MARKU 10
10
Kagar-bënim
(Mat 19.1-12)
1A Yeesu pën tsul atsëp pëboos Judeeya, a na lut kajara bërëk Jordan. A kandënd bañaan kaka júk tsi nul, a na kaka ci tsi puu jukan bukul, bi na ro bi Uwakëtsa përo. 2A balon tsi Bafariseu tsëp di Yeesu pii teen-teenanul, ba yeparul aja: “Aniirana niints pëwëtan aarul-a?” 3A Yeesu yank bukul aja: “We wi Moises picandar ind wun?” 4#Ulú 24.1-4; Mat 5.31Ba yankul aja: “Moises aniiran niints pëpican kakaarta kagar-bënim, a uu ba në wëtan aarul.”
5A Yeesu ja bukul: “Aci-undo katamb-ngëwaas ind ka wun Moises picandar ind utsua wi. 6#Uju 1.27; 5.2Maa ki ujuundi umundu, Nasien-batsi aleemp niints ni ŋaats; 7#Uju 2.24 ka wun, niints ka pën tsi asinul ni aninul në bofëlar ni aarul; 8bukul batëb bu ka ci uyamats uloole. Unk, bu katse ci batëb, maa uyamats uloole. 9Bi u ci bank, ko wi Nasien-batsi bofëlan wi, ñaan-najin tsë gar.”
10Bi ba ci bi di bametsu kato, a bafets kaka yeparul ko wan. 11#Mat 5.32; 1Kor 7.10,11A Yeesu ja bukul: “Na wëtani aarul, a na nim nalon ŋaats, aro mjubi tsi uleka nacak nun. 12A uci ŋaats wëtan ayënul, a na nima nalon niints, aro mjubi.”
Yeesu aja ngëwar pa upäts uties
(Mat 19.13-15; Lúk 18.15-17)
13Din, a bañaan tsiji Yeesu upäts, nee na kërara bukul. Maa bafets leentsar bukul. 14A Yeesu win ko wan, a u reanul uwaas na ja bukul: “Nda wëtan upäts ba bi tsi nji; ind tsë laaŋ bukul, par pësien Nasien-batsi aci pa ba naam biki pi bukul. 15#Mat 18.3Mán leents ind ucär: Ñaan na niiranatsi pësien Nasien-batsi pi napäts, yaas a në niaj di pul.” 16A na wúnkëra upäts, a na paf bukul iñan a na ja ngëwar pa bukul.
Narëmb nan fieri ubiira un dits wi ka ba
(Mat 19.16-30; Lúk 18.18-30)
17Bi Yeesu ci bi tsi bëga pëtsëp, a nalon niints túki ee jintëla tsi bërunul, a na yeparul aja: “Najukan nawar! We wi n ka wun përo pa pëka ubiira un dits wi ka ba?” 18A Yeesu yankul, aja: “We ka wun m jain nawar? Nawar cits, ucits ba naloole baŋ, un ci wi Nasien-batsi. 19#Pëp 20.13; Ulú 5.17 Pëp 20.14; Ulú 5.18 Pëp 20.15; Ulú 5.19 Pëp 20.16; Ulú 5.20 Pëp 20.12; Ulú 5.16Me ngëtsua: ‘M di kë fiŋ ñaan, m di kë ro mjubi, m di kë kiej, m di kë ja ko u mabats wi uleka ñaan, m di kë fal ñaan; kë rëmban asinu ni aninu.’” 20Din, a niints jaul: “Najukan, man mob tsi përo ngëmënts ngan bëlieng, ki n ci ki ndëpaas.” 21A Yeesu kaŋan këkës tsi nul, a na ŋalul, na jaul: “Ko uloole wi m dukanda wun përo; tsëpan kii waap ko wi m ka wi bëlieng, kë baranj, kii ka bëka di batsi; din kë bi kë fetsin.” 22Maa niints kë te irim yan a na pën atsëp, apiban na lílaants, par aci nan kai bëka bëwiak.
23Din, Yeesu teen tsëko tsëmënts tsun afayësan, a na ja bafetsul: “Aci ko u nooran wi mak, pa barëmb pëniaj pësien Nasien-batsi!”
24A bafetsul pikra tsi irimul, maa a Yeesu kaka ja bukul: “Upats, aci ko u nooran wi, pa ba watsaraan biki bëka pëniaj pësien Nasien-batsi! 25Ape përaf ungilëm pëpar tsi baar kagúja, ni pëjaa, narëmb aniaj pësien Nasien-batsi.” 26A bafetsul ru pe këpe pë pikra, a bu kë jaalar: “Uci ank, yën yëlan un pëbuer?” 27A Yeesu kaŋan bukul këkës a na ja: “Bañaan-bajin yëlaants përo, maa cits Nasien-batsi. Par, Nasien-batsi ayëlan përo ngëko bëlieng.”
28Din, a Per kur pëjaul: “Wund wëtan bikink ngëko bëlieng, a wund ci tsi pëfetsu.” 29A Yeesu yankul aja: “Mán leents ind ucär: Kaats ñaan na wëtani kato, oo ban tsaar biki ni nul, bayënts ni bakaats, oo anin, oo asin, oo upäts, oo ireeŋ, tsi undo nji, ni tsi undo Upetsan-uwar, 30a na rits yank, ngëyaas useent tsi uwal wi, ito, ni batsaar ni nul, bayënts ni bakaats, ni banin, ni upäts, ni ireeŋ, ni pënoor-noorana; tsi umundu wi kan bi wi, në yank ubiira un dits wi ka ba. 31#Mat 20.16; Lúk 13.30Maa, bacumal tsi bacak kee ba ci batuami; batuami ka ci bacak.”
Uyaas uwaajantsan bi Yeesu leents bi uleka pëcӓtsul, ni pënatseeul di pëcӓts
(Mat 20.17-19; Lúk 18.31-34)
32Bë ci tsi bëga pëkata Jerusalem, a Yeesu yër bukul bërun. A ba lënk, a ban dukee biki tsi ufets lal. A Yeesu kaka pënand bafetsul untaaja bukun ni batëb apatsand, a na kur pëleents bukul ngëko ngi kan baandë-niul ngi. 33A na ja bukul: “Nda teenan-e! Nja ka kata bikink pëtsëp Jerusalem; Abuk ñaan-najin ka gutsa tsi iñan bawiak-bajakan, ni bapican-ngëtsua. Bu ka lacanul pa na fiŋa, bu ka gutsul tsi iñan ban cits biki Bajudeu. 34Bu ka jiul, bu ka tucanul, bu ka tújarul, bu ka fiŋul; tsi unu uwaajantsan në natsee di pëcӓts.”
Bëyep Jakob ni Joŋ
(Mat 20.20-28)
35Din, Jakob ni Joŋ, babuk Sebede, kika awok Yeesu, a ba jaul: “Najukan! Wund aŋal m doon kë niiran wund ko wi wund kë yepu wi.” 36A na ja bukul: “Wee nda ŋal wun nji përoor ind?” 37A ba yankul aja: “Wët wund di përëmbu, nalon ka tsoar tsi kariirul, nacints tsi kamayu.” 38#Lúk 12.50A Yeesu ja bukul: “Nda meets ko wi nda ci wi tsi pëyep. Nda yëlan përaana karaani kan ci kink ki unoor, ki ndu n daana kink-a? Oo nda yëlan pëmijana pi ndu n mijana pi-a?” 39A ba jaul: “Wund ayëlan.” A Yeesu kaka ja bukul: “Ind kee raana karaani ki n daana ki, ndii mijana pi ndu n mijana pi, 40maa ind pëtsoar tsi kariir nji oo kamay nji, cits nji ka n tsu un. Maa aci pa biki u yecisara biki.”
41Bi untaaja bukun te bi ko wan, ba riabatsar Jakob ni Joŋ. 42#Lúk 22.25,26A Yeesu rui bukul, a na ja: “Nda me koon, ban tsua biki pëci bawiak bañaan ban cits biki Bajudeu, bu ka pëyëlan tsi bañaan bukul; a ba wiak biki bukul ka buts pëyëlan tsi bukul. 43#Mat 23.11; Mar 9.35; Lúk 22.26Maa tsi ind, di ka ci ank. Par na ŋali pëci nawiak tsi ind, aka pëci nakëmand ind. 44A na ŋal pëci nacak tsi ind, aka pëci naluek ind bëlieng. 45Par, Abuk ñaan-najin biits pa pëkëmandaa, maa pa pëkëmand ni pë ubiiraul pa pëlukar bañaan bacumal.”
Yeesu ayësan nakuel di Jeriko
(Mat 20.29-34; Lúk 18.35-43)
46A ba band Jeriko. Bi Yeesu kë pëni bi di Jeriko ni bafetsul, ni kandënd bañaan kawiak, a u ka nakuel ni ka n jakee Bartimeu, abuk Timeu; atsoar tsi kambaŋ bëga, na ci tsi bëñaan. 47Bi na te bi u ci Yeesu Kanpënë-ni-nasaret, a na ci tsi pëlie koo ja: “Yeesu, Abuk Dawid! Yëkarin ipës!” 48A bañaan bacumal kë leentsarul pa na yëŋandar, maa na ru pe këpe pëlië mak koo ja: “Abuk Dawid! Yëkarin ipës!” 49A Yeesu nats, a na ja: “Nda ruiul!” Din a ba rui nakuel ajaul: “wak; natsaan, aruu.” 50A na guts kapantuul, din a na cat abi tsi Yeesu. 51A Yeesu yeparul ajaul: “Wee m ŋal wun nji përooru?” A na jaul: “Nawiak, ma ŋal pëkak n win.” 52Din, a Yeesu jaul: “Tsëpan, uwaku abueranu.” Tsi uyëk umënts wun, a na kak ka win, a nuu fets Yeesu tsi bëga.
ప్రస్తుతం ఎంపిక చేయబడింది:
MARKU 10: KPKNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Le Nouveau Testament en langue Manjaku © Alliance Biblique du Sénégal, 2020.
