Yuhana 9

Yesuw a mbəl à wele duwa ta wa ŋgat guluf ŋa

1A pat duwa, Yesuw a de a ika vatwa. A ŋgat a wele duwa, guluf ŋa. A gər ana ta wa ŋgat a, aka ŋgat a vatwa tsa. 2Gà ɓəzla mazazama Yesuw ta gwaɗar: «Mala medzeŋge a mər, ta wa wele aaha guluf ŋana, aɗaba bakal ŋgar a? Tsəna, agəra biy gà tsir ŋgar a?» 3Yesuw a gwaɗa a tar aaka: «Guluf ŋgar aaha ka, aɗaba bakal ŋgar tsa, dite agəra biy gà tsir ŋgar tsa asa. Ta wa ŋgat guluf ŋa tùtùrkùmma ka, dite ndzəɗa Mbulum mə̀ pàt aba nda təv ŋgar. 4Say ki gekwe a meslire wele ana a slərra iye ya, i təv ana pat a riŋ mba ya. Həvəɗ aka à mege. Aka ge ka, ku weke tekeɗe, a sle a aà megemir ŋa asa tsa. 5I təv ana iye ɗa ika gər ahəɗ mba ya ka, iye i ne təv dzaydzay gà mburma gər ahəɗ.»

6A tsik a tar aba mifefile ata ya ka, a tif tìzle a bəɗ, a həlaɓ, dite a ndə̀ɗ metìrfèneh ŋana, a bah aà are mala guluf ata. 7A gwaɗar: «Da, ta bara are a duluv ana tə zalar Siluwam a.» Zləm təv ata ka, kərga megweɗe ya, wele ana tə slərra ya. Mala guluf ata a daha, a bara are ŋgar a fata. Dite wurat are ŋgar a hə̀ndə̀k ba. Aləka a màra ka, a ŋgat a vatwa lele kuɗa.

8I dəba ŋa ya, gà ɓəzla biye hərmaga ŋgar ana ta mberaha ya, nda gà na ta ŋgatawar à ŋgèl a duwa aà gùva vatwa ya, ta gwa: «E/?, naha ka, wele ana a ndzawa aà gùva vatwa, a ŋgalawa duwa ya dìgiyè?» 9Gà mìsle ŋgiɗ ta gwa: «Kaɗəŋ, ŋgat ŋa.» Gà asiŋ ŋa ta gwa: «Awaŋ, ŋgat tsa, ama kə̀la ka, a ndzikiɗ ba ŋgat pəra.» Aɗaba taŋa, wele ata a gwaɗa a tar aaka: «Iye ŋa ndzer dukw ŋgar.» 10Ta gwaɗar aaka: «Dite meme na are yak a hə̀ndə̀k ba seyiŋ a?» 11A gwaɗa a tar aaka asa: «A hə̀ndə̀k ba ka, wele ana tə zalar Yesuw a, a həlaɓ ahəɗ, a giŋ metìrfèneh ŋa aà are, dite na a gweɗiŋ: <Da, bara are a duluv Siluwam> a. I da, i ta bara are a fata kaɗəŋ ka, dite na araha i ŋgat a vatwa kuɗa ya.» 12Ta gwaɗar: «Mburma ŋa i ŋga, na kinehe ya?» A gwaɗa a tar: «I sər tsa.»

Gà *Farisa tə tsam bazlam aà wele ana a ndzawa guluf ŋa ya

13I dəba ŋa ya ka, tə da à wele ata are ŋgar a hə̀ndə̀k ba ya, a təv gà Farisa. 14-15Tə daha ka, gà Farisa ata tə tsam ihər bazlam a. Ta gwaɗar: «Meme na kà mbəl, are yak a hə̀ndə̀k ba kinehe kuɗa dər a?» A gwaɗa a tar: «I ŋgat a vatwa ka, Yesuw a giŋ metìrfèneh ahəɗ aà are, dite i bara are, tsam ka, na i ŋgatar a.» Tsaatsa, pat ana Yesuw a həlaɓ metìrfèneh ahəɗ, a ge aà are a wele ata, a hə̀ndə̀k ba ya ka, a pat mesìfìkà ba. 16Gà asiŋ gà Farisa ta gwa: «Mì samata wele ana a ge a kataya ya ka, a sle aà madàra i təv Mbulum a tsa, aɗaba ana a ge a megemir, a tike a gər a məpala ahəm kwa a pat mesìfìkà ba tsiye.» Ama gà mìsle ŋgiɗ asa ta gwa: «Meme na wura a sle a aà mege medzibe gà dukw mene aà mburma aaha ya, na ŋgat mala bakal a?» Aɗaba taŋa tə ndzakaya ba iba ya vatwa pampam.

17Gà Farisa ta gwaɗa a wele ana are ŋgar a hə̀ndə̀k ba ya asa: «Dite kər a gè, kù gwa aà wele ana a hə̀ndə̀k are yak ana, meme?» A gwaɗa a tar: «I gweɗe a là, ŋgat ka, mala məma à guma Mbulum ndzer.» 18Ama gà bàba gà Yahuda ta gəs bazlam ŋgar ata a gwa: «Iye piŋŋe ka, guluf ŋa, dite i mbəl kinehe» ya tsa. Aɗaba taŋa tə daha, tə zal a gà tsir ŋa, 19aà matsama tar bazlam a. Ta gwaɗa a tar: «Wànà naha ana, kəla kurum kaɗəŋ a? Kù gwaɗum, kà wum ŋgat ka, guluf ŋa ya? A ge ba dze ana, meme, na dite a ŋgat a vatwa asa yà?» 20Gà tsir wele ata ta gwaɗa a tar aaka: «Haya, mì sər, ŋgat ka, kəla mər. Mì wa ŋgat ka, guluf ŋa dukw ŋgar. 21Ama kinehe ka, mì sər meme na are ŋgar a hə̀ndə̀k ba ya tsa, dite mì sər wur ana a hə̀ndə̀kar ikəka ya tsa asa mbaŋa. Tsàmum aà ŋgat ŋa dukw ŋgar. Ŋgat ka, kəla ndirkiz mba tsa, a sle a aà metsike a kurum a dukw ana a geba nda ŋgat a.» 22Gà tsir ŋgar ti tsik kataya ka, aɗaba ana magəɗa gà bàba gà Yahuda a ge a ter a ya. Aɗaba gà bàba gà Yahuda tàa mbər medzè akaba bazlam aka ndəv. Ta gwa: Wele ana aka gwa, Yesuw ka, *Kiristi, mala məmbàlà à mburma ana Mbulum a gwa, i ti slir a kurumehe a ya ka, ti delewere a ŋgat i gà ga Mbulum tar ata ya. 23Aɗaba taŋa na gà tsir wele ata ta gwaɗa a tar: Tsàmum aà ŋgat ŋa, dukw ŋgar a. Ŋgat ka, kəla ndirkiz asa tsiye ya.

24I dəba ŋa ya, gà Farisa tə zal a wele ata a ndzawa guluf ŋa ya masula ŋa asa. Ta gwaɗar: «Tsik dukw Mbulum ndzer ŋana kwaŋ, aɗaba mì sər ndzer, wele ata ka, mala bakal.» 25Dite a gwaɗa a tar aaka: «Bəla ŋgat mala bakal, bəla ŋgat mala bakal tsəka, i sər tsa. Ama dukw ilik kə̀la ka, i sər. Aɗaba piŋŋe ka, iye guluf ŋa. Ama kinehe ka, Yàa ŋgat a vatwa dzaydzay lele kuɗa.» 26Ama tar ka, hiywe tar riŋ ihər tì tsèmeye ahər a pəra, ta gwaɗar: «A ge aà kər dze ana, meme? Dite meme na a hə̀ndə̀kək ika are ya?» 27Wele ata a gwaɗa a tar: «Yàa tsik a kurum dukw ana a geba nda iye ya aka ndəv, ama kàa dzùmar zləm tsa. Dite aàmala na a sàs a kurum metsereke masula ŋa asa ya? Wànà a sàs a kurum mene gà ɓəzla mazazama ŋgat mbaŋa kəla ya?» 28Tə tsaraka taŋa ka, tə ndavayar pìslìɗìɗe hinne, ta gwaɗar: «Kər ka, mala mazazama wele ata. Ama mər ka, gà ɓəzla mazazama Musa. 29Mì sər ka, Mbulum aka fàfəl a Musa akahər ata. Ama wele ata ka, mì sər təv ana a dara iɗəm a tsidze.»

30Wele aaha a gwaɗa a tar aaka: «Ee, tsaka naha ka, dukw mene à mburma ya, na a hìndìkiŋ ika are ya, dite meme na kurum ka, kà sərum təv ana a dara iɗəm tsiye? 31Kà sərakwa ka, Mbulum a dze a zləm a mifefile gà ɓəzla bakal tsa. Ama a dze a zləm ka, a wele ana a dzer a gurmits a bəɗ, dite a ge a dukw ana a sasar a. 32Daga aà gər ana ta ge gər ahəɗ a, wura aka tsaraka ka, tàa hə̀ndə̀k ika are ya a wur ana ta wa ŋgat guluf ŋa ya tsa. 33Na mege wele aaha a dara ka, i təv Mbulum a tsəka, a sle a aà mege duwa tsidze.» 34Ta gwaɗar aaka: «Iyyàh, kər ka, ta wa kər i bakal dukw yak daga piŋŋe ana, dite meme na ki ɗif a mər a à duwa ya?» Tsam ka, tə dalawara ŋgat i təv mayahaba gər tar a sarrrà.

Yesuw a fàfəl aka gər gà mburma ana ta ŋgat a vatwa ya,

ndəna ta ŋgatar tsiye

35Yesuw a tsaraka, tàa dalawara ŋgat i təv mayahaba gər tar ata ya ka, a dza ba aà mayaha ŋgat. Aləka a le aà ŋgat ka, a gwaɗar: «Kàa gəs *wur ana a dara i təv Mbulum a nda gəzləŋ a?» 36Wele ata a gwaɗar: «Wur ana a dara i təv Mbulum ana, weke, Əbay gà, na dite i gis a ŋgat a?» 37Yesuw a gwaɗar: «Wele ana kər riŋ ihər ki ŋgeteriŋa, a fèfilek a kinehe ya gè.» 38Wele ata a gwaɗar aaka: «Yàa gəs kər Batsah ga ŋa.» A daha, a dzar gurmits a bəɗ aka miɗ ŋgar.

39Yesuw a gwaɗar: «I dara aka gər ahəɗ a ka, aà masàsà ikaba seriye a mburma ya. Gà ɓəzla guluf ta ŋgat a vatwa. Ama gà mburma ana ta gwa, mì ŋgat a vatwa ya ka, ti ne a gà ɓəzla guluf ivaɗ.» 40Gà asiŋ gà *Farisa ana i təv ŋgar a, tə tsaraka bazlam ata ka, tə tsam ahər, ta gwaɗar: «Wànà kər kù gwa ana, mər gà guluf ŋa mbaŋa ya?» 41Yesuw a gwaɗa a tar aaka: «Na mege ki gwim gà ɓəzla guluf ka, ana ki gwim a i bakal tsa. Ama kù gwaɗum kinehe, mər gà guluf tsəka, kurum i bakal hiywe ivaɗ.»

ప్రస్తుతం ఎంపిక చేయబడింది:

Yuhana 9: gnd

హైలైట్

షేర్ చేయి

కాపీ