Matej 3
3
O Jovano savo bolelas objavisarel e Isuses
1Ande godoja vrjama o Jovano savo bolelas počnisardas te propovedil ande judejsko pustinja. 2Thaj phenelas: “Pokain tumen pale tumare bezeha thaj obratin tumen e Devlešće kaj si o Carstvo nebesko paše!” 3O proroko Isaija phenelas palo Jovano kana prorokuisardas:
“Vo si o glaso savo čhol muj ande pustinja:
‘Pripremin o drom palo Gospod,
vorton e staze pale leste!’”
4A o Jovano inđarelas pe peste drze save sas ćerde katar e kamilaće bal, a oko maškar sas les morćhako pojas. O habe lesko sas e skakavcurja thaj o divljo medo. 5Leste avelas o but o them andar o Jerusalim, andar e Judeja thaj andar sa e krajurja oko e reka Jordan. 6Ispovedinas lešće pire bezeha, a vo bolelas len ande reka Jordan.
7A kana o Jovano dikhla e but e farisejen thaj e sadukejen kaj aven leste te bolel len, phendas lenđe: “Tumen e sapešće čhavra! Koli upozorisarda tumen te našen katar e Devlešći bari holji savi avel? 8Sikaven tumare trajosa thaj tumare plodonenca kaj pokajisardine tumen katar tumare bezaha. 9Thaj na hohaven korkoro tumen kaj si tumenđe dosta te phenen: ‘Amen sam e Avramešće potomkurja’ kaj phenav tumenđe: o Del šaj vi katar akala bara te vazdel čhavren e Avramešće. 10O tover e Devlešće sudosko već si čhutino po koreno e kaštesko. Svako kaš savo či bijanel lačhe plodurja čhinelape thaj čhudelape ande jag.
11Me bolav tumen e pajesa, palo pokajanje katar tumare bezeha. Ali avel vareko posle mande ko si majmoćno mandar, kašće naj sem dostojno e sandale te inđarav. Vo bolela tumen e Sveto Duhosa thaj e jagasa. 12Vo si spremno te losarel o kućin e đivesko katar e pleva. O điv ćidela thaj spremila ande piri žitnica, a e pleva dela jag e jagasa savi naštik mudardol.”
O Jovano bolel e Isuse
13Askal avilo o Isus andar e Galileja pe reka Jordan te o Jovano bolel les. 14A o Jovano či kamlas te bolel les thaj phenelas lešće: “Tu trubul man te boles, a tu aves mande te me bolav tut?” 15A o Isus phenda lešće: “Muk akana, kaj agajda trubul amenđe te pheras e Devlešći pravedno volja.” Askal o Jovano bola les.
16Pale godova kana sas o Isus boldo thaj čim inkljisto andar o paj. Thaj dik! O nebo putajlo thaj vo dikhlas e Devlešće Duho sar fuljel sago golubo thaj mućel pes pe leste. 17Askal o glaso andar o nebo ašundilo: “Akava si mungro Čhavo, saves voliv. Vo si mungri bah.”
ప్రస్తుతం ఎంపిక చేయబడింది:
Matej 3: RČB
హైలైట్
షేర్ చేయి
కాపీ
Want to have your highlights saved across all your devices? Sign up or sign in