KALAQAMA 26
26
YISIHAAQI GERAARAHO HEE'RI
1Abirihaami yannata agurranna layinkimeeshsho wole hudeno ubbu; Yisihaaqino Geraara Filisxeemete mootewa Abemeleekiwa ha'ri. 2Hakkiicho Kaaliiqi isira leelle, «Gibitsete gobba hadhootina, ani kuleemmohe gobbara hee'ri. 3Kawiicho hee'ri; anino ledokki hee'reemmo; maassi'reemmohe; tenne baatto baala ateranna sirchikkira eemmo; annikki Abirihaamira xaaroommo xaarono wonsheemmo. 4Sirchokkino gordu beeddahe gede asse batiseemmo; tenne baatto baalano sirchikkira eemmo; baattote aana heedhanno gosa baala insanni maassantanno. 5Ate maassi'reemmohu, Abirihaami ani yoommota macciishshe hajajo'ya, seera'yanna woga'ya agadhino daafiraati» yiisi.
6Yisihaaqino Geraara hee'ri. 7Hatte gobba manni Ribiqa lae, «Ise atera maakkiiti» yee xa'misi. Isino qole, «Rodoo'yaati» yiinsa. Hatto yiinohuno, Ribiqa lowo geeshsha xuma ikkitino daafira, hatte gobba manni, «Ise hasi're shaannoe» yee waajjino daafiraati. 8Hakkiicho lowo yanna hee'rihu gedensaanni, Filisxeemete moote Abemeleeki masikootete widoonni qole la"anni hee're, Yisihaaqi Ribiqa kikkisanna afi. 9Kunnira Abemeleeki Yisihaaqi woshshiishe, «Agari, Ribiqa atera galtekkiitini! Mayira, ‹Rodoo'yaati› yiittoyya?» yee xa'misi.
Yisihaaqino, «Galte'yaati yuummoro isera yine shinannie yee waajjoommo daafiraati» yee dawari. 10Abemeleekino, «Togo mayira assittonke? Mannu galtekki ledo goxara shiimurilla gatino; ninke saote giddora eessite hoogoottonke» yii. 11Qoleno Abemeleeki, «Konne mancho woy galtesi kisannohu reyanno» yee manna qorophisiisi.
12Yisihaaqi hattenne gobbara jajja loosi'ri; Kaaliiqi maassi'rinosi daafira, hakko dironni 100 ero afi'ri. 13Jiro jirote aana lexxitanna, lowo geeshsha dureessa ikki. 14Meu, ge'reewunna lalu, hattono borojju lowo geeshsha bati'rinosi daafira, Filisxeemete gosa hinaasse, 15annisi Abirihaami borojji untino bu'a baalate bushsha wonshite beeshshite huntu.
16Abemeleekino Yisihaaqira, «Ninkenni roore wolqaataamo ikkitanni noottona, gobbankenni ho'li» yiisi. 17Yisihaaqino hakkiinni agure ha're, Geraaru lagicha teesso assi're hee'ri. 18Hakkiichono Abirihaami lubbotenni hee're unsiisinoti reyihu gedensaanni kayinni Filisxeemootu beeshshite huntino bu'a no; Yisihaaqi hatte bu'a fannanni gede assi; bu'ano annisi fushshino su'minni woshshi.
19Yisihaaqi borojji lagichaho bue unte dancha waa afidhu. 20Geraaru gobba allaalaasine Yisihaaqi allaalaasine ledo, «Wayi ninkeho» yitanni yekkeerantu. Kunnira Yisihaaqi hattenne bue su'ma Eseeqi#26:20 Eseeqi yaa Ibiraawootu afiinni gibbote yaate. yii.
21Wole bueno untu; isenni kainohunnino galagalte giwantino daafira, Yisihaaqi su'mase Sixina#26:21 Sixina yaa Ibiraawootu afiinni giwate yaate. yii. 22Hakkiinnino shiimare sa'e wole bue untu; isenni kainohunni giwantinokki daafira su'mase, «Xa Maganu halashshinonke; baattote aanano bati'neemmo» yiino daafira tenne buera su'ma Rehobooti#26:22 Rehobooti yaa Ibiraawootu afiinni hala'lado dargaati yaate. yii. 23Yisihaaqi hakkiinni kae Bersaabehi ha'ri. 24Hakko hashsha Kaaliiqi Yisihaaqira leelle, «Ani annikki Abirihaami Maganooti; ani ate ledo noommona waajjitooti! Maassi'reemmohe; soqqamaanchi'ya Abirihaami daafira yee sirchokki batiseemmo» yiisi. 25Yisihaaqi hakkiicho kakkalote darga seekke Kaaliiqiha qullaawa su'masi woshshanni magansi'ri; dukkanano kaasi'ri; borojjisi hakkiichono bue untu.
YISIHAAQINNA ABEMELEEKI NAMOONTINO GARA
26Abemeleeki, amaalaanchisi Ahuzeetinna olantosi hajajaanchi Fiikooli ledo Yisihaaqinni xaadara dayi. 27Yisihaaqino, «Ki'ne ane digibbine gobba'nenni fushshitine huntinie? Xa anewa mayira dagginiyya?» yiinsa.
28Insano, «Kaaliiqi ledokki noota seekkine anfoommo; kunnira ate ledo namoomme hee'rate gondooro e'nammora hendoommo; kunnira amo gondooro e'ne, 29mimmitonke gawajjineemmokki gede assinona; ninkeno ate aana mitte beebbano diassinoommo; wo'manka woyite dancha ikkinnina busha coye diassinoommohe; gobbankennino keerunnilla fulootto; kune ate Kaaliiqino maassi'rinohe» yitusi. 30Hakkunni gedensaanni, Yisihaaqi jila jileennansa itte aggu. 31Layinki soodo gutte ka'e mimmitu ledo gondooro e'u; Yisihaaqi geegiisseennansa, «Keerunni» yite hadhu.
32Hakko barrano Yisihaaqi soqqamaasine dagge u'mitino bue daafira coyidhanni, «Waa afi'noommo» yite kultusi. 33Isino hatte buera su'ma, «Saabehi» yee su'ma fushshi. Kunni daafira katamu su'ma techo geeshsha «Bersaabehi» yine woshshinanni.
EESAWU GOSASIRA GOBBAYIDINNI SEENNE ADHI
34Eesawu 40 diro ikkisita Bieeri beetto Yoodiitinna Elooni beetto Baasemaati adhi; lamenti Hitootaho. 35Insa lamenti Yisihaaqinna Ribiqa lowo geeshsha dadillisino.
ప్రస్తుతం ఎంపిక చేయబడింది:
KALAQAMA 26: QulMax
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© The Bible Society of Ethiopia; Sidama Holy Bible BSE-UBS 262 P 2014
