Matɨyo 7

Bɔyɛgɨŋ kɔl cay kamdɨgɨŋ naŋ

(Lug 6:37-38,41-42)

1«Bɔyɛgɨŋ kɔl cay kamdɨgɨŋ naŋ, ɗe Kumu kalɨn̰ ma bon̰ kɔl caygɨŋ naŋ bɨ. 2Leen̰ cɨndi, Kumu kɨya bɔyɛ kɔl a caygɨŋ hɨn̰ gɨ kɨŋ ba bon̰ kɔl a cay kamdɨgɨŋ wo̰ bɨ. Kan kɨya gɨse hɨnga bɨgɨŋ, na boy hɨnga ga kɨŋ gɨsɨn̰ hɨnga nee bɨn̰ kamdɨgɨŋ le bɨ. 3Kɨya wa ma mɨn̰ si tɨdɨn̰ solɨn̰ bugɗi hɛɗɨmɛ ga woy a cɨn̰ kurɨndɨn̰, ama ji sɨla te tabi di gumu di woy a tɨdɨn̰ naŋ ga? 4Kɛ na mɨna ma mɨn̰ gɨ yon̰ kurdɨn̰ hɨn̰: “Ɗaŋ aŋ dor bugɗi hɛɗɨmɛ ga woy a tɨdɨn̰”, ama ji-bandi kalɨn̰ ma, ji orɨn̰ dan̰ te tabi di gumu di woy a tɨdɨn̰ ga? 5Ji gɨ ba-yɔɔ-kɔl-kɨbɨn̰-sɔɔ-sɔɔ le, kuɗa gɨ ji dɨra sɨya gɨ gumu gɨ woy a tɨdɨn̰ an̰ solɨn̰ kɨɗɨn̰ kuɗa pa dɨm ma mɨn̰ da sol kɨɗɨn̰ kuɗa gɨ ni dorɨn̰ bugɗi hɛɗɨmɛ ga a ti kurɨndɨn̰ ƴee.

6«Kɨŋ ɗɔɔ ba dɨbe hɨnga ga woy dan̰ cɨndɨge bɨn̰ gaye naŋ bɨ, kɨŋ ɗɔɔ ba dɨbe mon̰ kogɨŋ dugo tumoy gɔsɨyɔŋn̰əŋ naŋ bɨ, naŋ na kan da ɗɔdɨrdɛ dugo bɨ, bɨləŋge caygɨŋ bɨ sagɨdɨgɨŋge bɨ.

Ɨngɨre hɨnga bɨ male hɨnga bɨ dɔgɛ kɨbɨ-ƴaa bɨ

(Lug 11:9-13)

7«Ɨngɨrgɨŋ hɨnga ga kɨŋ or n̰agedɨge cɨndɨgɨŋ tumɔ tumɔ na, kan kɨya bɨgɨŋ, malagɨŋ hɨnga ga kɨŋ or n̰agedɨge cɨndɨgɨŋ tumɔ tumɔ na, kɨŋ kɨya wɔɔ, dɨgagɨŋ kɨbɨ-ƴaa cɨndɨgɨŋ tumɔ tumɔ na, kan kɨya hangege bɨgɨŋ. 8Əw, waŋ waŋ gɨ na ɨngɨr hɨnga ga ban or n̰agedɨge na, Kumu kɨya bii, ban gɨ mal hɨnga ga ban or n̰agedɨge na, kɨya wɔɔ, ungo gɨ na dɨga kɨbɨ-ƴaa na, Kumu kɨya haŋge bii. 9Na waŋ duroygɨŋ ma hɨn̰ gɨ kɨyeyi na ɨngɨrii mapa na, kɨya aye oru bii ga? 10Naŋ le, na ɨngɨrii gusa na, kɨya aye kumbulo bii ga? 11Kɨŋ ga kuduroygɨŋ ɨsɨn kalɨn̰ ma, kɨŋ sol bɨn̰ karɨndɨgɨŋ hɨnga ga ɗari. Ma na mɨna ma Baygɨŋ gɨ som a daa nii, kɨya bɨn̰ kan ga ɨngɨriige hɨnga ga ɗari ɗɨn̰ ga nee le coŋ naŋ ga?

12«Hɨnga nɔm ga kɨŋ gey gɨ kalaŋ na laa danagɨŋ le, kɨŋ kalɨn̰ ma, laagɨŋ danage hɨn̰ wo̰ bɨ. Na ban ma na hɨnga ga gasɨn̰-kɔl gɨ da Moyis bɨ, ga da ka-yɔɔ-kɔl-gɨ-Kumu-ba-yɔɔ bɨ, gɨlnagɨŋge gɨ na na laagɨŋ.

Kɨbɨ-ƴaa gɨ sɛlgɛgɛ

(Lug 13:23-24)

13«Andaŋgɨŋ dan̰ kɨbɨ-ƴaa gɨ sɛlgɛgɛ gɨŋ. Kɨbɨ-ƴaa gɨ gumu na gɨyəŋ gɨ wol bəndəŋ bɨ, na gɨyəŋ gɨ orɨn̰ dan̰ kalaŋ na kɨɗɨn̰ mundoŋ gaŋ bɨ. Ama ka-ayedi kondɨge. 14Ama kɨbɨ-ƴaa gɨ sɛlgɛgɛ bɨ, gɨyəŋ gɨ jəngi bɨ le, kɨya orɨn̰ dan̰ kalaŋ na pɔɗɛ gɨŋ, ama ka-wɔɔdi na lagɨɗe wo̰.

Kɨradi kɔl gɨ da wɔɔdi hɨya

(Matɨyo 12:33; Lug 6:43-44)

15«Ɗagɨŋ muɗɔlɛ a cay gusɨgɨŋ gɨŋ kɨya cay kalaŋ ga ka-lɔɔ gusɨge loon̰ ka-yɔɔ-kɔl-gɨ-Kumu-ba-yɔɔ. Kan kɨya ɨrga gusɨgɨŋ dan̰ hurɔmɔ hɨn̰ karɨn̰ gamge wo̰, ama a kuduroyge na kan woyge na hɨn̰ gaye ga coŋ ga geyge dogɨŋ wo̰. 16Kɨŋ sol te hɨya na dan̰ wɔɔdi bɨ, kɨŋ sol ka-lɔɔ gɨye na dan̰ gɨye-lɔɔdɨge bɨ. Kɛ cay pɨna ungo ar suru a cay sɨləlɨm dɨŋ wala, ar tuguyɔŋ a cay gɨm gɨŋ hayi ga? 17Na hɨn̰ wo̰ ma, hɨya gɨ ɗari le kɨya wɔɔ wɔɔdi gɨ ɗari, ama hɨya gɨ ɨsɨn le kɨya wɔɔ wɔɔdi gɨ ɨsɨni bɨ. 18Hɨya gɨ ɗari le, kɨya ɓale wɔɔ wɔɔdi gɨ ɨsɨni naŋ bɨ, hɨya gɨ ɨsɨni le kɨya ɓale wɔɔ wɔɔdi gɨ ɗari naŋ bɨ. 19Hɨya nɔm gɨ wɔɔ wɔɔdi gɨ ɗari naŋ le, kan kɨya sɨrege dɨbege tɨwan̰ coŋ. 20Ɨni na, hɨn̰ gɨ kɨŋ ba sol hɨya na dan̰ wɔɔdi le, kɨŋ kɨya sɔlɛ kalaŋ ga nee le, na dan̰ gɨye-lɔɔdɨge bɨ.

Yɔɔ kɔl bɨ lɔɔ gɨye bɨ

(Lug 6:46; 13:27)

21«Na kalaŋ ga ka-tɔgɔŋge hɨn̰: “Ba-gulɔŋ, Ba-gulɔŋ!” Ba kɨya andaŋge nɔm boy dɔɔ-ƴaa di daa nii dɨŋ naŋ, ama na kan ga ka-lɔɔ hɨnga ga kuduroy Banɨ gɨ som a daa nii gey le ƴɔbɨ. 22Wɔlɛ gɨ ni bon̰ kɔl le, kondɨwadi kalaŋ kɨya tɔgɔŋge yɔ hɨn̰: “Ba-gulɔŋ, Ba-gulɔŋ!” Kɛ, ni ya-kɔl-gɨ-Kumu-ba-yɔɔ dan̰ gusondɨn̰ naŋ ga? Kɛ, ni taya turnɔn̰əŋ ga ɨsɨndəŋ dan̰ gusondɨn̰ naŋ ga? Kɛ, ni laa belin̰əŋ kunda dan̰ gusondɨn̰ naŋ ga?» 23Ɨni na, ɨŋ kɨya yoge daa waŋ hɨn̰: «“Ɨŋ sɨlagɨŋ naŋ bɨrɨŋ, ɨragɨŋ walaŋ sɛdɨ kɨbɨnɨ coŋ, kɨŋ ga ka-lɔɔ ɨsɨna!”

Kɨradi-kɔl gɨ ojɨ cay ƴaa ga sɔɔ

(Lug 6:47-49)

24«Na toy di hɨn̰ wo̰ ma, waŋ waŋ gɨ na ja kɔl hɨnge gɨ ɨŋ ba ye kɛ le bɨ, na aya laan̰ gɨye bɨ na, kɨya bɨle wɔyɛ na hɨn̰ ungo gɨ ba-cɨn̰-muɗɔlɛ gɨ gaɗɨ ƴaa toyi a cay garma gɨŋ. 25Kumu ongɨ bɨ, kaŋdi kuray buyoŋ ƴee kardi ƴaa bɨ, kal ye dan̰ togii tɔgɨ cay ƴaa gɨŋ bɨ, ama ƴaa le ba naŋ, kɨya gɨ ɗege tɔɔ na cay garma gɨŋ. 26Ama waŋ waŋ gɨ na ja kɔl hɨnge gɨ ɨŋ ba ye kɛ le bɨ na aya laan̰ gɨye naŋ na, kɨya bɨle wɔyɛ na hɨn̰ ungo gɨ ba-dɨngale gɨ gaɗɨ ƴaa toyi a cay kɨlay gɨŋ. 27Kumu ongɨ bɨ, kaŋdi kuray buyoŋ ƴee kardi ƴaa bɨ, kal ye dan̰ togii tɔgɨ cay ƴaa gɨŋ bɨ, ƴaa le dusoŋ bɨ, ba mundoŋ buɗɔg buɗɔg dugo coŋ.»

Dɔnɔ da Jesu

(Marg 1:22; Lug 4:32)

28Jesu gɨlɨn̰ kalaŋ hɨnga. Kɨɗɨn̰ ga ban dɨɗɨ kɨbɨ gɨle hɨnga kayi le coŋ ɨni na, gɨyəŋ gɨ ban gɨlɨn̰ kalaŋ hɨnga le dor turnoyge tɔgɨ. 29Kɨya gɨ ban gɨlge hɨnga na dan̰ dɔnɔ wala, wɨya na hɨn̰ gɨ da kalaŋ ka-gɨlɨn̰ kalaŋ gasɨn̰-kɔl gɨ da Moyis kage wo̰ naŋ.

ప్రస్తుతం ఎంపిక చేయబడింది:

Matɨyo 7: gab

హైలైట్

షేర్ చేయి

కాపీ