Luka 18

Bazlam minew gà məkəs duwa nda mala mege seriye

1I dəba ŋa ya, Yesuw a tsik bazlam minew a gà ɓəzla mazazama ŋgat ata, aà meɗife a tar dər ka, say ta hama a Mbulum hiywe, ti ye ba tsidze. 2A gwaɗa a tar: «Mala mege seriye duwa a riŋ i kwite duwa. Magəɗa Mbulum a ger tsidze, dite a gəs mifefile wura tsa asa mbaŋa. 3Madakwa məkəs duwa a riŋ i kwite ata mbaŋa, a dawa a təv ŋgar kəla pat, dite ma ger seriye. A gwaɗa a mala mege seriye ata: <Ge a mər seriye nda mala gùvəl gà duwa te.> 4Aka ndza hinne, a sàs a wele ata aà meger seriye ŋgar tsa. I dəba ŋa ya, a dzala a gwa: <Magəɗa Mbulum a giŋ a tsa dukw ŋgar, dite ka, a sèsiŋ magəsa ahəm wura tsa asa. 5Ama madakwa məkəs aaha à gìzliŋ a gər hinne nda bazlam, à kiɗ a iye ka, ŋgulum i ger a aba seriye ŋgar a dzekwiŋ, tsəka, a miyek a à madara a təv ga ya tsa.> «

6I dəba ŋa ya, Əbay Yesuw a səkah à bazlam ata asa. A gwaɗa a tar: «Dzum zləm a dukw ata mala mege seriye ata ŋgwal ŋa tsa a tsik a. 7Dite wànà Mbulum dze ana, a ti zlèk a gà mburma ana a pala tar, ti tiwer aaba a hawa mèkwède ya seyiŋ ivaɗ tsiye? Wànà a ge a mèhìnèkw aà mezleke tar a? 8Iye ihər i tsik a kurum ŋa: A ta gis a bazlam tar bise. Ama kəla ka, i təv ana iye, *wur ana a dara i təv Mbulum a, i dere a ya ana, wànà i ti lere a aà gà mburma ya nda gà megìse iye i gəzləŋ tar ika gər ahəɗ a?»

Bazlam minew gà *Farisa duwa nda mala duwan

9Aləka i dəba ŋa ya, Yesuw a tsik bazlam minew ŋgiɗ pam asa, a gà mburma ana tə dzala i tar ka, tar gà ɓəzla gà ŋgwal ŋa ika miɗ Mbulum, dite ka, ta fir a aà gà mìsle ŋgiɗ ka, kamala za ya. A gwaɗa a tar: 10«Gà wele duwa sula, tə da a ga Mbulum batsah ŋana aà meheme iɗəm. Mìsle ŋgiɗ ilik ka, gà Farisa. Biy ŋgiɗ aaha ibam, mala dùwan. 11Tə daha ka, Farisa ata a ndza a təv ŋgar pam, a dza ba aà mahàmà a Mbulum. A gwa: <Mbulum gà, iye ihər i gek a kəkaaha, aɗaba ana iye ka, kamala gà asiŋ gà mburma ŋgiɗ ana tar gà ɓəzla məburnun, nda pàrsa ka, dite tar gà ɓəzla muva asa ya tsa. I gek a kəkaaha asa, aɗaba ana iye ka, kamala mala dùwan aaha ya tsiye. 12I gewa ndəra pat sula kəla kwaskwa, dite iye ihər i vəlawa gà dukw ana ku mege Yàa ŋgat kurwa ya ka, i zle a ihər a ilik, i vilek a asa mbaŋa.> 13Ama mala dùwan aaha a daha ka, a hitse diriŋ, aka fə̀r a gəza mbulum tsa, luz a tike gər a bəɗ, a tiwe a ba ŋgar, a lakaba a gəzləŋ. A gwaɗa a Mbulum: <Mbulum ga, i ndzek are tsehe te tsiye, na iye na mala bakal a?> «

14Yesuw a gwaɗa a tar asa: «Iye ihər i gweɗe a kurum ŋa: Mala dùwan aaha, aləka a da a ma ka, aka mbər mene ŋgwal ŋa ika miɗ Mbulum, bakal ŋgar aka pəl kuɗa. Ama Farisa aaha ka, ŋgat ka, a ne ŋgwal ŋa tsa. Aɗaba na wura a sasar, tə zalar batsah ŋa ka, Mbulum a ne a ŋgat kəla ŋa ivaɗ. Ama wur ana aka ne à ba ŋgar kwizikw ika miɗ mburma ya ka, Mbulum a ne a ŋgat batsah ŋa asa mbaŋa.»

Yesuw a pise ahəm a gà ɓəza ndirkiz

Mata 19:13-15; Markus 10:13-16

15Aləka i dəba ŋa ya ka, gà mburma tə daha à gà ɓəza ndirkiz a təv Yesuw, aɗaba ma tike aka tar ahər te. Aləka gà ɓəzla mazazama ŋgat ta ŋgat a tar kataya tsara ka, ta pala a tar ahəm, a sàs a tar na ti dehe a à gà ɓəza ata ya tsa. 16Ama Yesuw a zal a gà ɓəza. A gwaɗa a tar: «Dumara a təv ga ya.» Dite a gwaɗa a gà ɓəzla mazazama ŋgat asa: «Mandza, ka palum a tar ahəm tsa, tə dara à gà ɓəza a təv ga ya. Aɗaba mekwere Əbay Mbulum a waya ka, medzibe gà mburma ana kamala gà ɓəza aaha ya, na ti de aɗəm a ya. 17Iye ihər i tsik a kurum a nda ndzer: Wur ana aka gəs mekwere Əbay Mbulum kamala kəla ndirkiz a tsəka, a sle aà mede aɗəm a tsidze.»

Mege metsehe a mazazama Mbulum agəra

limana ana hinne ya

Mata 19:16-30; Markus 10:17-31

18Aləka i dəba ŋa ya, Əbay gà Yahuda duwa a tsam aà Yesuw, a gwaɗar: «Əbay gà, kər na ŋgwal ŋa ya. I ge a dze ana, là, na dite i ŋget a mesife ana à ndìv a tsa aà biybiy a?» 19Yesuw a gwaɗar aaka: «Aàmala na kà zeliŋ ŋgwal ŋa ya? Wura a riŋ ŋgwal ŋa tsa, say na Mbulum ilik tsiye. 20Aɗaba kà sər məpala ahəm Mbulum ana a gwa ka: Ki ge muva tsa, kə̀ kəɗ mburma tsa, ki ge akəl tsa, kà sàs pàrsa aà mburma tsa, dite zàmbaɗa à gà dede yak, nda mama yak a tsiye?»*fa* 21Wele ata a gwaɗar aaka: «Əbay ga, Yàa gəs gà dukw ata tserdze ya, daga aà gər kəla ndirkiz a, Yàa ge tsa.» 22Yesuw a tsaraka mifefile wele ata tsara ka, a gwaɗar: «Ama dukw ilik aka zeha i gà dukw ata kà ɗama dze ya.» A gwaɗar: «Daha, ka dzawa à gà dukw yak fit, dite kà dzaya siŋgwe ŋa a gà ɓəzla matawak. Na kàa ge dər kataya ka, ki ŋget a limana ana batsah ŋa, à ndìv a tsa i təv Mbulum a. I dəba ŋa ya, ka dara, ka zazam iye kuɗa.» 23Ama wele ata a tsaraka mifefile ŋgar ata kataya tsara ka, a mət i are ya sə̀rràt, aɗaba ana limana ŋgar a riŋ hinne ya.

24Yesuw a fə̀r ahər, na a mət i are ya kataya ka, a gwa: «Mawùràba aà mada a mekwere Əbay Mbulum gà ɓəzla limana ka, hinne. 25Ndəna gà ɓəzla limana ti de a a mekwere Əbay Mbulum a ka, ŋgulum zlìgwèmè ma da nda biye lepìrè.» 26Gà mburma ana tə tsaraka mifefile ŋgar ata ya ka, ta gwaɗar aaka: «Na kataya ana, weke a sle aà mimbile a i təv Mbulum a?» 27Yesuw a gwaɗa a tar aaka asa: «Dukw ana mawùràba ŋa i təv mburma ya ka, mawùràba ŋa tsa, na i təv Mbulum a.»

28I dəba ŋa ya, Piyer a gwaɗar aakaha tsara: «Araha, mər ka, maa miyak aba à gà dukw mər a tserdze, maa dara, maa zazam kər.» 29Yesuw a gwaɗa a tar aaka: «Haya kwaŋ, taŋa ka, lele. Ama i tsik a kurum a ka, nda ndzer kəla: Na wura aka miyak aba à gà ga ŋgar a, kige tsa à məkəs ŋgar a, bəla à gà damər ŋgar, nda gà bəla tsir ŋgar a, kige tsa asa, à gà ɓəza ŋgar a, agəra mekwere Əbay Mbulum a ka, 30a ŋget aɗəm a hinne, à zè a taŋa a miyak dər aba kinehe ya. Dite a ta ŋget a mesife ana à ndìv a tsa aà biybiy a, aka miɗ mbaŋa.»

Yesuw a ɗif à məməta ŋgar ana a hitsere a i biye ya,

məmakər ŋa

Mata 20:17-19; Markus 10:32-34

31Yesuw a daha, a ndzək gà ɓəzla mazazama ŋgat aaha kurwa gəra sula ya, kətsah a zlawak aà mburma ya. A daha, a gwaɗa a tar: «Tsarakum, araha, kwa ihər ki tèkwe a a Yeruzalem. Aləka, aka təv ana kàa ndzekwaha a fataya ka, dukw ana gà ɓəzla məma à guma Mbulum ta wetse akahər ata piŋŋe, ti tsik aà iye, *wur ana a dara i təv Mbulum a ka, a ta geye a ba. 32Aɗaba ti ta vile a iye a ahər a gà slele ana i fata tə sər Mbulum tsiye. Ti sewle aà ìyeŋa, ti ndeveyiŋa, dite ti tif aà iye a tìzle. 33Ta gìzl a iye nda megwiymbiɗ hinne, dite ta kiɗ a iye kuɗa. Ama i huɗ mehinne makər a ka, i mbilere a i biye ya.» 34I fataya ka, gà ɓəzla mazazama ŋgat ata tàa tsaraka dukw ana a sasar aà metsike ya tsa. Aɗaba a ge aà tar ka, kamala makàhà ŋa i huɗ ŋa ya, dèrze ikəka.

Yesuw a mbəl à mala guluf duwa

Mata 20:29-34; Markus 10:46-52

35Aləka i təv ana Yesuw aka à mendze a kwite Yeriko ya ka, aka le aà wele duwa guluf ŋa, a riŋ mandza ŋa aà gùva vatwa, à ŋgèl a duwa. 36A tsaraka gà mburma ana ika vatwa ti de a ya ka, a wiz aà tar, a gwaɗa a tar: «Dukùla na taŋa ya?» 37Ta gwaɗar: «Yesuw ana a dara i Nazaret a, na a de a nda naha ya.» 38Mala guluf ata a tsaraka kataya ka, a wideye hinne nda magala. A gwa: «Yesuw, gwala Dawda, i ndzek are tsehe te tsiye? Zlak iye te.» 39Gà na tə lah a təv ŋgar ika miɗ Yesuw a ka, ta palar ahəm, ta gwaɗar: «Ndza ɗikɗik.» Ama wele ata ka, a tsaraka tsa, a səkah à Mewideye hinne nda magala ŋgəlakəkka ivaɗ asa. A gwa: «Gwala Dawda, i ndzek are tsehe te tsiye?» 40Yesuw a tsaraka mifefile ŋgar ata ka, a hitse dzeŋ, dite a gwaɗa a tar: «Gìswimiŋarra ahər a, ma dara a təv ga ya.» Tə daha, ta gə̀saraha ahər. A ndzeha a təv ŋgar ka, Yesuw a gwaɗar: 41«I gek dze ana, dukùla na a sàsak a?» A gwaɗar aaka: «Əbay, a sèsiŋ ka, lèmbeɗiŋ are gà te.» 42I dəba ŋa ya, Yesuw a gwaɗar: «Daba, are yak aka lə̀mbaɗaba. Megìse yak ana kì gis iye ya ka, aka mbəl à kər.» 43I dəba bazlam Yesuw ata a tsiker kataya ya tsara ka, wurat are ŋgar a hə̀ndə̀k ba. Dite a zazam Yesuw nda gà mazàmbàɗà aà Mbulum, tə dəɗ akaba tserdze. Gà mburma ana i fataya tekeɗe, ta ŋgat a dukw ata ka, tə zàmbaɗa à Mbulum mbaŋa.

ప్రస్తుతం ఎంపిక చేయబడింది:

Luka 18: gnd

హైలైట్

షేర్ చేయి

కాపీ