Yela 35
35
Chae wesoŋa
Kooro Devid yel
1N Naa Korowii, kpɔ nɛra
baa ɛ n dɔma la ɛ he dɔma,
ka yo nɛra baa dɛ yoo mɛ
la.
2Kpɔ he dɔmkwa tɔ mɛ
ɡbemɡbe,
ásɛ dɛ lɛɛ mɛ.
3Kpɔ he lampea ne kpanfɛ,
dɛ́ yo nɛra baa dɛ ti mɛ la.
Baɡɛ nyoa kɛŋɔ, hɛɛ lɛɛ mɛɛ.#Luk 2:11
4Gel sihiih kpo nɛra
baa dɛ nyin mɛ dɛ́ kpo.
Nɛra baa dɛ vɔrɔwe
n vɔrɔwa la,
ɡel ba wili, dɛ́ berɛ kaa.
5Gel ba do kɛŋɔ haahra
peu aa taa dɛɛ kaa a ne
la ken,
Korowii nyundua torome
teŋɛ ba nɛ dɛ́ɛ kaa.
6Gel biro ba tɔ ba ŋwɛnɛ ta
o do vɔle,
Korowii nyundua torome la
teŋɛ ba nɛ.
7N ta ban wobɛlbwa ɛɛ
ba har mɛ bel,
dɛ forɛ bɔluŋ, dɛ́ laɡ mɛ.
8Gel ba ne jara,
dɛ wenaale ba ba nɛ,
dɛ́ ɡel ba ɡbaɡba bel la
laɡ ba,
ba lee bɔluŋ la bini
dɛ́ serewe.
9Ásɛ Korowii nomanta,
n sie lɛ, dɛɛ hɛɡre,
o lɛɛ waa lɛɛ mɛ la wa.
10Mɛɛ le n bambile bini bwaa
dɛ ŋɔ,
“N Naa Korowii, umee do
kɛ hen ɔ?
He lɛ nɛŋɡwɛɡra
dɛɛ le nɛŋkpeɡa nɔn ta,
dɛ lɛ nyaara dɛɛ le nɛra
baa dɛ fiɡ ba nɔn ta.”
11Nɛnchɔɡa teŋe nyosone
dɛɛ dawɛ n nɛ,
waa maa wola a waa jemɛ
laanee baa bɔɔ mɛ.
12Wechɔɡaa ba kpɔ dɛɛ bɔ mɛ
wedɛɛɡa kem,
a ɡel n sie aa lɛ,
n bambile chɔɡ.
13Ba bwara fa aa dɛ wee ba la,
lweyalee n kpɔ tɔ,
n vɔwɛ nyoa, n ta kwaa dii.
N ba harɛ, dɛ soŋe Korowii
tɛɛ ba kɛrɛdɛ,
14ɡɛ n fe aa soŋe tɛ
n dam kɛɛ n nime.
N bambile chɔɡɔ mɛɛ wi,
kɛŋɔ maa dɛ wi
n nya seo waa ken.
15Kɛ wenaale aa puu mɛ la,
ba sie lɛo,
dɛ ba bar mɛ cheme,
dɛɛ di n loro.
Ba teŋɔ do mɛ
hɔhɔrɔwa kohona,
baa wola n nɛɛ sune.
16Ba do kɛ nɛra
baa wola Korowii tomɛ,
dɛ cheme dɛɛ mam mɛ,
dɛɛ nyiŋ mɛ sichɔɡa ne.
17N Naa Korowii,
saŋ besoo hɛɛ ba ɡɛ waa nɔ
nyiŋa ka tel ɔ?
Lɛɛ mɛ le yoi
baa dɛ yoo mɛ nɔ ta,
lɛɛ mɛ le n dɔma
baa do kɛ
nyujentena nɔ nɔn ta.
18Ásɛ n kpɔ jam tɛɛ
he nɛndamanta
baa chema bini,
nɛnlaa baahnee
mɛɛ ba he kpɛɛra.
19Bɛ ɡel nɛra baa hah mɛ
pɛɛpɛɛ la di n loro,
bɛ ɡel ba sie lɛ,
n suna maa dɛ di nɔ ta.#Jɔn 15:25
20Baa waa aa ba
deŋnesɔɔhna ne bol,
nyosonee ba teŋe
dɛɛ dawɛ,
nɛra baa wola
ba bwara ne waa nyin nɛ.
21Ba dɛ pwaah mɛ ŋɔ,
“Ya na waa bwa haa ɛa.”
22N Naa Korowii,
he na ɡɛ waa nɔ,
bɛ nyoa tɔ.
Bɛ bojaŋ kaa ɡel mɛ.
23Korowii maa dɛ tomɛ,
ir nyu ne, dɛ́ yo tɛ mɛ.
24N Naa Korowii,
che toɡra he wa
aa toɡra ta,
dɛ́ pa mɛ boldɛɛɡe,
bɛ ɡel n dɔma mam mɛ.
25Bɛ ɡel ba lii ŋɔ,
“Ya dɔɔ ɡɛ yaa dɛ nyin
name!”
Kɛɛ dɛ ŋɔ, “Ya dɔɔ kɛrɛdɛ.”
26N Naa Korowii, ɡel sihiih
kpo nɛra baa dɛ mam mɛ
kohona,
ásɛ dɛ wili,
n wahala maa dɛ na wa.
Gel sihiih kpo nɛra baa dɛ lii
kɛ ba ɡwaa mɛ kohona.
27N Naa Korowii,
ɡel banɔ la baa dɛ nyin
n di boldɛɛɡe,
ɛɛ do lɔŋɔre silɛɛ ne.
Ásɛ baa bol ŋɔ,
“Korowii kan ɡa,
o sie lɛ o bonɔɔ wer
waa doa ta.”
28Belaa mɛɛ ba toɡra
he wa aa toɡra la waa bola,
dɛ́ kpɛɛre tɔpebir bwa.
ప్రస్తుతం ఎంపిక చేయబడింది:
Yela 35: mzw
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.