Acts 9
9
Sema Inpamatin Saul Cha Jesus
1Si Saul, intolo-toloy ton ena-kot iren ma ematid Jesus, et inpahat toy kabaalan ton mengipabono ira. Isonga, kimowan cha kad-an na kahejangan a pari, 2et iyanbaga na solat say ibiybiy to ired ma naengibalbalnay cha synagog cha siyodad na Damascus tep say no gwariy toon sebien Saul a ematid Jesus, angken daleki ono bibii, gwariy karebengan ton menmet ira say odofen to ired Jerusalem.
3Et idi manbibiyahis Saul cha Damascus a man-eesop med ma siyodad, biglen gwariy nihal a edafo did dangit a kimi-ki-dat et sinilowan to. 4Et iya-kas cha pithek, et gwariy inki-ngelan ton esel a kigwan to i “Saul, Saul, niyana mowan padigathiak?” 5Et insongbat Saul i “Afo, siya ka aya?” Et kigwan na man-eesel i “Si-kak si Jesus a mowan padigathi. 6Akgwat ka et tahed ma siyodad, et gwared man i sa-kin toon mengowan cha si-kam no nengoy mesepol a a-magen mo.”
7Sema iren dalekin ekikadgwed Saul, imakgwat ired man a iyasdaaw a imeke-eket ira. Inki-ngelan cha ngo ma esel, nem nagwariy sini-neng cha. 8Et imakgwat si Saul, nem idi kimemjat, eg mahasi-neng. Et chigwat cha et inbalnay ched Damascus. 9Epalabas i tedon akow et nat mahasi-neng pay laeng si Saul, tan nat enga-engan tan iyan-ino-inom.
10Gwariy dahid Damascus a ematid Jesus a iyanngaran na Ananias. Iyanparang si Jesus cha si-katho babaen na singen kokip a kigwan to i “Ananias.” Et insongbat Ananias i “Ajaak, Afo.” 11Et kigwan Jesus i “Tahed ma kalsaren engaranan na Diritso. No sebien moy baliy Judas, ibagam no gwariy dahid man a i-Tarsus a iyanngaran na Saul. Gwared man a mankakararag. 12Tep gwariy inbiybiy kod si-katho babaen na singen kokip a sema dahin iyanngaran na Ananias, onsekep chiwa kad-an to et isagpat toy diwa thod si-katho say mahasi-neng mowan.” 13Nem kigwan Ananias i “Afo, chakel i toon engiistoriyed si-kak maypangkep niwa too tan sema ima-imag ton ngaaw ired ma toom cha Jerusalem. 14Et niman, ajed Damascus, et in-i-kan na aafo na papariy karebengan ton menmet kawin emiin a naematid si-kam.”
15Nem kigwan Jesus mowan i “Taha tep si-kathoy pinispis kon mengipaamta maypangkep cha si-kak ired ma Gentiles tan aari cha tan poli-polin Israel. 16Et ipaamtak ngod si-katho i chakel a diga-digat a mesepol a da-kaman to kagol na pematian tod si-kak.”
17Et kimowan si Ananias chiwa baliy et simekep. Et insagpat toy diwa thod Saul a kigwan to i “Saul a ahik, si Afo Jesus a iyanparang cha si-kam chiwa kalsara nonta mankokowan ka did jay, into-no thoak ali say mahasi-neng ka wa mowan tan say may-i-kanan ka na Ispirito Santo.” 18Et biglen gwariy iya-kas alid mathen Saul a singen siksik na paideng, et mahasi-neng mowan. Et imakgwat si Saul et ebonjagan. 19Idi ebonjagan ma, engan et kimedsang mowan i angel to.
Iyankasabes Saul Cha Damascus
Imonong si Saul ired ma ematid Damascus na piyen akow. 20Et kimowan a chakos cha emiin a synagog et inkasaba thos Jesus a kigwan to i “Si-kathoy Anak Afo Chiyos.” 21Emiin a iyanki-ngel na inkasaben Saul, iyasdaaw iren kigwan cha i “Nat sejay ayay toon naengipadigat iren ma naematid Jesus cha Jerusalem? Say podnon kagol na kimowanan to did jay, say chedmethen to ngo iriy naematid jay et say odofen to ired ma aafo na paparid Jerusalem.” 22Nem sema daing Saul a mantoro maypangkep Jesus, iya-a-choman. Mafoot i paneknek to i si Jesus i Cristo, et sema iren Hodjos a naiyan-iyan cha Damascus, nat mahasongbat cha si-katho.
23Idi epalabas i chakel a akow, iyantotolag iriy Hodjos a memonon Saul. 24Gwiya-gwa-gwa tan diyagwi-dagwi, nabiyantayan chiy sakepan na siyodad say bonoen cha no on-awas ali. Nem iyamtaan Saul i plano ra. 25Isonga, idi sa-kin dagwi, sema iren ematin naimonod cha Saul, iyodop ched tapow na tofing a iyandikmot chiwa siyodad. Inpakeb-ong ches Saul cha banay a basket, et insa-kod cha say mahabetik.
Imolis Saul Cha Jerusalem
26Idi mimothok si Saul cha Jerusalem, piyan ton mekika-chom ired ma emati. Nem tiyakothan chen emiin tep nat piyati ra i emati wes Saul. 27Nem iyodop Barnabas si Saul ired ma apostolis et in-istoriya thoy inpasing Saul a eni-neng Jesus cha kalsaren ontorong cha Damascus tan sema kigwan Jesus cha si-katho. Kigwan to ngo inpasing Saul a etoled a iyankasaba maypangkep Jesus cha Damascus. 28Et ekiiyan si Saul ired ma ematid Jerusalem, et etoled a iyankasaba maypangkep Jesus. 29Et ekitebal tan ekidiskotil ired ma Hodjos a Greek i esel cha, nem piyan chen bonoen. 30Idi iyamtaan iren ma echom ton emati i piyan iren ma Hodjos a a-magen, iyodop ches Saul cha Caesarea et into-no red Tarsus. #9:30 Caesarea tan Tarsus, siyodad ira man.
31Et nagwara wiy pemedigat iren ma ematid intiron Judea, Galilee, tan Samaria, tan sema pamati ra, mas kimedkedsang. Et iya-a-choman ira ma emati tep narinispiktar ches Afo Chiyos tan natiyolongan to ira na Ispirito Santo.
Inpamapteng Peter Si Aeneas Tan Si Dorcas
32Si Peter ngo, kimowan cha chakel a dogad a manbisita iren ma ematid Jesus. Idi sa-kin akow, kimowan ngon manbisita iren ma ematin naiyan-iyan cha siyodad na Lydda. 33Nonta gwared man, iyansagwi na dahin iyanngaran na Aeneas a naiyan-oli-olig na olay na gwalon tawen tep eg mahakiykiykiy. 34Et kigwan Peter cha si-katho i “Aeneas, niyan-ipamapteng toka wen Jesu Cristo. Akgwat ka et kofikop mo ta kamen mo.” Et imakgwat a chakos si Aeneas. 35Et emiin a toon naiyan-iyan cha Lydda tan Sharon, mita ra ma dahin man-aahad ma, et emati wa ired Jesus. #9:35 Sema siyodad na Lydda, gwared sahop na Sharon. Sema sahop na Sharon, gwared kilig na baybay a Mediterranean.
36Gwared siyodad na Joppa i sa-kin biin ematin iyanngaran na Tabitha a sema banag to, Dorcas. #9:36 Sema banag na Tabitha tan Dorcas, makgwas ono olsa ono osa. Naengamag na olay na mapteng para cha echom tan natimolong na olay cha iyangkebitheg. 37Idi gwares Peter chiwed Joppa, iyansahit si Dorcas et etiy. Et inmes chiy angel ton in-olig ched kwadtod kayang. 38Iyay-esop i Lydda cha Joppa. Isonga, sema iren ematid Lydda, idi inki-ngelan cha i gwares Peter cha Joppa, engito-no ira na chegwen dalekin mengodop alin Peter cha Lydda. Idi mimothok ira ma dalekid kad-an Peter, kigwan cha i “Pangpangaasim, kanoim say onkowan kiyed siyodad mi.” 39Et ekikowan si Peter cha si-kara. Idi mimothok si Peter cha baliy na etiy, inbalnay ched kayang cha kad-an na etiy. Et sema iren bibiin iyangkebalo, biyo-ngolan ches Peter a mannanangis, et inbiybiy chiy ima-imag Dorcas a baro para cha si-kara nonta sibibiyag. 40Et inpaawas Peter i emiin a too, et iyantalimohod a iyankararag. Et singo thoy etiy a kigwan to i “Tabitha, bangon ka.” Et kimemjat si Dorcas, et idi mita thos Peter, bimangon. 41Iyagchian Peter i diwa tho et tiyolongan to din imakgwat. Et tiya-gway to ira ma iyangkebalon bibii tan echom a emati, et inparang tos Dorcas a iyanpawil. 42Emiin a toon gwared Joppa, inki-ngelan chiy epasamak cha Dorcas, et chakel i emati wed Jesus. 43Et imeket si Peter chiwa Joppa na chakel a akow a ekiiyan cha toon para amag na kathat a iyanngaran na Simon.
ప్రస్తుతం ఎంపిక చేయబడింది:
Acts 9: KAR
హైలైట్
షేర్ చేయి
కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023 Wycliffe Bible Translators, Inc. All rights reserved.