Yuhana 7

Gà damər Yesuw ta gəs ŋgat nda gəzləŋ tsa

1I dəba ŋa ya, Yesuw a sùwaya riŋ ika ahəɗ Galile tserdze. A sasar mede aka ahəɗ Yuda tsa, aɗaba ana a sàs a gà bàba gà Yahuda aà makə̀ɗà ŋgat a. 2Akahər ata ka, megirive gà Yahuda ana tə zalar *megirive mekìrìwè ga ya, aka à mendze aɗəm i Yeruzalem. 3Aɗaba taŋa na gà damər Yesuw ta gwaɗar ka: «Tàkwa i faha ya, a Yeruzalem, aka ahəɗ Yuda, dite ka, gà ɓəzla mazazama kər ana i fataya, ta ŋgat a dukw mene aà mburma ana ki ge a ya mbaŋa ya. 4Wura à kèhe a dukw ana a ge a ya tsa, na aka sasar ka, mburma tə sər ŋgat tserdze ya. Aɗaba na kər riŋ ihər ki ge a medzibe megemir ata ka, ge parakkà, gà mburma tserdze ta ŋgatak, na dite ti sir a ya.» 5Ama gà damər ŋgar ata ti tsikar kataya ka, ku mege tar tekeɗe, ta gəs ŋgat nda gəzləŋ ɓav tsa.

6Yesuw a gwaɗa a tar: «Məpàslà ahər mede gà ana Mbulum a pesliŋ a ka, aka ndze aɗəm zukw tsa. Ama i kurum ka, aka sle, ku mege ndeɗime, ki ziwim a ka, gər kurum. 7Kurum ka, gà mburma ti ne a kurum a are tətsà. Ama iye ka, ti niŋ a are, aɗaba ana i gwaɗawa, megemir tar ana ta ge ye a ka, lele tsiye. 8Ama kurum ka, dum a megirive ata. Iye ka, aka sle mede gà zukw tsa, aɗaba məpàslà ahər mede gà aka ndze aɗəm tsa.» 9A tsik a tar aba bazlam ata ya ka, ŋgat ŋa a ndzaba ika ahəɗ Galile.

Yesuw a da a *megirive mekìrìwè ga a Yeruzalem

10Aləka gà damər Yesuw tə da a megirive ata i Yeruzalem a ka, Yesuw tekeɗe, a dəɗ aka tar i dəba ya mbaŋa. Aləka ŋgat a ndzeha a fata ka, aka pàt aba a mburma parzakkà tsa kəla, a kaha ba. 11Gà bàba gà Yahuda ana i fataya, ti yaha ŋgat i megirive ata ya hinne. Ta gwa: «Ŋgat dze ana, i ŋga?» 12Gà mburma tserdze ti tsikeye bazlam pampam nda akəl aka gər ŋgar hinne. Gà mìsle ŋgiɗ ka, ta gwa: «Wele ŋa ka, ŋgwal mburma.» Ama gà biy ŋgiɗ aaha ta gwa i tar: «Kataya tsa, ŋgwal mburma tsa, a bene a mburma.» 13Ama a sàs a wura aà meɗe à bazlam ŋa a bəra parakkà tsa, aɗaba ana ta ge magəɗa a gà bàba gà Yahuda ya.

14I huɗ megirive ata ya ka, Yesuw a da a batsah ga Mbulum. A daha, a dza ba aà metsìkè guma ŋgar a mburma. 15Bazlam ŋgar ata a tsik a ka, a ge aà gà bàba gà Yahuda ata kamala sunwa ya, tə dzala, ta gwa: «Meme na wele aaha a sər duwa hinne kataya ya? Dite kwets aka dzeŋge ɓav tsiye?» 16Yesuw a gwaɗa a tar aaka: «Guma aaha i tsik a ya ka, a dara ka, i madzala gà gər gà ya tsa. Ama a dara ka, i təv Mbulum ana a slərra iye ya. 17Wur ana a sasar a ge a dukw ana a tsahən aà Mbulum a ka, a sir a dər, guma gà aaha i tsik a ya ana, a dara ana, wànà i təv Mbulum a ya, tsəna, i madzala gà gər gà ya yà. 18Wur ana a tsik a bazlam ana a dara i madzala gà gər ŋgar a ka, a yehe a ka, meɗè zləm, dite gà mburma tə̀ zlə̀b à ŋgat. Ama wur ana a waya ka, mburma tə̀ zlə̀b à wele ana a slərra ŋgat a ka, ŋgat ka, mala ndzer, bakal i təv ŋgar tsidze. 19Magwaɗa ŋa ka, Musa aka vəl a kurum məpala ahəm Mbulum dze ana, dite wura aka gəs ahər ahəm i liwiŋ kurum a ilik tsidze ya. Aàmala na ki yehwim a vatwa aà mekìɗe iye asa ya?»

20Gà mburma ata ta gwaɗar: «Ki be a a dala kəla yà? Weke na a yehe a vatwa aà makə̀ɗà kər a?» 21Yesuw a gwaɗa a tar aaka: «I ge megemir a pat mesìfìkà ba ilik pəra ka, a ge a kurum kamala dukw mene aà mburma ya tserdze dze ana, meme? 22Kurum kà sərum, Musa a gwaɗa a kurum: <Kàa wum kəla, aka ge mehinne tsamakər ka, ki sèswimiŋa.>*fa* Nda ndzer kaɗəŋ ana, Musa yà na a lah metsìkè a kurum taŋa ya? Awaŋ, daga aà gər gà tsir kwa ya tsiye? Aɗaba bazlam Musa ata ka, ki seswim a mburma, ku mege pat ŋa aka ndze a pat mesìfìkà ba tekeɗe ya. Taŋa dze ana, meme? 23Haa kinehe kurum riŋ ihər ki seseywim a mburma na pat ŋa aka ndze a pat mesìfìkà ba ya ana, aɗaba kà wayum bakal ma ta ge riŋ nda təv məpala ahəm Musa asa tsiye, dite aàmala na ki gwim a matsəɓatsəɓ nda təv gà, agəra ana i mbəl à mburma tsekwir tsekwir lele, a pat mesìfìkà ba ya? 24Miyakum à mege seriye dukw ana ki dzelwim a nda gər a. Ki gwim a seriye ka, nda ndzer ŋa.»

Gà mburma ta gwa: «Wànà Yesuw ana, *Kiristi ya?»

25Gà asiŋ gà mburma ana i Yeruzalem a, ta gwa: «Abaya naha ka, wele ana gà mburma ti yehe a vatwa aà makə̀ɗà ŋgat a. 26Samatum kwaŋ. A riŋ à fèfil a parakkà ika magər gà mburma tserdze, dite ku wura a peler a ahəm tsa. Wànà gà Əbay kwa tə sər ŋgat ana Kiristi, mala məmbàlà à mburma ana Mbulum a gwa, i slir a kurumehe a ya kaɗəŋ kəla ya? 27Ama ka, a ge a kataya tsa. Aɗaba mì sər na Kiristi a dere a ka, wura a sir a, a dara ana, i ŋga ya ka, ti sir a tsa. Ama wele aaha ka, kà sərakwa təv ŋgar ana a dara iɗəm a.»

28Akahər ata ka, Yesuw a riŋ a tsik a guma ŋgar a mburma i ga Mbulum batsah ŋa ata ŋgəlakəkka. I huɗ guma ŋgar ata a tsik a ya ka, a gwa: «Kà sərum iye, dite kà sərum təv ana i dara iɗəm a ndzer a yà? Ama i dara ka, i ziwera gər gà ya tsa kəla. Wele ana mala ndzer ŋa ya, na a slərra iye ya. Ama kurum ka, kà sərum ŋgat tsa. 29Iye ka, i sər ŋgat, aɗaba i dara ka, i təv ŋgar a, dite ŋgat na a slərra iye ya.» 30I fataya tsara ka, ti yaha vatwa aà magəsa ŋgat. Ama wura ilik aka ləm ahər tsa, aɗaba məpàslà ahər ana Mbulum a tiker a ka, aka ndze aɗəm zukw tsa. 31Ama gà mburma i magər tar ta gəs ŋgat nda gəzləŋ tar. Gà mburma ata ta gwa: «Wele aaha ka, Kiristi ana Mbulum a gwa i sida ya, i slir a kurumehe a ya dukw ŋgar. Aɗaba meme na mburma ŋa a dere a, a ge a dukw mene aà mburma ka, à zè a dər biy na wele aaha a ge a kinehe ya ya?»

Tə slər gà ɓəzla makàslà ga Mbulum aà magəsa Yesuw

32Gà *Farisa tə tsarakara dukw ana gà mburma ti tsik aà Yesuw nda akəl i liwiŋ tar a ka, tə dza akaba ahəm nda gà Əbay gà ɓəzla mandəva kuɗa a Mbulum. Tə daha, tə slər gà ɓəzla makàslà ga Mbulum ata, aà magəsa Yesuw. 33Aləka tə daha ka, Yesuw a gwa: «I ndze a i təv kurum ka, zaakwa pəra, i dəba ŋa ya, i mbìɗ a gər a təv wele ana a slərra iye ya. 34Ki ti yehwim a iye, ama ki ŋgetwim a iye tsa. Aɗaba ki slwim a aà mede a təv ana i ti de aɗəm a ya tsa.»

35Gà bàba gà Yahuda ata tə tsaraka bazlam ŋgar ata kataya ka, ta gwaɗaba ika magər tar: «A ti de a dze ana, a ŋga, na dite ka, ki slekwe a aà mesire tə̀vəməŋa tsidze ya? Wànà a de a ana, a təv gà Yahuda ana ta gwitse aba aka ahəɗ diriŋ a liwiŋ gà Girek, a dzeŋge a ter a diriŋ i fata, dite ka, a dzeŋge a a gà Girek mbaŋa kəla ya? 36Bazlam ŋgar ata a gwa: <Ki ti yehwim a iye, ama ki ta ŋgetwim a iye tsa, aɗaba ki slwim a aà mede a təv ana i de a a ya tsa> ana, a sasar megweɗe ana, là?»

Yam ana à ŋgìz a ùwaɗ ùwaɗ, a vile a mesife a mburma ya

37A pat mandəvandəv megirive ata ka, megirive ŋgwal ŋa ana ndzer a kuɗa.*fb* A pat ata ka, Yesuw a hitse aà mbulum ika miɗ mburma tserdze, a fàfəl ŋgəlakəkka, a gwa: «Na yam aka kəɗ wura ka, ma dara a təv ga ya, ma sa. 38Ar ka, kamala ana mewetse ŋa a riŋ i wakita Mbulum akahər ata, ta gwa: <Wur ana aka gəs iye nda gəzləŋ a ka, yam ana a vile a mesife a mburma ya, à ŋgìzere a i gəzləŋ ŋgar a ùwaɗ ùwaɗ.> « 39Ama Yesuw a tsik a tar bazlam minew ata ka, aà Mezite Mesife Mbulum ana a ta vile a a gà na ta gəs ŋgat nda gəzləŋ a. Aɗaba akahər ata ka, gà mburma ata tàa ŋgat Mezite Mesife Mbulum zukw tsa, agəra ana Yesuw aka da a təv mezlibe ŋgar ana i təv Mbulum, tì zlibe a à ŋgat zukw tsiye.

Gà mburma tə ndzək ba ikaba ya təv pampam, agəra Yesuw

40Gà mìsle ŋgiɗ ika magər gà mburma ata tə tsaraka bazlam ata tsara ka, ta gwa: «Wele aaka ka, mala məma à guma Mbulum ana ndzer, Mbulum a gwa, i slir a kurumehe a ya.» 41Gà asiŋ ŋa ta gwa asa: «Wele aaka ka, *Kiristi, mala məmbàlà à mburma ana Mbulum a gwa, i ti slir a kurumehe a ya.» Ama gà mìsle ŋgiɗ pam ta gwa: «Kataya tsa. Kiristi a dere a ana, ika ahəɗ Galile ya ɓav a? 42Aɗaba wakita Mbulum a gwa ka, Kiristi a dere a ka, i gwala Dawda a i kwite Betelehem ana Dawda a ndzawa iɗəm akahər ata ya ana, meme?»*fc* 43Kamala taŋa ya gà mburma tə ndzək ba ikaba ya təv pampam, agəra Yesuw. 44A sàs a gà asiŋ ŋa, aà magəsa ŋgat zləmana, ama wura ilik aka ləm ahər tsa.

Gà Əbay gà Yahuda ta gəs Yesuw nda gəzləŋ tsa

45I dəba ŋa ya, gà ɓəzla makàslà ga Mbulum ata ndeɗiŋa ya, ta mbəɗaha gər a təv gà Əbay gà ɓəzla mandəva kuɗa a Mbulum, nda gà *Farisa. Ti ndzeha ka, gà Əbay ata ta gwaɗa a tar: «Aàmala na kə̀ gə̀sumara ŋgat a tsiye?» 46Gà mburma ata ta gwaɗa a tar aaka: «Wura aka fàfəl ilik kamala ŋgat a tsidze.» 47Gà Farisa ta gwaɗa a tar: «E/?e, aka baza a kurum za mbaŋa ya? 48Kà sərum, wura ŋgiɗ a riŋ ika magər gà Əbay kwa, nda gà asiŋ gà mburma mər gà Farisa ya ana, tàa gəs ŋgat nda gəzləŋ a? wura a riŋ tsa. 49Say gà mburma ana taf, tə sər məpala ahəm Musa tsiye, na a gəs ŋgat a. Tar tserdze tàa nəs, Mbulum aka vəl a tar mezelme.»

50Wele duwa a riŋ ilik ika magər gà Farisa ata, zləm ŋgar Nikudimus, wele ana a da a təv Yesuw akahər ata ya.*fd* A daha, a gwaɗa a tar: 51«Məpala ahəm kwa ka, aka vəl a kwa vatwa aà mege seriye aà mburma kataya tsa, say ki tserekikwe a ndzer ŋana a tsik a ya dzekwiŋ.» 52Ta gwaɗar aaka: «Assàh, wànà kər ana, gà Galile mbaŋa kəla ya? Dzeŋge wakita Mbulum lele kwaŋ, dite ki sir a dər ka, mala məma à guma Mbulum ilik a dere a ika ahəɗ Galile ya tsa.» 53{I fataya ka, ku mege weke a tsaraka taŋa ka, a daba a ma ŋgar.

ప్రస్తుతం ఎంపిక చేయబడింది:

Yuhana 7: gnd

హైలైట్

షేర్ చేయి

కాపీ