ปะทมมะกาน 13
13
อับรามละตาฮนังนึอัอดกับโลด
1-2เจอฮาไนอับรามกับละกวยคองอัน ก็ลอฮดิตาฮปะเทดอียิบ อับรามอะไนก็ซกร็างอะเลอ อันเบินซัดซาวาซิง เบินปราะเบินทองคำอับ เจออันก็เอดโกรกรูอะคองอันอะปัอะนำจนญิ อะไลลอฮปัอะอัอดแทวพากตายคองกะแตะคานาอันอะกีแอน เจอโลด นาก็ปันละมอนคองอัน ก็ปัอะมะนืยกับอับรามเต
3เจอฮาไนอะไลก็ลอฮดิแอน ตาฮพากตายคองกะแตะคานาอันอะกี เจอก็ปัอะเลือย ๆ จนตัอะเมืองเบดเอล ปัอะตัอะบอนนาก็อะไลเกยอัอดแตเกา ปันบอนนาก็อะไลเกยต็างเต็นอัอดละวางเมืองเบดเอลกับเมืองอัยอะกีออยะ 4ไนเมืออะไลปัอะจนตัอะบอนนาก็อับรามเกยตาะบอนปะจีาอะดอะเจอ อับรามเลิดซันเซินอะทิดทานอะโรจอ์ะเยโฮวาอัอดตีกีแอน
5เจอโลดนาก็ปัอะมะนืยกับอับรามอะกี อันก็เบินเต็นซะเอยลำ เจออันก็เบินทังแพะ ทังแกะ ทังตะแกง อับอะเลอ 6-7กะแตะบอนนาก็อะไลอะไซอัอดตีกีเลิดตัอปูอนัง พอะปายซัดซาวาซิงคองอะไลบาลนาะอะกี ก็เบินอับอะเลอ ตัอปายคองอันจายฮ ตัอปายคองละมอน เจอกวยคานาอัน กับกวยเป-ริดซี ก็นังอัอดตีกีอัอด บอนอัอดคองอะไลเลิดอีรูอม กวยเลียงซัดคองอับราม กับกวยเลียงซัดคองโลด เลิดละแลฮนังนึ ตำปอ์ลบอนนาก็ซีเลียงซัด
8ไนเมืออันปันอังกิเจอ อับรามเลิดเวานึงโลดปาย "ไฮซูละแลฮนังนึทัอะ! ซูออ์นกวยเลียงซัดคองไม กับกวยเลียงซัดคองอังกอะละแลฮนังนึ พอะไฮก็ปันแซมอัอยมะนืย 9เฮะลาะ กะแตะนาก็อัอดตอมัดไฮอะไนก็เบินอับอะเลอ ไฮอัมแปะนังนึอัอดทัอะ ค็านไมซีปัอะยาฮซาย กึก็ซีปัอะยาฮคูอ ลือค็านไมซีปัอะยาฮคูอ กึก็ซีปัอะยาฮซาย"
10-13บัดอับรามเวาอังกิเจอ โลดเลิดตะป็างอะเฮะยาฮลบ ยาฮอัมเปะดัอะจอแดนอะกี เจออันก็โฮมปายอัมปลาฮไนเบินดัอะซมบูนอัอดญิกูบอน อีกือซวนเอเดนบอนนาก็เยโฮวาตาะอะดอะแตเกา กับอันอีกือกะแตะนึงปะเทดอียิบนึงยาฮเมืองโซอาอะกี โลดเลิดเรือฮเอดกะแตะนาก็ลบ นาก็เบินอัมเปะดัอะจอแดนอะกีออยะ ออ์นปันซวนคองอัน โลดปัอะอัอดยาฮมะนางลอฮ อะไลบาลนาะเลิดละตาฮนังนึปัอะ
อับรามก็นังอัอดนึงบอนกะแตะคานาอันอะกีอัอด ฮักโลดบัดญีายเต็นคองอันปัอะอัอดตามเมืองอะไนเมืองอะกี อัอดแทวอัมเปะดัอะจอแดนอะกีออยะ จนอันปัอะอัอดละแจะกับเมืองโซโดม กวยนาก็อัอดนึงเมืองโซโดมอะกี ปันกวยนาก็ซัวอะเลอ อะไลตาะมังเนวโลยฮ ตาะมังเนวนาก็ตัอกลับกับมิดคองเยโฮวาไง (ซวงกีเยโฮวานังตุนทำลายเมืองโซโดมกับเมืองโกโมราอะไนอัมปิน)
พูซางออ์นอับรามอะเฮะกะแตะนาก็อันซีมูอบออ์น
14ไนเมือโลดลอฮปัอะเจอ เยโฮวาก็ตัอะเวานึงอับรามแอนปาย "ออ์นไมตะป็างเฮะเดิว กะแตะบอนนาก็ไมอัอดจะนูอ ออ์นไมตะป็างปัอะยาฮเนือ ยาฮตาย ยาฮมะนางลอฮ กับยาฮมะนางอันตรุฮ 15กะแตะแทวไนกึซีออ์นไมจนญิ นาก็ไมตะป็างโฮมอะไน กึซีมูอบออ์นไม ทังกอนเจาคองไมปัอะเลือย ๆ 16กึซีออ์นไมเบินกอนเจาอับอะเลอ จนซีซำกลองกะแตะจัวฮ ตัอเบินมะเลอนาก็ซีปันนับกลองกะแตะจัวฮ เจอกอนเจาคองไมก็ซีอับจนนับตัอกูแบบไนคือกัน 17ออ์นไมตะยาฮลอะเฮะเดิว กะแตะอะไน ออ์นไมตะยาฮเลียบออ์นตัวทังลวงกะตี ทังลวงละอา พอะกึซีมูอบกะแตะอะไนออ์นปันกำมะซิดคองไมจนญิ"
18เจออับรามก็ญีายเต็นคองอันแอน ปัอะอัอดบอนแก็ลอะลูองปูด นาก็ปันกะแตะคองมัมเรอะกี นึงบอนนาก็เบินแก็ลอะลูองปูดอะไน อะไลทือปายปันบอนนาก็ซักซิด อันอัอดนึงเคดกะแตะคองเมืองเฮโบรน เจออับรามก็เอดโงลตะเมากออะซอฮ ตาะบอนปะจีาออ์นเยโฮวาอัอดตีกีแอน
ప్రస్తుతం ఎంపిక చేయబడింది:
ปะทมมะกาน 13: Bru Bible
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
- Ethnos360
