Bìac Baxèm 9
9
Teo Hađong Patô Bìac Wêh Jao
1Boc Plình am xôq ramŏt ca Noah wa 'bài con calô haq, hi doi: “Phai xa-ông tam ma bàc waq ca bình halùih crŏng taneh. 2Dìq ca ngè ma rìh ta crŏng taneh, dìq ca chìm ta plình, wa dìq 'bài ca ma rìh ta diac, dìq dŏng ngè cô loq yùq crè ca pì. Pì jah wèq cwìang wì haq. 3Dìq ca ngè ma loq lam wa i hihèm, èh đòiq broq ca pì dahwèq caq, hadai tìah ca cachiq ma 'noiq, Au khoi am ca pì.
4“Mahaq pì apaq caq jam adrìh, aih jam ma ŏi i mahem. 5Ùh jah jêh đac mangai. Au joq 'nàng bòch hlài rìm ngè rôm leq ma broq ta-ùc mahem pì. Au hadai bòch chau mahem da mangai leq jêh đac oh daq cla.
6“Mangai leq jêh đac mangai,
ep 'bìq mangai jêh cađac,
ma jah 'màng aih Boc Plình
khoi broq loh con mangai tiaq 'mù Haq.
7'Màng aih, pì phai xa-ông tam bàc broq bình halùih ta crŏng taneh.”
8Boc Plình doi ca Noah wa 'bài con calô haq: 9“Manàiq cô, Au broq wêh jao ca pì wa xinoi pì, 10wa dìq ca ngè ma rìh ŏi ti pì, chìm ta plình, ngè aban ta hnem, rìm ngè rôm, rìm ngè khoi loh enh bong, aih rìm ngè ŏi ta crŏng taneh. 11Au broq wêh jao ca pì: Pàng cô ta èh, dìq ca chac xech ùh hìaq 'bìq jêh đac xam diac càn, hadai ùh i diac càn làp raliang đac crŏng taneh.”
12Boc Plình doi hòm: “Cô teo patô Au khoi broq đòiq ca pì wa dìq ca ngè rìh ŏi ti pì, trùh dìq xinoi atìq cô èh. 13Au đòiq hađong da Au ta yùc, đòiq broq teo patô bìac wêh jao da Au wa crŏng taneh. 14Jò leq Au tagop yùc ŏi ta plình, wa jò leq hađong loh ŏi ta yùc aih, 15Èh Au hmàng hlài bàu wêh jao da Au ma khoi broq ŏi ti pì wa rìm ngè ma rìh i hihèm. Èh ùh jò leq i diac càn hòm raliang cađac dìq ca chac xech. 16'Màng aih, jò hađong ŏi ta yùc, Au ngan hnoq haq, èh hmàng hlài bìac wêh jao hloi hloi ma Au khoi rùp bàu am dìq ca chac xech ma i hihèm rìh ŏi ta crŏng taneh.”
17Boc Plình doi ca Noah: “Aih teo patô bìac wêh jao Au broq ta'ne ca Au wa rìm chac xech ŏi crŏng taneh.”
Con Calô Noah
18'Bài con calô da Noah loh enh bong, aih: Sem, Ham wa Japhêt. Ham broq baq da Ca-na-an. 19Enh piq ngai con calô Noah ma i adrech dìq ca con mangai ŏi jàp ta crŏng taneh.
20'Màng aih Noah baxèm abèq taneh, èh broq wùan pìt long nho. 21I mòiq hì haq ôq diac plì nho loh ca bù, èh ŏi rahòng cùi dèh ta hnem traiq. 22Ham, baq da Ca-na-an, hnoq 'màng aih, haq loh enh gùng anoi hlài ca Sem wa Japhêt. 23Mahaq Sem wa Japhêt yŏc eo ma ha'mac ta palêh dađeh, lam laq alùi mùt ta hnem traiq ta'màn dèh ca baq. Mat wa haq ngan enh ngìa dađeh, 'màng aih wa ùh hnoq dèh baq ŏi rahòng.
24Jò Noah hi brêh ca bù, loq dèh ca con ma tìa khoi broq ca dađeh, 25haq doi:
“Ca-na-an đang ca waiq hanip!
Haq jah broq hapŏng
dèh ca 'bài oh daq haq.”
26Haq doi tam:
“Manè apôi Chuaq, Boc Plình da Sem!
Ca-na-an phai broq hapŏng ca Sem.
27Waiq xìn Boc Plình pèh rùng taneh ca Japhêt,
am ca haq rìh ŏi ta traiq Sem,
èh Ca-na-an phai broq hapŏng haq.”
28Atìq ca diac càn, Noah ŏi rìh jah 350 hanam. 29Haq rìh halình 950 hanam, hi cachìt.
ప్రస్తుతం ఎంపిక చేయబడింది:
Bìac Baxèm 9: HreB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 201̣̣9 WEC International
