San Mateo 10

Jesús becuee ca benni tsiꞌinu udheti ca tisa ruleꞌe

(Mr. 3:13-19; Lc. 6:12-16)

1Laniala nna uxi Jesús ca biꞌini tsiꞌinu rudheti ca tisa ruleꞌe. Lee nna begüee ca biꞌiniha derechu qui ebeacabi ca be xxegüi yuꞌu lheꞌe cuerpu gue ca benni, qui eyoncabi ca benni yuꞌu iyáloba isagüe lhe ca benni rilheni lhe. 2Ni dia lá ca benni tsiꞌinu bedheti ca tisa beleꞌe Jesús:

Primertteba Simón biꞌini láguaba Pedro,

Andrés betsi biꞌiniha lhe

Jacobo lenbi betsibi Juan ca biꞌini beaca xiꞌini Zebedeo lhe

3Felipe lhe Bartolomé lhe

Tomás lhe

Mateo biꞌini uca güequixa lhe

Jacobo xiꞌini biꞌini lá Alfeo lhe

Lebeo biꞌini láguaba Tadeo lhe

4Simón biꞌini nutsa ca nu te lácani Zelote#10:4 Zelote te láni ttu cue ca benni bittu uca uyúcana ca nu rinnabia lo yu atta useꞌe ca nu Israel, cumu ancacana benni dittu, delába ca nu beaca lascani yiesi te láni Roma. lhe

Judas Iscariote nu betena Jesús las ná ca nu betticana Benniha lhe.

5Ca biꞌini tsiꞌinu-ni (12) nua udhelha Jesús, nianna re ca biꞌiniha:

—Bittu tsiale atta seꞌe ca nu bittu anca benni Israel. Bittuguaba gaꞌale lheꞌe ca yiesi gue ca benni Samaria lhe. 6Sinuqui gualtsiala atta seꞌe ca benni Israel, cumu lacana ancacana attiba carneꞌe biganna. 7Gualtsia, gualquixxiꞌaquinna gualgás cana: “Chi daa ribiga isía sá innabia Tata Do Iyyabaaha.” 8Eyonle ca benni rani lhe ca benni raca nu anca attiba yiesusu te láni lepra lhe unle eyacani ca benni chi utti lhe ebeale ca be xxegüi yuꞌu lheꞌe cuerpu gue ca benni lhe. Lebiꞌi nna bittu uquixale gue nu unle, cumu neti nna cuentaba betea elha rinnabia quia-na len lebiꞌi, lägabi bequixale.

9’Bittu ujale oro lhe plata lhe cobre lhe. 10Bittuguaba ujale chuba yuꞌu yetta gue neda guele lhe niguaba attu cue xole lhe niguaba attu cue guaracha guele lhe niguaba garroti lhe. Cumu nu riben sinaha nna ralhaba nua utecana nu gona.

11’Gansi chi utaꞌale lheꞌe ttu yiesi o lheꞌe ttu lheꞌesi, gualeguila gaxa do ttu benni nu dica uxxen lele na, níaba gualtseꞌe lheꞌe yoꞌo gue nua, axta liba gansi chi bedále eríale nía. 12Atti gaꞌale lheꞌe yoꞌoha nna gualnnaba len Tata Do Iyyabaaha aca lanie ca benni seꞌe nía. 13Gansi ca benni seꞌe nía ralhacana aca len Tata Do Iyyabaaha cana, acaba nu unnabaleha, ttiaca gansi bittuba ralhacana dhicana nu unnabaleha nna eyequiba elha tseeha len lebiꞌi. 14Gansi seꞌe nu bittu ulabinle, nu bittu udo nagani guele lhe atti eríale lheꞌe yoꞌoha o lheꞌe yiesiha nna ucuibittele biste yu anca niꞌaleha.#10:14 Cumu unnuha uleꞌe lo läga beꞌo le Tata Do Iyyabaaha nu ben ca nua. 15Neti nna gualíbatia ria, gansi chi bisía sá uni Tata Do Iyyabaaha elha uxtisi gue ca benni seꞌe yies lo yu-ni, xxenirla anca elha disa utee gue ca benni seꞌe lheꞌe ca yiesi atta bittu ulabican le attichula elha disa utee gue ca benni useꞌe lheꞌe yiesi Sodoma len Gomorra.#10:15 Génesis 19

16’Neti ridhelha le attiba ttu nu ridhelha carneꞌe lagüi ca sagueo. Denuala nna listu gualuni attiba ttu belha, ttiaca gualaca tana attiba ttu becha. 17Tsitsi gualdo cuidadu, cumu udaxxu ca benni le saseꞌecan le lo ca uxtisi-na. Ca unná nna quincan le lheꞌe ca yoꞌo atta rudheti ca benni Israel ca tisa gue Tata Do Iyyabaaha. 18Lo niꞌa quia nna ichecanle lo ca nu lo gue ca uxtisi-na lhe lo ca nu rinnabia xeni-na lhe. Aníaliba nna qui aca quixxiꞌenle ca nua ca tisa quia-ni, quixxiꞌaguabinle ca nu bittu anca benni Israel lhe. 19Ttiaca gansi chi bedaxxu ca benni le qui saseꞌecan le lo ca uxtisi-na, bittu ichacha iquile gue bixa innále lhe gue gaxasná ecabile lhe. Cumu gansi chi bisía ura innele nna guteba Tata Do Iyyabaaha tisa innele. 20Cumu läga lebiꞌi nua innee, sinuqui Espíritu gue Tata guele do iyyabaaha, Benni yuꞌu lheꞌe lastoole-nba, Benniha innee cuenta guele.

21’Lania nua, la betsiba ttu benni utena attu betsiniha las ná ca nu uttican na, unnuhaguaba uni ca tata len ca xiꞌincani lhe ca xiꞌincaniha nna eyequicana usia lecani ca tata guecaniha, nianna uncana qui gatti ca nua. 22Lebiꞌi nna iyába ca benni bitturu aca uyúcan le lo niꞌa quia, ttiaca benni dhana dhu tsitsina lo neda quia axta atti isía sá gattina, unnuha liba lhána, bittu tsia nittina. 23Gansi chi bería lacana le lheꞌe ttu yiesi, gualuxxunni gualtsia lheꞌe attu yiesi subi. Neti ria le nna läga chi bea ca yiesi seꞌe lo yu gue ca benni Israel tsiale lheꞌecani atti chi isía sá esíaya, neti Benni unbiyuu daa iyyabaaha.

24’Nu rudhetiha nna läga ancana nu yuru atti benni anca maestro gueniha. Niguaba nu riben sinaha bittu ancana nu raru xxeni leni atti benni bananie na. 25Careꞌaba eꞌeyu benni rudhetiha acana atti anca maestro gueniha. Anáguaba benni ren sina lhe careꞌaba eꞌeyuna acana atti anca benni bananie na. Inqui neti ancala tata nna rácan dequi anca nu xxegüi,#10:25 Lo yitsi-ni rá nu xxegüi, lo adí ca yitsi nna rá Beelzebú. ¿titialiga lä innecana guele, lebiꞌi, ca benni anca xiꞌinia?

26’Larcala nna tsa bittu gasinle ca benni. Cumu tsa lägabi te ttu bixa te gatsi, lä tsanni lobana, niguaba ttu nu raca sigá, lä unaba benni-na lhe. 27Nu rixxiꞌaya suntteba len lebiꞌi nna gualquixxiꞌa na len adí benni, nu rixxiꞌatia le sigába roꞌo nagale nna gualiría gualquixxiꞌa na idisa qui una benni-na. 28Bittu gasinle ca nu utticana lebiꞌi yies lo yu-ni, cumu ca unná sunruba cuerpu guele-na dhacana utticana, ttiaca läga aca utticana alma guele-na. Gualgásini Benni aca guee utseꞌe loe cuerpu guele-na lhe alma guele-na lhe atta lexúaha.

29’¿Si läba ganna len tturba belhi nu bittu tte lidhacani te ritoꞌo chupa ca binnito? Läquiga de nua nna ni ttu ca unná bittu rinnacana lo yu, gansi bittuba aca le Tata guele do iyyabaaha. 30Anáguaba lebiꞌi, axta ca itsiquile-na coa ttuttucana babani Benniha. 31Larcala nna bittu gasinle, cumu lebiꞌi nna dacarlale atti ixe tsitsia ca binni-na.

32’Nuxaba benni dhi roꞌoni gualíba ria leni neti aní lo benni, anáguaba neti, dhíguaba roꞌa aní lo Tata quia do iyyabaaha gualíba ria leni neti. 33Ttiaca benni bittu dhi roꞌoni aní lo benni gualíba ria leni neti nna anáguaba neti bittuguaba dhi roꞌa gualí ria leni neti lo Tata quia do iyyabaaha.

34’Lebiꞌi nna bittu aquinle ga delha yies lo yu-ni qui tseꞌe tsee len loes ca benni. Läga delha neti qui tseꞌe tsee ca benni, daba neti qui lo niꞌa quia nna itilha len loes ca benni. 35Cumu delhaba qui utilha ca benni, unbiyuuha nna eyequinona tata gueniha, nuilaha nna eyequinona nan gueniha, xolisiha nna ttilha lenna nan gue unbiyuu gueniha. 36Larcala nna la ca nu seꞌe lheꞌe lislehaba bittu aca uyúcan le.

37’Benni racaruinna gue tata nan gueni attichula neti nna lägabi elha ralha nua acana benni quia. Nu racaruinna gue xiꞌin biyuuniha o gue xiꞌiniunnániha attichula neti nna lägabi elha ralha nua acana benni quia. 38Benni bittu dhielhana uchíana lo nu satena lo niꞌa quia, attiba ttu benni nuja crusi gueni diana atta ttána lo nua, unnuha nna bittuguaba bi elha ralhana acana benni quia. 39Benni uni odilá elha nabani gueni nna unnittiba nua elha nabani gueni, benni unnitti elha nabani gueni lo niꞌa quia nna aca banba nua ttu dia lii lo Tata Do Iyyabaaha.

40’Benni ulabina lebiꞌi nna netiba nua rulabi nua, benni ulabina neti nna benni udhelhe netihaba benniha rulabina. 41Benni ulabina ttu benni anca profeta, de anca biꞌiniha profeta nna loesi nu tsee dhi biꞌiniha guaba dhína. Benni ulabina ttu benni runi nu anca tsee, de anca biꞌiniha benni runi nu anca tsee nna loesi nu tsee dhi biꞌinihaguaba dhína. 42Nuxaba benni utena masquiba ttu xigaru inda dilha len ca benni bittu ra xxeni leni seꞌe-ni nna de ancacana benni rudheti nu ruleꞌa nna neti nna gualíbatia rpea le, unnuha nna guadíba na nu tsee ralhana dhína gue nu bennaha.

ప్రస్తుతం ఎంపిక చేయబడింది:

San Mateo 10: zaq

హైలైట్

షేర్ చేయి

కాపీ