Genesis 19
19
Sodoma Gomorra malcactam camacaycun
1Chay ishcay anjilcunämi inti jiꞌalpuyaptinña Sodoma malcaman ćhälälin. Lotñatac chay malcap puncunćhu täcuyäña. Chaymi licälul-pacha ćhasquïnin śhalcuculcul pampäcama uyshucuycula: 2“Taytacuna, nunayquim callá; ama chaynu capäcullaychu wasïta lilläśhun jamaculcänayquipä, ćhaquiquitapis paꞌaycälinacpä. Wälamanñaćh pasaculcanqui” nin.
Niptinmi paycunañatac: “Sulpá callächun, ñatac yaꞌacuna cällillaćhümi wälapäcuśhä” nin.
3Chaynu Lot jicutapayalmi awnïchila; jinalmi wasinta lipäcula. Chayćhümi jatun cumbiducta lulal mana libadürayu tantactapis micapäcula.
4Ñatac manaläpis cämanman uśhtupäcuptinmi Sodoma malcapi lluy-lluy nuna awquishcunapis, müsucunapis Lotpa wasinta cunćhacaycälin. 5Jinalculmi Lotta ayaycaćhaypa nicuyalcan: “¿Mayćhümi cayan jamapacunanpä ćhämu nunacunaca? ¡Waśhaman wicapamuy abusapäcunäpä!” nil.
6Niptinmi Lot paycunawan limä yalulcul puncunta wićhaculcullal nin: 7“Malcamasïcuna ama chaynu caychu; amari chaynu mana allintá lulapäcullaychu. 8Wasïćhu jamapacü nunacunäta ama imactapis lulaycäliychu. Aśhwanpa umricta manalä lisï ishcay wamläta uycälishayqui munaśhayquita paywan lulapäcunayquipä” nil.
9Niptinmi paycuna nicuyalcan: “¡Chincay ñawïpïta! ¡Yaꞌacunapi manalä cayalchun mandätucu-cayalcämanquimanlä canpis imatá! ¡Cananmá paycunapïtapis mas piyurtalä lulapäcuśhayqui!” nil.
Nilculmi Lotpa jananman paćhcaycälimul puncucta cućhpächiyta munacuyalcan. 10Chayćhümi chay ishcay jamapacücunaca chacchalcamul Lotta wasi luliman aysaycul, puncucta juclla wićhälälin. 11Waśha puncućhu uchuyllapis awquishpis lluy cäcunätañatacmi aplächin. Jinaptinmi mayćhu puncu caśhantapis mana talil chaplaycaćhaculcäla.
12Jinalculmi chay jamapacücunaca Lotta nin: “¿Cayanlächun juc aylluyquicuna? Wamlayquicunactapis, maśhayquicunactapis lluy cäniquicunactapis cay malcapïta aśhuchiy. 13Cay malcap mana allin lulaynincunapi quijacuynin Tayta Dioscamañam ćhälun. Chaymi tincüninmannu mana caśhanman muyuchipäcunäpä caćhapämäla” nil.
14Chaymi Lot wamlanwan cuscananpä limay-masincunacta willaycamü lila: “Apurayllaña caypi yaluśhun, Tayta Diosmi cay malcacta camacaycülunꞌa” nil.
Paycunañatacmi: “Yanꞌalćha nipayäman” nipäcula. 15Ñä achicacalpuyaptinmi anjilcunaca Lotta nin: “Apurayllaña walmiquita, ishcay wamla chuliquita puśhaculcul licuy; cay malcacta mućhuchishanca mana chalaśhunayquipä” nil.
16Chayćhu muspaypanu muspacuyaptinmi chay nunacunaca Tayta Diospa llaquipayninwan Lotta, walmintinta, chulintinta maquipïta chancuśhtin malcapïta waśhaman puśhälun.#2Ped 2.7. 17Chay waśhaćhu cayalcaptinñam jucnin anjilca: “¡Ayiculcay! Ipamanpis mana licalcullal pampacunäćhüpis nï śhaycuycullal ulꞌüman ayiculcay; yanꞌalätac wañülu imanquiman” nin.
18Niptinmi Lot: “Taytacuna, ama chaynu callaychu, 19cay nunallayquita chalapacuna caśhayquiwan llaquipaycamalmi cawsaynïtapis salbaycallämanqui. Ulꞌüman ćhayta mana atipaptïćha mućhuchicuyca alcansämal wañüchimanman. 20Aśhwanpa cayniscallaćhu tacsha malcallaman ayilćha iscapäman. Chayman ayinäpäri awniycallämay. Rasunpa chay uchuy malcallaman ayilćha iscapayculläśhä” nin.
21Niptinmi jucnin: “Cay mañacuyniquita uyalilmi, cay nimäśhayqui malcacta mana mućhuycachishächu. 22Ñatac wayrallañari chayman ayiculcay. Ćhäpäcunayquicama manalämi imactapis lulaśhächu” nil. Chaymi cay malca “tacshalla”#19.22 tacshalla ninanꞌa hebreo limayćhu “Zoar” niyanmi. nisha cala.
23Chay tacsha nishan malcäman inti ishpinayämuptinñam Lot ćhälälin. 24Chaylämi Tayta Dios janay pachäpïta asufriwan ninacta Sodoma Gomorra malcäman tamyächimula. 25Chaynüpam chay jinantin malcaca lluy imapis cänintin lluy wiñänintin sumä camacaycüśha cala.#Mat 10.15; 11.23-24; Luc 10.12; 17.29; 2Ped 2.6; Jud 7. 26Ñatac Lotpa walmin#Luc 17.32. ipaman muyulcülulmi suytu caćhiman śhäcuyal licalïla.
27Chay wäla Tayta Dioswan limanancäman Abraham ishpishanćhümi, 28licälun Sodoma Gomorra malcapi urnupïnu sumä-sumä untaylla ishpiyämüta. 29Chaynüpam Tayta Dios camacaycüla. Ñatac Abrahamta yalpalculmi chay jinantin malcacunacta camacaycüśha canancäpi Lotta juluycula.
30Chay tacsha nishan malcaćhu yaćhayta manchaculmi ishcaynin wamla chulinwan ulꞌüman Lot liculcäla. Chayćhümi maćhayllaćhu yaćhapäcula. 31Chaypïtam mayurca śhullca ñañanta nin: “Papäninchic awquishñam cayan; custumrinchicmannu casaracunapä cay lädućhuꞌa manam juc müsupis canñachu. 32Chayurá papäninchicta bïnuwan shincalcachil paywan puñuśhun milayninchic mana camacänanpä” nil.
33Ninaculculmi chay tuta shincalcachil mayurca puñula. Papäninñatacmi uśhtuycamuśhantapis, śhalcuśhantapis imanaśhantapis uchuyllapis mana musyalachu. 34Chay walantinñatacmi mayurca śhullcanta nin: “Anyan tuta papäninchicwan puñülümi. Cananpis shincächishun ampis puñunayquipä. Chayćha taytanchicpa milaynin mana chincanꞌañachu” nil.
35Ninacalcälilmi chay tutapis shincalcachil śhullcaca papäninwan puñula. Papäninñatacmi uśhtuycamuśhantapis, śhalcuśhantapis, imanaśhantapis uchuyllapis nï musyalachu. 36Chaynüpam papänin Lotpacta ishcaynin patalapäcula. 37Mayurcämi walaśhta ishyacülul Moab nïwan śhutichäla. Paypïmari Moab caśhtacunaca miläśha. 38Chay śhullcanpis ishyacüla walaśhtam. Paytam Ben-ammi nïwan śhutichäla. Paypïmari Amon caśhtacunaca miläśha.
ప్రస్తుతం ఎంపిక చేయబడింది:
Genesis 19: QVW
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022, AMWAN (Old Testament text)
© 2006, Wycliffe Bible Translators, Inc. (New Testament text)
Print copy NT 2006, Liga Bíblica del Perú
