ꠔꠃꠞꠣꠔ ১: ꠙꠄꠖꠣ ꠘꠣꠝꠣ 13
13
ꠢꠎꠞꠔ ꠁꠛ꠆ꠞꠣꠢꠤꠝ ꠀꠞ ꠢꠎꠞꠔ ꠟꠥꠔ (ꠀ꠩)
1ꠔꠦꠃ ꠀꠛ꠆ꠞꠣꠝ ꠀꠞ ꠔꠣꠘ ꠛꠤꠛꠤꠄ ꠢꠇꠟꠔꠣ ꠟꠁꠀ ꠝꠤꠡꠞ ꠖꠦꠡ ꠚꠣꠟꠣꠁꠀ ꠘꠦꠉꠦꠜ ꠝꠞꠥꠜꠥꠝꠤꠔ ꠉꠦꠟꠣꠉꠤ, ꠟꠥꠔꠅ ꠔꠣꠘ ꠟꠉꠦ ꠀꠍꠟꠣ।
2ꠀꠛ꠆ꠞꠣꠝ ꠈꠥꠛ ꠗꠘꠤ ꠀꠍꠟꠣ, ꠔꠣꠘ ꠛꠃꠔ ꠢꠦꠝꠣꠘ-ꠎꠣꠘꠥꠀꠞ ꠀꠞ ꠡꠥꠘꠣ-ꠞꠥꠙꠣ ꠀꠍꠤꠟ। 3ꠛꠣꠖꠦ ꠔꠣꠁꠘ ꠘꠦꠉꠦꠜ ꠕꠣꠇꠤ ꠢꠞꠔꠦ ꠢꠞꠔꠦ ꠛꠦꠕꠦꠟ ꠙꠞ꠆ꠎꠘ꠆ꠔ ꠉꠦꠟꠣ। ꠉꠤꠀ ꠔꠣꠁꠘ ꠛꠦꠕꠦꠟ ꠀꠞ ꠅꠄ ꠐꠣꠃꠘꠞ ꠝꠣꠎꠈꠣꠘꠅ ꠙꠃꠍꠟꠣ, ꠎꠦ ꠎꠣꠉꠣꠔ ꠔꠣꠁꠘ ꠀꠉꠦ ꠔꠣꠝ꠆ꠛꠥ ꠉꠣꠠꠤꠍꠟꠣ 4ꠀꠞ ꠙꠄꠟꠣ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠍꠟꠣ। ꠅꠘꠅ ꠉꠤꠀ ꠔꠣꠁꠘ ꠢꠤꠞꠛꠣꠞ ꠝꠣꠛꠥꠖꠞ ꠘꠣꠝ ꠟꠁꠟꠣ। 5ꠀꠛ꠆ꠞꠣꠝꠞ ꠟꠉꠦ ꠝꠥꠍꠣꠚꠤꠞ ꠀꠍꠟꠣ ꠔꠣꠘ ꠜꠣꠔꠤꠎꠣ ꠟꠥꠔ, ꠄꠘꠅ ꠛꠃꠔ ꠉꠞꠥ-ꠍꠣꠉꠟ ꠀꠞ ꠔꠣꠝ꠆ꠛꠥ ꠀꠍꠤꠟ। 6ꠅꠁꠟꠦ ꠎꠣꠉꠣꠐꠣ ꠁꠟꠣ ꠀꠍꠤꠟ ꠘꠣ ꠎꠦꠘ, ꠖꠥꠁꠅꠎꠘꠞ ꠙꠡꠥꠞ ꠙꠣꠟꠦ ꠄꠇꠟꠉꠦ ꠈꠣꠁꠔꠣ ꠙꠣꠞꠛꠣ। ꠉꠞꠥ-ꠍꠣꠉꠟ ꠀꠞ ꠔꠣꠝ꠆ꠛꠥ ꠅꠔ ꠛꠦꠡꠤ ꠀꠍꠤꠟ ꠎꠦꠘ, ꠁꠔꠣ ꠟꠁꠀ ꠔꠣꠞꠣꠞ ꠕꠣꠇꠣꠞ ꠃꠙꠣꠄ ꠀꠍꠤꠟ ꠘꠣ। 7ꠄꠞꠟꠣꠉꠤ ꠀꠛ꠆ꠞꠣꠝ ꠀꠞ ꠟꠥꠔꠞ ꠞꠣꠈꠣꠟ ꠅꠇꠟꠦ ꠢꠣꠝꠦꠡꠣ ꠖꠞꠛꠣꠞ-ꠇꠣꠁꠎ꠆ꠎꠣ ꠇꠞꠔꠣ। ꠀꠞ ꠢꠤ ꠡꠝꠄ ꠇꠦꠘꠣꠘꠤ ꠀꠞ ꠚꠣꠞꠤꠎꠤ ꠅꠇꠟꠅ ꠢꠤ ꠖꠦꠡꠅ ꠛꠡꠔ ꠇꠞꠔ।
8ꠔꠦꠃ ꠀꠛ꠆ꠞꠣꠝꠦ ꠟꠥꠔꠞꠦ ꠇꠁꠟꠣ, “ꠢꠥꠘꠅ, ꠀꠝꠞꠣ ꠔ ꠖꠥꠁꠅꠎꠘꠃ ꠀꠙꠘ। ꠔꠦ ꠔꠥꠝꠣꠞ-ꠀꠝꠣꠞ ꠝꠣꠎꠦ ꠀꠞ ꠔꠥꠝꠣꠞ-ꠀꠝꠣꠞ ꠞꠣꠈꠣꠟꠞ ꠝꠣꠎꠦꠅ ꠖꠞꠛꠣꠞ-ꠇꠣꠁꠎ꠆ꠎꠣ ꠇꠞꠣ ꠑꠤꠇ ꠘꠣꠄ। 9ꠢꠣꠞꠣ ꠖꠦꠡꠐꠣꠃ ꠔꠥꠝꠣꠞ ꠍꠣꠝꠘꠦ ꠙꠠꠤ ꠞꠁꠍꠦ। ꠔꠦ ꠀꠅ, ꠀꠝꠞꠣ ꠀꠟꠉꠣ ꠅꠁꠎꠣꠁ। ꠔꠥꠝꠤ ꠛꠣꠃꠄ ꠙꠍꠘ꠆ꠖ ꠇꠞꠟꠦ, ꠀꠝꠤ ꠒꠣꠁꠘꠦ, ꠀꠞ ꠔꠥꠝꠤ ꠒꠣꠁꠘꠦ ꠉꠦꠟꠦ, ꠀꠝꠤ ꠛꠣꠃꠄ ꠎꠣꠁꠝꠥ।” 10ꠟꠥꠔꠦ ꠌꠣꠁꠀ ꠖꠦꠈꠟꠣ, ꠎꠞ꠆ꠖꠣꠘ ꠉꠣꠋꠉꠞ ꠕꠟ ꠎꠣꠉꠣꠞ ꠢꠇꠟꠛꠣꠄ ꠍꠥꠀꠞ ꠉꠣꠃ ꠙꠞ꠆ꠎꠘ꠆ꠔ ꠛꠃꠔ ꠙꠣꠘꠤ ꠀꠍꠦ, ꠝꠣꠛꠥꠖꠞ ꠛꠣꠉꠤꠌꠣ ꠛꠣ ꠝꠤꠡꠞ ꠖꠦꠡꠞ ꠟꠣꠈꠣꠘ ꠁ ꠎꠣꠉꠣꠅ ꠊꠣꠡ-ꠙꠣꠘꠤ ꠀꠟꠣ। ꠅꠃ ꠡꠝꠄꠅ ꠝꠣꠛꠥꠖꠦ ꠍꠣꠖꠥꠝ ꠀꠞ ꠀꠝꠥꠞꠣ ꠐꠣꠃꠘ ꠛꠤꠘꠣꠡ ꠇꠞꠍꠂꠘ ꠘꠣ। 11ꠄꠞꠟꠣꠉꠤ ꠟꠥꠔꠦ ꠎꠞ꠆ꠖꠣꠘ ꠉꠣꠋꠉꠞ ꠢꠇꠟ ꠕꠟ ꠎꠣꠉꠣ ꠘꠤꠎꠞ ꠟꠣꠉꠤ ꠛꠣꠍꠤꠀ ꠙꠥꠛꠦꠖꠤ ꠢꠞꠤꠀ ꠉꠦꠟꠣꠉꠤ। ꠅꠃꠟꠣ ꠔꠣꠞꠣ ꠀꠟꠉꠣ ꠅꠁꠉꠦꠟꠣ। 12ꠀꠛ꠆ꠞꠣꠝ ꠇꠦꠘꠣꠘ ꠖꠦꠡꠅ ꠞꠁꠟꠣ, ꠀꠞ ꠟꠥꠔ ꠢꠃ ꠕꠟ ꠎꠝꠤꠘꠞ ꠐꠣꠃꠘ ꠅꠇꠟꠞ ꠇꠣꠍꠣꠔ ꠉꠤꠀ ꠛꠡꠔ ꠇꠞꠟꠣ। ꠔꠣꠁꠘ ꠍꠣꠖꠥꠝ ꠐꠣꠃꠘꠞ ꠇꠤꠘꠣꠞꠅ ꠔꠣꠝ꠆ꠛꠥ ꠉꠣꠠꠤꠟ꠆ꠟꠣ। 13ꠍꠣꠖꠥꠝꠞ ꠝꠣꠘꠥꠡ ꠅꠇꠟ ꠈꠥꠛ ꠈꠛꠤꠍ ꠀꠍꠤꠟ, ꠝꠣꠛꠥꠖꠞ ꠘꠎꠞꠅ ꠔꠣꠞꠣ ꠛꠦꠕꠣꠄꠀ ꠉꠥꠘꠣꠉꠣꠞ।
14ꠟꠥꠔ ꠀꠟꠉꠣ ꠅꠀꠞ ꠛꠣꠖꠦ ꠝꠣꠛꠥꠖꠦ ꠀꠛ꠆ꠞꠣꠝꠞꠦ ꠇꠁꠟꠣ, “ꠔꠥꠝꠤ ꠎꠦ ꠎꠣꠉꠣꠔ ꠃꠛꠣꠁꠍ, ꠁꠈꠣꠘ ꠕꠣꠇꠤ ꠃꠔꠞꠦ-ꠖꠃꠇꠘꠦ, ꠙꠥꠛꠦ-ꠙꠁꠌꠝꠦ ꠄꠇꠛꠣꠞ ꠌꠣꠁꠀ ꠖꠦꠈꠅ। 15ꠎꠦ ꠎꠣꠉꠣ ꠅꠇꠟ ꠔꠥꠝꠤ ꠖꠦꠈꠞꠣꠄ, ꠁꠔꠣ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠢꠣꠝꠦꠡꠣꠇꠥꠞ ꠟꠣꠉꠤ ꠖꠤꠟꠣꠁꠝꠥ। 16ꠀꠝꠤ ꠔꠥꠝꠣꠞ ꠅꠀꠞꠤꠡꠞꠦ ꠖꠥꠘꠤꠀꠁꠞ ꠗꠥꠁꠟ-ꠛꠣꠟꠥꠞ ꠟꠣꠈꠣꠘ ꠛꠦꠢꠤꠡꠣꠛ ꠇꠞꠝꠥ। ꠖꠥꠘꠤꠀꠞ ꠗꠥꠁꠟ-ꠛꠣꠟꠥ ꠎꠥꠖꠤ ꠇꠦꠃ ꠉꠘꠤꠀ ꠚꠥꠠꠣꠁꠔ ꠙꠣꠞꠦ, ꠔꠦ ꠔꠥꠝꠣꠞ ꠅꠀꠞꠤꠡꠞꠦꠅ ꠉꠘꠔ ꠙꠣꠞꠛ। 17ꠃꠑꠅ, ꠀꠡ꠆ꠔꠣ ꠖꠦꠡꠐꠣ ꠔꠥꠝꠤ ꠄꠇꠛꠣꠞ ꠊꠥꠞꠤꠀ ꠀꠅ, ꠅꠃ ꠖꠦꠡꠃ ꠀꠝꠤ ꠔꠥꠝꠣꠞꠦ ꠖꠤꠝꠥ।” 18ꠔꠦꠃ ꠀꠛ꠆ꠞꠣꠝꠦ ꠔꠣꠘ ꠔꠣꠝ꠆ꠛꠥ ꠔꠥꠟꠤꠀ, ꠢꠦꠛꠞꠘ ꠄꠟꠣꠇꠣꠔ ꠝꠝ꠆ꠞꠤꠞ ꠄꠟꠘ ꠛꠘꠞ ꠇꠣꠘ꠆ꠖꠣꠔ ꠘꠤꠀ ꠉꠣꠠꠤꠟꠣ। ꠢꠈꠣꠘꠅ ꠔꠣꠁꠘ ꠝꠣꠛꠥꠖꠞ ꠟꠣꠉꠤ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠟꠣ।
ప్రస్తుతం ఎంపిక చేయబడింది:
ꠔꠃꠞꠣꠔ ১: ꠙꠄꠖꠣ ꠘꠣꠝꠣ 13: sylN
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Ahle Kitab Society. All rights reserved.
