ꠔꠃꠞꠣꠔ ১: ꠙꠄꠖꠣ ꠘꠣꠝꠣ 9
9
ꠢꠎꠞꠔ ꠘꠥꠢ (ꠀ꠩) ꠅꠞ ꠟꠉꠦ ꠅꠀꠖꠣ
1ꠀꠟ꠆ꠟꠣꠄ ꠘꠥꠢ ꠀꠞ ꠔꠣꠘ ꠙꠥꠀꠂꠘ꠆ꠔꠞꠦ ꠛꠞꠇꠔ ꠖꠤꠀ ꠇꠁꠟꠣ, “ꠔꠥꠝꠤꠔꠣꠁꠘ ꠚꠟꠀꠟꠣ ꠅꠁꠀ ꠛꠣꠠꠤꠀ ꠖꠥꠘꠤꠀꠁ ꠜꠞꠤ ꠎꠣꠅ। 2ꠖꠥꠘꠤꠀꠁꠞ ꠎꠣꠘꠥꠀꠞ, ꠀꠍꠝꠣꠘꠞ ꠙꠣꠈꠤ, ꠝꠣꠐꠤꠞ ꠝꠣꠎꠦ ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠀꠞ ꠖꠞꠤꠀꠞ ꠝꠣꠍ, ꠢꠇꠟꠦꠃ ꠔꠥꠝꠞꠣꠞꠦ ꠒꠞ-ꠜꠄ ꠇꠞꠤ ꠌꠟꠛ। ꠁꠔꠣꠞꠦ ꠔꠥꠝꠞꠣꠞ ꠀꠔꠅ ꠖꠦꠅꠀ ꠅꠁꠟ। 3ꠎꠦꠟꠣ ꠔꠥꠝꠞꠣꠞꠦ ꠈꠦꠔꠞ ꠚꠟ-ꠚꠡꠟ ꠀꠞ ꠔꠞꠤ-ꠔꠞꠇꠣꠞꠤ ꠖꠤꠍꠟꠣꠝ, ꠅꠃꠟꠣ ꠅꠈꠘ ꠎꠤꠔꠣ ꠎꠣꠘꠖꠣꠞ ꠢꠇꠟꠞꠦꠅ ꠔꠥꠝꠞꠣꠞ ꠈꠣꠘꠤꠞ ꠟꠣꠉꠤ ꠖꠤꠟꠣꠝ। 4ꠈꠣꠟꠤ ꠟꠃ ꠡꠢ ꠉꠥꠡ꠆ꠔ ꠔꠥꠝꠞꠣ ꠈꠣꠁꠅ ꠘꠣ, ꠟꠃ ꠅꠁꠟꠉꠤ ꠎꠣꠘ। 5ꠇꠦꠃ ꠎꠥꠖꠤ ꠝꠣꠘꠡꠞꠦ ꠈꠥꠘ ꠇꠞꠦ ꠔꠦ ꠀꠝꠤ ꠅꠛꠡ꠆ꠡꠃ ꠔꠣꠞ ꠈꠥꠘꠞ ꠛꠖꠟꠣ ꠟꠁꠝꠥ। ꠢꠦ ꠎꠣꠘꠥꠀꠞ ꠅꠃꠇ ꠛꠣ ꠝꠣꠘꠥꠡ ꠅꠃꠇ, ꠝꠣꠘꠡꠞ ꠎꠣꠘ ꠎꠦ ꠘꠦꠄ, ꠔꠣꠞ ꠎꠣꠘꠅ ꠖꠦꠅꠘ ꠟꠣꠉꠛ। 6ꠝꠣꠘꠡꠞ ꠟꠃ ꠎꠦ ꠛꠣꠞ ꠇꠞꠦ, ꠝꠣꠘꠡꠦꠅ ꠔꠣꠞ ꠟꠃ ꠛꠣꠞ ꠇꠞꠛ, ꠇꠣꠞꠘ ꠀꠟ꠆ꠟꠣꠄ ꠝꠣꠘꠡꠞꠦ ꠘꠤꠎꠞ ꠍꠥꠞꠔꠦ ꠛꠣꠘꠣꠁꠍꠂꠘ। 7ꠔꠥꠝꠤꠔꠣꠁꠘ ꠛꠦꠡ ꠇꠞꠤ ꠚꠟꠀꠟꠣ ꠅꠁꠀ ꠛꠣꠠꠅ ꠀꠞ ꠖꠥꠘꠤꠀꠁꠔ ꠍꠤꠔ꠆ꠞꠤꠀ ꠎꠣꠅ।”
8ꠛꠣꠖꠦ ꠀꠟ꠆ꠟꠣꠄ ꠘꠥꠢ ꠀꠞ ꠔꠣꠘ ꠙꠥꠀꠂꠘ꠆ꠔꠞꠦ ꠇꠁꠟꠣ, 9“ꠢꠥꠘꠅ, ꠀꠝꠤ ꠎꠛꠣꠘ ꠖꠤꠀꠞ, ꠔꠥꠝꠞꠣ ꠀꠞ ꠔꠥꠝꠞꠣꠞ ꠛꠣꠖꠞ ꠢꠇꠟ ꠝꠣꠘꠡꠞꠦ, 10ꠀꠞ ꠙꠣꠈꠤ, ꠙꠣꠟꠣ ꠢꠦꠝꠣꠘ ꠀꠞ ꠖꠥꠘꠤꠀꠁꠞ ꠎꠔ ꠎꠣꠘꠥꠀꠞ ꠔꠥꠝꠞꠣꠞ ꠟꠉꠦ ꠎꠣꠎ ꠕꠣꠇꠤ ꠛꠣꠞ ꠅꠁꠍꠦ, ꠔꠣꠞꠣꠞꠦꠅ। 11ꠎꠛꠣꠘꠐꠣ ꠅꠁꠟ, ꠛꠣꠘꠞ ꠙꠣꠘꠤ ꠖꠤꠀ ꠀꠞ ꠇꠥꠘꠥ ꠡꠝꠄꠃ ꠢꠇ꠆ꠇꠟ ꠎꠣꠘꠖꠣꠞꠞꠦ ꠝꠣꠞꠣ ꠅꠁꠔ ꠘꠣꠄ, ꠀꠞ ꠔꠣꠝꠣꠝ ꠖꠥꠘꠤꠀꠁ ꠍꠣꠚ ꠇꠞꠣꠞ ꠟꠣꠉꠤ ꠁꠟꠣ ꠇꠥꠘꠥ ꠛꠣꠘꠅ ꠅꠁꠔ ꠘꠣꠄ।” 12ꠀꠟ꠆ꠟꠣꠄ ꠀꠞꠅ ꠇꠁꠟꠣ, “ꠎꠦ ꠎꠛꠣꠘ ꠀꠝꠤ ꠔꠥꠝꠞꠣꠞꠦ ꠀꠞ ꠔꠥꠝꠞꠣꠞ ꠟꠉꠞ ꠎꠣꠘꠖꠣꠞ ꠅꠇꠟꠞꠦ ꠖꠤꠟꠣꠝ, ꠁꠇꠐꠣ ꠇꠤꠀꠝꠔ ꠙꠞ꠆ꠎꠘ꠆ꠔ ꠛꠅꠀꠁꠟ ꠞꠁꠛ। 13ꠀꠞ ꠝꠦꠊꠞ ꠇꠣꠟꠘꠤꠞ ꠝꠣꠎꠦ ꠀꠝꠣꠞ ꠞꠋꠗꠦꠘꠥ ꠖꠤꠟꠣꠝ, ꠁꠇꠐꠣ ꠅꠁꠟ ꠖꠥꠘꠤꠀꠁꠔ ꠀꠝꠣꠞ ꠎꠛꠣꠘꠞ ꠘꠤꠡꠣꠘꠣ। 14ꠎꠦꠛꠟꠣ ꠀꠝꠤ ꠖꠥꠘꠤꠀꠁꠞ ꠃꠙꠞꠦ ꠇꠣꠟꠘꠤ ꠖꠤꠝꠥ, ꠁ ꠡꠝꠄ ꠅꠃ ꠞꠋꠗꠦꠘꠥ ꠖꠦꠈꠛꠣꠄ। 15ꠀꠞ ꠅꠃ ꠡꠝꠄꠃ ꠀꠝꠤ ꠔꠥꠝꠞꠣꠞ ꠀꠞ ꠢꠇꠟ ꠎꠣꠘꠖꠣꠞꠞ ꠟꠉꠦ ꠀꠝꠣꠞ ꠎꠛꠣꠘꠞ ꠇꠕꠣ ꠁꠀꠖ ꠇꠞꠝꠥ। ꠀꠞ ꠇꠥꠘꠥ ꠡꠝꠄꠃ ꠛꠁꠘ꠆ꠘꠣ ꠅꠁꠀ ꠢꠇꠟ ꠎꠣꠘꠖꠣꠞꠞꠦ ꠙꠣꠘꠤ ꠖꠤꠀ ꠗꠁꠀ ꠘꠤꠔ ꠘꠣꠄ। 16ꠇꠣꠟꠘꠤꠞ ꠝꠣꠎꠦ ꠎꠦꠛꠟꠣ ꠢꠤ ꠞꠋꠗꠦꠘꠥ ꠖꠦꠈꠣ ꠎꠣꠁꠛ ꠅꠃ ꠡꠝꠄ ꠀꠝꠤ ꠖꠥꠘꠤꠀꠁꠞ ꠢꠇꠟ ꠎꠣꠘꠖꠣꠞꠞ ꠟꠉꠦ ꠀꠝꠣꠞ ꠁ ꠢꠣꠝꠦꠡꠣꠇꠥꠞ ꠎꠛꠣꠘꠞ ꠇꠕꠣ ꠁꠀꠖ ꠇꠞꠝꠥ।” 17ꠢꠦꠡꠦ ꠀꠟ꠆ꠟꠣꠄ ꠘꠥꠢꠞꠦ ꠇꠁꠟꠣ, “ꠖꠥꠘꠤꠀꠁꠞ ꠢꠇꠟ ꠎꠣꠘꠖꠣꠞꠞ ꠟꠉꠦ ꠀꠝꠤ ꠎꠦ ꠎꠛꠣꠘ ꠖꠤꠍꠤ, ꠁꠇꠐꠣ ꠅꠁꠟ ꠔꠣꠞ ꠘꠤꠡꠣꠘꠣ।”
ꠢꠎꠞꠔ ꠘꠥꠢ (ꠀ꠩) ꠀꠞ ꠔꠣꠘ ꠙꠥꠀꠂꠘ
18ꠎꠣꠎ ꠕꠘꠦ ꠘꠥꠢꠞ ꠎꠦ ꠙꠥꠀꠂꠘ ꠛꠣꠞ ꠅꠁꠍꠟꠣ, ꠔꠣꠞꠣꠞ ꠘꠣꠝ ꠅꠁꠟ ꠡꠣꠝ, ꠢꠣꠝ ꠀꠞ ꠁꠀꠚꠦꠔ। ꠅꠃ ꠢꠣꠝ ꠅꠁꠟ ꠇꠦꠘꠣꠘꠞ ꠛꠣꠚ। 19ꠘꠥꠢꠞ ꠅꠃ ꠔꠤꠘꠅ ꠙꠥꠀꠞ ꠈꠣꠘ꠆ꠖꠣꠘ ꠅꠇꠟ ꠢꠣꠞꠣ ꠖꠥꠘꠤꠀꠁꠔ ꠍꠤꠔ꠆ꠞꠤ ꠉꠦꠟꠣ।
20ꠘꠥꠢꠦ ꠈꠦꠔ-ꠈꠣꠝꠣꠞ ꠡꠥꠞꠥ ꠇꠞꠤꠀ ꠄꠇ ꠀꠋꠉꠥꠞ-ꠈꠦꠔ ꠇꠞꠟꠣ। 21ꠀꠞ ꠀꠋꠉꠥꠞꠞ ꠡꠞꠣꠛ ꠈꠣꠁꠀ ꠐꠣꠟ ꠅꠁꠀ ꠔꠣꠝ꠆ꠛꠥꠞ ꠜꠤꠔꠞꠦ ꠃꠖꠣꠝ ꠅꠁꠀ ꠙꠠꠤ ꠞꠁꠟꠣ। 22ꠇꠦꠘꠣꠘꠞ ꠛꠣꠚ ꠢꠣꠝꠦ ꠀꠁꠀ ꠔꠣꠞ ꠛꠣꠚꠞ ꠅꠃ ꠢꠣꠟ ꠖꠦꠈꠤꠀ ꠛꠣꠞꠦ ꠉꠤꠀ ꠔꠣꠞ ꠖꠥꠁꠅ ꠜꠣꠁꠞ ꠉꠦꠍꠦ ꠇꠁꠟ। 23ꠅꠁꠟꠦ ꠡꠣꠝ ꠀꠞ ꠁꠀꠚꠦꠔꠦ ꠇꠣꠘ꠆ꠖꠅ ꠇꠞꠤ ꠄꠇꠈꠣꠘ ꠇꠣꠙꠠ ꠟꠁꠀ ꠙꠤꠍꠦ ꠀꠐꠤꠀ ꠛꠣꠚꠞꠦ ꠅꠃ ꠇꠣꠙꠠꠖꠤ ꠉꠥꠞꠤꠀ ꠖꠤꠟꠣ, ꠔꠣꠞꠣꠞ ꠌꠃꠈ ꠃꠟꠐꠣꠛꠣꠄ ꠕꠣꠇꠣꠄ ꠛꠣꠚꠞꠦ ꠛꠦ-ꠀꠛꠞꠥ ꠢꠣꠟꠔꠦ ꠖꠦꠈꠟꠣ ꠘꠣ। 24ꠘꠤꠡꠣ ꠇꠝꠤ ꠎꠣꠅꠀꠞ ꠛꠣꠖꠦ ꠘꠥꠢꠦ ꠔꠣꠘ ꠙꠥꠀꠞ ꠇꠣꠘ꠆ꠒ ꠢꠥꠘꠤꠀ 25ꠇꠁꠟꠣ, “ꠇꠦꠘꠣꠘꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ, ꠢꠦ ꠔꠣꠞ ꠜꠣꠁꠀꠁꠘ꠆ꠔꠞ ꠉꠦꠍꠦ ꠉꠥꠟꠣꠝꠞ ꠉꠥꠟꠣꠝ ꠅꠁꠛ।” 26ꠔꠣꠁꠘ ꠀꠞꠅ ꠇꠁꠟꠣ, “ꠢꠇꠟ ꠔꠣꠞꠤꠚ ꠡꠣꠝꠞ ꠝꠣꠛꠥꠖ ꠀꠟ꠆ꠟꠣꠞ, ꠇꠦꠘꠣꠘ ꠡꠣꠝꠞ ꠉꠥꠟꠣꠝ ꠅꠃꠇ। 27ꠀꠟ꠆ꠟꠣꠄ ꠁꠀꠚꠦꠔꠞꠦ ꠛꠃꠔꠔꠣ ꠖꠦꠃꠇ꠆ꠇꠣ, ꠢꠦ ꠡꠣꠝꠞ ꠔꠣꠝ꠆ꠛꠥꠔ ꠕꠣꠇꠃꠇ, ꠀꠞ ꠇꠦꠘꠣꠘ ꠔꠣꠞ ꠉꠥꠟꠣꠝ ꠅꠃꠇ।”
28ꠛꠣꠘꠞ ꠛꠣꠖꠦ ꠘꠥꠢ ꠀꠞꠅ ꠡꠣꠠꠦ ꠔꠤꠘ-ꠡ ꠛꠞꠍ ꠛꠣꠌꠟꠣ। 29ꠝꠥꠐ ꠡꠣꠠꠦ ꠘꠄ-ꠡ ꠛꠞꠍ ꠛꠄꠅꠡꠅ ꠔꠣꠁꠘ ꠝꠣꠞꠣ ꠉꠦꠟꠣ।
ప్రస్తుతం ఎంపిక చేయబడింది:
ꠔꠃꠞꠣꠔ ১: ꠙꠄꠖꠣ ꠘꠣꠝꠣ 9: sylN
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Ahle Kitab Society. All rights reserved.
