɛ man da tisi ya zʋʋd wʋsa ye ya dit si'em la, ala mɛn ka m tisi ya si'el wʋsa. 4Amaa mid ka ya ɔnbi ni'im kanɛ ka li ziim nan kpɛm bɛɛ li ni. 5Sɔ' ya'a kʋʋ o tiraan, m na kʋʋs o sɔba bɛ'ɛd; li ya'a an bʋnkɔnbʋgʋ kʋ ninsaal, bɛɛ o ninsaal tiraan ya'a kʋʋ o, mam na kad o saria kʋʋs o bɛ'ɛd. 6Ka on mɛkama kʋʋ o tiraan, ba mɛ na kʋʋ o; bɔzugɔ Wina'am maali ba ka ba nwɛnɛ o mɛŋ nɛ. 7Amaa ya'a anɛ fʋn Noa nɛ fʋ biis la, du'ami ka nɔbigi pɛ'ɛli dunia la.”
8Wina'am da lɛn yɛl Noa nɛ o biis la ye, 9“M yʋ'ʋn maal nɔnaar nɛ yanam nɛ ya yaas banɛ na dɔlli ya nya'aŋ, 10nɛ bʋnvʋr wʋsa banɛ bɛɛ ya san'an; niimis banɛ bɛ agɔl nɛ bʋnvʋya banɛ bɛ teŋin nɛ zimi banɛ bɛ atɛukʋn nɛ bʋnkɔnbid wʋsa banɛ yi anrʋŋʋn nwa' na la. 11M maal nɔnaar la nɛ ya ye ku'om kʋ lɛn san'am bʋnvʋr wʋsa bɛɛ teŋgbauŋ ya'asɛ.”
12Ka Wina'am lɛn yɛli ba ye, “M nɔnaar la zanbinnɛ nwa', linɛ na pa'al ye nɔnaar bɛ man nɛ yanam nɛ bʋnkɔnbid banɛ bɛɛ ya san'an la wʋsa ni. Nɔnaar kaŋa na kpɛm bɛɛ tis dunia wʋsa saŋa linɛ ka' naarɛ. 13M na maal dindɛog bɔɔnlim niŋ saŋgbauŋin ka li na an m nɔnaar la zanbinnɛ tis man nɛ ya yaas banɛ na bɛ teŋgbauŋʋn la. 14M ya'a ti kɛ ka saŋgbana yina ka dindɛog buoɛn, 15li na kɛ ka m tiɛn nɔnaar kanɛ bɛ man nɛ ninsaal nɛ bʋnkɔnbid wʋsa sʋʋgin la yɛla, ka m kʋ lɛm maligim kɛ ka ku'om san'am dunia bʋnvʋya la ya'asɛ. 16Saŋa kan wʋsa ka dindɛog buoɛn saŋgbana ni, m na nyɛɛ li ka tiɛn m nɔnaar kanɛ bɛ man nɛ ninsaal sʋʋgin la yɛla, ka li na bɛ saŋa linɛ ka' naarɛ.” 17Ka Wina'am lɛn yɛl Noa ye, “Nɛ'ɛŋa sid an m nɔnaar la zanbin, linɛ bɛ man nɛ dunia bʋnvʋr wʋsa sʋʋgin.” 18Noa biribis banɛ da yi anrʋŋʋn la na da anɛ Sem, nɛ Ham, nɛ Jafet (Ham dɔɔg anɛ Keenan dim). 19Li yinɛ Noa biis atan' nwa' ni na ka nidib yadigi tiig dunia la wʋsa.
Noa maal daam nuu kʋʋl la yɛla
20Noa da anɛ kpaad ka da dɛŋi sɛ vain #9:20 Ba anɛ tibanɛ ka ba nwiasidi ba wala maan daam. tiis. 21O da maal tiwala la daam ka nuu kʋʋl ka kpɛn' o dɔɔgin yɛɛg o fuud ka dig biel. 22Lin saŋa ka Ham onɛ da an Keenan saam la da kpɛn' nyɛɛ o saam nyan ka yina yɛl o bieya. 23Ka Sem nɛ Jafet da nɔk fuugʋ fɛndigi ba nindaa keŋ tutula kpɛn' dɔɔgin la pili ba saam la, ka pʋ gɔsi o nyannɛ. 24Ka Noa da nie gbɛɛmin ka ti baŋ o bikpaanr Ham niŋ o si'em la, 25ka pɔ nɔɔrɛ niŋ o ye,
“Kʋʋsbɛ'ɛd bɛ Keenan zug!
O na an yammʋgʋ tis o bieyanam,
Hali ka lieb tʋmtʋmi tisi ba sankpan'asnam!
26Wina'am bareka na bɛ Sem zug,
Keenan na aan o sankpan'as!
27Wina'am na kɛ ka Jafet#9:27 Hibiru dimi buon Jafet si'em anɛ “Paasʋg.” sʋ'ʋlim la yalig,
Ka on nɛ o bier Sem na la'am bɛ,
Keenan mɛ na aan o sankpan'as.”
28Ku'om da di dunia la li nya'aŋ, Noa da nan kpɛn vʋe yʋma kɔbistan' nɛ pisnu (350). 29Noa yʋma da anɛ kɔbiswai nɛ pisnu (950) ka nyaan kpi.
ప్రస్తుతం ఎంపిక చేయబడింది:
Pin'ilʋg 9: kus_gh
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023, Ghana Institute of Linguistics, Literacy and Bible Translation
