Gà Ɓəzla Meslire 1

Mezite Mesife ana Yesuw a gwa, i ta vile a a gà ɓəzla

mazazama ŋgat ana i sida ya

1A kər Tiyufil ana i waya kər hinne ya asa mbaŋa.

Aɗaba Yàa ɗama gà dukw ana Yesuw a ge ya, nda biy ana a dzeŋge a mburma daga piŋŋe, 2haa a pat ana a ndisl dər, a da a gər ŋa ya. Aka ana aka tsəl a gər ŋa zukw tsiye ka, aka ɗe a tar aba à metsehe ya, nda ndzəɗa Mezite Mesife Mbulum, a gà mburma ana a ndzək tar kamala gà ɓəzla meslire Mbulum a. 3I dəba məməta ŋgar a ka, a pàtawa a tar aba lele mehinne dzik faɗ, tə sər dər ka, ŋgat a riŋ nda are ndzer. I huɗ mehinne ata ya ka, a tsikewa a tar bazlam *mekwere Mbulum ana a ta kwere a ya.

4A pat duwa, tar riŋ mandza ŋa i təv ilik ŋa ka, a gwaɗa a tar: «Kà dum i Yeruzalem a zukw tsa. Ama say babum dukw ana i tsik a kurum, Tsir gà a gwa, a ta vile a kurum a i sida ya. 5Yuhana a tsilwiɓ à mburma ka, a yam. Ama i dəba ŋa ya, aləka ka, i tsilwiɓ à kurum a ka, a Mezite Mesife Mbulum.»

Yesuw a tsəl a gər ŋa

6Gà mburma ata tar riŋ i təv Yesuw a, ta gwaɗar: «Batsah mər ŋa, wànà a pat ata kuɗa ya ana, ki me a mər a à mekwere a ahər mər gà Isərayel a?» 7Yesuw a gwaɗa a tar aakaha: «Gà pat ŋa ana ta ge a ba ya ka, kurum tsa na ki sirwim a ya. Aɗaba Tsir gà na a tike məpàslà ahər pat ŋa ya, à gər ŋgar ilik. 8Ama ki ta ŋgetwim a ndzəɗa ka, i təv ana Mezite Mesife Mbulum a dere a a təv kurum a. Ki ti nwim a gà ɓəzla məma à bazlam gà i Yeruzalem, ika ahəɗ Yuda nda Samariya, dite ku mege i ŋga ika gər ahəɗ tserdze ya.» 9Yesuw a tsik aba gà bazlam ata ya lele ka, tə zla ŋgat ndàra a gər ŋa. I təv ana tar riŋ ta fir ahər a ya ka, hulɓukw a kaha ŋgat aà are tar a.

10Tar riŋ ta fir ahər a ndəramma pəra, na Yesuw a riŋ a de a ya. I dəba ŋa ya, pəzlàŋ gà mburma sula nda gà petek herrè ŋa, tə dara a təv tar a, 11ta gwaɗa a tar: «A kurum gà Galile, aàmala na ki ndzwim a i faha aà məfə̀rà aà gəza mbulum a? Yesuw ka, aka da ika magər kurum a, a gər ŋa. Ama à mère a mba ka, kataya mbaŋa asa, kamala naha a da à kurum a.»

Wele ana a zla təv mendze Yudas a

12Aləka i dəba ŋa ya, gà ɓəzla meslire Mbulum ata tə tarra i dìyes Ndzendzebire ata tar mandza ŋa iɗəm a, ta mbəɗara gər a Yeruzalem a. Dìyes ata ka, əzaɗ zaakwa pəra na à Yeruzalem a. 13Ti ndze a Yeruzalem ka, tə daha, tə tsala a ga ana ika gər biy ŋgiɗ, tə ndzawa iɗəm piŋŋe kəla pat a. Zləm gà mburma ata ka: Piyer, Yuhana, gà Zakup nda Andire, gà Filip nda Tumas, gà Bartelemi nda Mata, dite gà Zakup kəla Alfayus nda Simun ana a niw bazlam ŋgumna piŋŋe, a waya makwàrà ba tar i gwala ŋgar a, dite nda gà Yuda kəla Zakup. 14Tar ata tserdze ya, nda gà məkəs, ti yahawaba gər aà mahàmà a Mbulum nda gà Mariya məmər Yesuw, dite nda gà damər Yesuw fit tserdze.

15A pat ŋgiɗ duwa, i təv ana gà ɓəzla magəsa Yesuw nda gəzləŋ ti yahaba gər, ti sle a dərməka nda dzik səla ya ka, Piyer a hitse aà mbulum i magər tar. A gwaɗa a tar: 16«Gà damər gà, say dukw ana Mezite Mesife Mbulum a tsik piŋŋe i wakita Mbulum a ka, aka ge ba kaɗəŋ. Aɗaba a tsik nda ahər Dawda akahər ata, a tsik aà Yudas ana a ti ne a mala meɗìfè à vatwa a gà mburma ana tàa gəs Yesuw a. 17Yudas piŋŋe ka, ika magər kwa. Tə zla ŋgat kamala kwa ya. Mege megemir kwa ka, ilik. 18Ama siŋgwe ana tə dzàɗar aɗaba bakal ŋgar a ka, a səkəm dər gùvàh. I dəba ŋa ya, a dəɗ i gùvàh ata, à gər ŋgar, a ndə̀zl ika ba ya, dukw hitwis gàtsak gàtsak i bəra. 19Gà mburma ana i Yeruzalem a tserdze, tə tsaraka dukw ana a ge ba nda ŋgat a ka, tə zal a gùvàh ŋgar ata ndaka ahəm tar Akaldama, kərga megweɗe ya ka, <Gùvàh məmbəz>.» 20Ama Piyer a gwaɗa a tar asa: «Ta wetse a wakita Dimis ka, ta gwa:

<Wura ma ndza i ga ŋa, dite ka,

are ŋgar ma ge aà bəra tsa.>*fa*

Ama mewetse ŋa a riŋ asa ka, a gwa:

<Mìsle ŋgiɗ ma zla megemir ŋgar.>*fb*

21Ama kinehe ka, wura ilik ma da aɗəm avukw ŋgat, ma ne mala məma à bazlam Yesuw BATSAH kwa ŋana a mbəlara i biye ya, kamala mər a. Wele ata ma ge ka, mìsle ŋgiɗ ilik ika magər gà mburma ana tə zazam mər nda gà Yesuw BATSAH kwa ŋa i təv mesìweye ŋgar ana a sùwaya aà kwite aà kwite tserdze ya, 22à gər ana Yuhana a tsilwiɓ à ŋgat a yam a, dite haa a pat ana a da ika magər kwa a gər ŋa ya.»

23I dəba ŋa ya, tə ndzək mburma ika magər tar a sula: Gà Yasufa ana tə zalar Barsabas, dite Yustus asa ya nda Matiyas. 24Aləka tar ata tserdze ya, ta hama aà Mbulum. Ta gwa i huɗ meheme tar ata ya ka: «Batsah mər ŋa, kər na kà sər gəzləŋ mburma tserdze ya. Ɗif a mər dər, weke na i liwiŋ gà wele sula ŋa aaha kà zla ka, 25dite ma ndza a təv mendze Yudas, aà megemir mala meslire yak a. A zle a megemir Yudas ana a miyak dər aba ya, a daba a təv mendze ŋgar ana a waya ya.» 26Tə dza gà wele ata sula ya, a tsetse. Ta ge tsetse ŋa ka, a ɗe a tar à Matiyas. I dəba ŋa ya, gà ɓəzla meslire Mbulum kurwa gəra ilik ŋa aaha, tə zla ŋgat a liwiŋ tar kuɗa.

ప్రస్తుతం ఎంపిక చేయబడింది:

Gà Ɓəzla Meslire 1: gnd

హైలైట్

షేర్ చేయి

కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి

Bible, Zulgo గురించి మరింత తెలుసుకోండి