เกาตีนา 3
3
ครำ แอง ลุห
1ทาเน มาล ก็ ลวัก เลือ ซัด จู มบลึ เย็ห ลวัก เลือ ซัด ตัก เยโฮวา งกีจ็อง แอง มด นัน มี มี งิ นัน เย็ห ก็ โตะ จุ อัหเม คือเน “เอาซาง กิว มบราง ปา ป็อง แพละ ลำ ใน ซวน เน จู มบลึ นังเลาะ อัน” มาล อัง 2“ไอ แมน ซัง เยอะ ป็อง แพละ ลำ จู มบลึ จู มบลัก กุญ มด 3แต เอาซาง มบราง เยอะ ป็อง มี เกา เดียว เน นำ ไล เยอะ ฮุนเน 'อำ ปา ป็อง แพละ ลำ เกา เน ตัก อุ เคิง ล็อง ซวน เน ดาย อำ ก็อง อำ ป็อง เตาะ กัน ปา ป็อง ปา ก็ ต็อง เปิล' เอาซาง อัง เค็ย เยอะ” อัหเม ไล มาล คือนะ
4มาล นัน ก็ ซวัล นำ “เก็ย มี กิว เปิล ซัง 5เอาซาง เม็จ แลว กัน ปา ป็อง แพละ ลำ เน ปา ก็ เคาใจ ซีวะ เลาะ ซีวะ ลุห ปา ก็ เป็น เล็ห ครำ ซะลาด มอก เอาซาง นัน ฮัก” มาล อัง เค็ย นำ 6อัหเม นัน ก็ ดอม แพละ ลำ นัน ก็ ฮุน เลาะลัห เลาะ ป็อง ซำ เป็น แพละ ลำ ตัก แอง ระ แอ ซะลาด เล็ห วัล นำ กึด ฮุนนัน แลว นำ ก็ ลด เก็บ เอิด ป็อง นำ ก็ ซำ อน ตัก อัหคล็อง ป็อง วัล อัหคล็อง ล็อง นัน ก็ ป็อง เลิม
7แลว ปาม ป็อง แพละ ลำ นัน แลว ปาม ก็ ลด เม็จจึด ดก มบลึ ปาม ลด เม็จจึด นัง ออ ลุน อุ ปาม ก็ จัก เอิด นทู แพละ ครุล จิง แอง เป็น คัว แซ็ด ออ
เอาซาง โตะ และ อาดาม เคิบ เอวา
8ทาเน ตัก แจ็ล แมด ซะ เยโฮวา งกีจ็อง ก็ โตะ และ ปาม ปาม ก็ เม็จ นำ นเดิร อัง ซะ นจาง เริล ใน ซวน ปาม ก็ ลด ปัด พก ตัก เกาลำ เคิง ซวน นัน ไอ มี ระ เยโฮวา งกีจ็อง เม็จ ออ 9เยโฮวา งกีจ็อง ก็ งกรอ และ อัหคล็อง นัน “มัห อุ พา นเดย เออะ อาดาม” เอาซาง อัง 10อาดาม ก็ ซวัล คือเน “เอิญ เม็จ นเซิง มัห นเดิร อัง ซะ ตัก ซวน เน เอิญ ก็ กราญ อัง มัห เพาะวา เอิญ ลุน อุ เอิญ ก็ ลด พก งเกริม นัง ออ” อาดาม อัง
11เอาซาง ก็ ซ็วน นำ คือเน วัล “ซีเอ เค็ย มัห ลุน อุ มัห ป็อง แพละ ลำ เกา นัน ตี เอิญ มบราง มัห ป็อง นัน กา” เอาซาง อัง
12อาดาม ก็ ซวัล เอาซาง ฮุนเน “ก็ อัหเม เน ตัก มัห ระ อุ เคิบ เอิญ เน นำ อน เอิญ ป็อง เอิญ ก็ ป็อง” อาดาม อัง 13ทาเน เยโฮวา งกีจ็อง ก็ ซ็วน อัหเม วัล คือเน “มัห แอง ซีวะ จังเน เออะ” “ก็ มาล จุ เอิญ ดาย เอิญ ก็ ลด ป็อง” อัหเม อัง
เอาซาง ลงโทด มาล เคิบ ครำ
14เอาซาง ก็ ลด งวย มาล นัน ฮุนเน “มัห แอง จังเน ไอ มี เลาะ เตาะ เอิญ ต็อง จม แจง มัห เลือ ปึง ซัด เลียง ซัด นโจ มด จู มบลึ จู มบลัก ดาย มัห ต็อง มบละ งก็อห เริล ตัก ซิก นเซ็บ มัห ก็ ต็อง ป็อง พุน ป็อง วะ จำปอ เปิล แอ็ม ฮัก” เอาซาง อัง
15เอาซาง ก็ ลบ วัล ไล มาล ฮุนเน วัล “เอิญ แอง ระ มัห เคิบ อัหเม เน ลุห อัง นอย ไอ มี จับ อัง นอย ควัน งา มัห เคิบ ควัน งา อัหเม เน ก็ ซำ ลุห อัง นอย วัล บัดนะ ควัน งา มัห ก็ ท็อห นจ็อล เจ็ง ควัน งา อัหเม เน ควัน งา อัหเม เน ก็ ซำ เซ็ม แอ็ม กึ มัห วัล บัดนะ” เอาซาง อัง เค็ย มาล
16เอาซาง ก็ ไล อัหเม นัน ฮุนเน “มัห ลุห อัง แญง เอิญ เอิญ ก็ ลด แอง ระ มัห โซะ ดก ลำบาก ดก ญาม มัห เกิด ควัน บัดนะ เอิญ ก็ แอง ระ มัห แร็ง โซะ ทีซุด ดาย แต ตึง มัห โซะ ดก มอก นัน มัห ก็ ควะ ซีรอก อุ เลิม เคิบ คล็อง ออ เอิญ ก็ ระ คล็อง มัห ปกคอง มัห วัล” เอาซาง อัง
17เจ็นนัน เอาซาง ก็ ลด ไล อาดาม คือเน “ญอน มัห ปัง แญง ยัห ออ มัห ป็อง แพละ ลำ ตัก เอิญ มบราง ป็อง นัน เอิญ ก็ ลงโทด มัห ดาย เอิญ จม งวย ซิก เน ก็ ญอน มัห เน เจ็นเน ญาม มัห และ ซะ ป็อง มัห ก็ ต็อง และ ตุก และ ญาก มัห ต็อง ลำบาก จำปอ มัห เปิล ดาย 18เจ็นเน ซิก เน ก็ ดก ปลัด นดอก แญ็น นดอก ซีเยอะ อน ตัก มัห มัห ต็อง ป็อง มบัห ป็อง มบ็วญ ตาม แซ ตาม ซวน 19มัห โซะ ป็อง จะ มัห ก็ ต็อง แองกาน ตาก อาก ฮอน ซะ ฮอน โอด จำปอ มัห เปิล ลบ วัล เป็น เล็ห ซิก วัล เอิญ เอิด มัห เจ็น ซิก แลว มัห ก็ ต็อง เป็น เล็ห ซิก วัล” เอาซาง อัง
20ทาเน อาดาม ก็ มพึ ซือ ยัห ออ ตัก เอวา เพาะวา นำ เป็น เมจ็อง คอง ครำ แอ เน มด 21เจ็นนัน เยโฮวา งกีจ็อง ก็ เอิด ซวัห ซัด แอง คัว อน ตัก อาดาม เคิบ เอวา แซ็ด ญาม นัน
22เยโฮวา งกีจ็อง ก็ จ็อก ฮุนเน วัล “ดอม เอิด ดาย ครำ เน ก็ เม็จจึด ซีวะ เลาะ ซีวะ ลุห มอก แอ เน แลว เจ็นเน เอิญ ไอ งกิ ระ ปาม เก็บ ป็อง แพละ ลำ เกา นัน ตัก แอง ระ ครำ รีด อุ ตลอด จำ นเดย จำ กวา นัน ไอ มี ระ ปาม ป็อง เตาะ” นำ อัง 23ญอน ปาม ลุห อัง แญง งกีจ็อง นัน เยโฮวา งกีจ็อง ก็ มบรึห ปาม ทอก เริล เจ็น ซวน เอเดน ระ ปาม เริล แอง ซวน ออ ตัก บัดซะ ซวน เอเดน ฮัก เป็น ซิก ตี เอาซาง แอง ปาม กำนา นัน นำ ไอ มี ระ ปาม อุ ใน ซวน นัน วัล เตาะ
24แลว เอาซาง มบรึห แอ็ม ปาม แลว เอาซาง ก็ ไล ปึง เทวาดา เครูบ #ค 24 เทวาดา เครูบ เป็น เทวาดา มี มบลึ นะ ตี มี แร็ง ดก โตะ เพา ซวน เอเดน ลัห เพียห โตะ งิ งคม เอาซาง ก็ เอิด ดาบ ตัก กรึห อุ ฮุน โอด เพา อุ เคิง นัน วัล นำ ก็ ระ ดาบ นัน วาง โตน วาง แต็ห เพา รวง เริล และ เกา ลำ ตัก แอง ระ ครำ รีด อุ ติกๆ นัน เอาซาง ไอ มี ระ ปาม กุด ป็อง แพละ ลำ นัน วัล เตาะ
ప్రస్తుతం ఎంపిక చేయబడింది:
เกาตีนา 3: Prai
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Global Partners
