Luka 13
13
Erriidu anaa indaayaya
1Naa kore apa te inia kata keatae ltung'ana ootilikita Yeso mbaa ee lkulie ltung'ana le nkop e Galilaya oaatara ꞉Pilato eitaita lasar, neituchulaki lodo lenche ilo asar oitaita. 2Newoliki ninche ajoki, <<Amaa, idoldol ntae aajo ltung'ana loo ng'ok oleng kulo tung'ana le Galilaya aalang lkulie pooki le inie tankaraki natumo sina oba nejia? 3Kajoki naa ntae, metiu nejia. Kake tinimirriidudu, naa indaayaya sii ntae aiko nejia. 4Tana sii laapa 18, ootuurokine nkaji naado te Silaom near metuata. Amaa, ijoijo ntae kera ninche laasak loo ng'ok oleng aalang lkulie pooki oaamanya Yerusalem? 5Kajoki naa ntae metiu nejia, kake tinimirriidudu sii ntae naa indaayaya pooki aiko nejia.>>
6Nelimu ana kitanyanyukoto: <<Etii apa ltung'ani obo oata lcheni la lng'aboli ouno ta lchampa lo lmusabibu nelo ayiaya lng'anayio te ilo cheni, kake nelau. 7Nejoki laitibirani la lchampa lo lmusabibu, <Ng'ura, kayewuo kulo arin okuni ayiaya lng'anayio tele lng'aboli nalau. Tudung'o! Aanyo payie ewuon aya mpaach pecheu?> 8Newoliki ꞉laitibirani la lchampa ajoki, <Lokitok, tapala ele ari apeny matukurroki nkulupo, napik ltulugumi! 9Naa tenejing lng'anayio elde ari olotu naaku keisupat, kake teneitu ejing nidung.> >>
Eichiunyie ꞉Yeso nkitok naruja oriong mparri e Sabato
10Kore ta mparri nabo e Sabato, neiteng'enicho Yeso te Sinagogi nabo. 11Naa kore apa teinie, netii nkitok nabo naata lairirua le moyian. Naa ketigila ꞉ilo airirua nkoriong taa larin 18, neirrig paa meidim aitorioi koon aitacho aitibiraki. 12Kore payie edol Yeso ninye, neipot meeu nejoki, <<Natomononi, ikitalakuaki te nchalan ino!>> 13Neiteleki nkaina enye inia kitok, necheii nkoriong nabokata, neisis Nkai. 14#Nai 20:9,10; Nkit 5:13,14Kore tankaraki naichiunyie ꞉Yeso ltung'ani ta mparri e Sabato, negoro lkitok le Sinagogi neitarrap ltung'ana ajoki, <<Mperot ile ake eyiere neasi siaai, ootu taa nenia perot meichiunyeki ntae, kake mara ta mparri e Sabato!>> 15Newoliki ꞉Laitoriani ajoki, <<Ntae looitaakino! Amaa, keata lobo taa ntae lemelaku lmong'o anaa sikiria enye to boo, nereu aitamat nkare ta mparri e Sabato? 16Amaa ana kitok, nara ntito e akuyia lang Abraam nateena apa Chitani larin 18, mara keichiaakino nelakuni ta mparri e Sabato?>> 17Kore payie eidip atejo kuna baa, neitam anyit lolo pooki ooiserunore ninye, neng'ida ltung'ana taa mbaa pooki kutuaa e nking'asia naataasa ninye.
Nkitanyanyukoto e lantararai o ne siichi
(Matayo 13:31–33)
18Neipar ꞉Yeso ajoki, <<Nyo einyunyukore nkitoria e Nkai? Naa nyo aitunyunyukore? 19Nchi etiu ana lantararai kini owa ltung'ani aun ta lchampa lenye, nebulu neaku lcheni, neitibir nkueeny e nkeper e ai nkajijik enche too sura enyena.>>
20Neitoki ajo, <<Nyo aitunyunyukie nkitoria e Nkai? 21Nchi etiu ana mukate kini naisiicho#13:21 Ketaasichere Luka nkae oitiei eiro mbaa naaipirita nkitibirata e mukate., naituchulaka nkitok ncharaan uni e nkuruma e nkano, nepal ana meisiichoi pooki.>>
Nkutuk napirik e nkaji
22Nelo Yeso aibung nkoitiei, aidachaa nkang'ite o lkerenketi eiteng'enicho eloito Yerusalem. 23Neipar ltung'ani obo ajoki, <<Laitoriani, amaa, keikuni sa ltung'ana kenya oojeu?>> Nejoki ninche, 24<<Entonyok oleng entijing nkutuk napirik e nkitoria e Nkai! Amu, kajoki ntae, keikumo loonyok aajing, nemetumoki. 25Kore ake payie einyuototo lopeny nkaji, neiken nkutuk e nkaji, nintachoo ntae ta aulo ijoijo, <Laitoriani, tobolu iyioo.> Kake newoliki ajoki, <Mayielo nanu ntae, ajo aji ing'uaa!> 26Ning'asusu aajo, <Ikitama ndaa, nikimaticho iboitiere iyioo, ninteng'enichie too nkoito ang.> 27#SNk 6:8Nejoki ntae, <Mayielo ning'uaa! Enchom, entung'ayieeki nanu ntae pooki, laasak loo ntorrok!> 28#Mat 22:13, 25:30#Mat 8:11,12Kore kenya tinidoldol Abraam o Isaka o Yakobo o loibonok pooki te nkitoria e Nkai, etanang'akaki ntae aulo, naa inchirchir kenya, niwonywony lala te mion. 29Naa kepuonu ltung'ana ooing'uaa neiliepunyie o nedoyierie ndama o kopikop o maikope, newueni aanya ndaa taatua nkitoria e Nkai. 30#Mat 19:30, 20:16; Mrk 10:31Naa keaku kenya lolo le siedi lekue, neaku lekue le siedi.>>
Nchaman e Yeso te Yerusalem
(Matayo 23:37–39)
31Kore te inia kata ake, nepuonu lkulie Parisayo nejoki ninye, <<Inyuo siga tene, amu keyieu Erode nikiar.>> 32Newoliki ninche ajoki, <<Enchom, entiaaki inia barie, <Ng'ura, kore anapar o teisiere kamiraa lairiruani naichiunyie ltamoyia, kore mparri e uni naidip siaai lai. 33Kake meata ajo maaibung nkoitiei anapar o teisiere o mparri e uni, amu meiririkino payie enang loiboni nkae ng'oji namara Yerusalem.> 34Oi sii ake Yerusalem! Yerusalem! Iyie naar loibonok nenang too soito metuata lolo likiterewakaki. Nkatitin aja ateyiewua naiturrur nkera inono ana neiko nkoko teneiturrurru nkuoo taa nkaipupo enyena, niany. 35#SNk 118:26Eng'ura etung'akaki ntae nkaji inchi era mijoni. Naa kajoki ntae, mikidoldol nanu ana nijoijo, <Emayiana ilo olotu ta nkarna e Laitoriani!> >>
ప్రస్తుతం ఎంపిక చేయబడింది:
Luka 13: saq
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2021, Bible Translation and Literacy
