ꤗꤢ꤬ꤊꤢꤨ 8
8
ꤛꤢꤩ꤬ꤏꤛꤢꤨ ꤘꤣꤧꤢꤩ꤬ꤘꤣꤧꤥ꤭ ꤊꤣꤧ꤬ꤛꤢꤧ꤭ ꤜꤝꤤ꤭ꤚꤤ
(ꤗꤢꤞꤢꤧ ꤁꤅:꤃꤂-꤃꤉)
1ꤙꤣꤧꤔꤣꤧ꤬ ꤢ꤬ꤋꤢꤩ꤭ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ꤘꤢꤨ꤬ ꤘꤣ ꤢ꤬ꤚꤥ꤬ ꤒꤣ꤬ꤗꤢꤨ꤬ ꤟꤢꤧ꤭ꤥ꤬ꤕꤜꤢꤪꤥ꤬ꤕꤜꤢꤨ꤬ ꤊꤣꤧ꤭ ꤜꤢꤪ꤭ ꤜꤢ꤭ꤒꤢꤩ꤬ ꤜꤢꤨ꤭ ꤚꤣꤧ꤬ ꤛꤢꤩ꤬ꤞꤤ꤭ ꤜ꤫ꤢꤩ꤬ꤢꤩ꤬ꤜ꤫ꤢꤩ꤬ꤥ꤭ ꤜꤢꤪ꤭ꤊꤢꤧ꤭ ꤟꤣꤧ ꤚꤣꤧ꤬ ꤛꤢꤩ꤬ꤏꤛꤢꤨ ꤢꤩꤟꤢꤧ꤭ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤘꤣ ꤢ꤬ ꤥ꤬ ꤚꤣꤧ꤬ ꤢ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, 2“ꤠꤢꤧ꤭ ꤞꤤꤛꤢꤪ꤬ ꤚꤣꤧꤘꤢꤦ꤬ ꤔꤢꤧ꤬ꤡꤣꤧ ꤊꤣꤧ꤬ꤛꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬, ꤢ꤬ ꤥ꤬ ꤊꤣꤧ꤭ ꤜꤢ꤭ꤋꤢꤧ꤭ ꤔꤢꤧ ꤠꤢꤧ꤭ ꤙꤣꤧꤣꤧ꤭ ꤗꤢ꤬ ꤢ꤬ ꤙꤢ꤭ ꤟꤣꤧ ꤞꤥ꤭ꤔꤣꤧ꤭ ꤟꤣꤧ꤯ ꤛꤢꤩ꤬ꤞꤤ꤭ ꤜ꤫ꤢꤩ꤬ꤢꤩ꤬ꤜ꤫ꤢꤩ꤬ꤥ꤭ ꤥ꤬ ꤜꤢ꤭ꤋꤢꤧ꤭ ꤒꤣ꤬ꤡꤣ꤬꤮ ꤒꤥ꤬꤯ 3ꤠꤢꤧ꤭ ꤊꤢꤩ꤬ ꤕꤜꤝꤢ꤭ꤊꤢ꤬ ꤒꤣꤧ꤬ꤠꤤ꤭ꤒꤣꤧ꤬ꤊꤢꤪ꤭ ꤛꤢꤩ꤬ꤞꤤ꤭ ꤘꤣ ꤢ꤬ꤟꤤ꤬ ꤟꤢꤩꤚꤣꤧ꤬, ꤢ꤬ ꤢꤩ꤬ꤔꤢꤪꤥ꤭ꤔꤢꤪ ꤜꤢ꤭ꤋꤢꤧ꤭ ꤒꤥ꤬ ꤚꤣꤧ꤬ ꤢ꤬ ꤜꤣꤧ꤬ꤘꤢꤧꤢꤩ꤬ꤜꤣꤧ꤬ꤘꤢꤧꤥ꤭ ꤊꤢ꤬ ꤜꤢꤪ꤭ ꤘꤣ ꤊꤜꤢꤧꤜꤥ꤬ ꤟꤢꤩ꤬꤯ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ꤟꤢꤩ꤬ ꤗꤢ꤬ ꤢ꤬ ꤥ꤬ ꤜꤢ꤭ꤋꤢꤧ꤭ ꤘꤣ ꤢ꤬ꤛꤢ꤬ ꤟꤢꤧ꤭ ꤡꤣꤧ꤯”
4ꤚꤣꤧ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤕꤢꤩ꤬ ꤒꤥ꤭ꤙꤢꤩ꤬ ꤘꤣꤧꤢꤩ꤬ ꤛꤢꤩ꤬ꤞꤤ꤭ ꤜ꤫ꤢꤩ꤬ꤢꤩ꤬ ꤗꤢ꤬ ꤢ꤬ꤗ꤫ꤢ꤬ꤠꤢ꤯ ꤗꤢ꤬ꤔꤢꤧꤚꤣꤧ꤬ ꤘꤣ ꤜ꤫ꤢ꤬ꤗꤤ꤬ꤏꤥ꤬ꤊꤜꤢꤩ꤭ ꤟꤢꤨꤣꤧ꤭ꤔꤣꤧ꤬, ꤕꤢꤩ꤬ ꤊ꤫ꤢꤦ꤬ ꤡꤝꤢꤗꤢꤧꤕꤢꤨ꤭ ꤘꤣꤧꤢꤩ꤬ ꤡ꤫ꤢꤧ꤬ ꤕ꤫ꤢꤩ꤬ ꤛꤢꤩ꤬ꤞꤤ꤭ ꤟꤢꤨꤒꤢꤩ꤭?”
5ꤛꤢꤩ꤬ꤏꤛꤢꤨ ꤘꤣꤧꤟꤣꤧ꤭ ꤛꤢꤩ꤬ꤞꤤ꤭ ꤔꤢꤧ, “ꤞꤤ꤭ꤋꤢꤪꤗꤢꤨ꤭ ꤥ꤬ ꤙꤢꤊꤜ꤫ꤢꤪ꤬ꤒꤢꤩ꤭?”
“ꤢ꤬ ꤥ꤬ ꤞꤥ꤭ꤞꤝꤢꤒꤣ꤬ꤊꤜ꤫ꤢꤪ꤬” ꤛꤢꤩ꤬ꤞꤤ꤭ ꤟꤢꤩꤏꤢꤦ꤬ ꤜꤢꤨ꤭ ꤟꤢꤨꤔꤣꤧ꤬꤯
6ꤛꤢꤩ꤬ꤏꤛꤢꤨ ꤔꤢꤪ꤭ꤥ꤬ꤔꤢꤧ꤭ꤒꤢ꤭ ꤜꤢꤪ꤭ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤣꤧ꤭ꤒꤣꤧ꤬ꤟꤢꤩ꤬ ꤘꤣ ꤟꤢꤩ꤬ꤋꤢꤨ꤬ ꤚꤣꤧ꤬ ꤢ꤬ ꤖꤛꤢꤓꤢꤧ꤬ ꤋꤢꤪꤗꤢꤨ꤭ ꤣꤧ꤭ꤞꤥ꤭ꤞꤝꤢꤒꤣ꤬ꤊꤜ꤫ꤢꤪ꤬ ꤚꤣꤧ꤬ ꤢ꤬ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ ꤓꤢꤨ꤬ꤞꤢꤩꤓꤢꤧ꤬ ꤡꤢꤪꤗꤣꤧ꤬ꤚꤢꤧ꤬, ꤚꤣꤧ꤬ ꤢ꤬ ꤙꤤ꤬ꤊꤛꤢ꤭ ꤓꤥ꤭ ꤋꤢꤪꤗꤢꤨ꤭ ꤣꤧ꤭ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤘꤣꤧ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤔꤢꤪ꤭ꤡꤝꤢꤛ꤫ꤢꤨ꤬ ꤛꤢꤩ꤬ꤞꤤ꤭ ꤚꤣꤧ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤡꤝꤢꤛ꤫ꤢꤨ꤬ꤒꤢ꤭ ꤘꤤ꤭ꤒ꤫ꤢꤦ꤬ ꤔꤢꤧ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤒꤣꤧ꤬ꤟꤢꤩ꤬꤯ 7ꤛꤢꤩ꤬ꤞꤤ꤭ ꤖꤛꤢꤟꤢꤧ꤭ ꤒ꤫ꤣ꤬ꤊꤣꤧ꤭ ꤒꤢꤩ꤭ꤟꤢꤨ ꤒꤣ꤬ꤙꤢꤩ꤬ ꤔꤣꤧ꤭ꤙꤢꤩ꤬ ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩꤙꤝꤤꤟꤢꤩꤒꤣꤧ꤬ꤚꤣꤧ꤭ ꤓꤢꤨ꤬ꤞꤢꤩꤓꤢꤧ꤬ ꤡꤢꤪꤗꤣꤧ꤬ꤚꤢꤧ꤬ ꤓꤥ꤭ꤚꤣꤧ꤬ ꤢ꤬ ꤔꤢꤪ꤭ꤛ꤫ꤢꤨ꤬ꤒꤢ꤭ ꤢꤩ꤬ ꤔꤢꤧ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤣꤧ꤭ꤒꤣꤧ꤬ꤟꤢꤩ꤬꤯ 8ꤛꤢꤩ꤬ꤞꤤ꤭ ꤢꤩ꤬ꤊꤢꤪꤥ꤭ꤙꤢ꤭ ꤕꤥ꤬ꤢꤩ꤬ꤕꤥ꤬ꤥ꤭ ꤜꤢꤪ꤭ꤕꤜꤤ꤭ ꤡꤣꤧ꤯ ꤚꤣꤧ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤖꤛꤢꤘꤝꤢꤋꤛꤢ꤭ ꤋꤢꤪꤗꤢꤨ꤭ ꤘꤣ ꤢ꤬ ꤥ꤬ꤊꤢꤧ꤭ꤕꤢ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤙꤢ꤭ꤕꤢ꤬ ꤡꤣꤧ ꤔꤢꤧ ꤋꤚ꤫ꤤ꤬ꤔꤣꤧ꤬ ꤞꤥ꤭ꤞꤝꤢꤒꤣ꤬ꤋꤚ꤫ꤤ꤬ ꤡꤣꤧ꤯ 9ꤊꤣꤧ꤬ꤛꤢꤧ꤭ ꤢꤩ꤬ꤏꤢꤩ꤬ꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤖꤢꤦ꤬꤮ ꤥ꤬ ꤡꤣꤧ ꤊꤣꤧ꤬ꤛꤢꤧ꤭ ꤜꤝꤤ꤭ꤚꤤ꤯ 10ꤛꤢꤩ꤬ꤏꤛꤢꤨ ꤕꤜꤝꤢ꤭ꤊꤢ꤬ꤊꤢꤧ꤭ ꤓꤥ꤭ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤣꤧ꤭ꤒꤣꤧ꤬ꤟꤢꤩ꤬, ꤚꤣꤧ꤬ ꤒꤣ꤬ꤖꤥꤒꤥ꤬ ꤢ꤬ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤡꤝꤢꤔꤥ꤭ ꤘꤣ ꤞꤢꤪ꤬ꤊꤜꤣꤧ꤭ꤊꤢꤨ꤭ ꤚꤣꤧ꤬ ꤓꤢꤩ꤬ꤡꤝꤢ ꤘꤣ ꤘꤢ꤬ꤜꤢ꤬ꤗꤢ꤬ꤔꤢꤨ꤬ꤞꤢ꤬ꤊ꤫ꤢꤩ꤬꤯
ꤖꤢ꤬ꤚꤤ꤬ꤏꤛꤢꤧꤖꤢꤨ ꤒꤣꤧ꤬ꤟꤢꤩ꤬ ꤊꤝꤤ꤭ꤗꤢꤧ ꤒꤢꤩ꤬ꤋꤥꤒꤣꤧ꤬ꤊꤜꤤ
(ꤗꤢꤞꤢꤧ ꤁꤆:꤁-꤄)
11ꤖꤢ꤬ꤚꤤ꤬ꤏꤛꤢꤧꤖꤢꤨ ꤒꤣꤧ꤬ꤟꤢꤩ꤬ ꤟꤢꤧ꤭ ꤘꤣ ꤛꤢꤩ꤬ꤏꤛꤢꤨ ꤢ꤬ ꤥ꤬ ꤚꤣꤧ꤬ ꤢ꤬ ꤟꤢꤧ꤭ ꤡꤢꤓꤢꤧ꤬ ꤋꤚ꤫ꤢꤧ꤬ ꤛꤢꤩ꤬ꤏꤛꤢꤨ꤯ ꤚꤣꤧ꤬ ꤛꤢꤩ꤬ꤏꤛꤢꤨ ꤣꤧ꤭ꤔꤣꤧ꤬ꤗꤢ꤬ ꤢ꤬ ꤥ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤥ꤬ ꤟꤢꤧ꤭ ꤗ꤫ꤢ꤬ ꤟꤢꤧ꤭? ꤗ꤫ꤢ꤬ꤒꤥ꤬ ꤟꤢꤧ꤭? ꤔꤣꤧ꤬, ꤛꤢꤩ꤬ꤞꤤ꤭ ꤟꤢꤧ꤭ꤊꤝꤤ꤭ ꤋꤢꤋꤥ꤬ꤗꤢꤧꤙꤛꤢ꤬ꤖꤢꤧ ꤜꤢꤨ꤭ ꤔꤢꤧ ꤢ꤬ ꤊ꤫ꤢꤦ꤬ ꤘꤣꤧꤜꤥ꤭ ꤕ꤫ꤢꤩ꤬ ꤛꤢꤩ꤬ꤞꤤ꤭ ꤒꤢꤩ꤬ꤋꤥꤒꤣꤧ꤬ꤊꤜꤤ ꤒꤣ꤬ꤡꤣ꤬꤯#ꤗꤢꤞꤢꤧ ꤁꤂:꤃꤈, ꤜꤢꤨꤊꤢ꤬ ꤁꤁:꤁꤆ 12ꤛꤢꤩ꤬ꤏꤛꤢꤨ ꤞꤢꤩꤗ꤫ꤥ꤬ ꤚꤣꤧ꤬ ꤢ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤓꤢꤦ꤭ ꤒꤣꤧ꤬ꤟꤢꤩ꤬ ꤡꤝꤢꤊꤝꤤ꤭ꤗꤢꤧ ꤒ꤫ꤥ꤬ ꤠꤢꤧ꤭ ꤒꤢꤩ꤬ꤗꤢꤩ꤬ ꤋꤥꤒꤣꤧ꤬ꤊꤜꤤ ꤗꤢꤩ꤬ꤒꤢꤩ꤭? ꤠꤢꤧ꤭ ꤟꤢꤩꤡꤢꤪꤡꤢꤪ ꤞꤤ꤭ ꤠꤢꤧ꤭ ꤘꤣꤧꤜꤥ꤭ ꤕ꤫ꤢꤩ꤬ ꤞꤤ꤭ ꤒꤢꤩ꤬ꤗꤢꤩ꤬ ꤋꤥꤒꤣꤧ꤬ꤊꤜꤤ ꤒꤣ꤬ꤡꤣ꤬꤮ ꤒꤥ꤬꤯”#ꤗꤢꤞꤢꤧ ꤁꤂:꤃꤉, ꤜꤢꤨꤊꤢ꤬ ꤁꤁:꤂꤉ 13ꤢ꤬ ꤟꤢꤩ ꤚꤣꤧ꤬ ꤢ꤬ ꤓꤢꤩ꤬ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤔꤢꤧ ꤖꤢ꤬ꤚꤤ꤬ꤏꤛꤢꤧꤖꤢꤨ ꤔꤣꤧ꤬ꤒꤣꤧ꤬ꤟꤢꤩ꤬, ꤚꤣꤧ꤬ ꤢ꤬ ꤊꤢ꤬ ꤊꤣꤧ꤬ꤔꤥ꤭ꤋꤛꤢ꤭ ꤘꤣ ꤞꤢꤪ꤬ꤊꤜꤣꤧ꤭ꤊꤢꤨ꤭ ꤚꤣꤧ꤬ ꤓꤢꤩ꤬ꤡꤝꤢꤊꤢꤧ꤭ ꤘꤣ ꤓꤣꤧ꤭ꤢꤪ꤬ꤙꤢꤩꤚꤢꤩ꤭ ꤒꤣ꤬ꤊꤛꤢ꤭꤯
ꤛꤢꤩ꤬ꤏꤛꤢꤨ ꤤ꤬ꤞꤝꤢ ꤚꤣꤧꤘꤢꤦ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬
(ꤗꤢꤞꤢꤧ ꤁꤆:꤅-꤁꤂)
14ꤛꤢꤩ꤬ꤏꤛꤢꤨ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤏꤥ꤭ꤒꤣꤧ꤬ꤕꤢ꤬ ꤖꤛꤢꤡꤝꤢꤔ꤫ꤤ꤬ ꤜꤢ꤭ꤋꤢꤧ꤭ ꤋꤢꤪꤗꤢꤨ꤭꤯ ꤚꤣꤧ꤬ ꤘꤣ ꤞꤢꤪ꤬ꤊꤜꤣꤧ꤭ꤊꤢꤨ꤭ ꤣꤧ꤭ꤔꤣꤧ꤬, ꤛꤢꤩ꤬ꤞꤤ꤭ ꤖꤛꤢꤡꤝꤢꤔ꤫ꤤ꤬ ꤖꤢꤧ ꤋꤢꤪꤗꤢꤨ꤭ ꤒꤣ꤬ꤊꤜ꤫ꤢꤪ꤬ꤊꤜ꤫ꤢꤪ꤬꤮ ꤟ꤫ꤢꤨ꤬ ꤖꤢꤧ꤯ 15ꤛꤢꤩ꤬ꤏꤛꤢꤨ ꤗ꤫ꤢ꤬ꤊꤢꤧ꤭ ꤒꤢ꤭ꤒꤢꤩ꤬ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤔꤢꤧ, “ꤚꤢꤪ꤬ꤚꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤢꤧ ꤖꤢ꤬ꤚꤤ꤬ꤏꤛꤢꤧꤖꤢꤨ ꤒꤣꤧ꤬ꤟꤢꤩ꤬ ꤢ꤬ꤟꤥ꤭ꤗꤢꤦ꤬ ꤔꤢꤧ ꤋꤝꤤꤟꤢꤩ꤬ꤚꤥ꤬ ꤢ꤬ꤟꤥ꤭ꤗꤢꤦ꤬ ꤣꤧ꤭ꤔꤣꤧ꤬ ꤔꤤ꤮꤯”#ꤜꤢꤨꤊꤢ꤬ ꤁꤂:꤁
16ꤛꤢꤩ꤬ꤞꤤ꤭ ꤟꤢꤩ ꤚꤣꤧꤘꤢꤦ꤬ ꤋꤛꤢ꤭ꤜꤢꤨ꤭ ꤔꤢꤧ, “ꤙꤢꤧ꤬ꤡꤢꤩ꤬ ꤟꤢꤩ ꤕꤢꤩ꤬ ꤟꤢꤨꤣꤧ꤭ꤔꤣꤧ꤬ꤗꤢ꤬, ꤗ꤫ꤢ꤬ꤘꤣ ꤕꤢꤩ꤬ ꤋꤢꤪꤗꤢꤨ꤭ ꤥ꤬ ꤕ꤫ꤢꤩ꤬ ꤜꤢꤨ꤭ ꤒꤥ꤬ ꤔꤣꤧ꤬ꤟꤣꤧ꤯”
17ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨ ꤞꤤꤑꤢꤩ꤭ ꤔꤢꤧ ꤛꤢꤩ꤬ꤞꤤ꤭ ꤟꤢꤩꤙꤢꤩ꤬ ꤚꤣꤧꤘꤢꤦ꤬ꤜꤢꤨ꤭ ꤔꤢꤧ ꤋꤢꤪꤗꤢꤨ꤭ ꤢ꤬ꤚꤤ꤬ꤢ꤬ꤊꤢꤧ꤭ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢ꤬ ꤘꤣꤧꤟꤣꤧ꤭ ꤛꤢꤩ꤬ꤞꤤ꤭ ꤔꤢꤧ, “ꤗꤢ꤬ꤗꤢꤩ꤬ꤒꤢꤩ꤭ꤚꤣꤧ꤬ ꤞꤤ꤭ ꤡꤝꤢꤘꤥ꤬ꤔꤢꤧ꤭ ꤚꤣꤧꤘꤢꤦ꤬ ꤋꤛꤢ꤭ꤜꤢꤨ꤭ ꤔꤢꤧ ꤞꤤ꤭ ꤋꤢꤪꤗꤢꤨ꤭ ꤥ꤬ꤒꤥ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤟꤢꤨꤒꤢꤩ꤭? ꤗꤢ꤬ ꤞꤤ꤭ ꤗꤢꤧꤓ꤫ꤣꤧ꤬ ꤞꤤꤑꤢꤩ꤭ꤕꤜꤥ꤭ ꤊꤣꤧ꤭ꤔꤢꤧ꤭ ꤜꤢ꤭ꤟꤤꤢꤨ꤭ ꤒꤥ꤬ ꤟꤢꤧ꤭? ꤞꤤ꤭ ꤡꤝꤢꤞꤤꤑꤢꤩ꤭ꤕꤜꤥ꤭ ꤕ꤫ꤢꤩ꤬ ꤊꤣꤧ꤭ꤢꤨ꤭ ꤒꤥ꤬ ꤟꤢꤨꤒꤢꤩ꤭ꤒꤢꤩ꤭? 18ꤞꤤ꤭ ꤕꤣꤧꤞꤢꤩ꤬ꤕꤜꤢꤪ꤬ ꤥ꤬ ꤊꤣꤧ꤭ꤢꤨ꤭ ꤚꤣꤧ꤬ ꤞꤤ꤭ ꤗꤢꤧꤓ꤫ꤣꤧ꤬ ꤊꤣꤧ꤭ꤢꤨ꤭ ꤒꤥ꤬, ꤞꤤ꤭ꤊꤢꤨꤜꤢꤩ꤬ꤊꤥ꤬ ꤥ꤬ ꤊꤣꤧ꤭ꤢꤨ꤭ ꤚꤣꤧ꤬ ꤞꤤ꤭ ꤔ꤫ꤤ꤬ꤟꤥ꤭ ꤊꤣꤧ꤭ꤢꤨ꤭ ꤒꤥ꤬꤯#ꤡꤛꤣ꤬ꤚꤢ꤬ꤗꤤꤛꤣ꤬ ꤅:꤂꤁, ꤛꤣ꤬ꤟꤢꤩꤎꤢ꤬ꤊꤢꤩꤜꤢ꤬ ꤁꤂:꤂, ꤗꤢ꤬ꤊꤢꤨ ꤄:꤁꤂ 19ꤙꤣꤧ ꤠꤢꤧ꤭ ꤙꤤ꤬ꤊꤛꤢ꤭ ꤋꤢꤪꤗꤢꤨ꤭ ꤍꤢꤧ꤭ꤊꤜ꤫ꤢꤪ꤬ ꤚꤣꤧ꤬ ꤠꤢꤧ꤭ ꤙꤥ꤬ꤢꤩ꤬ ꤔꤢꤧ ꤊꤣꤧ꤬ꤛꤢꤧ꤭ ꤍꤢꤧ꤭ꤚꤤ ꤢ꤬ꤋꤢꤩ꤭ꤔꤣꤧ꤬, ꤞꤤ꤭ ꤖꤛꤢꤘꤝꤢꤕꤜꤢꤪ ꤋꤛꤢ꤭ꤞꤢꤧ ꤢ꤬ ꤥ꤬ꤊꤢꤧ꤭ꤜꤣ ꤔꤣꤧ꤬ꤒꤣꤧ꤬ꤟꤢꤩ꤬ꤚꤣꤧ꤬ ꤢ꤬ ꤥ꤬ꤕꤢ꤬ ꤙꤢꤋꤚ꤫ꤤ꤬ꤒꤢꤩ꤭ ꤔꤣꤧ꤬ꤗꤢ꤬ ꤞꤤ꤭ ꤒꤥ꤭ꤗꤢꤚꤣꤧ ꤕꤢ꤬ꤒꤥ꤬ ꤟꤢꤧ꤭?”
ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤢ꤬ ꤥ꤬ꤊꤢꤧ꤭ꤜꤣ ꤏꤣꤧꤔꤣꤧ꤭ꤋꤚ꤫ꤤ꤬꤯”
20“ꤙꤣꤧ ꤠꤢꤧ꤭ ꤙꤤ꤬ꤊꤛꤢ꤭ ꤋꤢꤪꤗꤢꤨ꤭ ꤞꤥ꤭ꤞꤝꤢꤒꤣ꤬ꤊꤜ꤫ꤢꤪ꤬ ꤚꤣꤧ꤬ ꤠꤢꤧ꤭ ꤙꤥ꤬ꤢꤩ꤬ ꤔꤢꤧ ꤊꤣꤧ꤬ꤛꤢꤧ꤭ ꤜꤝꤤ꤭ꤚꤤ ꤢ꤬ꤋꤢꤩ꤭, ꤞꤤ꤭ ꤖꤛꤢꤘꤝꤢꤕꤜꤢꤪ ꤋꤛꤢ꤭ꤞꤢꤧ ꤋꤢꤪꤗꤢꤨ꤭ ꤘꤣ ꤠꤢꤧ꤭ ꤙꤤ꤬ꤊꤛꤢ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤥ꤬ꤊꤢꤧ꤭ꤜꤣ ꤕꤢ꤬ ꤙꤢꤋꤚ꤫ꤤ꤬ꤒꤢꤩ꤭?”
ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤢ꤬ ꤥ꤬ꤊꤢꤧ꤭ꤜꤣ ꤕꤢ꤬ ꤞꤥ꤭ꤞꤝꤢ ꤒꤣ꤬ꤋꤚ꤫ꤤ꤬꤯”
21ꤚꤣꤧ꤬ ꤢ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤞꤤ꤭ ꤞꤤꤑꤢꤩ꤭ ꤕ꤫ꤢꤩ꤬ꤊꤣꤧ꤭ꤔꤢꤧ꤭ ꤜꤢ꤭ꤟꤤꤢꤨ꤭ ꤒꤥ꤬ ꤟꤢꤧ꤭?”
ꤛꤢꤩ꤬ꤏꤛꤢꤨ ꤛ꤫ꤢꤧ꤬ꤥ꤬ꤗ꤫ꤢꤩ꤬ ꤊꤣꤧ꤬ꤛꤢꤧ꤭ꤖꤢꤩ꤭ ꤕꤣꤧꤞꤢꤩ꤬ꤋꤤ ꤒꤣ꤬ꤖꤚꤢꤩ꤬ ꤢ꤬ ꤕꤣꤧꤞꤢꤩ꤬ꤕꤜꤢꤪ꤬ ꤘꤣ ꤠꤤ꤭ꤙꤢꤩ꤬ꤞꤢ꤬ꤎꤢꤧꤘꤢ꤬
22ꤛꤢꤩ꤬ꤏꤛꤢꤨ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤡꤝꤢꤒ꤫ꤥ꤬ ꤘꤣ ꤠꤤ꤭ꤙꤢꤩ꤬ꤞꤢ꤬ꤎꤢꤧꤘꤢ꤬ ꤚꤣꤧ꤬ ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ ꤢꤩꤟꤢꤧ꤭ꤔ꤫ꤤ꤬ ꤊꤣꤧ꤬ꤛꤢꤧ꤭ ꤕꤣꤧꤞꤢꤩ꤬ꤋꤤ ꤒꤣ꤬ꤖꤚꤢꤩ꤬ ꤚꤣꤧ꤬ ꤢ꤬ ꤟꤢꤧ꤭ꤊꤝꤤ꤭ꤞꤤꤛꤢꤪ꤬ ꤛꤢꤩ꤬ꤏꤛꤢꤨ ꤔꤢꤧ ꤢ꤬ ꤊ꤫ꤢꤦ꤬ ꤒꤥ꤬ꤙꤢꤩ꤬ ꤕ꤫ꤢꤩ꤬ ꤊꤣꤧ꤭ ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬꤯ 23ꤛꤢꤩ꤬ꤏꤛꤢꤨ ꤕ꤫ꤢꤦ꤬ꤔ꤫ꤤ꤬ ꤊꤣꤧ꤬ꤛꤢꤧ꤭ꤖꤢꤩ꤭ ꤕꤣꤧꤞꤢꤩ꤬ꤋꤤ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ꤊꤢꤨꤋꤢꤨ꤬ ꤚꤣꤧ꤬ ꤢ꤬ ꤢꤩꤓꤢꤩ꤬ ꤜꤢꤨ꤭ ꤘꤣ ꤘꤢꤪ꤭ꤊꤜꤢꤪ꤭ ꤚꤣꤧ꤬ ꤢ꤬ ꤓꤢꤨ꤬ꤕꤜꤢꤚꤢꤩ꤭ ꤜꤢꤨ꤭ ꤕꤣꤧꤞꤢꤩ꤬ꤕꤜꤢꤪ꤬ ꤚꤣꤧ꤬ ꤢ꤬ ꤒꤥ꤬ꤚꤢꤩ꤭ ꤊꤣꤧ꤬ꤛꤢꤧ꤭ꤖꤢꤩ꤭ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤕꤣꤧꤞꤢꤩ꤬ꤕꤜꤢꤪ꤬ ꤚꤣꤧ꤬ ꤢ꤬ ꤘꤣꤧꤟꤣꤧ꤭ ꤜꤢꤨ꤭ ꤔꤢꤧ, “ꤔꤢꤧ꤬ ꤗꤢꤧꤓ꤫ꤣꤧ꤬ ꤒꤢꤩ꤬ ꤒꤣ꤬ꤡꤣ꤬ꤡꤣ꤬ ꤟꤢꤧ꤭?”
24ꤢ꤬ ꤗꤢꤧꤓꤥ꤭ꤗꤢꤧꤜꤢꤧ꤬ ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤠꤢꤧ꤭ ꤗꤢꤧꤓ꤫ꤣꤧ꤬ ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ ꤒꤣꤧ꤬ꤘꤢꤦꤚꤣꤧ꤬ ꤢ꤬ꤞꤢꤧꤔꤢꤧ ꤞꤢꤪ꤬ꤗ꤫ꤢꤪ꤬ ꤚꤣꤧ꤬ ꤢ꤬ ꤡꤝꤢꤊꤢ꤬ꤡꤝꤢꤟꤢꤧ꤭ ꤟꤢꤨꤔꤣꤧ꤬ ꤖꤢꤧ꤯”
25ꤛꤢꤩ꤬ꤏꤛꤢꤨ ꤒꤥ꤬ꤚꤢꤩ꤭ ꤋꤛꤢ꤭ꤞꤢꤧ ꤊꤣꤧ꤬ꤛꤢꤧ꤭ꤖꤢꤩ꤭ ꤕꤣꤧꤞꤢꤩ꤬ꤋꤤ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤕꤣꤧꤞꤢꤩ꤬ꤕꤜꤢꤪ꤬ ꤚꤣꤧ꤬ ꤊꤣꤧ꤬ꤛꤢꤧ꤭ꤖꤢꤩ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤢꤧꤡꤢꤦ ꤗꤢꤧꤒꤢ꤭ꤒꤢꤩ꤬ ꤋꤛꤢ꤭ꤞꤢꤧ ꤚꤣꤧ꤬ ꤢ꤬ ꤕꤣꤧꤞꤢꤩ꤬ꤕꤜꤢꤪ꤬ ꤜꤤ꤭ꤓꤢꤧ꤬ ꤚꤣꤧ꤬ ꤢ꤬ ꤗꤢꤧꤓ꤫ꤣꤧ꤬ ꤚꤢꤧꤜꤢꤪ꤭ ꤒꤢꤩ꤬ꤕꤝꤢ꤭ꤒꤣ꤬ꤡꤣ꤬꤯ 26ꤚꤣꤧ꤬ ꤛꤢꤩ꤬ꤏꤛꤢꤨ ꤟꤢꤩꤚꤣꤧ ꤜꤢꤨ꤭ ꤔꤢꤧ, “ꤊꤢ꤬ ꤒꤣ꤬ꤖꤥꤊꤢ꤬ ꤘꤣ ꤟꤤ꤬ ꤔꤤ꤮, ꤊꤢ꤬ ꤊꤣꤧ꤬ꤔꤥ꤭ ꤒ꤫ꤢꤧ꤬ ꤘꤣ ꤘꤢꤪ꤭ꤊꤢꤨ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮꤯”
ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤟꤢꤩꤓꤢꤩ꤬ꤜꤥ꤭ ꤔꤢꤧ ꤛꤢꤩ꤬ꤏꤛꤢꤨ ꤗꤢ꤬ ꤖꤚꤢꤩ꤬ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤔꤝꤢꤓꤢꤧ꤬ ꤢ꤬ ꤒꤣ꤬ꤖꤚꤢꤩ꤬
(ꤗꤢꤞꤢꤧ ꤁꤆:꤁꤃-꤂꤀, ꤜꤢꤨꤊꤢ꤬ ꤉:꤁꤈-꤂꤁)
27ꤛꤢꤩ꤬ꤏꤛꤢꤨ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤡꤝꤢ ꤜꤢ꤭ꤋꤢꤧ꤭ ꤘꤣ ꤘꤢꤪ꤭ ꤥ꤬ ꤘꤣ ꤠꤤ꤭ꤊꤢꤧꤎꤢ꤬ꤚꤤ ꤖꤤꤜꤤ꤬ꤕꤤ꤬ ꤢ꤬ꤊꤢꤧ꤭ꤏꤢꤪ꤭ꤊꤢꤧ꤭ꤏꤢ ꤒꤣꤧ꤬ꤟꤢꤩ꤬ ꤚꤣꤧ꤬ ꤙꤣꤧ ꤢ꤬ ꤡꤝꤢ ꤘꤣ ꤊꤜꤢꤧꤜꤥ꤬ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤏꤛꤢꤨ ꤘꤣꤧꤟꤣꤧ꤭ ꤛꤢꤩ꤬ꤞꤤ꤭ ꤔꤢꤧ, “ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ ꤟꤢꤩꤋꤚꤢꤧ꤮ ꤠꤢꤧ꤭ ꤔꤢꤧ ꤠꤢꤧ꤭ ꤗꤢ꤬ ꤊꤣꤧ꤬ꤛꤢꤧ꤭ ꤟꤢꤨꤒꤢꤩ꤭ ꤒꤣ꤬ꤖꤚꤢꤩ꤬ ꤕꤢꤩ꤭?”
28ꤛꤢꤩ꤬ꤞꤤ꤭ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤒꤣꤧ꤬ꤟꤢꤩ꤬ꤟꤢꤩ꤬ꤚꤣꤧ꤬ ꤢ꤬ ꤟꤢꤩ ꤔꤢꤧ ꤖꤚꤢꤩ꤬ꤡꤢꤩ꤬ ꤢꤨ꤭ ꤋꤢꤨ꤭ꤛꤥ꤭ꤟꤢ꤬, ꤒꤣꤧ꤬ꤟꤢꤩ꤬ꤟꤢꤩ꤬ ꤊꤣꤧ꤭ꤜꤢ꤭ꤒꤢꤩ꤬ꤚꤣꤧ꤬ ꤢ꤬ ꤟꤢꤩ ꤔꤢꤧ ꤖꤚꤢꤩ꤬ꤖꤚꤥ꤬ ꤢꤩꤜꤤ꤬ꤛꤢ꤬, ꤒꤣꤧ꤬ꤟꤢꤩ꤬ꤟꤢꤩ꤬ꤚꤣꤧ꤬ ꤢ꤬ ꤟꤢꤩ ꤔꤢꤧ ꤖꤚꤢꤩ꤬ꤖꤚꤥ꤬ ꤒꤥ꤬ꤗꤢ꤬ꤔꤢꤧ ꤖꤚꤢꤩ꤬ꤖꤚꤥ꤬ ꤋꤥꤘꤢꤦ꤬ ꤘꤣ ꤢ꤬ꤚꤥ꤬ ꤒꤣꤧ꤬ꤟꤢꤩ꤬ ꤢ꤬ꤊꤜꤢꤩ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤖꤢꤧ,” ꤢ꤬ ꤟꤢꤩ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬꤯#ꤗꤢ꤬ꤊꤢꤨ ꤆:꤁꤄,꤁꤅, ꤜꤢꤨꤊꤢ꤬ ꤉:꤇,꤈
29ꤚꤣꤧ꤬ ꤢ꤬ ꤘꤣꤧꤟꤣꤧ꤭ ꤛꤢꤩ꤬ꤞꤤ꤭ ꤔꤢꤧ, “ꤞꤤ꤭ ꤊꤣꤧ꤭ꤜꤢ꤭ꤒꤢꤩ꤬ꤜꤢꤩ꤭꤮, ꤞꤤ꤭ ꤊ꤫ꤢꤦ꤬ ꤟꤢꤩ ꤜꤢ꤭ꤒꤢꤩ꤬ ꤠꤢꤧ꤭ ꤔꤢꤧ ꤢꤨ꤭ꤕꤢꤩ꤭?” ꤢ꤬ ꤟꤢꤩ ꤚꤣꤧ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤟꤢꤩꤏꤢꤦ꤬ ꤢ꤬ ꤔꤢꤧ, “ꤔꤢꤧ꤬ ꤗꤢ꤬ ꤖꤚꤢꤩ꤬ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤢꤨ꤭#8:29 ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤗꤢ꤬ ꤋꤚꤤꤖꤢꤨ ꤢ꤬ꤗꤢꤨ꤬ ꤘꤣ ꤢ꤬ꤚꤥ꤬ ꤒꤣꤧ꤬ꤟꤢꤩ꤬ꤟꤢꤩ꤬ꤔꤣꤧ꤬ ꤢ꤬ ꤟꤢꤩ ꤔꤢꤧ, “ꤒꤢꤩ꤬ꤗꤢꤩ꤬ꤜꤢꤨ꤭ꤓꤢꤩ꤬ꤊꤢ꤬” ꤗ꤫ꤢ꤬ꤒꤥ꤬ꤚꤣꤧ꤬ “ꤒꤢꤩ꤬ꤋꤢꤧꤊꤢ꤬ꤖꤥ꤬ꤊꤢ꤬, ꤒꤢꤩ꤬ꤢꤩꤊꤢ꤬ꤖꤥ꤬ꤊꤢ꤬꤯” ꤘꤣ ꤡꤢꤪꤗꤣꤧ꤬ꤚꤢꤧ꤬ ꤔꤝꤢꤓꤢꤧ꤬ ꤢ꤬ ꤔꤣꤧ꤬ꤒꤣ꤬ꤖꤚꤢꤩ꤬ ꤟꤣꤧ꤯”#ꤛꤥ꤭ꤟꤢ꤬ ꤆:꤆꤈,꤆꤉
30ꤟꤢꤨꤔꤣꤧ꤬ꤚꤣꤧ꤬ ꤛꤢꤩ꤬ꤏꤛꤢꤨ ꤗ꤫ꤢ꤬ꤊꤢꤧ꤭ ꤛꤢꤩ꤬ꤞꤤ꤭ ꤔꤢꤧ, “ꤠꤢꤧ꤭ ꤗꤢ꤬ ꤖꤚꤢꤩ꤬ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤢꤨ꤭ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤔꤝꤢꤓꤢꤧ꤬ ꤢ꤬ ꤔꤣꤧ꤬ꤒꤣ꤬ꤖꤚꤢꤩ꤬ ꤟꤣꤧ, ꤞꤤ꤭ ꤙꤢꤩ꤬ ꤡꤝꤢ ꤟꤢꤩꤏꤥ꤬ꤜꤥ꤭ꤔ꤫ꤤ꤬ ꤕ꤫ꤢꤩ꤬ ꤢꤨ꤭ ꤟꤢꤨꤔꤣꤧ꤬ ꤒꤣ꤬ꤖꤚꤢꤩ꤬꤮ ꤒꤥ꤬ ꤔꤤ꤮꤯”
ꤛꤢꤩ꤬ꤏꤛꤢꤨ ꤟꤢꤩꤏꤥ꤬ꤥ꤬ꤔꤢꤩ꤬ ꤚ꤫ꤣꤧ꤬ ꤢ꤬ ꤙꤢꤩ꤬ ꤋꤢꤧꤡꤢ꤭ꤋꤢꤧꤡꤢꤦ꤬ ꤒꤢꤩ꤬ ꤔꤢꤧ ꤢ꤬ ꤙꤢꤩ꤬ ꤞꤣꤧ꤭ ꤕꤢ꤭ ꤢ꤬ꤚꤤ꤬ꤢ꤬ꤊꤢꤧ꤭
(ꤗꤢꤞꤢꤧ ꤁꤆:꤂꤁-꤂꤈, ꤜꤢꤨꤊꤢ꤬ ꤉:꤂꤂-꤂꤇)
31ꤚꤣꤧ꤬ ꤛꤢꤩ꤬ꤏꤛꤢꤨ ꤡꤢꤓꤢꤧ꤬ ꤤ꤬ꤞꤝꤢ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤔꤢꤧ, “ꤠꤢꤧ꤭ ꤗꤢ꤬ ꤖꤚꤢꤩ꤬ꤜꤢꤨ꤬ ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤚꤣꤧ꤬ ꤠꤢꤧ꤭ ꤒꤥ꤭ꤙꤢꤩ꤬ ꤋꤢꤧꤙꤢꤩ꤬ ꤢꤩꤔꤢꤧ꤬ꤡꤣꤧ ꤒꤢꤩ꤬ꤡꤢ꤭ꤒꤢꤩ꤬ꤡꤢꤦ꤬ ꤕꤢ꤭꤯ ꤚꤣꤧ꤬ ꤛꤢꤨꤘꤢ꤬ꤖꤢꤨ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬, ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤔꤢꤧ ꤖꤚꤢꤩ꤬ꤤ꤬ꤞꤝꤢ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤢ꤬ꤞꤢꤚꤢ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤞꤢꤪꤒꤣꤧ꤬ꤔ꤫ꤢ꤬ ꤞꤢꤪꤒꤣꤧ꤬ꤖꤢ꤭ꤊꤢꤧ꤭ ꤠꤢꤧ꤭ ꤕꤢ꤭ ꤚꤣꤧ꤬ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤗꤢꤩ꤬ꤞꤣꤧ꤭ꤊꤢꤧ꤭ ꤠꤢꤧ꤭ ꤕꤢ꤭꤯ ꤚꤣꤧ꤬ ꤠꤢꤧ꤭ ꤞꤣꤧ꤭ꤓꤥ꤭ꤕꤢ꤭ ꤚꤣꤧ꤬ ꤞꤥ꤭ꤔꤣꤧ꤭ ꤕꤢ꤭ꤔꤣꤧ꤬, ꤠꤢꤧ꤭ ꤊ꤫ꤢꤦ꤬ ꤞꤣꤧ꤭ꤖꤚꤢꤩ꤬ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤘꤣ ꤒꤢꤩ꤬ꤞꤣꤧ꤭ ꤕꤢ꤭꤯” 32ꤢ꤬ ꤟꤢꤩꤜꤥ꤭ ꤜ꤫ꤢ꤬ꤜꤤ꤭ ꤕꤜꤥ꤭ ꤕ꤫ꤢꤩ꤬ꤜꤢꤪ꤭ ꤡꤣꤧ ꤛꤢꤩ꤬ꤞꤤ꤭ ꤔꤢꤧ ꤜꤢꤪ꤭ ꤒꤢꤩ꤬ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤢꤩꤡꤝꤢ ꤒꤣꤧ꤬ꤖꤢ꤭ ꤛꤢ꤬ꤡꤢꤩ꤭ꤊꤢꤧ꤭ ꤙꤢꤧ꤬ꤡꤢꤩ꤬ ꤒꤣꤧ꤬ꤊꤤ꤬ꤟꤢꤨ ꤚꤣꤧ꤬ ꤢ꤬ ꤞꤤꤖꤚꤝꤢ꤭ ꤜꤢꤨ꤭꤯
33ꤗꤢ꤬ꤔꤢꤧꤚꤣꤧ꤬ ꤛꤢꤩ꤬ꤏꤛꤢꤨ ꤒꤣꤧ꤬ꤚꤤꤓꤥ꤭ꤒꤣꤧ꤬ꤚꤤꤜꤢꤧ꤬ ꤚꤣꤧ꤬ ꤢ꤬ ꤗꤢꤧꤚꤢꤩ꤭ ꤓꤥ꤭ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤞꤤꤖꤚꤝꤢ꤭ ꤊꤢ꤬ꤋꤛꤢ꤭ꤏꤢꤦ꤬ ꤋꤢꤨ꤭ꤕꤢꤩ꤬ꤒꤢ꤬ꤚꤢꤨ ꤔꤢꤧ, “ꤊꤣ꤮ ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ, ꤓꤢꤩ꤬ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤔꤢꤧ ꤠꤢꤧ꤭, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤔꤢꤧ꤬ ꤒꤢꤩ꤬ꤒꤣꤧ꤬ꤔꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ꤞꤢꤧꤔꤢꤧ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ ꤒꤢꤩ꤬ꤒꤣꤧ꤬ꤔꤢꤩ꤬ ꤔꤣꤧ꤬ ꤖꤢꤧ, ꤢ꤬ ꤞꤢꤧꤊꤣꤧ꤭ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤒꤣꤧ꤬ꤔꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤗ꤫ꤢ꤬ꤒꤥ꤬꤯”
34ꤓꤥ꤭ꤚꤣꤧ꤬ ꤛꤢꤩ꤬ꤏꤛꤢꤨ ꤢꤩꤟꤢꤧ꤭ꤕꤜꤢꤪꤒ꤫ꤣ꤬ ꤜꤢꤪ꤭ ꤊꤣꤧ꤬ꤛꤢꤧ꤭ ꤙꤢꤩꤗꤢꤨ꤬ ꤒꤣꤧ꤬ꤟꤢꤩ꤬ ꤔꤢꤧ ꤢ꤬ ꤋꤥ꤭ꤖꤢꤨꤡ꤫ꤢꤩ꤬ ꤒꤣꤧ꤬ꤟꤢꤩ꤬ ꤘꤣ ꤢ꤬ ꤥ꤬ ꤚꤣꤧ꤬ ꤢ꤬ ꤟꤢꤩ ꤛꤢꤩ꤬ꤞꤤ꤭ ꤔꤢꤧ, “ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤊꤢꤩ꤬ ꤞꤤꤛ꤫ꤢꤦ꤬ ꤋꤚꤝꤢ꤭ ꤠꤢꤧ꤭ꤋꤛꤢ꤭ ꤟꤢꤩꤔꤣꤧ꤬, ꤢ꤬ ꤒꤥ꤭ꤙꤢꤩ꤬ ꤗꤢꤩ꤬ ꤟꤢꤨ ꤠꤢꤧ꤭ ꤞꤤꤛ꤫ꤢꤦ꤬ꤔꤢꤪ꤭ꤗꤢꤩ꤬ ꤜꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬꤯ ꤢ꤬ ꤗꤢꤩ꤬ ꤡꤢꤨ꤮ ꤘꤢꤦ꤬ ꤢ꤬ꤞꤤꤕꤜꤢꤪ꤬ ꤗꤢ꤬ ꤢ꤬ꤔ꤫ꤤ꤬ ꤒꤥ꤬꤯ ꤢ꤬ ꤙꤢꤩ꤬ ꤛꤢꤧꤓꤢꤧ꤬ ꤚꤣꤧꤘꤢꤦ꤬ ꤢ꤬ ꤟꤤ꤬ꤓꤢꤦ꤬ꤘꤤꤊꤢꤩ꤬ ꤚꤣꤧ꤬ ꤢ꤬ ꤙꤢꤩ꤬ ꤋꤚꤝꤢ꤭ ꤠꤢꤧ꤭ꤋꤛꤢ꤭꤯#ꤗꤢꤞꤢꤧ ꤁꤀:꤃꤈, ꤜꤢꤨꤊꤢ꤬ ꤁꤄:꤂꤇ 35ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤞꤤꤛ꤫ꤢꤦ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤚꤣꤧꤘꤢꤦ꤬ ꤢ꤬ ꤞꤤꤕꤜꤢꤪ꤬ꤞꤣꤧ꤭ꤖꤚꤢꤩ꤬ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤔꤣꤧ꤬, ꤢ꤬ ꤞꤤꤕꤜꤢꤪ꤬ꤞꤣꤧ꤭ꤖꤚꤢꤩ꤬ ꤊ꤫ꤢꤦ꤬ ꤥ꤬ꤗ꤫ꤢꤩ꤬ꤊꤢꤧ꤭ ꤕꤢ꤭꤯ ꤗꤢ꤬ꤔꤢꤧꤚꤣꤧ꤬ ꤘꤣ ꤠꤢꤧ꤭ꤋꤝꤢ꤬ꤠꤢꤧ꤭ꤋꤛꤢ꤭ ꤚꤣꤧ꤬ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤊꤢꤩ꤬ ꤘꤣꤧꤜꤢꤧ꤬ꤊꤢꤧ꤭ ꤢ꤬ ꤞꤤꤕꤜꤢꤪ꤬ꤞꤣꤧ꤭ꤖꤚꤢꤩ꤬ ꤔꤢꤧ ꤒꤢꤩ꤬ꤞꤤꤋꤚꤢꤦ꤭ꤗꤝꤤ꤭ꤜꤢ꤬ ꤣꤧ꤭ꤔꤣꤧ꤬ ꤘꤣ ꤠꤢꤧ꤭ꤑꤢꤩ꤭ ꤟꤢꤩꤔꤣꤧ꤬, ꤢ꤬ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤛ꤫ꤢꤧ꤬ꤛꤥ꤬ꤞꤣꤧ꤭ꤖꤚꤢꤩ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤕꤢ꤭꤯#ꤗꤢꤞꤢꤧ ꤁꤀:꤃꤉, ꤜꤢꤨꤊꤢ꤬ ꤁꤇:꤃꤃, ꤛꤥ꤭ꤟꤢ꤬ ꤁꤂:꤂꤅ 36ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤜꤢꤪ꤭ ꤡꤣꤧ ꤟꤢꤩ꤬ꤋꤢꤨ꤬ꤏꤤ꤭ꤙꤢ꤬ ꤢ꤬ ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤒꤣꤧ꤬ꤟꤢꤩ꤬ ꤡꤣꤧ ꤚꤣꤧ꤬ ꤢ꤬ ꤊꤢꤩ꤬ ꤜꤣꤧ꤬ꤡ꤫ꤢꤨ꤬ꤊꤢꤧ꤭ ꤢ꤬ ꤛ꤫ꤢꤧ꤬ꤛꤥ꤬ꤞꤣꤧ꤭ꤖꤚꤢꤩ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤣꤧ꤭ ꤟꤢꤩꤔꤣꤧ꤬ ꤢ꤬ꤙꤝꤤꤥ꤬ ꤘꤣ ꤜꤢꤨ꤭ꤑꤢꤩ꤭ ꤤ꤬ꤒꤢꤩ꤭? 37ꤊꤣꤧ꤬ꤛꤢꤧ꤭ ꤘꤣ ꤢ꤬ ꤞꤤꤛ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤢ꤬ ꤛ꤫ꤢꤧ꤬ꤛꤥ꤬ꤞꤣꤧ꤭ꤖꤚꤢꤩ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤣꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ꤔꤣꤧ꤬, ꤒꤢꤩ꤬ꤘꤢꤨ꤬ꤛ꤫ꤢꤧ꤬ꤓꤢꤧ꤬ꤞꤢꤩ꤭ ꤘꤣ ꤢ꤬ ꤊ꤫ꤢꤦ꤬ ꤤ꤬ꤖꤚꤤ꤬ꤙꤢꤩ ꤔꤢꤧ ꤢ꤬ ꤞꤤꤕꤜꤢꤪ꤬ꤞꤣꤧ꤭ꤖꤚꤢꤩ꤬ ꤣꤧ꤭ꤔꤣꤧ꤬ ꤢ꤬ ꤥ꤬ ꤒꤣ꤬ꤡꤣ꤬꤮ ꤒꤥ꤬꤯ 38ꤓꤢꤦ꤭ꤋꤢꤩ꤭ ꤘꤣ ꤢ꤬ ꤥ꤬ ꤏꤥ꤭ꤏꤢꤦꤖꤢꤧ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤩ꤬ꤞꤢꤦꤗꤢꤩ꤬ꤕꤜꤢꤒꤢꤩ꤬, ꤊꤣꤧ꤬ꤛꤢꤧ꤭ ꤘꤣ ꤢ꤬ ꤋꤚꤝꤢ꤭ꤜꤢꤦ꤬ꤗꤢꤩ꤬ ꤒꤥ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤞꤤꤕꤜꤢꤪ꤬ ꤥ꤬ ꤕꤢ꤬ ꤒꤥ꤬ ꤣꤧ꤭ꤒꤣ꤬ꤓꤢꤦ꤭ ꤢ꤬ꤊꤢꤨ꤭ꤣꤧ꤭, ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤘꤣ ꤢ꤬ ꤞꤤꤒꤣꤧ꤬ꤚꤢꤩ꤭ ꤠꤢꤧ꤭, ꤓꤥ꤭ꤒꤥ꤬ ꤢ꤬ ꤞꤤꤒꤣꤧ꤬ꤚꤢꤩ꤭ ꤠꤢꤧ꤭ꤜꤢ꤭ꤠꤢꤧ꤭ꤍ꤫ꤥ꤬ ꤣꤧ꤭ꤒꤣꤧ꤬ꤟꤢꤩ꤬ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤔꤣꤧ꤬, ꤏꤢ꤮ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤗ꤫ꤢ꤬ꤟꤣꤧ ꤠꤢꤧ꤭ꤣꤧ꤭ ꤊ꤫ꤢꤦ꤬ ꤟꤢꤧ꤭ꤟꤣꤧ ꤔꤢꤧ ꤠꤢꤧ꤭ꤖꤢꤩ꤭ ꤢ꤬ ꤒꤣꤧ꤬ꤚꤣꤧ꤭ꤘꤢꤨ꤬ꤒꤣꤧ꤬ꤚꤣꤧ꤭ꤓꤢꤨ꤭ ꤟꤣꤧꤕꤢ꤭, ꤚꤣꤧ꤬ ꤠꤢꤧ꤭ ꤟꤢꤧ꤭ꤒ꤫ꤣ꤬ꤟꤣꤧ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤗꤢꤪꤋꤢꤨ꤬ꤒꤣꤧ꤬ꤔꤢꤩꤖꤢꤨ ꤒꤣꤧ꤬ꤟꤢꤩ꤬ ꤟꤣꤧꤕꤢ꤭ ꤢ꤬ꤋꤢꤩ꤭ꤔꤣꤧ꤬, ꤠꤢꤧ꤭ ꤊ꤫ꤢꤦ꤬ ꤞꤤꤒꤣꤧ꤬ꤚꤢꤩ꤭ ꤊꤣꤧ꤭ꤜꤢ꤭ꤒꤢꤩ꤬ ꤢ꤬ ꤕꤢ꤭꤯”
ప్రస్తుతం ఎంపిక చేయబడింది:
ꤗꤢ꤬ꤊꤢꤨ 8: eky-Kali-MM
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
