Mataos 5
5
Motɨɨ mo Yesʉs é l'ecwɨʼ kʉ
(Markus 3.13; Lʉkas 6.12-13, 20-26)
1Mbea Yesʉs a bee ntuntuma bʉr ɨ, nye ntɔʼ bere é l'ecwɨʼ kʉ, di si. Ompʉn be ze dihle gumo nye a be e. 2Nye ze nʉa lwib, ntɔʼ dwe be sikʉlʉ é mbi wi. 3Nye ó:
«Mocyɛʼ mo mpom e bʉr o ndɨ ekʉ gʉa ó,
mɨsisim myɔɔ, myé ejyeb é nko paʼ egʉa Zyɛm ɨ,
ebe, jwɨ̀ʼa mo Da, yé cyela ó, é l'efu e bʉr o ndɨ mpʉ be e!
4Mocyɛʼ mo mpom e bʉr o ndɨ ejɨ modwe e,
ebe, Zyɛm ódila modwe mɔɔ ó e bɨsʉhʉ!
5Mocyɛʼ mo mpom e bʉr o ndɨ é cyɛʼ mɨnjwɨr ɨ,
ebe, bé ó ngo liʼ e si nwa!
6Mocyɛʼ mo mpom e bʉr o ndɨ ejoʼo dweh
le egwɨm sa mɨmpaŋ bɨsyɛɛla ɛ,
ebe, Zyɛm óloŋlo be mya!
7Mocyɛʼ mo mpom e bʉr o ndɨ ejwɨʼ bʉʉ bʉr nkoo e,
ebe, Zyɛm ójwɨʼ be nteme nkoo!
8Mocyɛʼ mo mpom e bʉr o ndɨ e mɨleme é sɔɔɔ ɛ,
ebe, bé ó ngo bee Zyɛm!
9Mocyɛʼ mo mpom e bʉr o ndɨ egba motala paʼra bʉr e bʉr ɨ,
ebe, bé ójebe be ó, bwan mo Zyɛm!
10Mocyɛʼ mo mpom e bʉr o ndɨ etíilɔ
ebe ebò e cyen bé lé ekœʼ é l'ocɨcyel mo Zyɛm ɨ,
ebe, jwɨ̀ʼa mo Da, yé mu lé ecyelɔ cyecye ó, é l'efu e bʉr o ndɨ mpʉ be e!
11Mocyɛʼ mo mpom, mé ó e bɨn é jɔʼ bé ólwɨɨ bɨn, tíile bɨn le efœʼ bɨn mɨmbi mimyɛh é lɔb wam. 12Soha ga! Mɨɨla ga, ebe, myɛna monɨnɨ le embɨa, byé ebono bɨn é jobo kʉ, ebe, bé ó b'a tíile nteme ogwiha o mɨlɔb bé a taare pyal e bɨn ɨ.»
Kɨkɛna ekpa
(Markus 9.50; Lʉkas 14.34-35)
13«Bɨn ó ndɨ ekpa e si nwa. Sa gwar, ǃɨ ekpa, lé si dimle mojómo me nɛʼɛ, bé óka bula dwe le mojómo nyá ɛ? Yé ókʉ ka liʼ sɔʼɔ njɨ ó, lé sʉŋɔ kʉl, bʉr tíile le e mokʉ.»
Kɨkɛna elama
(Markus 4.21; Lʉkas 8.16; 11.33)
14«Bɨn ó ndɨ myɛn bʉr o si nwa. Nkana ndɨ fuma é l'ecwɨʼ kʉ ɨ, yé abe lé efwab bʉr é mih. 15Bʉr, bé abe lé etumo elama é l'efu le ebur le é kaʼ tʉŋlʉ. Yé ejala ó, bé cyelɨ le é cye elama kʉ, gumo lé ókʉn bʉr bɨbɛh ndɨ é mbɛr ɨ. 16No ó myɛn win, wé ejala le epan é bʉr, ó bé nkʉʼ gʉa bee mɨmpaŋ bɨsyɛɛla bin, le edwiibɨ Sɔŋ win ndɨ é jobo kʉ ɨ.»
Krɨst a ze ó, lé edu Motie mo Moyiz
17«Abuʼla ga ó, me a ze ó, ze gbɛɛ motie mo Moyiz, nkʉ gbɛɛ sikʉlʉ ogwiha o mɨlɔb bé a dwe bɨmpam bin ɨ. Me a baaze gbɛɛ. Me a ze ó, ze sil du me! 18Me elɛɛ bɨn cyecye ó nɛɛ: to pyal é jɔʼ kʉ e si, byé ósie e, kaŋa gwar tɨ, nkʉ ma etɔn egwar, byé ákwoʼ pʉʼa é motie mo Moyiz, to pyal é jɔʼ sa yiyɛh, yé ósyɛɛlɨ ɨ.
19«Ebe no, ǃɨ mʉr si ntaa etie, dam be ó, laa ndɨ é bul twaʼbe e, le eyeʼle bʉr ó, bé ntaŋa motie no nɛʼɛ, nye óbe ó mpʉ mʉr twaʼa é sama bʉr o jwɨ̀ʼa mo Da. To kœb ó, mʉr nyiwɛh ódu motie maa le eyeʼle bʉʉ bʉr esa no e, nye ócyelɔ é dia nɨnɨ é jwɨ̀ʼa mo Da. 20Ebe no, me elɛɛ bɨn ó nɛɛ: ǃɨ ocɨcyel win, wé si be, alaa waa oFarizyɛŋ, nkʉ waa oyeʼle o motie nɛʼɛ, bɨn bé ákwoʼ ni é jwɨ̀ʼa mo Da.»
Sikʉlʉ é lɔb empime
(Markus 11.25; Lʉkas 12.57-59)
21«Bɨn bé a be ó si joʼo mpʉ bé a bɛa lɛɔ ó: “Ajʉ mʉr. ǃƗ mʉr si jʉ mɨɔ we mʉr nɛʼɛ, nye ótoŋɔ e nye é mpah mɨlɔb.” 22Ebe no, me elɛɛ bɨn ó nɛɛ: mʉr nyiwɛh lé ekpaa empime e mɨɔ we e, nye ótoŋɔ e nye é mpah mɨlɔb. ǃƗ mʉr si lɛɛ e mɨɔ ó: “Go sa gʉʼlʉgʉ yi” nɛʼɛ, nye ótoŋɔ e nye é mih mo Bʉm Nɨnɨ. ǃƗ mʉr si lɛɛ ó “Go sa gʉʼ yi” nɛʼɛ, nye ótoŋɔ e nye é Bɨ-siʼe ndɨ é diʼa ɛ.
23«Ebe no, yé be ó, go mu lé eto é taa mɨndwɛa lé eto diʼ Zyɛm motwina go kɛʼ nye nɛʼɛ, ǃgo si ka toŋlo ó, mɨɔ go, nyi niʼe go baa ebebe wa, 24liʼa bɨsa gɨ kɛʼ Zyɛm ɨ, kunokuno e taa mɨndwɛa. Go à fiʼ, to kœb mɨɔ go, diŋa ó, bɨn bé ókomlo lɔb ndɨ paʼra win ɨ. Pie tɨ, go òbula ze dwe Zyɛm motwina go taare ze e me e.
25«Yé be ó, nuu mʉr, nyi pur go, bɨn e mʉr waa ka jà zi lé eto nko mpah mɨlɔb nɛʼɛ, kpahba sa ó, bɨn komla, bɨn dina zi e zi. Nye amu to e go boo tiʼà mɨlɔb. Tiʼà mɨlɔb cen go boo lʉ bɨpulʉm, ó wé gbaʼ go é mbʉʼ. 26Me elɛɛ go cyecye ó nɛɛ: go ákwoʼ pʉʼa é gumo yaa, cye yiyɛh go l'apa jɛna mpɔla go nyiwɛh, para gwar aliʼ ɨ.»
Sikʉlʉ é lɔb mɨfyɛba
(Mataos 18.8-9; Markus 9.43, 47-48)
27«Bɨn bé a be ó si joʼo mpʉ bé a bɛa lɛɔ ó: “Asa mɨfyɛba” ɛ. 28No ó me elɛɛ e bɨn ó: mʉrʉm nyiwɛh lé edwɛʼ mʉma, ntɔʼ mine mocyeele e, nye mu naa ó, si sa mɨfyɛba e mʉma waa ó nɨ.
29«No ó, yé be ó, dih le ejʉm lo, lé ó ndɨ esa ó, go duma é l'ebebe nɛʼɛ, pɛʼɛ le. Laa ó, go diʼe e mih moba mo, go ntɔʼ guhɔ é Bɨ-siʼe, fuo pɛʼ yɛɛ dih, go à myah le, ebe, yé é bul mbɨa é nko paʼ go ó, go dimla yʉʉ fum nyʉl yo gwar, abe ó, nyʉl go nyiwɛh, nye guhɔ é Bɨ-siʼe. 30Yé be ó, mbo ejʉm go, wé ó ndɨ esa ó, go duma é l'ebebe nɛʼɛ, tiʼa we. Laa ó, go diʼe e mobo moba mo, go ntɔʼ to é Bɨ-siʼe, fuo myah yɛɛ mbo, ebe, yé é bul mbɨa é nko paʼ go ó, go dimla yʉʉ fum nyʉl yo gwar, abe ó, nyʉl go nyiwɛh, nye toʼ é Bɨ-siʼe.»
Sikʉlʉ é lɔb ejwɨɨ le eba
(Mataos 19.7-9; Markus 10.4-5, 10-12; Lʉkas 16.18)
31«Yé a si lɛɔ nteme ó: “ǃƗ mʉr si lɛɛ ó, nye buulo ó, mʉma we nɛʼɛ, nye tila kalara ejwɨɨ le eba, dwe nye nya.” 32No ó, mɛm, me elɛɛ bɨn ó nɛɛ: ǃɨ mʉr si buulo mʉma we nyɛɛ yɛɛ l'asa mɨfyɛba, myɛl ntɔʼ to sa mɨfyɛba nɛʼɛ, nyi sa ó, nye diʼe mʉma mɨfyɛba. ǃƗ mʉr si ba mʉma nuu mʉr a buulo nɛʼɛ, mʉr waa nteme, nyi sa mɨfyɛba.»
Sikʉlʉ é lɔb mɨnkɛla
33«Bɨn bé a be ó si joʼo nteme mpʉ bé a bɛa lɛɛ e bɨmpam ga bina ó: “Agwìh e Zyɛm é mɨnkɛla go a de e. Go ejala le eloŋlo mɨnkɛla go a pa de é mih mo Da ɛ.” 34No ó, mɛm, me elɛɛ bɨn ó nɛɛ: mʉr ade ga mɨnkɛla. Agba ga die e “jobo kʉ” é mɨnkɛla, ebe, jobo kʉ, yé ó dia taʼa mo Zyɛm. 35Agba ga die e “si” é mɨnkɛla, ebe, si, nye ó cyela mokʉ mo Zyɛm. Agba ga die e “Yerʉsalɛm” é mɨnkɛla, ebe, yé ó nkana mo Njwɨɨbʉr nɨnɨ. 36Ade mɨnkɛla nteme, gba lʉ go é mɨnkɛla, ebe, go abe e nkul eliŋ koho mpuo ngwar ó, wé saʼ mpi, nkʉ ó, wé diʼe dwidwin. 37ǃƗ mpɨha go si be “Eee” nɛʼɛ, nye diʼe sɔʼɔ, njɨ “Eee”. Yé be ó, nye ó “Hɨʼɨ” nɛʼɛ, nye diʼe sɔʼɔ, njɨ “Hɨʼɨ”, ebe, ekan ndɨ eka koŋɔ tɨʼ kʉ ɨ, lé eduho ó, boo Bɨbla-mʉr.
38«Bɨn bé a be ó si joʼo mpʉ bé a bɛa lɛɛ ó: “Dih taa dih; eje taa eje#5.38 Dwɛʼa Mɨtoʼ 21.24.” e. 39No ó, mɛm, me elɛɛ bɨn ó nɛɛ: asa ga bɨbla mʉr mongan. ǃƗ mʉr si jaa go bɛh é l'emuʼ le ejʉm nɛʼɛ, birɨ nteme ó, nye ŋmɛhɛ é laa le emyɛl. 40ǃƗ mʉr si kpɛl to pur go mpah mɨlɔb, é gwɨma ó, nye dɛʼ ó go dur nɛʼɛ, birɨ nteme ó, nye toʼ ndwe e len kʉr. 41ǃƗ mʉr si sa go mpel, sa ó, go nkɛŋɨ nye mɨmbeʼ é cyen kilmɨra ngwar nɛʼɛ, gwɔɔ, go à sa oba. 42ǃƗ mʉr si jaʼ go sɔʼɔ nɛʼɛ, go à dwe nye ya. Waa lé edî go ó, go kʉlɨ nye mɔn ɨ, kʉlɨ nye ya.»
Cwɨa ga e bʉr o dɔm bɨn
(Lʉkas 6.27-28, 32-36)
43«Bɨn bé a be ó si joʼo mpʉ bé a bɛa lɛɛ ó: “Kpɛlɨ mɨɔ go mʉr. Go à nwim bʉr o dɔm bo” e. 44No ó, mɛm, me elɛɛ bɨn ó nɛɛ: kpɛlɨ ga bʉr o dɔm bɨn. Jwɨʼla ga é l'efu e bʉr o lé etíile bɨn ɨ. 45Bɨn saʼ no é l'efu ó, bɨn nkʉʼ kœʼ ebò e cyen lé ejala e bwan mo Sɔŋ win ndɨ é jobo kʉ ɨ. Nye esa ó, dobo le, lé kaha é l'efu e bʉr o ndɨ é bebe, le baa ndɨ é mbɨa ɛ. Zyɛm, nye esa nteme ó, mpie nwɨŋɨ é l'efu le ocɨcyel e l'ozyɛhozyɛh o bʉr. 46Yé be ó, bɨn bé ekpɛl ó, njɨ baa lé ekpɛl bɨn nɛʼɛ, a bɨn bé óbono myɛna mo Zyɛm naa yáa gumo? Onwɨa o tœa, bé esa nteme ó, jwɨʼ gwar yaa! 47ǃBɨn si kʉ soho njɨ obɨɔ bɨn nɛʼɛ, yé ndɨ sa edwan tɨʼ ɨ? Dam be bʉr o ndɨ abe oYʉden ɨ, bé esa nteme no. 48Ebe no, kuma ga é l'ombɨmbɨa é mɨpaʼ mimyɛh, mpʉ Sɔŋ win ndɨ é jobo kʉ ɨ, ndɨ é l'ombɨmbɨa é mɨpaʼ mimyɛh ɛ.»
ప్రస్తుతం ఎంపిక చేయబడింది:
Mataos 5: ozmBad
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2002, Wycliffe Bible Translators, Inc. All rights reserved.
