ಲೂಕ 17
17
ಮನ್ನಿಪ್ಪ್ ಪಿಂಞ ನಂಬಿಕೇರ ಬೋದನೆ
(ಮತ್ತಾಯ 18.6,7,21,22; ಮಾರ್ಕ 9.42)
1ಪಿಂಞ ಯೇಸು ಅಂವೊಂಡ ಶಿಷ್ಯಂಗಳ ನೋಟಿತ್, ಈ ಲೋಕತ್‍ಲ್ ಪಾಪ ಮಾಡ್‌ವಕ್ ಸೋದನೆ ಎಕ್ಕಾಲು ಬಪ್ಪ. ಆಚೇಂಗಿ ಬೋರೆಯಿಂಗಳ ಪಾಪ ಮಾಡ್‌ವನೆಕೆ ನಡ್‍ತ್‍ವ ಜನಕ್ ಅಯ್ಯೋ. 2ನಾಡ ಮೇಲೆ ನಂಬಿಕೆಯುಳ್ಳ ಈ ಚೆರಿಯಯಿಂಗಳ ದಾರ್ ನಾಡ ಮೇಲೆ ನಂಬಿಕೆ ಇಲ್ಲತ್ತನೆಕೆ ಮಾಡ್‌ವ, ಅಯಿಂಗಡ ಬೋಳೆಕ್ ಬಲ್ಯೊರ್ ಬೀಜುವ ಕಲ್ಲ್‌ನ ಕೆಟ್ಟಿತ್ ಸಮುದ್ರತ್‍ಲ್ ಚಾಡ್‌ಚೇಂಗಿ ಅಂವೊಂಗ್ ನಲ್ಲದ್. 3ನಿಂಗ ಈ ವಿಷಯತ್‍ಲ್ ಎಚ್ಚರವಾಯಿತಿರಿ. ನೀಡ ಅಣ್ಣತಮ್ಮಣಂಗ ನೀಕ್ ವಿರೋದವಾಯಿತ್ ತಪ್ಪ್ ಮಾಡ್‍ಚೇಂಗಿ ಅಂವೊನ ಗದರಿಚಿಡ್. ಪಿಂಞ ಅಂವೊ ಪಶ್ಚಾತಾಪ ಪಟ್ಟತೇಂಗಿ, ಅಂವೊನ ಮನ್ನಿಚಿಡ್. 4ಅಂವೊ ದಿವಸಕ್ ಏಳ್ ಕುರಿ ತಪ್ಪ್ ಮಾಡಿತ್, ಏಳ್ ಕುರಿಯು ಬಂತ್ ಪಶ್ಚಾತಾಪ ಪಟ್ಟಿತ್ ಮನ್ನಿಪ್ಪ್ ಕ್‍ೕಟತೇಂಗಿ, ಅಂವೊನ ಮನ್ನಿಚಿಡ್.
5ಅಕ್ಕ ಅಪೊಸ್ತಲಂಗ: ಒಡೆಯನ ನೋಟಿತ್, ನಂಗಡ ನಂಬಿಕೇನ ಸ್ತಿರಮಾಡ್‍ೕಂದ್ ಕ್‍ೕಟತ್.
6ಅದ್ಂಗ್ ಯೇಸು: ನಿಂಗಕ್ ನಾಡ ಮೇಲೆ ಕಡು ಕುರುರಚ್ಚಕ್ ನಂಬಿಕೆ ಉಂಡೇಂಗಿ, ಒರ್ ಅತ್ತಿ ಮರಕ್: ನೀನ್ ಬೇರೋಡೆ ಸಮುದ್ರಕ್ ಬೂಳ್‍ೕಂದ್ ಎಣ್ಣ್‌ಚೇಂಗಿ, ಆ ಮರ ನಿಂಗಡ ತಕ್ಕ್ ಕ್‍ೕಟಿತ್ ಬುದ್ದ್‌ಪೋಪಾಂದ್ ಎಣ್ಣ್‌ಚಿ.
7ನಿಂಗಡ ಒರ್ ಆಳ್ ಬೇಲ್‌ಲ್ ಉತ್ತಿತ್, ಅಲ್ಲೇಂಗಿ ಕುರಿನ ಮೇಚಿತ್ ಮನೆಕ್ ಬಂದಕ: ಬಾ, ಬೆರಿಯ ಪೋಯಿತ್ ಉಂಡಿತ್ ಬಾಂದ್ ನಿಂಗ ಎಣ್ಣುವಿರ? 8ಇಲ್ಲೆ, ನಿಂಗ ಅನ್ನನೆ ಎಣ್ಣುಲೆ! ಅದ್ಂಡ ಬದ್‍ಲ್, ನೀನ್ ನಾಕ್ ಅಡಿಗೆ ಮಾಡಿತ್, ನಾಕ್ ಉಪಚಾರ ಮಾಡ್, ನಾನ್ ಉಂಡಿತ್ ಕುಡಿಚಿತಾನ ಪಿಂಞ ನೀನ್ ಉಂಡಿತ್ ಕುಡಿಕಲೂಂದ್ ಎಣ್ಣುವಿರಲ್ಲ.
9ಅನ್ನನೆ ಮಾಡ್‍ನ ಆಳ್‍ಕ್: ನೀಡಗುಂಡ್ ನಾಕ್ ಉಪಕಾರ ಆಚೀಂದ್ ಎಣ್ಣುಲೆ. ಎನ್ನಂಗೆಣ್ಣ್‌ಚೇಂಗಿ ಆ ಕೆಲಸ ಎಲ್ಲ, ಆಳುವ ಮಾಡ್‍ವಕ್ಕುಳ್ಳ ಕೆಲಸ ತಾನೆ? 10ಅನ್ನನೆ, ನಿಂಗಳು ನಿಂಗಕ್ ಆಜ್ಞೆ ಮಾಡ್‍ನದ್‍ನೆಲ್ಲ ಬಗ್ಗ್‌ಚಿಟ್ಟ್ ಮಾಡ್‍ಚೇಂಗಿ: ನಂಗ ಒರ್ ಯೋಗ್ಯತೆ ಇಲ್ಲತ ಆಳುವ ಮಾತ್ರ, ಮಾಡ್‍ವಕ್ಕುಳ್ಳ ಕೆಲಸತ್‍ನ ಮಾತ್ರ ಮಾಡಿತುಂಡ್‍ೕಂದ್ ನಂಗ ಎಣ್ಣಂಡು.
ಯೇಸು ಪತ್ತ್ ಕುಷ್ಟರೋಗಿಯಳ ವಾಸಿ ಮಾಡ್‍ನದ್
11ಯೇಸು ಯೆರೂಸಲೇಮ್‌ಕ್ ಪೋಯಂಡಿಪ್ಪಕ, ಸಮಾರಿಯ ಪ್ರಾಂತ್ಯ ಪಿಂಞ ಗಲಿಲಾಯ ಪ್ರಾಂತ್ಯತ್‍ರ ಗಡಿಕ್ ಬಾತ್. 12ಅಂವೊ ಒರ್ ಊರ್‌ಕ್ ಬಪ್ಪಕಾಪಕ ಪತ್ತ್ ಜನ ಕುಷ್ಟರೋಗಿಯ ದೂರತ್‍ಲ್ ನಿಂದಿತ್, 13ಯೇಸು ಸ್ವಾಮೀ, ನಂಗಕ್ ಕನಿಕರ ಕಾಟ್, ನಂಗಳ ಚಾಯಿಮಾಡ್‍ೕಂದ್ ಎಣ್ಣ್‌ಚಿ.
14ಯೇಸು ಅಯಿಂಗಳ ನೋಟಿತ್: ನಿಂಗ ಪೋಯಿತ್, ಯಾಜಕಂಡ ಪಕ್ಕ ನಿಂಗಳ ಕಾಟೀಂದ್ ಯೇಸು ಎಣ್ಣ್‌ಚಿ. ಅಯಿಂಗ ಪೋಯಂಡ್ ಇಪ್ಪಕಲೆ ಅಯಿಂಗ ಶುದ್ದ ಆಯಿತ್ ಚಾಯಾಚಿ. 15ಅಯಿಂಗಡ ಕೂಟ್‌ಲ್ ಒಬ್ಬ ಅಂವೊ ವಾಸಿ ಆನಾನ ಕಂಡಿತ್ ಯೇಸುರ ಪಕ್ಕ ಓಡಿ ಬಂದಿತ್, ಕೂತ್ ಕೊಡ್‌ತಂಡ್ ಯೇಸುನ ತುದಿಚತ್. 16ಪಿಂಞ ಯೇಸುರ ಕಾಲ್‌ಕ್ ಅಡ್ಡ ಬುದ್ದಿತ್ ವಾಸಿ ಆನಗುಂಡ್ ವಂದನೆ ಮಾಡ್‍ಚಿ. ಅಂವೊ ಸಮಾರಿಯ ನಾಡ್‍ಕ್ ಕೂಡ್‍ನಂವೊನಾಯಿತ್ಂಜತ್. 17ಅದ್ಂಗ್ ಯೇಸು, ಪತ್ತ್ ಜನ ವಾಸಿಯಾಯಿತ್ ಶುದ್ದ ಆಚ್ಚಲ್ಲ, ಬಾಕಿ ಒಯಿಂಬದ್ ಜನ ಎಲ್ಲಿ? 18ಪರದೇಶಿಯಾನ ಇಂವೊ ಒಬ್ಬನೇ ದೇವನ ತುದಿಪಕ್ ಬಂತಲ್ಲಾಂದ್ ಎಣ್ಣಿತ್, 19ಪಿಂಞ ಯೇಸು, ನೀನ್ ಎದ್ದಿತ್ ಪೋ, ನೀಡ ನಂಬಿಕೆ ನಿನ್ನ ಶುದ್ದಮಾಡ್‌ಚೀಂದ್ ಅಂವೊಂಗ್ ಎಣ್ಣ್‌ಚಿ.
ದೇವಡ ರಾಜ್ಯ
(ಮತ್ತಾಯ 24.23–28,37–41)
20ಒಮ್ಮ, ಚೆನ್ನ ಫರಿಸಾಯಂಗ ದೇವ ಆಳುವ ಕಾಲ ಎಕ್ಕ ಬಪ್ಪಾಂದ್ ಕ್‍ೕಟತ್?
ಅಯಿಂಗಕ್ ಅಂವೊ: ದೇವಡ ರಾಜ್ಯ ಪ್ರತ್ಯಕ್ಷ ಆಯಿತ್ ಬಪ್ಪುಲೆ. 21ದಾರೂ, ನೋಟಿ! ದೇವಡ ರಾಜ್ಯ ಅಲ್ಲಿ ಉಂಡ್ ಇಲ್ಲಿ ಉಂಡ್‍ೕಂದ್ ಎಣ್ಣುಲೆ, ಎನ್ನಂಗೆಣ್ಣ್‌ಚೇಂಗಿ ದೇವಡ ರಾಜ್ಯ ನಿಂಗಡಲ್ಲಿಯೇ ಉಂಡ್‍ೕಂದ್ ಯೇಸು ಎಣ್ಣ್‌ಚಿ.
22ಯೇಸು ಅಂವೊಂಡ ಶಿಷ್ಯಂಗಕ್: ಮನುಷ್ಯಕುಮಾರಂಡ ದಿನತ್‍ನ ನೋಟ್‍ವಕ್ ನಿಂಗ ದುಂಬ ಪಾರಕಾತಂಡಿಪ್ಪ ಸಮಯ ಬಪ್ಪ, ಆಚೇಂಗಿ ನಿಂಗಕ್ ನೋಟ್‍ವಕ್ ಕಯ್ಯುಲೆ. 23ಜನ, ನಿಂಗಕ್ ಮನುಷ್ಯಕುಮಾರ ಅಲ್ಲಿ ಉಂಡ್ ಇಲ್ಲಿ ಉಂಡ್‍ೕಂದ್ ಎಣ್ಣುವಾನ ಕ್‍ೕಟಿತ್, ಅದ್ಂಡ ಬಯ್ಯಕ್ ನೋಟ್‍ವಕ್ ಪೋಕತಿ. 24ಮನುಷ್ಯಕುಮಾರ ಬಪ್ಪಕ ಬಾನತ್‍ಲ್, ಒರ್ ಬರೀಂಜ ಇಂಞೊರ್ ಬರಿಕ್ ಮಿನ್ನುವನೆಕೆ ಪ್ರಕಾಶ ಇಪ್ಪ. 25ಆಚೇಂಗಿ ಅದ್ಂಗಿಂಜ ಮಿಂಞ ಈ ಮನುಷ್ಯಕುಮಾರ ದುಂಬ ಕಷ್ಟಪಟ್ಟಿತ್ ಇಕ್ಕತ್‍ರ ಕಾಲತ್‍ರ ಜನಳಗುಂಡ್ ತ್‍ಕ್ಕಾರ ಆಂಡು. 26ನೋಹಂಡ ದಿವಸತ್‍ಲ್ ಎನ್ನನೆ ಇಂಜತೋ ಅನ್ನನೆ ಮನುಷ್ಯಕುಮಾರ ಬಪ್ಪ ಸಮಯತ್‍ಲು ಇಪ್ಪ. 27ನೋಹಂಡ ಕುಟುಂಬಕಾರ ನೋಹಂಡ ಬಲ್ಯ ಕಪ್ಪಲ್‍ರ ಒಳ್‍ಕ್ ಪೋನ ದಿವಸಕತ್ತನೆ, ಜನ ಉಂಡಂಡ್ ಕುಡಿಚಂಡ್, ಮಂಗಲ ಕಯಿಚಂಡ್, ಮಂಗಲ ಮಾಡಿಕೊಡ್‌ತಂಡ್ ಇಂಜತ್. ಅಕ್ಕ ಜಲಪ್ರಳಯ ಬಂದಿತ್ ಎಲ್ಲಾ ಜನಳ ನಾಶ ಮಾಡ್‍ಚಿ. 28ಅದೇ ತರ, ಲೋಟ ಎಣ್ಣ್‌ವಂವೊ ಬದ್‍ಕ್‍ನ ಕಾಲತ್‍ಲ್ ಸಹ ಜನ ತಿಂದಂಡ್, ಕುಡಿಚಂಡ್, ವ್ಯಾಪಾರ ಮಾಡಿಯಂಡ್, ನಟ್ಟಿಯಂಡ್, ಕಟ್ಟಡ ಕೆಟ್ಟಿಯಂಡಿಂಜತ್. 29ಆಚೇಂಗಿ ಲೋಟ ಸೊದೋಮ್ ಊರ್‌ನ ಬುಟ್ಟಿತ್ ಪೋನ ಅದೇ ದಿವಸತ್‍ಲ್ ಬಾನತ್ಂಜ ತಿತ್ತ್ ಪಿಂಞ ಗಂಧಕ, ಸೊದೋಮ್ ಊರ್‌ರ ಮೇಲೆ ಬುದ್ದಿತ್ ಎಲ್ಲಾರ್‌ನ ಕೊಂದ್‍ರ್‌ತ್. 30ಮನುಷ್ಯಕುಮಾರ ಪ್ರತ್ಯಕ್ಷ ಆಪ ದಿವಸತ್‍ಲ್ ಸಹ ಜನ ಇದೇ ತರತ್‍ಲ್ ಬದ್‍ಕಿಯಂಡಿಪ್ಪ. 31ಮನುಷ್ಯಕುಮಾರ ಬಪ್ಪ ಆ ದಿವಸತ್‍ಲ್ ಮನೆರ ಕೊಡಿಲ್ ಇಪ್ಪ ಒಬ್ಬ ಮನೆರ ಅಡಿಕ್ ಪೋಯಿತ್ ಅಂವೊಂಡ ಸಾಮಾನ್‌ನ ಎಡ್‍ಪಕ್ ಪೋಪಕ್ಕಾಗ. ಅನ್ನನೆ ಬೇಲ್‌ಲ್ ಉಳ್ಳಂವೊ ಬಯ್ಯಕ್ ಬಪ್ಪಕ್ಕಾಗ. 32ಲೋಟಂಡ ಪೊಣ್ಣ್‌ಕ್ ಎಂತಾಚೀಂದ್ ಗೇನ ಮಾಡಿಯೊಳಿ! 33ತಾಂಡ ಜೀವತ್‍ನ ಕಾಪಾಡ್‌ವಕ್ ನೋಟ್‍ವಂವೊ ಅದ್‍ನ ಕಳೆಂದ್‍ರ್‍ವ, ದಾರ್ ತಾಂಡ ಜೀವತ್‍ನ ಇಲ್ಲಿ ಕಳೆಂದ್‍ರ್‍ವ, ಅಂವೊ ಅದ್‍ನ ಕಾಪಾಡ್‌ವ. 34ಮನುಷ್ಯಕುಮಾರ ಬಪ್ಪ ಸಮಯತ್‍ಲ್ ಒರೇ ಮೆತ್ತೆಲ್ ದಂಡ್ ಜನ ವರಿಯಂಡಿಪ್ಪ, ಒಬ್ಬನ ಕೊಂಡ್ ಪೋಯಿರುವ ಇಂಞೊಬ್ಬನ ಬುಟ್ಟ್‌ರ್‌ವ. 35ದಂಡ್ ಪೊಣ್ಣಾಳುವ ಜೋಳತ್‌ನ ಕಲ್ಲ್‌ಲ್ ಕಡ್ಂದಂಡ್ ಇಪ್ಪ. ಒಬ್ಬಳ ಎಡ್‌ತ್‌ರ್‌ವ ಇಂಞೊಬ್ಬಳ ಬುಟ್ಟ್‌ರ್‌ವ. 36-37ಇನ್ನನೆಲ್ಲ ಎಣ್ಣುವಕಾಪಕ,
ಶಿಷ್ಯಂಗ: ಇದೆಲ್ಲ ಎಲ್ಲಿ ಆಪಾಂದ್ ಯೇಸುನ ಕ್‍ೕಟತ್.
ಅದ್ಂಗ್ ಯೇಸು: ಚಾವ್ ಎಲ್ಲಿ ಉಂಡೋ ಅಲ್ಲಿ ಅಡ್‍ಪದ್ದ್ ಪಾರಿತ್ ಕೂಡ್‍ವನೆಕೆ ಇದೆಲ್ಲಾ ಕಡೆ ಕಾಲಕ್ ಗುರ್‌ತಾಯಿತ್‌ಪ್ಪಾಂದ್ ಎಣ್ಣ್‌ಚಿ.#17.36–37 ಚೆನ್ನ ಮೂಲ ಪ್ರತಿಲ್: ದಂಡ್ ಜನ ಬೇಲ್‌ಲ್ ಇಪ್ಪ, ಒಬ್ಬನ ಸ್ವೀಕಾರ ಮಾಡ್‌ವ, ಇಂಞೊಬ್ಬನ ಬುಟ್ಟ್‌ರ್‌ವಾಂದ್ ನಾನ್ ನಿಂಗಕ್ ಎಣ್ಣುವೀಂದ್ ಸಹ ಉಂಡ್.
ప్రస్తుతం ఎంపిక చేయబడింది:
ಲೂಕ 17: ಕೊಡವ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2017, New Life Literature (NLL)
