Matío 8
8
Yɛɛ́so a á ega ŋghʉ̄ɛ, ŋgaŋ kaʼpáp á tʉɛ
(Mlk 1.40-44; Lúk 5.12-16)
1Yɛɛ́so a le gē efhó á ndo lekwɛ̄t esóʼo, mía nnɔ alāʼ á gɔ́ nzem nzhɛ̄nɛ á yí. 2Mmɔʼ ŋgaŋ kaʼpáp, á lɛ ntshóte nnɛ̄t mé lezēŋ tsí, ńtswíʼte á mvhɔ yí, ńdé á mbū yí ŋ́gɛ: «Mɛkwáŋ, o kuūʼ á leghʉ meŋ etēe, éyi o ó kɔŋ. » 3Yɛɛ́so á lɛ nnā apū, ḿpfēŋ á yí, ńdé ŋ́gɛ: «Meŋ á kɔŋ, tʉɛ̄. » Kaʼpáp á lɛ mmī ánɛ yí, efʉʼ mɛ́t efʉʼ mɛ́t. 4Yɛɛ́so á piŋ ndé á mbū yí ŋ́gɛ: «Pá á wú á lepū eshúŋ anu jʉɔ mɛ́t, á mbū ŋiŋ. Ké ŋgʉ̄ɔ ntswīi nnɛ̄t ju, á mbū nnɔŋ‑epɔʼ, ḿbiŋ nnɔ̄ŋ ntií epɔʼ zīi, lepé Mɔɔ́sɛ é zɛtteé ŋ́gɛ, ŋgaŋ kaʼpáp a tʉɛ, á nɔŋ. O eghʉ̄ épúp, ńdɔk ntswī á légɛ, o ó te. »
Yɛɛ́so a á ega ŋghʉ̄ɛ, méŋkhʉ̄ tɛŋgyā ncu epuɔ Lóma á tʉɛ
(Lúk 7.1-10; Jáŋ 4.46-54)
5Yɛɛ́so á gʉɔ tɛ ndɛ̄ ŋgē ekó á tésɔŋ Kafaanawum, mmɔʼ ŋge á gɔ́ éwú, ŋ́gɔ́ á tɛŋgyā ncu epuɔ Lóma, é shʉʼ mbúʼ mbū á mbū yí, 6ŋ́gɛ: «Mɛkwáŋ, mmɔʼ méŋkhʉ̄ ga a nɔɔ̄ŋ á mba, a te zɛ́t ŋkūʼɔ á leŋɛnnɛ ɛ́, ḿbú ŋgɔ́ si njʉ́ɔ ŋgʉɔ̄ʼ tɛʼ. » 7Yɛɛ́so á pwɛt á mbū yí ŋ́gɛ: «Meŋ wūɔ, meŋ a egʉɔ eghʉ a etē lɛ́?#8.7 Emɔ̄ʼ meŋwaʼne Ndém é leé ajʉʼ ega mɛ́t ŋ́gɛ: «Á épúp, meŋ a gʉɔ eghʉ a etē».» 8Tɛŋgyā ncu á zéŋ ndé ŋ́gɛ: «Mɛkwáŋ, meŋ te kūʼ yīi, o gɔ ezíʼ tɛ ŋkó á ŋgyā meŋ ɛ́. Táʼ, o lɛ ndé ŋ́gɛ méŋkhʉ̄ ga a etē, mbɔ a a te. 9Meŋ ndʉ́ɛ́ páʼa melaʼ mīi, meŋ á si njúʼɔ azá á mbū epuɔ pīi, pɔ́ é mvhɔ meŋ. Ńzéŋ ŋgwɛ̄ azá emɔ̄ʼ wɔ maʼ‑ncu, pɔ́ nɔŋ njúʼɔ á mbū meŋ. Meŋ toó mmɔʼ ŋgaŋ, á gʉɔ lɛ glɛ. Ńtswī ŋ́gɛ mmɔʼ a eshʉ̄ʼ, á shʉʼ lɛ glɛ. Ńdé á mbū méŋkhʉ̄ ga ŋ́gɛ, a eghʉ̄ azō, á ghʉ lɛ glɛ. » 10Yɛɛ́so á júʼ páʼ a á lé épúp, á kʉʼne á yí tɛʼ. Á lé á mbū epuɔ pīi, é nnɔŋ nzhɛ̄nɛ á yí ŋ́gɛ: «Meŋ a shúŋ á wɛ́ á kwaʼ anuúnē, meŋ ndaá mbú njʉ́ɔ ŋiŋ Islaɛl, á fɛ́ nnɛ̄t ŋgyá á mbū meŋ, páʼ ŋge wuɔ la á. 11Á épúp tɛ́ meŋ shúŋɔ á wɛ́ ŋ́gɛ, epuɔ tɛ nzáne, é shʉʼ efhó á meshhʉ̄ meshhʉ̄ á ndo esī atsetsáʼ, éshʉʼ ekó á ntē ŋgɔŋ eswhī, á athʉ́ lephū, pɔ́ a wɔ maŋgānjʉʼ pímpɛ, á Ablaham, mbɔɔ Izak, mbɔɔ Yakɔ́p, e ejhʉ́ á mía lekāk. 12Mɛ́ epiŋ mmāʼ epuɔ pīi, ŋgɔŋ eswhī jʉɔ mɛ́t, e é nzi ŋgɔ́ ezɔp, á apɛ́, á ntē nzém, ájʉʼ zīi mɛ́ é éwú ndaa mpfɛ́tɛ mesɔŋ. » 13Yɛɛ́so á shúŋne épúp, ḿbēkne nnɛ̄t, ńdé á mbū tɛŋgyā wɔ maʼ‑ncu wɔ̄ ŋ́gɛ: «Piŋ nzem mé mba ju. Páʼ o ó fɛ́ nnɛ̄t ju ŋgyá á mbū Ndém lā, ajū mīi o ó si ntsáa, á tó ndeŋ ndeŋ páʼ o ó si ntsáa épúp. » Méŋkhʉ̄ tɛŋgyā ncu, á lɛ ntē efʉʼ mɛ́t efʉʼ mɛ́t.
Yɛɛ́so a á ega ŋghʉ̄ɛ, ŋgém Piɛ á tʉɛ
(Mlk 1.29-31; Lúk 4.38-39)
14Yɛɛ́so á fhó á ajʉʼ mɛ́t, ŋgʉ̄ɔ mé mba Piɛ, ŋ́kó éwú, ńdɛ ŋgē ekó á ŋgyā, ńjʉ́ɔ ŋgém Piɛ á nɔŋ á ekó, nnɛ̄t é nɔŋ ŋkɔ́ʼɔ á yí. 15Yɛɛ́so á kímne apū zí, nnɛ̄t é lɛ nzáʼa. Á lɛ ndū á esī efāʼ azō, ńdɔk ŋghī á yí.
Yɛɛ́so a á ega ŋghʉ̄ɛ, megaŋ agɔ tɛ nzáne é tʉɛ
(Mlk 1.32-34; Lúk 4.40-41)
16Á kó ŋgɔ́ eseéŋ‑njhʉ̄, mɛ́ lɔk epuɔ tɛ nzáne pīi, mesī é lē ŋgɔ á wɔ́p, éshʉʼ njʉ́ɔ á Yɛɛ́so. Á lɔk ndaʼ ashuŋne, ńjūŋ mesī ánɛ pɔ́p, ŋ́ghʉ̄, megaŋ agɔ metsem é pú ntē. 17Ŋ́ghʉ̄ épúp, á lɔk mbō páʼ Izayi ntswi‑ŋke Ndém a le lé ŋ́gɛ: «Yí mé le tswíʼ melɔ́ʼ mímpɛ mbīʼ, yí mé zéŋ efhó ánɛ pímpɛ, éfók megɔ mímpɛ mbīʼ. »
Lecʉ̄ʼ á ŋiŋ nnɔ Yɛɛ́so
(Lúk 9.57-62)
18Yɛɛ́so á jʉ́ɔ páʼ mía nnɔ alāʼ a á cúʼte á lezēŋ yí, ńtswī mé nnɔ yí ŋ́gɛ, pɔ́ a pɔ́p e etó ntshi, ŋ́gʉ̄ɔ mé nzéŋ mmɔʼ. 19Mmɔʼ ŋkɛʼte‑mbé Ndém, á tshóte nnɛ̄t mé lezēŋ tsí, ńdé á mbū yí ŋ́gɛ: «Nziʼnɛ, o púu ŋgʉ̄ɔ tɛ ŋkó egɔ́ lɛ́, meŋ egɔ́ áa nzem wu. » 20Yɛɛ́so á pwɛt á mbū yí ŋ́gɛ: «Membapndo é wɛɛ̄ membhʉ̄ mɔ́p. Meséŋ é wɛ meŋka mɔ́p. Táʼ, Méŋ‑Ŋiŋnɔŋ wuɔ á piŋ te wɛ̄ azí ajʉʼ zīi, a gɔ enáŋ éwú ú. » 21Mmɔʼ ŋiŋ ánɛ nnɔ yīi, é nɔŋ nzhɛ̄nɛ á yí, á lé á mbū yí ŋ́gɛ: «Mɛkwáŋ, tsɔ́ʼɔtsɔ̄ʼ, lɛ nzwíʼte meŋ eshʉ̄ʼ nzīi mvhɔ, ńtúŋ á mɔʼɔ́ ga, tɛ́ eshʉʼ ŋgɔ́ á nzem wu. » 22Yɛɛ́so á pwɛt á mbū yí ŋ́gɛ: «Shʉʼɛ ŋgɔ́ á nzem meŋ. Ńcʉ́ʼ, epuɔ pīi é nzi ŋgɔ́ mepfhō, e etúŋ mepfhō pɔ́p. »
Yɛɛ́so a á ega nzáʼa ntshi pɔ́ afēm
(Mlk 4.31-41; Lúk 8.23-25)
23Yɛɛ́so á zíʼ ŋkó á ntē amɔ̄ʼ akɛnūʼ, nnɔ yí é zhɛne á yí, ŋ́kó azɔ́p éwú. 24Pɔ́ nɔŋ ŋgʉ̄ɔ, mmɔʼ mía mía afēm á veŋne ntúʼ á ndo ntshi, tɛ ŋghʉ̄, ntshi é pú ncʉ́ʼɛ ŋgɔ̄ áa ŋkápte akɛnūʼ. Yɛɛ́so á piŋ nnɔ̄ŋ ndíi. 25Nnɔ yí é tshóte nnɛ̄t mé lezēŋ tsí, ńzīɛ á yí, ńdé á mbū yí ŋ́gɛ: «Mɔʼɔ́ wek, lɛ ŋghʉ̄ ḿpɛ e etswɛ́t. Ḿpɛ é mi mbōo. » 26Á pwɛt á mbū pɔ́p ŋ́gɛ: «Pɛ cɔʼɔ akɔ̄? Lefɛ̄ nnɛ̄t wɛ ŋgyá á mbū meŋ a te kʉɔ́k e?» Ńdé épúp, ńdū á esī ntshí á ajʉʼ, ńcɔ́k afēm pɔ́ ntshi. Ejʉʼ é pwɛ́t lɛ jɔʼ. 27Pɔ́ jʉ́ɔ épúp, á pú ŋkʉ̄ʼne á wɔ́p tɛʼ, pɔ́ lé ŋ́gɛ: «Eziɛ́ ntií ŋiŋ e é páʼa ŋgɔ́ ejʉɔ, tɛ afēm pɔ́ ntshi, é gɔ́ ega njúʼu nchu yí í?»
Yɛɛ́so a á ega njūŋɔ mesī ánɛ epuɔ mémpīa
(Mlk 5.1-20; Lúk 8.26-39)
28Yɛɛ́so á gʉɔ tɛ ŋkó ezi mmɔʼ nzéŋ ntshi, á alāʼ epuɔ Ŋgadala, emɔ̄ʼ epuɔ mémpīa é fhó ajʉʼ zīi, mɛ́ gɛ ntúŋɔ mepfhō éwú, éshʉʼ ntswɛ́tte á yí, mbɔ mesī é lē ŋgɔ á wɔ́p. Ŋ́gáʼ, tɛ ŋgɔ́ yīi, ŋiŋ a le gɔ́, a á le kūʼ á lelɔk ajʉʼ mɛ́t, ńzápa nzhɛ ɛ́. 29Pɔ́ shʉʼ épúp, ńdɛ nzī á legaʼte mé ŋghi teté ŋ́gɛ: «Méŋ Ndém, o tswíi akɔ̄ á mbū pek ē? O kɛɛ́ eshʉʼɛ ega páʼā, ŋ́gɔ̄ áa nté njhʉ̄ enéŋ á wék ánɛ ŋgʉɔ̄ʼ kɛ?»
30Á le gē egɔ́ épúp, mmɔʼ mía akɛt mekúna, á gɔ́ mmɔʼ eshhʉ̄ mpfɛ́tɛ etsō. 31Mesī mɛ́t é swíŋte á Yɛɛ́so, ńdé ŋ́gɛ: «Páʼ o gʉɔ mé njuūŋ pek lā, tswiī pek egʉɔ ŋkó ánɛ akɛt mekúna zi. » 32Á lé á mbū pɔ́p ŋ́gɛ: «Pɛ etó ŋgʉɔ ŋkó éwú. » Mesī mɛ́t, é lɛ efhó ánɛ epuɔ mɛ́t ntó, ŋ́gʉɔ ŋkó ánɛ mekúna pwɔ̄. Akɛt mekúna jɔ̄ á fɛ́ ŋkʉŋɛ́, ŋgʉ̄ɔ á mía, ḿbú ŋkwhʉ́te á ntē ntshi. 33Mepfɛnne‑mekúna é jʉ́ɔ épúp, ŋ́kʉ ŋgʉ̄ɔ mé tésɔŋ, ḿbɛ́te ajūɔ tsem zīi á tɔ́k, éshúŋ epuɔ. Ńzéŋ eshúŋ epuɔ páʼ, á tsia épúp, tɛ́ epuɔ pīi mesī é ŋgɔ́ ánɛ pɔ́p, é te. 34Tésɔŋ ntsem á pú ntó eshʉʼ ntswɛ́tte á Yɛɛ́so. Ńdɛ ŋgē ejʉ́ɔ á yí, éswíŋte á yí ŋ́gɛ, a efhó á alāʼ pɔ́p ŋgʉ̄ɔ.
ప్రస్తుతం ఎంపిక చేయబడింది:
Matío 8: ybb
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
