ማቲወስት ወንጌል 9
9
ፈወነ 9
እየሱስ ድውይ እጅር ቓዘጘ
(ማር. 2፡1-12፤ ሉቃ. 5፡17-26)
1እንዝ ግረ እየሱስ ታኰዝ ፃቭ ባኽርድየንት ከር ጝቕምት ኻትመይል ፊሩ። 2ጝጊስም እቅ ላው ድውይ እጅር ቃነ ቀሪዘዝ መውርጝ ጝጐ ፃይጝ ተር። እየሱስም ጝታእምንትድ ቓል ድውይድየንት፦ «እፈረ ክተ! ኣይዝዀች ክኽጥያትድ ይቅር ይሽትኩ» ዩ።
3ኣይንድ ላው ላው ወሪትት ኽግ ክንሰጥ፦ «እን እጅርድ እደረት ዛሸኰይ» ይጛ ጝታእዘኒዝ ኻስቭ። 4እየሱስም ጝታእዘኒዝ ኻስቭጘውድየንት ኣርቕ፦ «ውር ቃጥ የጝ ክታእዘኒዝ እነየው ጭቓ ዊገ ኻስቭርነውድ? 5ኣየውጚ! ‹ክኽጥያትድ ይቅር ይሽትኩ› የናንቲስመ ‹ጕር ፃጝ› የናንቲስ ኣውየን ቀልጡ? 6ዊገድ ግን እጅር ዅር እን ዝቨይስ ኽጥያት ይቅር ይጠ ስልጣን ፃየው ኣቐጘ ኣርቕጥን» የው ድውይ እጅርድየንት፦ «ጕ! ክኣረትድ መውትር ክጝን ፊጥ» ዩ። 7ጘጝም ጕ ጝጝን ፊሩ። 8ኽዝቭድም እኒንት ቓላንድ ጊርምሹ፤ እጅርዝ እነየው ስልጣን ይወው እደረትም ሚዝየንዙ።
እየሱስ ማቲወስት ጭጘጘ
(ማር. 2፡13-17፤ ሉቃ. 5፡27-32)
9እየሱስም ጝጊስ ጕ ፊራንድ ማቲወስ የነው ቀረጥ ቀቨው እጅር ቀረጥ ቃርጠነ ስፍረይል ጐይ ቓል፦ «ለው ይት ቲክን» ዩ፤ ጘጝም ጕ ጝት ቲክኑ።
10እየሱስ ማቲወስት ጝን መድል ጐይ ፅባ፣ ንቕፀቍ ቀረጥ ቀቨቍዝመ ኽጥያትኝጥዝ ተርጝ ጝስመ ጝክንደጢዝ ጅቅ ዅጥጘ ላብጠ መድል ጐይ። 11ፈሪሳንድም እኒንት ቓልጛንድ ጝክንደጥድዛት፦ «ክታክንሰተድ ቀረጥ ቀቨቊዝመ ኽጥያትኝጢዝ ጅቅ ላብጠ ኸኵሳ?» ይ።#15፡1-2። 12እየሱስም እኒንት ወሻንድ፦ «ኻይክም በንዘውድ ፅውዝጅንጥዝጚ ትኽንቍዝም ኣየው። 13ፊትርን፦ ‹ምስዋይት ኣዪጝቀ ስቝርት የጝ ቀነውድ› ይሽት ፃፍሸውድየንት ወረጘ የነት ኣቐጘ ኣርቕጥን። ምላሰንድም ኽጥያትኝጥድዛትጚ ፃድቃንድዛት ጭጝጨም ተጢቀር» ዩ።#ዀስ. 6፡6፤ ማቲ. 12፡7።
ፃምዝቍዝ ኣልተው ዋቕረ
(ማር. 2፡18-22፤ ሉቃ. 5፡33-39)
14ኣይንድ ይዃንስት ክንደጥድ እየሱስ ትጐ ተርጝ፦ «ይናስመ ፈሪሳኒዝ ዊትርቅ ፃምነኵን፤ ክክንደጥድ ግን ፃማይጘውድ ወረጘ የጝ?» ይጝ ዋቕር። 15ጘጝም፦ «ኣስንድ ጛጅቅ ፅባ መጭድ ኻዝንጥጘ ጥውሸኵመ? ዊገድ ግን ኣስንድየንት ጛጊስ ቲዝጝ ፊስጘው ግርየ ተርጡ፤ ኣይንድ ፃምጥቍ። 16ኻፍለ ኣልቨል ኣይር ምልግቨ ሚልግቨው እጅርም እጀው፤ ሚልግቭሽ ግን ኣይር ምልግቨድ ኻፍለድየንት ወሰገቨ ቀደኵ፤ ቀዳድም ፈራቐኵ። 17እኒዝጘም ኣርጐው መርዝ ቝጥን ወይንዙ ሚዘ እቝረውም እጀው፤ እቝርሽ ግን መርድ ብጥቕ የኵ፤ ወይኒዙ ሚዘድም ቅብረኵ፤ መርድም ኣርወ እጀው ሊቭ እዳቐኵ። ዊገድ ግን ቝጥን ወይንዙ ሚዘድ ኣይር መርዝ እቝረነው ጥውሸኵ፤ እንዝም ጝታቪልጝቅ ቸለቸልሽጝ ዊንጘኵ» ዩ።
እየሱስ ክትረይ እፈረስመ ፅዊትረይ እውነስ ፃቨው ታምርድ
(ማር. 5፡21-43፤ ሉቃ. 8፡40-56)
18እየሱስ እኒንት ዊግታ ሲጝቀ ላው ሽም እጅር ተር ጝበዊል ጝግምባሪዝ ሊቭ፦ «ይቝረ ክትርኵች፤ ተትር ክናኒዝ ዳቕ፤ ጚይም ቓድቲ» ዩ። 19እየሱስም ጕ እጅሪጅቅ ፊሩ፤ ጝክንደጥድም ጝት ቲክንጝ ፊር።
20ጝጊስም ፅጭ ሊጘ ምት ምሉ ብር ቅብርጛ ተሰቃይሽራ ፅብረይ ላይ እውነ ጝእግርገይዝ ተትር ጝኣልቨይዙ ጫፍድየንት ዳቕች።#ዘዅ. 15፡38፤ ዘዳ. 22፡12። 21ጝርእዘኒዝ፦ «ጝኣልቨይዙ ጫፍድ እኳ ዳቓን ቓድጭር» ይር ኻስቭር ዊንች። 22እየሱስም ዋጥር የው ጝርት ቓል፦ «ኣይዝዀች ይቝረ! ክእምንትድ ቓዝኩ» ዩ። እውነየንም ኣይኒስ ኪርምር ቓድች።
23እየሱስም ሽም እጅሪዙ ጝኒል ችጛንድ ኽዝንዙ ቱትለ ጣዘቍዝመ ፍውጛ ሊዘቍ እቅዝ ቓል፦ 24«እግልጥን! እፈረየን ኽርይርኵችጚ ክሪረይም!» ዩ። ጛይም እኒንት ወሽጛንድ ኣሹፍጛ እቘር። 25እቅድም ፍጘት ግረ ኣቒ ጝኒል ጥው ጝርናንድ ፃዩ፤ እፈረየንም ጕች። 26እን ዊገይዙ ጂጘድም ጛይ ኻግራኒልቅ ጂጚቱ።
እየሱስ ሊጘ ኻርብ ቓዘጘ
27እየሱስም ጝጊስ ጕ ፊራንድ ሊጘ ኻርብ፦ «ዳዊትት ዅርወ! ኣለቀይ ሳቝጭ!» ይጛ ቓፅጛ ጝት ቲክን። 28ጘጝም ጝን ኣቒል ጥዋንድ ጛይም ጝት ቲክንጝ ጥው፤ ጘጝም፦ «ያን ክታእልጣንድ ቓዝጨ ቸለር ኣቐጘ ኣምንድርነኵመ?» የው ዋቕሩ። ጛይም፦ «ኣደረወ! የይ ኣምነኵን» ይ። 29ጘጝም ኣይንድ ጝታእልጣንድዛት ጝናኒዝ ዳቕ በር፦ «ፈርጥን ክታእምንቲዝጘ ኣነ» ዩ። 30ጝታኣልጣንድም ኣይንድ ቓድ፤ እየሱስም፦ «እን ዊገድየንት ኣውማውቅ ኣርቒነ!» የው ጣጝቅቅሱ። 31ጛይ ግን ፊርጝ ጘጝ ኻግሪልቅ እየሱስት ዊገድ ጂጝዝ።
እየሱስ ላው ድደ እጅር ቓዘጘ
32ጛይ ፍጛንድም ላጥ እቅ ላው ጋኒንዝ ፃይሸው ድደ እጅር እየሱስ ትጐ ነስ። 33ጋኒንድም እጅሪስ ፋንድ እጅርድየን ዊግተነው ኪርሙ፤ ኽዝቭድም ጊርምሸነውዝ፦ «እነየው ዊገ እስራየል ኻግሪስ ቓሊሽትም ኣርቓው» ይ። 34ፈሪሳንድ ግን፦ «ጋኒናንድዛት ፊሰውድ ጋኒናነ ኻልቀይዝ የጝ» ይ።#ማቲ. 10፡25፤ 12፡34፤ ማር. 3፡22፤ ሉቃ. 11፡15።
ማፅወይዝ ሰራሸጥድ ዊትቍ ኣጘጘ
35እየሱስም ጝታምኵራቫኒል ክንሳ፣ እደረት ምጝጝስቲዙ ወንጌልድየንትም ሲቭካ፣ ኽዝቭድም ጝታፅውዘይስ ጝታቕጅወይስም ቓዛ ኻትምጢል ኪቋኒልቅም ጅልዋ ዊኑ። 36ኽዝቭድም ምቓ እጀቍ ቢቂዝጘ ጨጝቅሽ፣ ከቨተም እጀው ኣቕ ቓል ኻዝኑ።#ዘዅ. 27፡17፤ 1ነገ. 22፡17፤ 2ዚመ. 18፡16፤ ኽዝ. 34፡5፤ ዘካ. 10፡2፤ ማር. 6፡34። 37ጝክንደጥድዛትም፦ «ማፅወድ ኽየው የጝ፤ ሰራሸጥድ ኣጛንድ ዊትቍ ጛይ። 38ነስየ ማፅወይዝ ወነድየንት ጝማፅወይዝ ሰራሸጥ እፃቓንስ ማጥን ጨውጥን» ዩ።#ሉቃ. 10፡2።
ప్రస్తుతం ఎంపిక చేయబడింది:
ማቲወስት ወንጌል 9: ኽምጣኣኪ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
