काम 13
13
बरनाबास अर साऊलनै टाळर भेजबो
1अंताकीया की बिस्वासी मंडळी म परमेसर की खेबाळा अर उपदेस देबाळा कई हा, जंय्यां की बरनाबास, समोन जिनै काळ्यो बी बोलता हा अर कुरेन को लूकियुस अर देस की चोथी पाँती को राजपाल हेरोद#13:1 हेरोद ओ हेरोद अनिपास ह। को गोद आयड़ो भाई मनाएम, अर साऊल। 2जद बे बरत क सागै परमेसर की भगती करर्या हा बि टेमई पबितर आत्मा बाऊँ बोली, “मेर ताँई बरनाबास अर साऊलनै बि काम ताँई नाकै टाळो जि काम ताँई बानै बुलायो गयो ह।” 3जणा बे बरत अर अरदास कर बाकै माथा प हात म्हेलर बानै बिदा कर्या।
पोलुस अर बरनाबास को साईपरस ताँई सफर
4पबितर आत्मा क कह्या गेल बरनाबास अर साऊल सिलूकीया गया जठैऊँ झाज म बेठर साईपरस नाम का टापू प पुग्या। 5अर बे बि टापू की सलमीस नगरी म पुगर बठै यहूदिआ की अरदास करबाळी झघा म परमेसर का बचन सुणाया, अर यहून्ना जिनै मरकुस बी बोलीं हीं, एक मददगार की जंय्यां बाकै सागै हो। 6अर बे, बि सगळा टापूऊँ होताहोया बि टापू क परलै नाकै की नगरी पाफुस म पुग्या। जठै बानै बार-ईसु नाम को एक यहूदि जादूगर अर झूठो परमेसर की खेबाळो मिनख मिल्यो। 7अर बो राजपाल सिरगियुस-पोलुस जखो दिमागऊँ बोळो तेज हो बिकै सागै हाळो मिनख हो, ओ सिरगियुस-पोलुस बरनाबास अर साऊलनै आपकै कनै बुलार बाऊँ परमेसर को बचन सुणबो चातो हो। 8पण बार-ईसु जादूगर जिको नाम यूनानी भासा म अलिमास हो, बो बाको बिरोद कर टापू का राजपालनै परमेसर प बिस्वास करबाऊँ रोकबो चायो। 9जणा साऊल पबितर आत्माऊँ भर'र जिनै पोलुस बी बोलीं हीं#13:9 साऊल पबितर आत्माऊँ भर'र जिनै पोलुस बी बोलीं हीं रोमी बोली म पोलुस अर इबरानी बोली म साऊल हो। बिकै कानि एक टक देख्यो। 10अर बोल्यो, “सगळा छळ कपटऊँ भरेड़ा सेतान की ओलाद, भलाई का बेरी। तू परमेसर का सचा अर सिदा गेलानै तोड़बो मोड़बो कोनी छोडै के?” 11जणा ले इब तेरै प परमेसर को हात पड़्यो ह, अर इब तू आँदो होज्यासी अर क्युंक टेम ताँई दिन का च्यानणानै कोनी देखसी। अत्ती खेताई बिकी आँख्या क आगै अँधेरोसो होगो अर अठिनै-बठिनै टपटोळा मारबा लागगो जिऊँ कोई बिको हात पकड़र बिनै लेज्यावै। 12जणा टापू को राजपाल आ देखर परबु की सीख प ताजूब क सागै बिस्वास कर्यो।
पोलुस अर बरनाबास पिसदिआ का अंताकीया म
13पोलुस अर बिकाळा साती पाफुसऊँ झाज म बेठर पंफुलिया की पिराग नगरी म आया; पण यहून्ना जिनै मरकुस बोलता हा बानै छोडर यरूसलेम चलेगो। 14अर बे बठैऊँ चालर पिसदिआ का अंताकीया म आया अर अरामहाळा दिन अरदास करबाळी झघा म जार बेठगा। 15मूसा का नेम-कायदा अर परमेसर की खेबाळा की पोथी मऊँ बाचर अरदास घर का अधिकारी बाऊँ बोल्या, “यहूदि भाईड़ो, मिनखानै देबा ताँई थारै कनै कोई उपदेस ह तो आर ख्यो।” 16जणा पोलुस खड़्यो होर आपका हात को इसारो मिनखा कानि कर बोल्यो, “परमेसरऊँ डरबाळो गैर-यहूदिओ अर इजरायली मिनखो ध्यानऊँ सुणो। 17इजरायली मिनखा को परमेसर आपणा बाप-दादानै आप ताँई टाळ लिओ हो। अर जद अ मिसर म परदेसी होर रेह्ता हा जणा बो आनै बठै फळायो अर आपकी ताकतऊँ बानै बठैऊँ छुटा ल्यायो। 18अर करीब चाळिस बरसा ताँई बो बानै उजाड़ म बरदास करतो रिह्यो। 19अर कनान देस का सात राजनै नास कर बो बा धरती इजरायली मिनखानै बाकी बापोत होबा ताँई दे दि। 20आ बाता म करीब साडे च्यार सो बरस लाग्या हा। इकै पाछै परमेसर की खेबाळा सेमुएल क टेम ताँई परमेसर बानै न्याय करबाळा दिआ। 21इकै पाछै बे परमेसरऊँ एक राजा की माँग करी जणा परमेसर बिन्यामीन का गोत मऊँ एक मिनख किस का छोरा साऊलनै बापै चाळिस बरसा ताँई राजा बणायो। 22इकै पाछै परमेसर साऊल की झघा दाऊदनै बाको राजा बणायो; जिकै बारां म बो बोल्यो की, ‘यिसै को छोरो दाऊद जखो मेरा हिया जंय्यां को ह मनै मिलगो, जखो मेरी सगळी इंछ्यानै पूरी करसी।’ 23इ मिनख क कूणबा मऊँई परमेसर आपका वादा गेल इजरायल का मिनखानै छुटाबाळा ईसुनै भेज्यो। 24#मर 1:4; लूक 3:3बिकै आबाऊँ पेली यहून्ना सगळा इजरायली मिनखा म पापऊँ तौबा कर पाणी को बतिस्मो लेबा को परचार करतो हो। 25#यह 1:20; मत्त 3:11; मर 1:7; लूक 3:16; यह 1:27जद यहून्ना आपको काम पूरो करबाळो हो जणा बो मिनखानै बोल्यो, ‘थे जखो मनै समजर्या हो, म बो कोनी हूँ बो तो मेरै पाछै आसी अर म तो बिकाळा जूता का सळू खोलबा जोगोई कोनी हूँ।’ 26सुणो मेरा यहूदि भाईड़ो, अब्राहम की संतानो अर गैर-यहूदि परमेसर का भगतो! छुटकारा का अ बचन थारै कनैई पुग्या हीं। 27यरूसलेम का रेह्बाळा अर यहूदि नेता आ कोनी जाण्या क ईसुई छुटाबाळो ह, अर अरामहाळा दिन सीखाया जाबाळा बे बचन जखा परमेसर की खेबाळा क कानिऊँ मांड्या गया हा, बाका भेद बी कोनी जाण्या। पण ईसु प दोस लगार सास्तर का बा बचनानै बे पूरा कर्या। 28#मत्त 27:22,23; मर 15:13,14; लूक 23:21–23; यह 19:15बानै बिमै मारबा जंय्यां को कोई दोस कोनी लाध्यो इकै पाछै बी बे पीळातुसऊँ बिनै मारबा की माँग करी। 29#मत्त 27:57–61; मर 15:42–47; लूक 23:50–56; यह 19:38–42अर जद बे बिकै बारां म मंडेड़ी सगळी बातानै पूरी करली, जणा बे बिनै सुळीऊँ तळै उतार बिकी लासनै एक कबर क मांयनै धर दिआ। 30पण परमेसर बिनै मरेड़ा मऊँ ओज्यु जिंदो कर्यो। 31#काम 1:3अर बो बानै जखा बिकै सागै गलिलऊँ यरूसलेम आया हा, बोळा दिना ताँई दिखतो रिह्यो अर इब बेई मिनखा क सामै बिका गुवा हीं। 32म्हें थानै परमेसर का बि करार का चोखा समचार को परचार करर्या हां जखो आपणा बडका क सागै कर्यो गयो हो। 33परमेसर ईसुनै ओज्यु जीवार, बा बात आपणा ताँई पूरी करी ह, जखा बिकी संतान हां, जंय्यां की दुसरा भजन म मंडेड़ो ह क, ‘तू मेरो छोरो ह, अर म आजई तेरो बाप बण्यो हूँ।’ 34अर बिनै अंय्यां मरेड़ा मऊँ ओज्यु जिंदो कर दिओ जिऊँ बो कदैई नइ सिडै़। इ ताँई परमेसर बोल्यो क, ‘म दाऊद क सागै करार करेड़ी सगळी पबितर अर पक्काइऊँ होबाळी बरकत तेरै प करस्युं।’ 35जणाई बो एक दुसरा भजन म अंय्यां बोल्यो की, ‘तू तेरा पबितर मिनखनै कबर म सिड़बा कोनी देवै।’ 36अर दाऊद तो परमेसर की इंछ्या गेल आपका टेम म सेवा कर मरगो अर बिनै बठैई गाड्यो गयो जठै बिका बडका गडर्या हा अर बाकी लास सिड़गी। 37पण परमेसर जिनै मरेड़ा मऊँ जिंदो कर्यो बो कोनी सिड़यो। 38जणा यहूदि भाईड़ो, थे जाणल्यो क ईसुई ह जिकै जरिए थार प पापऊँ माफी की घोसणा करी ह। 39थानै नेम-कायदा गेल छुटकारो कोनी मिल सकै, पण जखो बी बिपै बिस्वास करसी बिनै सगळा पापऊँ अजाद कर्यो जासी अर परमेसर क सामै धरमी बणायो जासी। 40इ ताँई चेता म रेह्वो अंय्यां नइ हो क जोक्यु परमेसर की खेबाळा बोल्या हीं बा थारै सागै नइ होवै। क्युं क परमेसर की खेबाळा की पोथी म मंडर्यो ह, 41‘हसी करबाळो! अचरज कर मरज्यावो! क्युं क म आ दिना म अंय्यां को काम करबाळो हूँ, जिकै बारां म ज थानै कोई बतातो जणा बी थे बिपै जमाई बिस्वास कोनी करता।’” 42अर जद बे आपको उपदेस देर बठैऊँ जार्या हा जणा बानै सुणबाळा मिनख बाऊँ बोल्या, “आगला अरामहाळा दिन म्हानै अ बाता ओज्यु सुणाज्यो।” 43सभा क खतम होबा क पाछै यहूदि अर गैर-यहूदि जखा यहूदि धरम पंथ म रळेड़ा भगत हा बे पोलुस अर बरनाबास क गेल होलिआ। पोलुस अर बरनाबास बाऊँ बात कर बानै समजाया की परमेसर की दया म बण्या रेह्ओ।
गैर-यहूदिआ म परबु को बचन
44इकै पाछै आगला अरामहाळा दिन करीब सगळी नगरी परबु को बचन सुणबा ताँई भेळी होई। 45इ भीड़नै देखर यहूदि बळगा अर पोलुस की बाता क खिलाप बोलता होया बिकी बुराई करी। 46जणा पोलुस अर बरनाबास हिमत कर बोल्या, “ओ जरूरी हो क परमेसर को बचन सऊँ पेली थानै सुणायो जावै पण थे इनै थारूँ दूर कर्या अर खुदनै अजर-अमर जीवन को भागी कोनी मान्या जणा इब म्हें गैर-यहूदिआ क कनै जावां हां। 47क्युं क अ आदेस म्हानै परबु दिओ ह। बो बोलै ह, ‘दुसरा देसा ताँई म थानै च्यानणो बणायो हूँ। जिऊँ ओ होवै की थारै जरिए मुक्ति को ओ संदेसो धरती का सगळा मिनखा म फेल जावै।’” 48आ सुणर गैर-यहूदि मिनख बोळा राजी होया अर परबु का बचना की मेमा करबा लागगा। अर जत्ता बी अजर-अमर जीवन ताँई टाळेड़ा हा बे बिस्वास कर्या। 49अर सगळा परदेस म परबु को बचन फेलगो। 50पण यहूदि नेता, गैर-यहूदिआ की मानी-थानी यहूदि धरमनै मानबाळी भगत लूगाया अर नगरी का मान्या-थान्या मिनख जखा परमेसरनै मानबाळा हा बाका कान भर पोलुस अर बरनाबास क खिलाप बिदरो कर बानै, बि नगरी क बारनै कढवा दिओ। 51#मत्त 10:14; मर 6:11; लूक 9:5; 10:11जणा पोलुस अर बरनाबास बानै चेताबा ताँई आपकै पगा की धूळ झाड़र बठैऊँ इकोनियुम चलेगा। 52अर बठिनै अंताकीया का बिस्वासी राजी होर्या हा अर बे पबितर आत्माऊँ भरता गया।
ప్రస్తుతం ఎంపిక చేయబడింది:
काम 13: एस डब्लु वी
హైలైట్
షేర్ చేయి
కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
(c) 2010-2017, New Life Computer Institute. All rights reserved