Yohana 9

UYeesu iiponia umupofu

1Lino, ilisiku limonga uYeesu pina akhandi ijenda, akhamwajile umuunu yumonga yuna wásaviilwe mupofu. 2Avamanyisiwa vaakwe vamuposa vaaja, “Wee Mumanyisaaji, umuunu uyu wásawaagwa mupofu kwa kiiva ya wunansi wa naani? Waakwe yumwene awu wa vasafi vaakwe?”#9:2 AVayahuudi vihuvililaga kiija, uwupofu nu wulema wumonga fiihuma kwa Nguluvi, kwa kiiva ya wunansi wa mutamu awu munyaayumo wa vambuyaanave. Yimba mu litaafili lya Kihuma 20:5. 3UYeesu wávagomosesa wáaja, “Uyu asili mupofu kwa kiiva ya wunansi waakwe, awu wa vasafi vaakwe. Leelo wásawaagwa mupofu kiija, ingufu sa Nguluvi siwoneshe kwa vaanu shina sisenga insengo mu wiikhasi waakwe. 4Tisakulwa kisenga insengo ya Nguluvi yuna anifiliishe, pina kushaanali minsi. Ishilo shiyinsa, pina tisikwiliile kisenga insengo isi. 5Uluhaavi luna nipili mu nyi iyi, one nili wuvalafu kwa vaanu woona, uwuvalafu wumulikha paminsi.”

6UYeesu wáganaga kilogola ago, wáfuunya amata pansi pa lilongo, wáafuvanga amatope, wámupakha umupofu yula, mu meeho. 7Baheene wámujovela umupofu yula wáaja, “Luta uyishuule ku meeho, mu lilamba lya Silowamu.” (Silowamu, uluganulo lwakwe, yuna afiliikhwe.) Baaho umupofu yula, wáaluta wáyishuula ku meeho, wádaamula, wáawuya kunyaakwe.

8Lino avashegamani vaakwe na vanji vina vakhandi vikimwaga ulwamwandi pina ilomba lomba, vaposania vaajova, “Wuli, umuunu uyu asili yumwene yuna akhandi iikhala ilomba lomba?” 9Avanji vaajova, “Umuunu uyu, yumwene.” Avanji vaajova, “Umuunu uyu, asili yumwene, leelo ahwaneene mandu nu mwene.” Leelo umwene yuna akhandi mupofu wávajovela wáaja, “Shiyooli yuune.” 10Ino vamuposa vaajova, “Nda shiyooli yuuwe, ameeho gaakho gayansa wuli kiloleela?” 11Umwene wávagomosesa wáaja, “Umuunu yuna itambulwa Yeesu, wáfuunyaga amata pa lilongo, wálifuvanga ilitope, wánipakha mu meeho gangu. Baaho wánijovela wáaja, ‘Luta uyishuule ku meeho mu lilamba lya Silowamu.’ Baheene naaluta nayishuula ku meeho, nayansa kiloleela.” 12Vamuposa vaajova, “Wuli, umuunu uyo lino ali kwi?” Umwene wávagomosesa wáaja, “One nisimeenye kuna akwali.”

AVafalisaayo viseesa shina wáponisiwa yuna akhandi mupofu

13Lino avaanu vala vamutwala kwa Vafalisaayo, umuunu yuna ulwamwandi akhandi mupofu. 14Ino ilijuva ilyo lina uYeesu wáfuvaga ilongo na kimuponia umupofu yula, likhandi lijuva lya Sabaato. 15Baheene aVafalisaayo woope vamuposa umuunu yula vaajova, “Wuli, wayansa kiloleela shihwana wuli?” Wávagomosesa wáaja, “Umuunu yumonga wánipakha ilitope mu meeho, naagana kiyishuula ku meeho, nayansa kiloleela.” 16AVafalisaayo vamonga vaajova, “Umuunu yuna angagaha ngaja ndeeni, asikwiliile kihuma kwa Nguluvi, kwa kiiva iigaha gina gasiyiitikhwa mu lijuva lya Sabaato.” Leelo avamonga vaajova, “Wuli, umuunu umunansi akwiliile kigaha amabikha ago?” Baaho, vabagunkhana vaveene kwa vaveene.

17Baheene aVafalisaayo vamuposa khanji vaajova, “Umuunu yuna wákuponia ameeho gaakho, wiijova wuli ulwa muunu uyu?” Umwene wávagomosesa wáaja, “One niiwona umuunu uyo kiija, mukuwamalago wa Nguluvi.” 18Leelo avakhome va Vayahuudi vasikhahuviliile kiija umuunu uyu yuna iloleela, akhandi asaviilwe mupofu. Baaho vavashemeela avasafi vaakwe. 19Vavaposa vaajova, “Wuli, umuunu uyu mwaneenyu? Nda mwaneenyu, mujinie kiija wásawaagwa mupofu. Nda shilushwali ndeeno, lino wáyansa wuli kiloleela?” 20Avasafi vaakwe vavagomosesa vaajova, “Ose tiijinia kiija, uyu shiyooli mwaneesu, khanji wásawaagwa mupofu. 21Leelo tisimeenye shina wáyansa kiloleela, khanji tisimumeenye nayu muunu yuna wámuponiaga ameeho gaakwe. Muposaaji yumwene, kwa kiiva woope muunu mukhome, akwiliile kilogola yumwene.” 22Avasafi vaakwe vakhalogwele ndeeno, kwa kiiva vakhandi vikivatiila avakhome vala va Vayahuudi. Avakhome awo vakhandi vapulinkheene kiija, umuunu yoyoona yuna iyiitikha kiija uYeesu yu Mukulusaaji yuna uNguluvi wátahisaaga kimufilikha,#9:22 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. vakhamudaga mu nanda saanave isa kifuunyila. 23Lulwene avasafi vaakwe vajovaga, “Muposaaji yumwene, kwa kiiva woope muunu mukhome, akwiliile kilogola yumwene.”

24Lino avakhome va Vayahuudi vamushemeela khanji ulwa wuvili, umuunu yula yuna akhandi mupofu vamujovela vaaja, “Yiyiiga kwa Nguluvi ujove wilogola ga shiyooli! Ose timeenye kiija umuunu uyo yuna wákuponia, munansi.” 25Lino wávagomosesa wáaja, “One nisimeenye kiija umuunu uyo munansi, leelo nilimeenye liswi limo hela, kiija nikhandi mupofu, lino niloleela.” 26Lino vamuposa vaajova, “Wuli, umuunu uyo wágahaga shi? Wákuponia wuli ameeho gaakho?” 27Umwene wávagomosesa wáaja, “One navajovela imola iso, leelo musapuliisa. Lino kwashi mwisakula nivajovele khanji? Wuli, na yuumwe mwisakula kiiva vamanyisiwa vaakwe?”

28Lino aveene vamuliga vaajova, “Maanyi owe, yuna uli mumanyisiwa wa muunu uyo! Leelo ose tili vamanyisiwa va Musa. 29Timeenye kiija uNguluvi wálogolaga nu Musa, leelo ulwa muunu uyo, tisimeenye na kuna ahumile.”

30Umuunu yula wávagomosesa wáaja, “One niswiga mandu! Umwene wániponia ameeho gangu, leelo mushaanali musiimanya kiija ahumile kwi! 31Timeenye kiija uNguluvi asipulikha amafuunyo aga vanya wunansi,#9:31 Yimba mu litaafili lya Sabuli 34:15-16; Mfitikho 15:29. leelo ikimupulikha umuunu yoyoona yuna ikimuyinatila, na kigaha gina agageene. 32Kihuma pashiyanso sha nyi, tisinapulikhaje hata gwalimo kiija, umuunu wámuponia umuunu yuna wásawaagwa mupofu. 33Umuunu uyo wáali ave asihumile kwa Nguluvi, wáali asikwiliile kigaha ago.” 34Aveene vamugomosesa vaajova, “Owe wasawaagwa na kisungwa ngaja munya wunansi. Wuli, una wutawulilwa wushi uwa kitumanyisa ose?” Baheene vamudaga kihuma mu nanda iya kifuunyila.

Uwupofu uwa mu numbula

35UYeesu wáganaga kipulikha kiija vamudaga umuunu uyo, wáaluta kimusakula. Wáganaga kimwaga, wámuposa wáaja, “Wuli, ukimuhuviilila uLusawo lwa Muunu?” 36Umuunu yula wámugomosesa wáaja, “Wee mutwa, nijovela uLusawo lwa Muunu yu naani, kiija nive nikimuhuviilila?” 37UYeesu wámugomosesa wáaja, “Owe wámwaga, khanji uyu yuna wilogola nawo, yumwene.” 38Umuunu yula wáaja, “Nikikuhuviilila, Mutwa.” Baaho wáfugama pa Yeesu na kimufuunya.

39Lino uYeesu wámujovela wáaja, “One nikhayinsile mu nyi muno kihiga, kiija avapofu valoleele, khanji vina viloleela, vave vapofu.” 40AVafalisaayo avanji vina vakhandi pala, vaganaga kipulikha injowo iso, vamuposa vaajova, “Wuli, ukitujova yuuse, kiija tili vapofu?” 41UYeesu wávagomosesa wáaja, “Nda mwali muve vapofu, ndi musaava vanya wunansi. Lino omwe mwijova mwiloleela, ndeeno yiwonensa kiija mupili vanansi.”

ప్రస్తుతం ఎంపిక చేయబడింది:

Yohana 9: Shisangu

హైలైట్

షేర్ చేయి

కాపీ