John 14

1Jesus itanístsiiwa ománikapiimiksi, “Óóki. Piníkihkíniʼtakika; amáíʼtooka Áʼpistotookiiyi. Noohkáttomaiʼtookik. 2Omíím Nínna Áʼpistotookiwa otsítaopiihpim itakáwoyaawa omiistsi itáípstópáoʼpistsi. Ámohka kátaaʼnistsiiopi kimátakanistohpoaawa. Niistówa tákohtsitapoo kááhkohtaʼpistotomoohsoayi kááhkitaopihpoaawa. 3Kii aotóíʼksistaʼpistotsiminikiaawa tákítsskaistoo. Kitákitohpoʼkiípioohpoaawa, kii ánnimayii kitákitaʼpaisspoaawa omiima nitsítakaʼpaisspi. 4Kii kiistóaawa kikáíssksiniihpoaawa kááhkanistohkoitoʼtoohpoaawayi nitáyaakitapoohpi.”

5Óóki. Omáa Thomas itanííwa, “Óóki, nitsínaaimi. Nimátssksiniihpinnaan kitákitapoohpi. Tsááhtaa nááhkanistohkottssksiniihpinnáánahta nááhkanistohkoitoʼtoohpinnaani.” 6Itanííwa Jesusa “Niistówa ánnahkaoʼka annaahka kitákohtohkoitoʼtoohpoaawahka. Niistówa ánnahkaoʼka mokámoʼtaʼpssi. Niistówa ánnahkaoʼka ómohtsiistapitsstsiihpi manipáítapiʼssini. Omáa matápiiwa ikkámsaohtohkoyikisi niistói mátakohkoitoʼtóowaatsi ninni.

7Óóki. Kíniitaʼpssksinookihpoaawopi kitákitoohkattssksinoaawa nínna. Ki ánnohkayii kitákomatapssksinoawaawa.”

8Óóki. Itanííwa omáa Philip, “Óóki nitsínaaimi. Noohkáístamaatsookinnaan kínnoona; ánniayi kinóóhkanistókamanistohpinnaana. Nimátakattsitsspókamaniihpinnaan.” 9Jesus itanííwa, “Philip, kitsiksísamohpokaʼpaissiimohpoaawa, ki kitsíímiisawaitaʼpssksinookihpoaawa. Ikkamíkainokiinoainiki kinóóhkattsikainoawaawa nínna. Kimáʼkanissi, ‘noohkáístamatsookinnaan kínnoona’? 10Kaahkstamáíʼsayiʼtookihpoaawa nomohpipáítapiiʼssi nínna, ki nínna omohpipáítapiiʼssi niistóyi. Kii amóstska kitáánistohpoaawaistska nimátawattanistoohpiaawa. Nínna iihpipáitapiiwa niistói kii omíístsi nitáwanisttsiihpistsi, oostóyi ánnahkaoʼka áwattanisttotsimaistsi. 11Amáíʼtsit nomohpipáítapiʼssi nínna kii omohpipáítapiʼssi niistóyi. Ikkamánistaiksimsstaainoainiki kitsawáohkottomaiʼtsissooaayi inaóʼkohtomaiʼtakika nitsipisatanísttsissiistsi. 12Kitákanistohpoaawa niitsííyi. Omáa nitáómaiʼtooka ákitotoisapaʼpoʼtakiwa niistói, kii otáʼpoʼtsiihpistsi ákitoʼtsitsksskonataʼpiiyaawa niistóyi nitáʼpoʼtakssiistsi, takaa niistówa nitáksskitapoo nínna. 13Kiistóaawa ánnikskaoʼkiaawa annííksiska itomáíʼtakiiksi niistóyi, ki ánnihkayii kitákohtohkottsinihkatsimakkihpoaawa. Kitákitanistsiʼtoohpoaawa. Nínna ákohtsitsspimmawa niistóyi nitákitanisttsiihpi. Niistóakaoʼka ohkóyi. 14Ikkamókamanikkiinoainiki kítsstatoohpoaayi, kitakohtokamanikkihpoaawa kitamssoaayi amiiksiska itomáíʼtakiiksi niistói ki kitákitanisttotomoohpoaawa.

15Kii ikkamákomimmokiinoainiki kitákitanistaiʼtsiihpoaawa nitokákihtsimaanistsi. 16Ki nitákanistawa nínna mááhkitapipoʼtoahsi noohkíítssimmi kááhksspommóyissoaayi, ki omíiska noohkíítssimmiska kimátakónoayiistapáakkoawaatsinai. 17Omááhka noohkíítssimmahka ánnahkaóʼka annaahka kitákohkokkoaawahka mokámoʼtaʼpi. Ánnahkaoʼka annaahka Natowóttakahka. Kátaʼyaomaiʼtakiiksi mátakohkottoʼtoyiiwaiksi Natowóttaki. Mátakohkottsinapimmíwaiksaawayi. Mátakohkottonoyiiwaiksaawayi. Kiistówaawa kítssksinoaawaawa. Kítohpokaʼpaissiimokoaawa, kii kitáksistomatawaawa. 18Kiistóaawa, aiʼtsskítoinoainiki, kimátakitsiksisstoyimmohpoaawa ánni immaksíʼni. Kitákitamattaistohkoohpoaawa. 19Aipstsíksisisamosi omííksi kátaʼyaomaiʼtakiiksi matápiiksi nitákitsawattsinookiaawa. Kiistóaawa kitákattsistaiʼnookihpoaawa. Kii niistówa nitáksaakiipaitapiiyi, ki ánnihkayi kitákohtoohkattanipaitapiihpoaawa, kiistóaawa. 20Anniihka aaʼnistsíísi kitákitotsistapiʼtsiihpoaawa niistówa nomohpipáítapiiʼssi nínna, ki komohpipáítapiiʼsoaayi niistówa, ki niistówa nomohpipáítapiiʼssi kiistóaawa.

21Omáa maʼtsíma nitokákihtsimaanistsi, ki niitáíʼtsimaistsi, ki ánnahkaoʼka nitákomimmokahka. Ki omáa nitákomimmoka, otákitakomimmoka nínni, ki niistówa nitákakomimmawa. Nitakitaistamáatsoohsatawa.”

22Óóki. Omáa máttanistawa Judas, mátamiwa Judas Iscariot, mattóóhkiitssimma, itanístsiiwa Jesusi, “Óóki nitsínaaimi, tsiáa ákanistaʼpi. Tsskáa Kitákohtsawaistamaatsoohsatawa kátaʼyaomaiʼtakiiksi matápiiksi kííwa kitákaistamáatsoohsakkihpinnaani niistónnaan?” 23Jesus itanííwa, “Óóki, kanáítapiiwa nitákomimmokiksi, ákanistaiʼtsimiawa nitáániihpistsi. Otákitakomimmokoaawa nínni. Nínna ki nistówa nitákitoʼtoohpinnaan omííksi. Nitákitaisksohpokaʼpaissiimannaaniaawa. 24Óóki, ki omáa nikátaaʼkomimmoka ostóyi mátakanistaiʼtsima nitáániihpistsi. Ki ánnohka kitóóhtookihpoaawaistsi kitáánistohpoaawaistsi, nimátawattanistoohpiaawa; nitóʼtsskookahka, nínnahka otsíʼpoahsinaistsi.

25Óóki. Ánnohka kitsítohpokaʼpaissiimohsoayi kitsítanistohpoaawa áámostska. 26Ki omáahka kitákáísspommokoaawahka omááhka natowóttakahka, kitákssksinimáatsookoaawa kanáʼpaisistsi. Kitáksspommookoaawa kááhksskssksinissoaayi kanáʼpaisistsi kitáánistohpoaawaistsi. Omáa Natowóttaka, ánniskaoʼkinai otákoʼtsskoai nínna. Niistóyi ákohtoʼtsskoyiiwayi.

27Óóki. Ánnohka kitáyaaksskitohpoaawa. Kitákohpsskitohpoaawa iʼtáámipaitapiʼssini. Mátanistapiiwaatsi manistsíʼtaamistotootsiiyihpiaawa kátaʼyaomaiʼtakiiksi matápiiksi. Noohkíítsiwa amóo kómohpsskitohpoaawayihka iʼtáámipaitapiʼssini. Ki ánnihkayii kómohtanistohpoaawa, piníkihkíniʼtakika. Pinikóʼpoka.

28Kitóóhtookihpoaawa kitáánistohsoaayi nitáksistapoohsi, ki tákitamattsskitoʼtoo kiistóaawa. Óóki, ikkamákomimmokiinoainiki, kitákitohtsiksimatsiʼtakihpoaawa nitáksskitapoohsi nínna. Takaa ostóyi itóʼtsitssksspssiwa niistói. 29Óóki ánnohka kitsítsaomaanistaohkoyiʼpoaawayi kitsítsíkayissohtsiʼpoatohpoaawa, ki ánnimayii aaʼnistíísi kitákohtsitoʼtomaiʼtakihpoaawa. 30Ki kitáítamáaksiksistssitsipssatohpoaawa. Táítamaakoʼtáakka omáa istsínawa annóo ksááhkommi, omáa Makáʼpatoʼsiwa. Ki nimátakohkottanistaʼpayistotóókaatsi. 31Ki ánnohka, tákaistamaatsaawa ótapiʼssini nitákomimmahsi nínni; nanistániiyihpi nínni, ánniai nitákanisttsi. Okíh. Ááhkonomatapaaoʼpa.”

ప్రస్తుతం ఎంపిక చేయబడింది:

John 14: BLA

హైలైట్

కాపీ

సరిపోల్చండి

షేర్ చేయి