Genesis 12
12
Iqmoeq 12
Aqbhaqlaq bhai khul-a nail ganl
1Heeqphaq Miqyail neq, Aqbhaqlaq bhai ge bhiq-a nail: "Naoq nail milkhaoq, naoq nail jeq-e jaq-a dai khi naoq nail aqbhu nail ilkhaol bhai khaonq ha-ail ceevq khi, ngaq-i mail tsiq tsoe nail milkhaoq bhai ail yaoq.
2Ngal naoq bhai tsaol jeq-e jeq-e ma bhi pevq lal nail ngaol. Ngal naoq bhai geeqlaoq bivq khi mail, aqmil bhi dov lal nail nee ovqtavq, naol bhaq da nee, yu geeqlaoq ya nail ngaol.
3Naoq bhai geeqlaoq bivq nail gaq bhai, ngal geeqlaoq bivq nail ngaol. Naoq bhai ivqkhail yavq nail gaq bhai, ngal ivqkhail yavq bhiq nail ngaol. Miltsaq kovtavq khe khal jaol nail tsaol jeq-e yaoq jeq-e yaoq-ao nee mail, naol bhaq da nee geeqlaoq ya nail ngaol" dai, ge bhiq-a nail ngaol.
4Aqbhaqlaq gail, Heeqphaq Miqyail-i mail khal ge bhiq-a nail khe-ai, Haqlanq nail meenq nee mail dov ail-u phao, aivq nail aqkovq 75 kovq bhee-aiq nail ngaol. Laoltavq gail, aivq nee mail teevq gaq khe-ai tsao thel leevq-a nail ngaol.
5Aqbhaqlaq neq, aivq nail khaqma Saqlaqiq, aivq nail jaqbheq nail yaqyov Laoltavq dai khi, khal jiav nail ildaoq maoqgaiq iqsanl mail oil-a nail nee ovqtavq, Haqlanq nail meenq khe ya-a nail yaqkav juq iqsanl mail khul khi, Khaqnanq milkhaoq phao ail kev-a nail ngaol.
6Aqbhaqlaq neq, milkhaoq al khaoq nee tsao ceil laivq khi, Seiqkhinq meenq nail aqjail bhai jiav nail Maollav dai khul nail teevq gaq nail aqbhaol bhaol ma teevq bhaol doevq nail bha kev lal-a nail ngaol. Yanq al yanq bhai, Khaqnanq nail tsaol-aq juq neq, a bhai jaol nail ngaol.
7A bhai nee ngal-aq, Heeqphaq Miqyail neq, Aqbhaqlaq bhai bhi moel khi, ge bhiq-a nail: "Niil milkhaoq niil khaoq naoq-ai nee mail yavq kha lee thaq nail juq bhai, ngal bivq naol" dai, ge bhiq-a nail ngaol. Aq-u phao Aqbhaqlaq neq, aivq bhai bhi moel lavq-a nail Heeqphaq Miqyail nail galduq laolduq lav sav-a nail ngaol.
8A bhai nee ngal-aq, Maollav aqbhaol nee mail Bheiqtaqlav meenq nail nlma dov khoeq phao jiav nail gaoqjaoq phao haqphal saiqgov cov phal lai khi mail, jaol-a nail ngaol. Jaolduq al duq nail nlma gaq khoeq phao neq, Bheiqtaqlav nail meenq, nlma dov khoeq phao neq, Aq-il nail meenq jiav nail ngaol. Jaolduq al juq bhai gail, Heeqphaq Miqyail bhai laolduq lav sav khi, aivq nail aqmil bhai khul-a nail ngaol.
9A bhai nee mail, gaoq jaol khal leevq khi, Nilgeiq miltsaq bhai jaol kel leevq-a nail ngaol.
Iljiltuv nail milkhaoq bha Aqbhaqlaq kev ail-a nail ganl
10Khaqnanq milkhaoq bhai moevq nail sivq nail kev lee bhiq khi mail, al jaiq-ail doil nail bhaq da nee, Aqbhaqlaq neq, Iljiltuv nail milkhaoq bhai daq-i jiov-ail nail dai khi, ail kha-a nail ngaol.
11Aivq neq, Iljiltuv nail milkhaoq bhai aol-ail nail milkhaiq jel lee nail aqjail jail lal-u phao, aivq nail khaqma Saqlaqiq bhai ge bhiq-a nail: "Naol neq, al jaiq-ail hel daiq meeq nail yaqmai-aq teevq gaq ngaol.
12Iljiltuv nail tsaol-aq juq naoq bhai moel-u phao, 'Aivq neq, Aqbhaqlaq nail khaqma ngaol. Ngadao aivq bhai heivq khi yaqmai-aq thoil gaq ya nail ngaol' dai, ge lal nail ngaol.
13Al heel ngel-i mail, aqyu juq nal daiq lal-u phao, ngaq nail jaqbheq dai, ge bhiq yaoq. Thail hai ge bhiq haq neq, ngaq bhai maq deeq heivq lavq nail nee ovqtavq, naol bhaq da nee, ngaq bhai aqmeeq dai hav lavq nail ngaol" dai, ge bhiq thaq gai-a nail ngaol.
14Aqbhaqlaq Iljiltuv milkhaoq bhai aol lai-u phao, Iljiltuv nail tsaol-aq juq neq, aivq nail khaqma aqmeeq meeq nail bhai hel daiq moel-a nail ngaol.
15Heeqphaq Phaqlaol nail haol khe hel daiq phail nail aqivq aqtsu teevq pav gav nav juq gail moel khi, Saqlaqiq hel daiq meeq dee dee nail bhai Phaqlaol jaol nail bha ge bhiq lai-a nail ngaol. Al heel ngel-i mail, Saqlaqiq bhai Phaqlaol nail haol bha bhi jaol nail dai khi, khul laivq-a nail ngaol.
16Saqlaqiq bhaq da nee Phaqlaol neq, Aqbhaqlaq bhai aqmeeq dai, hav lavq bhiq nail nee ovqtavq, yaol maqkhaiq, civqmeiv maqkhaiq, niaoqnel maqkhaiq, moeqphaq laljieiv maqkhaiq, yaqkav juq dai khi laolthao juq bivq-a nail ngaol.
17Thail hai ngaol-aoq, Heeqphaq Miqyail neq, Aqbhaqlaq nail khaqma Saqlaqiq bhaq da nee, Iljiltuv nail heeqphaq dai khi, aivq nail haol khe jaol nail juq bhai, aqjao jao ma nal nail nalgoel bhi nal lal-a nail ngaol.
18Aq-u phao, Phaqlaol neq, Aqbhaqlaq bhai khul khi, ge bhiq-a nail: "Naol ngaq bhai khal hai nl lavq-a nail-aiq. Saqlaqiq neq, naoq nail khaqma pevq nail dai, ngaq bhai khul khi mail maq ge lavq-a nail-aiq.
19Aivq bhai ngaq nail khaqma bhi pevq lal dai, aivq neq, naoq nail jaqbheq ngaol dai, khul khi mail ge lavq-a nail-aiq. Niil aq-il nee mail, naoq nail khaqma bhai khul khi mail, dov-ail yaoq" dai, daoq bivq-a nail ngaol.
20Phaqlaol-i mail daoq bivq-a nail khe-ai, haol khe hel daiq phail nail aqivq aqtsu juq neq, Aqbhaqlaq bhai aivq nail khaqma nee mail teevq gaq khe-ai ildaoq maoqgaiq jaiqyaq juq iqsanl mail oil khi, bhi dov ail-a nail ngaol.
ప్రస్తుతం ఎంపిక చేయబడింది:
Genesis 12: aeu
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2016, Wycliffe Bible Translators, Inc. All rights reserved.
