Pin'ilʋg 3
3
Tʋʋmbɛ'ɛd pin'ilʋg
1Waaf la da anɛ zam sɔb hali gaad bʋnkɔnbid banɛ wʋsa ka Zugsɔb Wina'am da maal la. O da bu'os pu'a la ye, “Li an sida ye Wina'am yɛl ye ya da di tisi'a wala lɔmbɔn'ɔg nwa' nii?” 2Ka pu'a la lɛbis waaf la ye, “Ti tun'e di tiwala lɔmbɔn'ɔg nwa' ni, 3amaa Wina'am ye ti mid ka ti di tikanɛ bɛ lɔmbɔn'ɔg la teŋsʋk la wala, ye ti pʋn da si'isi lii, ka ti ya'a niŋ ala ti na kpi.” 4Ka waaf la yɛl pu'a la ye, “Ayei! O ma'anɛ, ya kʋ kpii! 5Wina'am mi' ye ya ya'a di wala la ya nini na nie ka ya nwɛnɛ on Wina'am nɛ, ka mi' sʋm nɛ bɛ'ɛdi bakid.” 6Ka pu'a la da nyɛ ka tiig la wala an sʋm, nar nɛ diib ka lɛn vɛnli o nini ni, ka an linɛ na tis o baŋir la, o da pun'oe di ka zaŋ sieba tis o sid ka o mɛ di. 7Anina ka ba nini nie ka ba gɔsi nyɛ ka ba zi'e biel, ka ba ans kekaŋ vaandi maali sɔɔn lusi ba nyan.
8Zaam da ma'ae ka ba wʋm Zugsɔb Wina'am dammir lɔmbɔn'ɔgin la, ba da zɔɔ keŋ su'a tiis gbina ni. 9Ka Zugsɔb Wina'am buol dau la, ka ye, “Fʋ bɛ yaanɛ?” 10Ka o lɛbis ye, “M wʋmi fʋ dammir ka dabiem kpɛn'ɛm bɔzugɔ m pa'a anɛ biel, lin ka m su'a m mɛŋ.” 11Ka Wina'am lɛbis o ye, “Anɔ'ɔn yɛlif ye fʋ anɛ biellɛ? Fʋ maal bɔ? Fʋ zan'asi m nɔɔr nɛ ka di tikanɛ wala ka m daa kpa'asidif ye mid ka fʋ dii li la nɛ bɛɛ?” 12Ka dau la lɛbis ye, “Pu'a kan ka fʋ tisim la, onɛ tisim tiig la wal ka m di.” 13Ka Zugsɔb Wina'am yɛl pu'a la ye, “Bɔɔ kɛ ka fʋ maal ala?” Ka pu'a la ye, “Waaf la pan'asim ka m di.” 14Ka Zugsɔb Wina'am yɛl waaf la ye, “Fʋn maal nwa' la zug, kaanb bɛ'ɛd na bɛɛ fʋ zug bʋnkɔnbid buudi wʋsa sʋʋgin! Fʋ na vuudi fʋ pʋʋr zug, ka dit titan, hali ti paae fʋ nyɔvʋr bɛn. 15Ka dataadʋg na bɛ fʋn nɛ pu'a la sʋʋgin, ka lɛm bɛ fʋ biis nɛ pu'a la biis sʋʋgin. Ka o na mɛdigi fʋ zug ka fʋn mɛ na dum o nɔbkpansinkpan'ar.”
16Ka Zugsɔb Wina'am yɛl pu'a la ye, “Fʋ ya'a nɔk pʋʋg m na kɛ ka fʋ nyɛ tɔɔg hali fʋ du'am daar. Fʋ ya'a ti ye fʋ du'a biis, li na zabid hali, la'an nɛ wala fʋ ya'amlɛog na bɛɛ fʋ sid san'an, ka o mɛ sʋ'ʋf.”
17Ka Wina'am yɛl Dau la ye, “Fʋn siaki fʋ pu'a nɔɔr ka di tiwal kanɛ ka m digil nɔɔr ye fʋ da di la, kaanb bɛ'ɛd bɛ teŋ la zugʋ fʋ yɛla. Fʋ na namis hali ka paam diibi di, hali ti paae fʋ nyɔvʋr bɛn. 18Gɔn'ɔs nɛ mɔyaalis na yi teŋ la zug, ka fʋ na dit tiis wala nɛ mɔbiili. 19Ɔnsir na yiif ka fʋ nyaan paam diibi di, hali ti paae fʋn na lɛb teŋin daasi'er, bɔzugɔ li anɛ anina ka fʋ yina. Fʋ anɛ titan, ka na lɛb titanin.”
20Adam#3:20 Li gbin Hibiru ni anɛ ninsaalib. da pʋd o pu'a la yʋ'ʋr ye Hawa,#3:20 Li gbin anɛ vʋm. bɔzugɔ onɛ an saalib wʋsa ma. 21Ka Zugsɔb Wina'am nɔk bʋnkɔnbid gbana maal fuudi yɛɛl Adam nɛ o pu'a. 22#Nie 22:14 Ka Zugsɔb Wina'am yɛl ye, “Ninsaal la yʋ'ʋn nwɛnɛ tinam nɛ, ka mi' sʋm nɛ bɛ'ɛdi bakid. Li pʋ sʋ'ʋm ye o pun'oe nyɔvʋr tiig la wala di ka vʋe saŋa wʋsaa.” 23Ka Zugsɔb Wina'am kad o yis Eden lɔmbɔn'ɔgin la, ye o keŋ kua teŋgbauŋ kanɛ ka o yi la na. 24Ka o kad dau la yis ka kɛ ka Kerubnam sieba gur Eden lɔmbɔn'ɔg la za'anɔɔr. Ka zaŋ sʋ'ʋg dinɛ dit tuon nɛ nya'aŋ ka li ian'ad pil-pil ka giligid zin'ig la wʋsa gu'ud suor kanɛ ken nyɔvʋr tiigin la.
ప్రస్తుతం ఎంపిక చేయబడింది:
Pin'ilʋg 3: kus_gh
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023, Ghana Institute of Linguistics, Literacy and Bible Translation
