Kucangtsi 6
6
Anyisu Ande Ndembeb ku Fufa Uwae Utense
1Ti ande jwunn ku fufa uwae utense, ama aba mbae anyisu ti anda, 2anyisu Rimam#6:2 anyisu Rimam Ariki ku ri baa, abane na si atom Rimam ti bom risu te Rimam, ama Rimam tur ba jwunnsi yi riben. ti arom nung anda ti tinyang ti ande ku mbae, aba tsab ati waen timambe uwae-ba, u pu ba mbe. 3Tiri Yaweh ri baa, “Kusung-m, ti ku nda unyang, u som kunn-wu te ande ru fife yi uwe cwucwo be, ikyaen ti, aba si anying ti ibye ijwe. Bag tine ru yi uwe, asang-ba u yafe-yi asang ukob mbe rikom (120) be.” 4Kiye wu ti anyisu Rimam ti arom ba nae te anyisu ande ti anda, aba mbae ukam ande ti rinyi-ba pu iten. Aba som utense uwae kiye wu, ti uwae kiye iki kpang isim-yi.
5Yaweh nung itibi ande ko ku fufa uwae utense, meme ira ti kab ande munn te ira titibi. 6Ayi ndembeb Yaweh utob ti awu kyae unde uwae utense. Utob-wu ndembeb si-yi ti ti ri be. 7Ikyaen yine, Yaweh ri baa, “Ande ti ame kyae, ame u twenji ba uwae utense – aba ti ibye ti rimang meme. Iken ti ku kyang riben, ti inung ti apupwen meme, ayi nyangskeb ti ame ú kyae-m ayi be.” 8Amaa Nuhu tu kutxuwe titinyang uwe Yaweh.
Nuhu Tu Kutxuwe Tinyang Uwe Rimam
9Ayine si kuci na Nuhu. Nuhu si unde ti kubenti, ti som usom ti pang atang uwae ande ti tsitsi kiye-wu. Awu kyang ikyin te Rimam. 10Nuhu site anyisu ti arom ita, Shem ti Ham ti Jafeti.
11Rimam nung baa, meme ande na ndembeb pu ba, u munn te ikentitibi fa ti utob ti byag. 12Rimam sae utense ndembeb pu wu, ikyaen ti ande ti ta uwae utense ye usom ti som-ba ndembeb pu ba.
13Tiri Rimam ri te Nuhu baa, “Ame sa tsi pu m ti m u wenji tag ande ti utense, ikyaen ti kubyagkwa ti ira titibi munnkyi tag utense ikyaen-ba. Ame u fen pu ba ru ye utense. 14Ikyaen yine, kyae na ijwe-fu kuyae na kutuku titinyang, ti kpakang. Kata wu kusog-kusog, ti fu fxebkyi wu, uwae ti ise meme, ti kindob koltai. 15Fengo ti afu u kyae kuyae wu ta re. Rikob-wu ti risang u si afxen ukob inje ti mae ifaen mbe rijwe (450), riyaen-wu ama u si afxen mae ita mbe rijwe asu itsong (75), rikob-wu ti ritsen ama u si kutun kujwo rijweta (30). 16Kyae rukub risu kuyae wu, ti fu kyae riye ti ka afxen kinjo ti ripye yi rikob-wu tirisang ti ti ritsen meme. Kata uwae kuyae wu ita, tī riben, tí tī kutampwa, tí tī apupwen. Sa ufu kinjo tsi iyen kyab kuyae wu. 17Nung! Ame u nda ambyi u munnkyi utense, u twenji meme iken ti site unyang. Meme iken ti site unyang uwae utense ne u twenji tag. 18Amaa, ame u yer unju te fu, afu ti uwa-fu, ti anyisu-fu, ti awa-ba, u sang uwae kuyae wu. 19Pu meme itso iken ti site unyang ifaen-ifaen, tī urom tí ti unda, sang fa uwae kuyae atang, ti itso-yi ā twenji-yi be. 20Ye itso inung, ti itso ibye, ti itso iken ti ku kun riben, ifaen-ifaen sang uwae kuyae, ikyaen ti ayi ā twenji-yi be. 21Pu wuci ti itsotso yang-yi sang uwae kuyae atang ikyaen ti ayi u si wuci-ni ti wuci ana ibye yi.” 22Nuhu nde putsa meme iken ti Rimam ri te wu.
ప్రస్తుతం ఎంపిక చేయబడింది:
Kucangtsi 6: kubNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Wycliffe Bible Translators, Inc. and
© The Nigeria Bible Translation Trust 1995, 2017
