Matalikilo 20
20
Abulahamu a Abimeleki
1Lino kuzwa waawo Abulahamu wakalonga wazwa ku Mamule akuya kulubazu lwakumusanza, wakaakukkala akati ka Kadesyi acisi ca Syuu. Amane wakaakukkala kucisi ca Gelaa. 2Abulahamu wakababejela bantu bakucisi eeco kuti Sala, mukaintu wakwe, wakali mucizi wakwe. Aboobo Abimeleki, mwami wakucisi ca Gelaa, wakatola Sala kuti abe mukaintu wakwe. 3Masiku aayo ngoonya, Leza wakalibonya kuli Abimeleki muciloto akumwaambila kuti, “Uli mufu yebo, nkaambo Sala ngumukamuntu.” 4Ciindi eeco Abimeleki taakanakkala antoomwe a Sala. Aboobo wakati kuli Leza, “Simalelo wangu, sena inga wabajaya bantu batakwe mulandu? 5Ede Abulahamu mwini nguwakaamba kuti mmucizi wakwe, alimwi awalo mukaintu wakati munyinandumi wakwe. Aboobo ooku ndakakucita amoyo uusalala, taakwe acibi ncendakacita pe.” 6Leza wakamwiingula mumonya muciloto eeco wakati, “Iiyi, ndilizi kuti wacita oobo amoyo uusalala, ncendakuvuna kuti utandibisizyi, alimwi ncendakukasya kukkala antoomwe amukaintu ooyo. 7Lino mubweedezye mukaintu ooyu kumulumaakwe. Nkaambo mulumaakwe musinsimi, aboobo inga uyookukombela kuti utafwi pe. Pele kuti naa utamubweedezyi, ndikuzibya kuti ulafwa yebo amukwasyi wako woonse.”
8Mbubwakaceda buyo, kucili kooko, Abimeleki wakaita babelesi bakwe boonse akubaambila makani aaya oonse, nkaako bakayoowa kapati. 9Mpoonya Abimeleki wakaita Abulahamu akumubuzya kuti, “Ino ncinzi eeci ncoocita kulindiswe? Ino ndakakubisizya nzi ncoondiletela bubi buli boobu mebo alimwi abulelo bwangu boonse? Taakwe muntu uunga ulacita cintu cili mbuli ceeci ncoondicitila yebo.” 10Eelyo Abimeleki wakaindilizya akuti kuli Abulahamu, “Nkaambo nzi ncoocita cintu cili boobu?” 11Abulahamu wakaingula kuti, “Ndakacita oobu nkaambo ndalikuyeeya kuti okuno taakwe bantu balemeka Leza, nkaako ndakali kuyoowa kuti inga bandijaya kutegwa batole mukaintu wangu.” 12Kwalo Sala mmucizi wangu ncobeni, tuli bana basinamaali. Nikuba boobo ndakamukwata. 13Nkabela ciindi Leza naakandilonzya akundigwisya mumunzi wokwesu kuya mumanyika aambi aabweenzu, ndakaambila Sala kuti, “Ulakonzya kutondezya kusyomeka kwako kulindime kwiindila mukwaamba kuti ooyu mmukwesu.”
14Mpoonya Abimeleki wakabweedezya Sala kuli Abulahamu, alimwi wakamupedelezya ambelele, ŋombe, alimwi abazike. 15Wakati kuli Abulahamu, “Njeeyi nyika yangu yoonse mboibede, kolisalila omwini kufumbwa busena mboyanda kuti uunke ukkale nkuko.” 16Kuli Sala wakati, “Mwanookwanu ndamupa cuulu camali aansiliva kutondezya kuti yebo ulasalala, tojisi mulandu kulindime, nkaako muntu woonse uyooziba kuti taakwe cibi ncookacita.”
17Abulahamu wakamukombela Abimeleki, eelyo Leza wakamuponya walo amukaintu wakwe, abakaintu bazike bakwe, bakakonzya kuzyala alimwi. 18Eeci cakacitika nkaambo Leza wakajalide luzyalo lwabaŋanda yoonse ya Abimeleki akaambo kaceeco ncaakacitide kuli Sala, mukaintu wa Abulahamu.
ప్రస్తుతం ఎంపిక చేయబడింది:
Matalikilo 20: Tonga96
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Tonga Bible © United Bible Societies, 1994.
