Mateo 8

Si Isa makawuliꞌ aꞌa inipul

(Markus 1:40-45; Lukas 5:12-16)

1Pagdurul si Isa amban diyataꞌ kūd, asal banes manamal aꞌa nuhut iye. 2Manjari, niyaꞌ pī pu si Isa dambuwaꞌ aꞌa inipul. Nengge aꞌahin duk tuꞌutne magpadiyawaꞌ pu si Isa duk paꞌinne, “O Tuwan, bang kew mabayaꞌ tapakawuliꞌnu ku.” 3Pinasōng weꞌ si Isa tangannen duk inantan weꞌ ne aꞌa inipulin, duk paꞌinne, “Asal mabayaꞌ ku. Kawuliꞌan ne kew.” Magtawus kawuliꞌan ipulnen. 4Paꞌin si Isa si iye, “Pakale kew, daꞌa kew magaka-aka bisan pu sine. Saguwaꞌ pī kew, pakitehanun barannun si imamin duk magkuluban kew sa pangandaꞌakan si Musahin, hinang tandaꞌ si meꞌ aꞌahin weꞌ asal kawuliꞌan ne kew.”

Pinakoleꞌ weꞌ si Isa daraꞌakan kapitanin

(Lukas 7:1-10)

5Pagsakaliꞌ si Isa padiyalem si puweblo Kapernaum, niyaꞌ dambuwaꞌ kapitan si armi bangsa Roma pasampang si iye māku tabang, paꞌinne, 6“O Tuwan, niyaꞌ dambuwaꞌ daraꞌakanku si lumaꞌ. Saki teꞌed iye, gaꞌi umusaꞌ duk peddiꞌan teꞌed manamal.” 7Paꞌin si Isa, “Aweꞌ, nuhut ku kaꞌu makoleꞌ iye.” 8Saguwaꞌ nambung kapitanin, paꞌinne, “Tuwan, daꞌa ne. Gaꞌi ku pataꞌ papituhannu si lumaꞌku peggeꞌ bangsahan kew teꞌed. Missā kew hadja duk koleꞌ du daraꞌakankun. 9Kataꞌuhanku, peggeꞌ bisan aku, pagbayaꞌan ku weꞌ malangkew amban akuhin duk magbayaꞌ ku si meꞌ sundalukun. Bang paꞌinku si dangan, ‘Pī kew,’ na, pī iye. Bang paꞌinku si seddili, ‘Pitu kew,’ pitu iye. Duk bang paꞌinku si daraꞌakankun, ‘Hinangun inin,’ hinangne ne.”

10Pagkale si Isa inin, ulaliꞌ iye si binissā kapitanin. Manjari paꞌinne si meꞌ aꞌa mapatuhut si iyehin, “Sabennal akahante kaꞌam, bisan si bangsa Israꞌil gaꞌ ku bakas makadugpak aꞌa kuweꞌ kapitan inin asal sandel manamal. 11Pakale kaꞌam, si pasōngan ekka iyan aꞌa bayuꞌ-bayuꞌan bangsa amban meꞌ lahat silangan duk seddepan ningkoloꞌ magkakanan duk disi Ibrahim, Isahak duk si Yakub laꞌi dem pagbayaꞌan Tuhanin. 12Saguwaꞌ meꞌ aꞌa bangsa Israꞌilin, siye subey meꞌ maꞌumasek dem pagbayaꞌan Tuhanin, gaꞌi siye umasek. Pinapī siye si luwasan dem kalindeman, pinatahalaꞌ amban Tuhan. Magmatey siye laꞌi duk magtageꞌot meꞌ impenden hawal pagsusunden.” 13Ubus paꞌin si Isa si kapitanin, “Pī ne kew hap lumaꞌ. Tahinang ne si kaꞌu sa kinahagadnun.” Manjari magtawus kawuliꞌan daraꞌakannen laꞌi si lumaꞌ.

Ekka aꞌa pinakoleꞌ weꞌ si Isa

(Markus 1:29-34; Lukas 4:38-41)

14Ubus hap pī si Isa padiyalem si lumaꞌ si Petros. Takitene matoꞌa si Petros dendehin pabāk laꞌi, saki, ilemmun. 15Inantanan weꞌ ne tangan dendehin, manjari kawuliꞌan ne iye. Ubus dongaꞌ iye duk pinakan siye weꞌ ne.

16Pagseddep ne ellewin, binoꞌo weꞌ meꞌ aꞌahin ekka meꞌ aꞌa pasayedan seyitan pu si Isa. Pinaluwas weꞌ ne meꞌ seyitanin amban pangandaꞌakanne hadja. Duk pinakawuliꞌ weꞌ ne kēmon aꞌa masakihin. 17Hinangne inin duk tuman bissā Nabi Isaya dem kitabin, pinaꞌin, “Iye mangānan peddiꞌten bi duk iye mangānan sakiten bi.”

Meꞌ arak mapatuhut pu si Isahin

(Lukas 9:57-62)

18Pagkite si Isa meꞌ aꞌa mabanes mapaliput si iyehin, paꞌinne si meꞌ tindegnen, “Sūng kite bi palipag pī si dambiyaꞌ lamew.” 19Gaꞌ pe siye tumahalaꞌ, niyaꞌ tekka guru si saraꞌ āgama pī pu si Isa, paꞌinne, “Tuwan, mabayaꞌ ku nuhut kaꞌu tungan-tungan papīhannu.” 20Nambung si Isa, paꞌinne, “Gam pe meꞌ pāhangin niyaꞌ lowangde, duk meꞌ manuk-manukin niyaꞌ sabakande. Saguwaꞌ aku, Anak Manusiyaꞌin, gaꞌ niyaꞌ pahalihanku.”

21Niyaꞌ isab dambuwaꞌ meꞌ manuhut si Isahin missā, paꞌinne, “Tuwan, pī ku dahuꞌ hap lumaꞌ. Pagubus kubulku samakun, balik saꞌ ku pitu nuhut kaꞌu.” 22Saguwaꞌ paꞌin si Isa si iye, “Ambat mamateyin kinubul weꞌ meꞌ aꞌa manggaꞌ niyaꞌ umulde salama-lamahin.”

Si Isa mateddoꞌ lahat-lahat

(Markus 4:35-41; Lukas 8:22-25)

23Ubus miyaꞌan, pasakey si Isa dem bangkaꞌ duk nuhut du isab meꞌ tindegnen. 24Manjari bessuwang nihup baliyu mabasagin hangkan piligdu teꞌed bangkaꞌin palenneb, saguwaꞌ sasang tuli si Isa. 25Pī meꞌ tindegnen mangun si Isa, paꞌinde, “Timbulun kite bi, Tuwan; matey kite bi inin.” 26Paꞌinne si siye, “Weꞌey kaꞌam tinalew? Kulang sandelbi si akuhin.” Manjari dongaꞌ si Isa duk daꞌakne padeheng baliyuhin duk goyakin. Magtawus lamewin teddoꞌ ne teꞌed. 27Ulaliꞌ teꞌed siye. “Aꞌahey inin?” paꞌinde. “Bisan baliyuhin duk goyakin nuhut pangandaꞌakannen.”

Meꞌ aꞌa amban Gadara pasayedan seyitan kawuliꞌan

(Markus 5:1-20; Lukas 8:26-39)

28Pagtekka disi Isa laꞌi si dambiyaꞌ lamew, laꞌi si lahat meꞌ aꞌa Gadara, niyaꞌ pasampang si iye duwe aꞌa pasayedan meꞌ seyitan. Paguwaꞌ siye amban meꞌ lingab pagkubulan. Laꞌatan siye manamal, hangkan gaꞌ niyaꞌ bahani palabey billaꞌi. 29Magtawus maggasud siye, paꞌinde, “O Anak Tuhan, gaꞌ niyaꞌ lamudnu si kami. Pitu ke kew minasa kami bu gaꞌ pe taꞌabut janjiꞌ kamihin?” 30Niyaꞌ tala-tala billaꞌi panenan bawi magsungkal. 31Pabuyuꞌ-buyuꞌ meꞌ seyitanin pu si Isa, paꞌinde, “Bang daꞌaknu kami tahalaꞌ, padiyalemun kami magdem baran meꞌ bawi miyaꞌan.” 32Paꞌin si Isa, “Pī ne kaꞌam.” Manjari paluwas meꞌ seyitanin amban aꞌahin duk padiyalem siye pī magdem baran meꞌ bawihin. Magtawus panenan bawihin magubas padurul pī si pampang magdem lamew duk lambo siye kēmon. 33Manjari meꞌ aꞌa magipat meꞌ bawihin, magubas pī si puweblo, magaka-aka si meꞌ aꞌa malaꞌihin sabab bakas hininang si Isa si meꞌ aꞌa pasayedan seyitanin. 34Manjari pī meꞌ aꞌa puweblo miyaꞌan pu si Isa. Buyuꞌ-buyuꞌde si Isa dinaꞌak tahalaꞌ amban lahatde.

ప్రస్తుతం ఎంపిక చేయబడింది:

Mateo 8: yakV

హైలైట్

షేర్ చేయి

కాపీ