Jenesis 32
32
Mae Jekop ne tarabana mala tei filoni mae Iso
1Mae Jekop jaola ne jifla ne tei balugna nogna vike na, eghuteuna nogna engel God re ne mei ne thafoni mana. 2Kate filodi mare na mana ne cheke eghu, “Igne nogna tothoghei soldia God!” Aonu mae Jekop ne kiloni namono igne Mahanaem. Nangha igne gaoghathogna na “Phei namono” eghu.
3Mae Jekop ne kurudi keha mae mala kulu tei ka kantri Seia, keha nanghagna na Idom, mala hata cheke tei ka mae Iso, mae ke biꞌogna na. 4Mae Jekop ne cheke eghu ka mare, “Tei ghotilo mala cheke eghu ka mae nogu funei iara Iso ia. ‘Ghema Iso, nou mae gloku iagho mae Jekop ia mana neke tei au kmana finogha balugna mae Laban eghuteuna gognaro na mana magnahaghei teke pulo mei. 5Iara au nogu tothoghei buluka, dongki, sipu, nanigot, mae gloku nei gaꞌase gloku eghu. Iara faꞌari cheke igne ka iagho nei tore nigho iagho eghu mala keli iagho ranghi ghau iara eghu.’ ”
6Mae igre neke pulo mei neke cheke eghu ka mae Jekop, “Ghehati ne hata cheke ne tei posa ka mae tighamu Iso, eghuteuna mana gognaro na mei thafo nigho iagho fari hotei nabrou. Eghuteuna fati gobi mae na mei balugna mana.”
7Mae Jekop ne nomhini cheke igne ne mhaghu nogna fara. Aonu mana ne fofota naikno re ka phei tothoghei. Mana jaola ne fofota buluka, sipu, nanigot, nei kamel teure ka phei tothoghei. 8Mae Jekop ne ghaoghatho eghu, “Jame mei mae Iso te magra ka tothoghei ulu lahu na, fapea tothoghei gne ginauna tangomana te rikha na.”
9Mae Jekop pogho soru ne tarai eghu, “Iagho nogna God mae kuꞌe Ebraham nei nogna God mae mama Isak! Lord, iagho neke cheke ranghi ghau iara mala ke pulo ka namonogu nei vikegu teura, eghuteuna iagho neke cheke ka iara mala fablahi ghau iara neku. 10God, iara nou mae gloku iagho. Iara theome mae keli ka tathamu iagho na, nu iagho neke namha ghau iara nei keli ranghi ghau iara. Kani teke tei kasa iara ka khoꞌu Jordan ia teke tei au balugna mae Laban ia, iara neke theome hata kaisei glepo balugu. Theo. Iara neke louloku kaisei khodo kolho. Eghume iara gognaro na kela pulo mei baludi phei tothoghei igre. 11Iara tore nigho iagho mala fakarhi ghau ka mae ke biꞌogu Iso. Iara mhaghu nogu fara glahula mei mana falehe fateo ghami ghehati hui, gaꞌase nei sua teu igre. 12Tifa na iagho neke nhaꞌa cheke ka iara mala fablahi ghau iara nei mala tusu ranghi ghau iara kmana vike mala kmana fara jateula nusu te theome tangomana te kahadi ka glilihi na are eghu mare neku.”
13Mae Jekop ne thuru jare bongi tuana, eghuteuna ka keha narane na mana ne vavahi keha glepo mala namha ka mae Iso. 14Mana ne vavahi phei gobi nanigot gaꞌasedi nei varadaki nalhaꞌudi, nei phei gobi sipu gaꞌasedi nei varadaki nalhaꞌudi. 15Nei tolufulu kamel gaꞌasedi te au thudi, nei phiatutu buluka gaꞌasedi nei nabotho buluka nalhaꞌudi, nei varadaki dongki gaꞌasedi nei nabotho nalhaꞌudi. 16Mae Jekop ne tufa ka nogna mae glokure glepo igre mala reireghidi mare. Aonu mana ne cheke eghu ka nogna mae glokure, “Ghotilo na tei ka phei tothoghei ke ulugu iara. Nu ghotilo tei fakhaba, thosei tei fanamo ka keha tothoghei na eghu.”
17Mae Jekop ne cheke eghu ka nogna mae gloku te baubatu gna tothoghei ulu lahu na, “Mae thabusigu iara mae Iso na mana ginauna na mei thafo nigho iagho na ghusna eghu ka iagho, ‘Iagho nogna mae gloku mae ihei? Iagho mala tei aheva? Eghuteuna nogna tothoghei nanigot, nei sipu, kamel, buluka nei dongki mae ihei igre?’ 18Aonu iagho ginauna na cheke eghu ka mana, ‘Tothoghei glepo igre nogna nou mae gloku iagho, Jekop. Mana famei glepo igre jateula nogna namha eghu mana ka iagho, mae funei. Mae Jekop na thoghei mei ke leghu jare!’ ”
19Mae Jekop ne cheke eghu ka hatimare nogna mae gloku re, “Kate thafoni ghotilo mae Iso na, ghotilo kafe eni u nafnata cheke igne ka mana. 20Ghotilo mala cheke eghu ka mana, ‘Uve, nou mae gloku iagho Jekop na ke leghumi ghehati mei!’ ” Mae Jekop ne cheke eghu ka gaoghathogna thegna na, “Ka puhi igne mae thabusigu iara na ginauna na ke ghatho ihodi teke diꞌatagna ka iara ra. Eghuteuna ka te thafo ghau iara na, mana ginauna nake keli tagna ka iara eghu.” 21Aonu mae Jekop ne kulu fahata u namha igre ka tothoghei ulu lahu na mala tusu lao ka mae Iso. Nu mae Jekop ne au neu ka grorofe na ka bongi tuana baludi khetogna nei thugna teure.
Mae Jekop neke magra balugna God
22Ka bongi tuana mae Jekop kegra haghe ne hata phei khetognare, phei nogna gaꞌase gloku re nei nabotho kaisei thugnare neu ne kasa ka khoꞌu Jabok. 23Mana ne kulu hata fakasadi ka keha phile khoꞌu na, aonu mana neke pulo neke chekedi nogna mae glokure mala hata nogna gobigna lepore. 24Nu mana ne au faleghu neu thegna jare. Eghuteuna kaisei mae ne mei ka mana ne magra balugna mana ne ghilei haghe naprai na. 25Mae ihei te magra balugna mae Jekop igne mana laseni na te theome tangomana te uluni mae Jekop na. Aonu mana ne loku lao ka thudu sorogna mae Jekop na ne fablughuni ghahegna mana na.
26Aonu mana ne cheke eghu ka mae Jekop, “Lisei ghau iara sagho, naugna u naprai gne la haghehi.”
Nu mae Jekop ne cheke eghu ka mana, “Iara ginauna na theome snakre tei nigho iagho ghilei fablahi ghau iara ghu iagho!”
27Mae igne ne ghusna eghu, “Ihei iagho nanghamu na?”
Mae Jekop ne cheke eghu, “Iara nanghagu na mae Jekop.”
28Aonu mana ne cheke eghu ka mana, “Tifa na mare neke kiloni nanghamu iagho na Jekop. Nu gognaro na nanghamu iagho na Israel, naugna iagho ne magra balugna God nei jaola magra balugna naikno neu, la heta gheuhi la ulunihi iagho magra igne.” Nangha igne gaoghathogna na “Magra balugna God” eghu.
29Aonu mae Jekop ne cheke eghu ka mana, “Chekeni sagho nanghamu na ka iara.”
Nu mana ne cheke eghu, “Iagho theome naba te ghusnani nanghagu iara na.” Ke leghugna igne mana ne fablahini mae Jekop. Mana jifla jare ne tei kokoni mae Jekop.
30Mae Jekop ne cheke eghu, “Iara la filonihi tathagna nei foflogna teu God na, eghuteuna iara gne na theome lehe eghu.” Aonu mae Jekop ne kiloni vido igne Peniel.
31Naprai na la haghehi kate jifla mana Peniel na. Mae Jekop ne theome nonolo fakeli naugna nhubra ghahegna na la klasuhi la. 32Aonu funu ka narane igne te ghilei posa ka narane gognaro gne mae Israel gre ne theome ghamu nafnahi te au ka sorodi buluka ba sipu ba nanigot teure, naugna God neke habo ka sorogna mae Jekop na.
ప్రస్తుతం ఎంపిక చేయబడింది:
Jenesis 32: mrn
హైలైట్
షేర్ చేయి
కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022, Wycliffe Bible Translators , Inc. All rights reserved.