Luka 11
11
Eiteng'enichie Yeso mbaa naipirita nkomono
(Matayo 6:9–15, 7:7–11)
1Kore etii Yeso nkae ng'oji aomonito, kore payie eidip atoomono, nejoki ꞉lobo loo looiteng'eni lenyena, <<Laitoriani, inteng'ena iyioo nikinko tinikiomon, ana neikuna sii apa Yoana payie eiteng'en looiteng'eni lenyena.>> 2Nejoki ninche, <<Kore tinioomonmon, entejo nchi,
<Papa,
meyanyiti nkarna ino,
meeu nkitoria ino.
3Nchoo iyioo mparri pooki ndaa naitiemu iyioo.
4Tapaliki iyioo ng'ok ang,
amu ikipaliki sii abaki iyioo lolo pooki oitarroki iyioo.
Nimirik iyioo atua ntemat.> >>
5Nejoki ninche, <<Amaa, ng'ae taa ntae oata lchore, nelo ajing'aki kiji kuarie ajoki, <Lchore lai, nchooki mukateni uni te sile, 6amu eyewuo lchore lai nati eing'uaa nelakua, namaata ntoki naicho ninye.> 7Keidim sa newoliki ꞉ilo chore lenye oti nkaji ajoki, <Mikintanyamal nanu, amu eikenoki duo nkutuk e nkaji, nikitijing'a rruat aaperi o nkera ainien. Mekure hooyia aaidim ainyuo aichoo toki.> 8Kajoki ntae, kore abaki tenemeinyuototo aicho ninye ntoki tankaraki kera lchore lenye, kake kore tankaraki keitirrichaka aomon, keinyuototo neicho ninye inia pooki nayieu.
9<<Naa kajoki nanu ntae, entoomonu naa keichori ntae, enteyiai naa itumtum, enkodkodo nkaji naa keboluni ntae. 10Amu kore pooki ng'ae oomonu neichori, naa kore pooki oyiaya netum, naa kore loikodkod neboluni. 11Ng'ae taa ntae oata nkerai, naa kore teneomon nkerai enye nkiring'o, neicho lasurai? 12Tanaa sii, teneomon mboliboli, neicho nkulupa? 13Amaa sa tiniyielolo ntae oaara torrok aaichoo nkera inchi nkichoorot supati, kebaa sa eitulusoo Papa linchi otii chumata aichoo Ltau Sinyati lolo oomon ninye?>>
Yeso o Beelsebul
(Matayo 12:22–30; Marko 3:20–27)
14Kore apa mparri nabo naa keararita ꞉Yeso lairiruai ming'ani. Kore payie eipung'u lairiruai, neiro ilo tung'ani ming'ani, neing'asia lturrurri. 15#Mat 9:34, 10:25Nejo lbata loo lolo tung'ana, <<Kearaa lairiruani to ngolon e Beelsebul#11:15 Kore Beelsebul naa nkarna e Chitani. Naa kore kipirte enye naa lkitok le moidiei., lkitok laa lairiruani.>> 16#Mat 12:38, 16:1; Mrk 8:11Nenyok lkulikae aasaan aaipar ninye, nkitodolunoto naing'uaa chumata. 17Kore amu keyielo ninye mparrunot enche, nejoki ninche, <<Kore nkitoria pooki naoro arare koon, naa kesachari aidaaya nemuta, naa kore nkaji naoro naa keurori. 18Amaa tanaa keoro Chitani arare koon, aji eiko nkitoria enye teneitache? Amu ijoitoto ntae kaaraa lairiruani to ngolon e Beelsebul. 19Amaa tanaa kaaraa nanu lairirua to ngolon e Beelsebul, to ngolon e ng'ae earaa looiteng'eni linchi? Naaku naa, keaku ninche looiguanare ntae. 20Kake tanaa kaaraa nanu lairiruani to ngolon e Nkai, naaku eidipa nkitoria e Nkai ayeu nitii. 21Kore tenerrip ltung'ani ogol nkang enye, oterretene neata masaa e larrabal, neserianu ntokitin enyena. 22Kake kore tenerasaki ꞉logol alang ninye, neigolgol aworu masaa e larrabal pooki naang'idare, neor pooki naatarua. 23#Mrk 9:40Kore lamaatii tenebo naa lmang'antita lai, naa kore lemeiturrur o nanu naa kesachaa.
Nchukunoto e lairiruai
(Matayo 12:43–45)
24<<Kore payie eipung'u lairiruai taatua ltung'ani, neimaa ng'ojitin nemetii nkare, eyiaya neyeng'iyeng'are. Kake tenelau nejo, <Karrinyokino nkaji ai naipung'unyie apa.> 25Kore payie ebau, nedol ajo ketooroki, neitibiraki, 26nelo ariku lkulie airiruani sapa torrok oaalang ninye, nejing nemany inie. Nerroyo nkichon e siedi e ilo tung'ani alang napa ekue.>>
Ng'ida nadede
27Kore ejoito Yeso nejia, nebuak nkitok nabo taatua lturrur nejoki, <<Emayiana nkocheke nikitiiwua o lki litanaa.>> 28Kake nejo ninye, <<Naikach tinijo, emayiana lolo ooning rerei le Nkai neibung.>>
Eyieita ltung'ana nkitodolunoto
(Matayo 12:38–42)
29 #
Mat 16:4; Mrk 8:12 Kore eponunye lturrur, neng'asu ajo, <<Kore kulo tung'ana naa ltung'ana le mpukunoto torno. Keyiaya nkitodolunoto, kake meichori ninche, mara ake nkitodolunoto e Yona. 30#Yona 3:4Amu kore ana nara apa Yona nkitodolunoto too ltung'ana le Ninawi, naa nejia sii eaku Nkerai e ltung'ani tana towuo. 31#1Lki 10:1–10; 2Ng'a 9:1–12Keitipiuni kenya nkinkii naing'uaa kopikop ta mparri e nkiguana, tenebo o ltung'ana le ana towuo neiguanare ninche. Amu keyewuo eing'uaa neiting'ie nkop ainining'u ng'eno e Solomon, naa eng'ura, ketii ene lara kitok alang Solomon! 32#Yona 3:5Keitachoo kenya lewa le Ninawi o ana towuo ta mparri e nkiguana nedung'oki nkiguana torno, tankaraki keibelekenyete apa ninche te likoroto e Yona, naa eng'ura ketii ene lara kitok alang Yona!
Wong'an e sesen
(Matayo 5:15, 6:22–23)
33 #
Mat 5:15; Mrk 4:21; Luka 8:16 <<Meatae ltung'ani ooinok lkilang'ilang'et nepukuroki loket, tanaa eisiapaa. Kake kepik nkeper e ng'oji netala, paa kore loopuonu nedol wong'an enye. 34Kore naa nkong'u ino naa lkilang'ilang'et le sesen lino. Naa tanaa keisupat nkong'u ino, newong'u sesen lino pooki, naa tanaa keitorno neaku sesen lino naimin. 35Naaku todua meaku kore wong'an nikitii atua, naa naimin. 36Naaku naa tanaa kebore sesen lino pooki wong'an nemeata rubata naata naimin, newong'u ng'oji pooki, ana tinikintowong wong'an e lkilang'ilang'et.>>
Eing'odia ꞉Yeso Lparisayo o laiteng'enak loo nkitanapat
(Matayo 23:1–36; Marko 12:38–40)
37Kore naidipie Yeso airoro, neitoomon ꞉Lparisayoi obo mechomo anya ndaa ta nkaji enye. Nelo nejing inia aji newuon te misa anya ndaa. 38Kore payie edol ilo parisayoi ajo eitu eituk ninye nkaik #11:38 Kore tanaa meituk Lyiaudi nkaik enche ewuon eitu enya ndaa, mara supati tekue Nkai. ewuon eitu enya ndaa, neing'asia. 39Nejoki ꞉Laitoriani ninye, <<Koree ntae Lparisayo, intuktuk oriong ee lkikompeni o nee ncharaan, kake kore atua ntae naa kebore lubo o ntorno. 40Lomada kulo! Mara ilo oitibira oriong oitibira sii atua? 41Neaku naa enchoo laisinak nkichoorot inchi natii atua lkikompeni o ncharaan, naa kesupataki ntae mbaa pooki.
42 #
Lal 27:30
<<Kake oi siake ntae Lparisayo! Amu intaii motua inchi e tomon#11:42 Kore motua inchi e tomon naa ntoki naitanapa apa Nkai taatua nkitanapat enyena ajo keyiere neitai ltung'ani motua e tomon te ip nabo e nkano o naichuo o lata otumo ninye payie easichere ta nkaji e Nkai. Todua Nkitaparrunoto ee nkitanapat 12:17, 14:22–23. e lkeek kunini oaamati o nee lkeek pooki laa lng'anayio la lchampa, nipalpal mintaasichocho naichiaakino o nchaman e Nkai. Nana baa naa naaichiaakino tiniasias, niming'uaa sii nkulie! 43Oi sii ntae Lparisayo! Amu ichamcham aatewuenie lorikan loo lkutuaa te Sinagogi, nichamcham neirorokini ntae too ng'ojitin neemirichereki. 44Naa oi sii aitoki ntae! Amu ituwuanana nkuraren nemelio, neim ltung'ana nkeperi enche meyielo.>>
45Newoliki ninye ꞉laiteng'enani obo loo nkitanapat ajoki, <<Laiteng'enani, tinijo naa nchi, naa itedia sii iyioo.>> 46Nejoki ꞉Yeso ninye, <<Oi abaki ntae ooyielo nkitanapat oleng, amu intanapnap ltung'ana lkurupa ogol napata, naa kore ntae, miyapupu hoo abaki lkumojino obo aaretoki ninche ilo kurupa. 47Oi siake ntae! Amu intibirakiki nkuraren loibonok le Nkai, oaatara apa akuyiani linchi. 48Naaku imbalunyie ntae aajo, ichamaa siaaitin loo lmakui linchi, amu ketara ninche metuata, nichetakiki ntae nkuraren. 49Naa inia payie etejo Nkai to Kursaicho enye nchere, <Karewaki kenya ninche loibonok lainien o lkipaareta, naa kear ꞉ninche lbata loo lolo, neitoki aaitam sina tankaraki nkurukoto enche.> 50Naaku keipari ana towuo lodo loo loibonok pooki le Nkai, oibukoyieki ta ng'asunoto e nkop, 51#Ng'as 4:8, 2Ng'a 24:20,21ang'asunyie lodo le Abel ana metabaki le Sakaria, oataraki terichet lperere la lasar o nkaji e Nkai. Ee, naa kajoki ntae keipari ana towuo. 52Oi ntae ooyielo nkitanapat oleng! Amu iwaita lbolet le ng'eno, neitu ijing'jing ntae maate, naa imbooitie lkulie oyieu nejing payie mejing.>>
53Kore eipung ninye teinie, neng'asu laiteng'enak loo nkitanapat o Lparisayo aagoro oleng neitoki aitirrichaki ninye aipar mbaa kumo, 54esaan aayiaya nkoitiei naibung'ie ninye tee rereii oojo.
ప్రస్తుతం ఎంపిక చేయబడింది:
Luka 11: saq
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2021, Bible Translation and Literacy
