Pin'ilʋg 5
5
Adam yaas yɛla
(1Yɛ 1:1-4)
1Nwa' pa'an Adam yaas yɛla.
Wina'am da maal ninsaal la, o da maal o ka o nwɛnɛ o mɛŋ nɛ. 2O da maalnɛ dau nɛ pu'a, ka niŋi ba bareka ka buoli ba ye ninsaalib. 3Adam da mɔri yʋma kɔbiga nɛ pistan' (130) ka du'a Set, ka biig la nwɛnɛ o mɛŋ nɛ. Ka o pʋd o yʋ'ʋr ye Set. 4Ka on da du'a Set nya'aŋ la, Adam da lɛn du'a biribis nɛ bipumis sieba n paas ka nan kpɛn vʋe yʋma kɔbisnii (800). 5Adam yʋma wʋsa da anɛ kɔbiswai nɛ pistan' (930) ka o nyaan kpi.
6Set n da paae yʋma kɔbiga nɛ anu (105) la, o da du'a o biig Enos. 7Ka on du'a Enos nya'aŋ la o da lɛn du'a biribis nɛ bipumis sieba n paas ka nan kpɛn vʋe yʋma kɔbisnii nɛ ayɔpɔi (807). 8Set yʋma wʋsa da anɛ kɔbiswai nɛ pii nɛ ayi' (912) ka o nyaan kpi.
9Enos n da paae yʋma piswai (90) la, o da du'a Kenan. 10Ka on du'a Kenan nya'aŋ la, o da lɛn du'a biribis nɛ bipumis sieba paas ka nan kpɛn vʋe yʋma kɔbisnii nɛ pii nɛ anu (815). 11Enos yʋma wʋsa da anɛ kɔbiswai nɛ anu (905) ka o nyaan kpi.
12Kenan n da paae yʋma pisyɔpɔi (70) la, o da du'a Mahalaleel. 13Ka on da du'a Mahalaleel nya'aŋ la, o da lɛn du'a biribis nɛ bipumis sieba paas ka nan kpɛn vʋe yʋma kɔbisnii nɛ pisnaasi (840). 14Kenan yʋma wʋsa da anɛ kɔbiswai nɛ piiga (910) ka o nyaan kpi.
15Mahalaleel n da paae yʋma pisyuobʋ nɛ anu (65) la, o da du'a Jared. 16Ka on da du'a Jared nya'aŋ la, o da lɛn du'a biribis nɛ bipumis sieba n paas ka nan kpɛn vʋe yʋma kɔbisnii nɛ pistan' (830). 17Mahalaleel yʋma wʋsa da anɛ kɔbisnii nɛ piswai nɛ anu (895) ka o nyaan kpi.
18Jared n da paae yʋma kɔbiga nɛ pisyuobʋ nɛ ayi' la (162), o da du'a Enok. 19Ka on du'a Enok nya'aŋ la, Jared da lɛn du'a biribis nɛ bipumis sieba paas ka nan kpɛn vʋe yʋma kɔbisnii (800). 20Jared yʋma wʋsa da anɛ kɔbiswai nɛ pisyuobʋ nɛ ayi' (962) ka o nyaan kpi.
21Enok da paae yʋma pisyuobʋ nɛ anu (65) ka da du'a Metusela. 22On da du'a Metusela nya'aŋ la, o da lɛn du'a biribis nɛ bipumis sieba paas. O da dɔl Wina'am suor sʋ'ʋŋa yʋma kɔbistan' (300) ya'as. 23Enok yʋma wʋsa da anɛ kɔbistan' nɛ pisyuobʋ nɛ anu (365). 24Enok da dɔl Wina'am suor sʋ'ʋŋa, ka li nya'aŋ ba pʋ lɛn nyɛɛ o, bɔzugɔ Wina'am da nɔk o.
25Metusela n da paae yʋma kɔbiga nɛ pisnii nɛ ayɔpɔi (187) la, o da du'a Lamek. 26Ka on da du'a Lamek nya'aŋ la, o da lɛn du'a biribis nɛ bipumis sieba paas ka nan kpɛn vʋe yʋma kɔbisyɔpɔi nɛ pisnii nɛ ayi' (782). 27Metusela yʋma wʋsa da anɛ kɔbiswai nɛ pisyuobʋ nɛ awai (969) ka o nyaan kpi.
28Lamek n da paae yʋma kɔbiga nɛ pisnii nɛ ayi' (182) la, o da du'a biribiŋ 29ka pʋd o yʋ'ʋr ye Noa,#5:29 Noa gbin nɛ Hibiru anɛ “vʋ'ʋsʋm” bɛɛ “yɔlsim.” ka yɛl ye, “Bikaŋa na bʋgʋli ti sʋʋnr nɛ namisʋg kanɛ ka ti nyɛt kuobin nɛ ti nu'us tʋʋma wʋsa ni, ka li yinɛ Wina'am da pɔ nɔɔri niŋ teŋ la.” 30Noa du'am la nya'aŋ la, Lamek da lɛn du'a biribis nɛ bipumis sieba paas ka nan kpɛn vʋe yʋma kɔbisnu nɛ piswai nɛ anu (595). 31Lamek yʋma wʋsa da anɛ kɔbisyɔpɔi nɛ pisyɔpɔi nɛ ayɔpɔi (777) ka o nyaan kpi.
32Noa n da paae yʋma kɔbisnu (500) la, o da du'a Sem nɛ Ham nɛ Jafet.
ప్రస్తుతం ఎంపిక చేయబడింది:
Pin'ilʋg 5: kus_gh
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023, Ghana Institute of Linguistics, Literacy and Bible Translation
