Acts 10
10
Kimowan Si Peter Cha Baliy Cornelius A Romano A Kapitan
1Gwariy dahid siyodad na Caesarea a iyanngaran na Cornelius. Si-kathoy kapitan na sandasos a solcharon iyanngaran na Gropon i-Italy. 2Angken Gentile si Cornelius, ematid Afo Chiyos et nachijaw to, pati emiin a toon naiyan-iyan cha baliy to. Banay i tolong Cornelius ired ma Hodjos a iyangkebitheg, tan naintolo-toloy ton iyankararag cha Afo Chiyos. 3Idi sa-kin arachem a chanchanin alas tris, gwariy inbiybiy Afo Chiyos cha Cornelius a anghil babaen na singen kokip. Sini-neng Cornelius i anghil a mansesekep cha kad-an to, et kigwan na anghil i “Cornelius.” 4Innekel Cornelius iwa anghil tep epaladoy tahot ton kigwan to i “Niyana, Afo?” Et insongbat na anghil i “Naniyemnemnem token Afo Chiyos tep inki-ngelan toy kara-kararag mo tan sini-neng ton emiin i ima-imag mon ontolong cha iyangkebitheg. 5Pengito-no ka na dalekin onkowan ired siyodad na Joppa say ta-gwayen chiy sa-kin toon iyanngaran na Simon Peter. 6Naekiiyan cha Simon a para amag na kathat a gwariy baliy tod kilig na baybay.” 7Idi iyakcheng a kigwan na anghil iwan cha Cornelius, bimetik mala. Et ena-gway si Cornelius na chegwen bagaen tan sa-kin solcharo thon naiyanchayaw ngod Afo Chiyos. 8In-istoriya thon emiin iwa epasamak cha si-katho, et into-no tho wa ired Joppa.
9Idi gwa-gwa thon chanchanin alas dosi, sema iren toon into-non Cornelius, man-aahad iren man-eesop cha Joppa. Nontan a oras, sima-pat si Peter cha toktok na baliy Simon say mankararag. 10Et aofa wes Peter et piyan ton mengan. Idi chiyan isaganiy kakanen to, gwariy inbiybiy Afo Chiyos cha Peter babaen na singen kokip. 11Mitha thoy dangit a edohatan et gwariy mansa-sa-kod cha kad-an ton singen banay a ketap a emangkaiba-jat cha epat a soyok to. 12Sema gwared ma ketap, emiin a animal, sema iren nakimorong, tan sema iren natimayab. 13Et gwariy esel a kigwan to i “Peter, akgwat ka. Panparti ka et pengan ka.” 14Nem insongbat Peter i “Pangaasim, Afo, enchi! Tep ekak enga-engan na iyayparit ono ensekig cha dinteg mi.” 15Et imesel mowan iwa esel a kigwan to i “Enog i kigwan i nat mengan ka na iyayparit a mekan iy inpadinis malen Afo Chiyos.” 16Emintedon epasamak iwan, et kimayang mowan i ketap cha dangit.
17Idi niyannemnemnemen Peter i banag na mita tho, sema iren toon into-non Cornelius, mimothok ired Joppa, et inbaga ra no toy kad-an na baliy Simon a para amag na kathat. Idi sipol cha, imakgwat ired ma sakepan to. 18Et kimeljaw iren inbaga ra no gwariy toon naiyan-iyan chithan a iyanngaran na Simon Peter? 19Si Peter ngo, idi towan nemnemnema pay i banag na inbiybiy Afo Chiyos cha si-katho, kigwan na Ispirito Santod si-katho i “Gwariy tedon dahin ahay mothok ched jay a chiyan anafa ka. 20Tahed sa-kod et enog i chegwa-chegwen mekiolop cha si-kara tep si-kak i engito-no ira.” 21Et sima-kod si Peter a kigwan to ired ma daleki “Si-kak i jowan anafa. Niyana kimowan kayo di?” 22Insongbat iren ma daleki i “Into-no tho kawi din Kapitan Cornelius chiyay. Maronong a too, tan nachijaw tos Afo Chiyos, tan emiin a echom mon Hodjos, narinispiktar cha. Kigwan na esantoan a anghil cha Cornelius i ta-gwayen miken onkowan alid baliy to say iki-ngelan toy konen mo.” 23Et kigwan Peter i onsekep ired ma baliy say mejo-kow ired man.
Idi gwa-gwa tho, ekiolop si Peter ired ma daleki, et sema echom a ematin naiyan-iyan cha Joppa, kiyadgwaan cha. 24Et nonta maykadgwen akow, mimothok ired Caesarea, et niyansekera iren Cornelius, pati aahi tan kakajem ton tiya-gway to. 25Idi simekep si Peter cha baliy Cornelius, iyaspol Cornelius et iyantalimohod cha sangoanan ton menejaw. 26Nem si Peter, inpaakgwat tos Cornelius a kigwan to i “Akgwat ka tep tooak bengat a inges mo.” 27Idi mantetebal ira, simekep ired ma baliy, et miten Peter i chakel a toon esa-sa-nop chiwan. 28Et kigwan tod si-kara i “Sigoradoak i amta yo i iyayparit i mekikadgwa kawin Hodjos ired ma nat Hodjos. Nat mebedin i angken manbisita kawid si-kara. Nem inpaamten Afo Chiyos cha si-kak i nagwara komiy toon ibilang kon iyayparit ono ensekig. 29Isonga, idi tiya-gway joak, ekak iyanpangpangbal, no diket kimowanak alin chakos. Et niman kowan ibaged si-kayo no niyana tiya-gway joak.”
30Et insongbat Cornelius i “Nonta epat den akow a chanchanin alas tris na arachem a inges to niman, mankakararagak chiya baliy ko, #10:30 epat den akow Nainbilang iren ma Hodjos i parti na akow a san-akow. Isonga, sema akow a iyanparang i anghil cha Cornelius, sema pilmiron akow. Sema akow a mimothok i tothoon Cornelius cha kad-an Peter, sema maykadgwen akow. Sema akow a bintihan iren Peter i Joppa, sema maykatdon akow. Tan sema akow a mimothok ired baliy Cornelius, sema mayka-pat a akow. et biglen sema dahin iyanbaro na mandingsi, man-ak-akgwat cha sangoanan ko. 31Kigwan to i ‘Cornelius, inki-ngelan Afo Chiyos i kararag mo, et naniyemnemnem ton emiin i ima-imag mon ontolong cha iyangkebitheg. 32Isonga, pengito-no ka na dalekin onkowan ired Joppa say ta-gwayen chiy sa-kin toon iyanngaran na Simon Peter. Naiyan-iyan cha baliy Simon a para amag na kathat a gwariy baliy tod kilig na baybay.’ 33Isonga, tiya-gway tahen chakos, et salamat a kimowan ka di. Et niman aja kawin emiin cha sangoanan Afo Chiyos say iki-ngelan min emiin i inbilin Afo Chiyos i konen mo.”
34Et imesel si Peter a kigwan to i “Iyamtaan ko wa i podnon nat naindasin Afo Chiyos i too, 35no diket egwathen ton emiin i toon naiyanchayaw cha si-katho tan naengamag na mapteng, angken ton iliy edafoan cha. 36Amta yoy mapteng a chamag a inpaamten Afo Chiyos cha si-kawin poli-polin Israel a mebedin men onmapteng i pekitimpoyog na tood Afo Chiyos kagol na ingkathiy Jesu Criston Afo na emiin a too. 37Tep iyaychamag iwa mapteng a chamag cha Galilee et cha emiin a doga-dogad cha Judea a iyanchogid timpon iyakcheng a inkasaben John a Naemonjag i mesepol a manbabawiy tothoo et mebonjagan ira. 38Amta yo i in-i-kan Afo Chiyos i panakabalin to tan Ispirito Santod Jesus a i-Nazareth. Amta yo i iyanbiya-biyahis Jesus a engamag na mapteng tan inpamapteng ton emiin i toon inpadigathan na Diablo tep gwares Afo Chiyos cha si-katho.
39“Si-kawin apostolis, mita win emiin i imag Jesus cha Jerusalem tan cha echom a doga-dogad cha ili na Hodjos. Et biyono ren indansa red koros. 40Nem idi maykatdon akow na ingkathiy Jesus, inpanpawil Afo Chiyos et inpasi-neng Afo Chiyos. 41Sema iren toon iyaybiybiyan Jesus, nat emiin a too, no diket si-kawin sigod a pinispis Afo Chiyos a tistigo. Idi iyanpawil mes Jesus, mita wi ngo tan ekipangan tan ekiinom kawid si-katho. 42Et si Jesus i emilin kawi i mankasaba kawi na mapteng a chamag ired ma too. Kigwan to ngo i tistigoan mi i si-kathoy pinispis Afo Chiyos a mengowis na emiin a too, pati sibibiyag tan etiy. 43Et si Jesus ngoy engibanagan na emiin a profita nonta tinistigoan cha i emiin a mematid si-katho, mepekawanan i basol cha kagol na ingkathiy to.”
In-i-kan Afo Chiyos I Ispirito Santo Ired Ma Gentiles
44Idi man-eesel pay si Peter, sima-kod i Ispirito Santod emiin a toon manki-ki-ngel na towan kona. 45Et sema iren Hodjos a ematin ekikadkadgwed Peter, iyasdaaw ira tep in-i-kan ngon Afo Chiyos i Ispirito Santod angken Gentiles. 46Amta ra i epasamak iwan tep man-eesel ira ma Gentiles na ekila-kilasin esel a eg cha amta, tan chija-chijaw ches Afo Chiyos. Et kigwan Peter i 47“Seja tothoo, iyay-i-kanan ira na Ispirito Santon inges tayo. Gwara ayay toon mengowan i nat mebonjagan koma ira?” 48Et binidin Peter ires Cornelius i manpabonjag ira say ibiybiy chen emati wa ired Jesu Cristo. Et inbaga iren Cornelius i mekiiyan si Peter cha si-kara na sankaatihan a akow.
ప్రస్తుతం ఎంపిక చేయబడింది:
Acts 10: KAR
హైలైట్
షేర్ చేయి
కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023 Wycliffe Bible Translators, Inc. All rights reserved.