KEJADIAN 3
3
Mansian anlaban Uisneno
1Kauna nane mu'it le amanoet nesin na'ko ale mu'it le Uisneno anmo'e nalali. Kauna natan neu bife nane nak, “Ai namneo-namneo Uisneno anpenan ki he nati' hi kaisa miah hau fua-hau fua na'ko ale hau anbi etu le i in nanan?”
2“Nabe'i hai miah hau fua-hau fua na'ko ale hau anbi etu le i in nanan,” bife nane natae onane, 3“alkun na'ko hau le anbi etu in atnanan, Uisneno anpenan kai he nati' kaisa hai miah hau nane in fuan ai ampoe in; kalu hai minaoba mani, hai of amate.”
4Kauna nane natae nak, “Nane ka namneo fa; hi of ka mate fa. 5Uisneno namolok onane natuin In nahin kalu hi miah hau fua nane, hi tenab of natfai; ma hi of amfani on Uisneno ma mihin sa' le naleko ma sa' le namle'u.”
6Bife nane ankiso nak hau le nane namas, ma in fuan nane namin neu het bukae. Ma in natenab nak alekot kun leka in anfani ahinet. Es nane te in anseu hau fua le nane, oke te in anbukae, ma in anfe nani amsa neu in mone, ma in mone amsa anbukae nani. 7Nok askeken leka sin anbukae nalali hau fua nane, sin nekan natfai ma sin nahin nak sin aon monas. Es nane te sin anhetu bub hau kase in non ma sin an amu sin aon.
8Neno mabe nane sin nen Uisneno In nao natuin etu nane in nanan, es nane te sin nua sin na'tolo anbi haunu sin atnanan he nati' Uisneno kaisa nit sin. 9Mes Uisneno In no'en atoni le nane nak, “Ho es ko me ka?”
10Atoni nane natae nak, “Au amnen neu Ho es ko etu in nanan; au umtau, es nane te au u'tolo' natuin au monas kau.”
11Uisneno natae nak, “Sekau es nak neu ko nak ho monas ko?” “Ai ho muah hau fua le Au ukain ko he nati' kaisa ho muah in fua?”
12Atoni le nane natae nak, “Bife le Ho fe anfani atuntakus neu kau, anfe nalali hau fua le nane neu kau, oke te au uah ulali in.”
13 Uisneno natan neu bife le nane nak, “Nansa' es ho mo'e lasi nane?”
In natae nak, “Kauna es anfuli kau, talantia au uah hau fua le nane.”
Uisneno anfe nani kasat
14Nalali onane te Uisneno nak neu kauna nane nak, “Ho of amsimo mani kasat natuin ho mo'et nane; na'ko ale mu'it alkun ho es amsutai mani sukat le i: Na'ko leku le i of ho muknama meki ho taim, ma ho muah afu anbi ho neno monit sin. 15Ho ma bife le nane of amanek nanan es nok es, in sufan ma ho ka'um of anmamusun piut. In sufan of naskuku ho nakam, ma of hom lau sin haen tikan.”
16Oke te Uisneno nak neu bife nane nak, “Of Au sato ho menas leka ho muapu ma leka ho muhoni. Maski onane amsa, of hom nek sinmak piut neu ho mone, ma mes ho munebtom meu in.”
17Oke te Uisneno nak neu atoni nane nak, “Hom nen ho fenai in molok sin oke te ho muah hau fua le Au penan he nati' kaisa ho muahan. Natuin ho mo'et nane, afu le i masukat. Ho mes amepu mumep anbi ho neno monit he nati' afu nane napoitan mnahat nok athoes neu ko. 18Afu le i of napoitan neu ko kisan ma kaitila, ma ale luet fui of anfani ho mnahat. 19Of ho mepu nok susal ma nukat ma ho puse of ansai he nati' afu le i napoitan sa' es, talantia hom fani neu afu, natuin anmo'e ko na'ko afu. Anmo'e ko na'ko afu, ma of hom fani meu afu.”
20Nai Adam nakanab in fenai bi Hawa, natuin bife le nane anfani ainaf neu ale uf amonit. 21Es nane te Uisneno anmo'e blua pake na'ko mu'it in pasun neu Nai Adam ma in fenai, oke te In napakeb neu sin.
Uisneno anli'u napoitan Nai Adam ma bi Hawa na'ko Etu Eden
22 Uisneno nakua a'an nak, “Leku le i atoni anfani on Hit ma anmu'i nek hine ma amle'ut. Es nane te hit at eka in he naiti ma nah hau fua le anfe honis, he nati' kaisa in anmoni tal nabal-bal.” 23Es nane te Uisneno anli'u atoni nane na'ko Etu Eden ma anlenu in he nati' anmepu afu le in na'kone. 24Nalali onane te, anbi neno saen na'ko etu nane in enon, Uisneno antao ahake neno sin, ma suni le anpin on ai le nabe'i anfun natef pah kabenan, hen panat lanan le anao neu hau afe honis nane. Nok nane ka tit fa atoni mese nabe'i hen tam ma anhaumak hau nane.
ప్రస్తుతం ఎంపిక చేయబడింది:
KEJADIAN 3: AOZ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
