Genesis 17
17
Tayta Dios nishannümi Abram siñalaculcan
1Ñatac Abram isun ćhunca isunniyu (99) watanta liyaptinmi Tayta Dios licalilcamul nin: “Yaꞌami sumä munayniyu Tayta Dios cá, munaśhämannu allincällaćhu sumäpa cawsaycuy. 2Amwanmi limalicuynïta tacyalpachí; milayniquim achca-achcaman milaycachisha canꞌa” nil.
3Niyällaptinmi cäranpis pampäman ćhänancama Abram unꞌulacuycula. Chayćhu Tayta Diosꞌa jinallalämi limayäla: 4“Anman limalicuśhäca caymi: Achca-achca nasyuncunap taytanmi canqui. 5Caynu achca nasyuncunap taytan caśhayquipïmi Abram nishañachu mana canqui, sinuꞌa Abraham nishañam.#Rom 4.17-18. 6Achca-achcaman milachiptïmi malcacunapis licalinꞌa, mandacücunapis ampi yalapämunꞌa. 7Cay limalicuśhäca ampäwan milayniquipämi wiña-wiñaypä canꞌa. Yaꞌami Tayta Diosniqui ampäpis lluy milayniquipäpis caśhä. 8Cay pulishayquïtawan jinantin Canaan allpätam amtapis lluy milayniquicunactapis wiña-wiñaypä uycuśhä.#Hch 7.5-6. Yaꞌañatacmi Tayta Diosnin caśhä” nin.
9Chaypïta Tayta Dios Abrahamta yapam nin: “Cay limalicuynïta lluy milayniquicunawan wiña-wiñaypämi śhunꞌuyquićhu uywapäcunqui. 10Cayta ampis milayniquicunapis lulanayquipämi limalicuyá: Milayniquićhu lluy walaśhcunam siñalachiculcanꞌa.#Hch 7.5-6. 11Siñalachiculcanqui umri cayniquićhu utachanta uchuyllacta cuchuyculmá. Caymi amwan limalicuśhäta camalachinꞌa. 12Näsishanpi pusä muyunta liyaptinmi lluy walaśh iñachacunaca unanchaycuśha capäcunꞌa. Caynu lulapäcunqui lluy milayniquicunawanmari, chaynütac wasiquićhu juc caśhta uywayniquicunawanpis, illaywan lantishayquicunäwanpis. 13Lluymi, wasiquićhu näsi ütac lantïsha uywayniquicunapis siñalachicüśha canꞌa. Chaynüpam aychayquićhu wiña-wiñaypä limalicuyní mana chincaycü camalaycunꞌa. 14Ñatac nishänüpis umri cayninćhu mana siñalachicücämi ichá malcapïta alüśha canꞌa limalicuynïta jalutacüśhanpi” nil.
15Chaynütacmi Abrahamta Tayta Dios nin: “Walmiqui manañam Sarai nishañachu canꞌa, sinuꞌa Sara nishañam canꞌa. 16Paytamá allinpä licaycuśhä. Paypamari juc chulicta taliycachishayqui. Sumä allinpä licaycuptïmá milaynincunapi jatućha malcacuna caycunꞌa, mandacücunapis yaluycunꞌamá” nil.
17Niptinmi pampäman cäranpis ćhänancama unꞌulaycuyäśhanćhu Abraham śhunꞌullanćhu asicülun: “¿Paćhac (100) watactaña liyaptí imanuypam chulí cälunman? ¿Maynümi isun ćhunca (90) watantaña liyal walmí Sarapis patayu licalïlunman?” nil.
18Niptinmi Abraham: “Maynu allinćha canman Ismaelta allinpä licaycuptiquiꞌa” nin.
19Niptinmi Tayta Dios nin: “Quiquin walmiqui Saraćhümi chuliqui canꞌa. Paytam Isaacwan śhutichanqui. Paywanmi limalicuynïta tacyalpachishä; jinaman lluy milaynintinpäpis wiña-wiñaypämi caycunꞌa. 20Ñatac Ismaelpïpis uyaliycucmi. Paypis allinpä licaycuptïmi alli-alliman milaycunꞌa. Paypïmi malcacunapis, ćhunca ishcayniyu puydïcunapis yalamunꞌa. 21Limalicuynïtañatacmi ichá Isaacwan lulaycuśhä; walmiqui Sara śhamü wata canan muyunćhünu ishyacunancäwanmari” nil. 22Chaynu Abrahamwan Tayta Dios limaśhanpïmi licula.
23Chay Tayta Dios nishantanüllamá chay muyun chulin Ismaelta umri cayninćhu Abraham siñalachila. Chaynütac wasinćhu lluy cäcunätapis, näsisha lantisha uyway nunancunactapis umri cayninćhu siñalachila. 24Isun ćhunca isun (99) watanta liyalmi Abraham umri cayninćhu siñalachicula. 25Chulin Ismaelñatacmi ćhunca quimsayu (13) watanta liyal umri cayninćhu siñalachicula. 26Chay muyunllam Abrahampis, chulin Ismaelpis, 27wasinćhu lluy cäcunäpis, lantisha uyway nunancunapis siñalachicüśha capäcula.
ప్రస్తుతం ఎంపిక చేయబడింది:
Genesis 17: QVW
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022, AMWAN (Old Testament text)
© 2006, Wycliffe Bible Translators, Inc. (New Testament text)
Print copy NT 2006, Liga Bíblica del Perú
