Mateo 18

Sine tamanan malangkewin

(Markus 9:33-37; Lukas 9:46-48)

1Baytu miyaꞌan hap pī pu si Isa meꞌ tindegnen, paꞌinde, “Sine tamanan malangkewin si meꞌ aꞌa manuhut pagbayaꞌan Tuhanin?” 2Manjari ngandaꞌak si Isa dambuwaꞌ nakanak pī si siye bu pinatengge weꞌ ne si tengngaꞌde. 3Ubus paꞌinne, “Sabennal akahante kaꞌam, gaꞌi kaꞌam sumakup dem pagbayaꞌan Tuhanin bang gaꞌi pindahanbi pikilanbin duk kaꞌam manjari kuweꞌ nakanak dikiꞌin, gaꞌi malangkew dine. 4Sine-sine madiyawaꞌ ateyne kuweꞌ nakanak inin, iye tamanan malangkewin si pagbayaꞌan Tuhanin. 5Bang niyaꞌ aꞌa bu sabab sandelne si akuhin ngaddatan dambuwaꞌ nakanak dikiꞌ kuweꞌ inin, aku inaddatannen.”

Subey ilebbahan pagdusehin

(Markus 9:42-48; Lukas 17:1-2)

6“Bang niyaꞌ aꞌa makapaduse si dambuwaꞌ nakanak dikiꞌ kuweꞌ inin makahagad si akuhin, hāp pe siꞌ iye miyaꞌan tapatowengan batu hadje si kellongne bu ilaboꞌ pī dem tahik, duk hadja gaꞌi taboꞌone magduse. 7Makaꞌaseꞌ-aseꞌ meꞌ manusiyaꞌin peggeꞌ niyaꞌ teꞌed meꞌ sassat makapaduse siye. Bugtuꞌ niyaꞌ teꞌed meꞌ sassat tekka. Saguwaꞌ kaꞌaseꞌ-aseꞌ aꞌa manassat saweꞌnen duk saweꞌnen magduse, peggeꞌ asal legga Tuhanin iye.

8“Bang tangannun atawa bettisnun mamoꞌo kaꞌu magdusehin, lebbahanun ne pagdusenun. Dalilnen, kuweꞌ du putukannu tangannun duk bettisnun bu nu ngalakasanne. Hāp pe kew paꞌasek dem surgaꞌ bisan kew putuk, amban duwe tangannun atawa duwe bettisnun saguwaꞌ tinimanan kew pī dem ebbut gaꞌ niyaꞌ kapalemne. 9Duk bang matanun isab mamoꞌo kaꞌu magdusehin, lebbahanun pagdusenun. Dalilnen, kuweꞌ du ugitannu matanun bu nu ngalakasanne. Hāp pe kew paꞌasek dem surgaꞌ bisan dambuwaꞌ saꞌ matanun amban duwe matanun saguwaꞌ tinimanan kew pī dem ebbut narkaꞌ.”

Dalilan sabab bili-bili masumapeꞌin

(Lukas 15:3-7)

10“Pahatul-hatul kaꞌam,” paꞌin si Isa, “daꞌa diyawaꞌanun bi bisan dambuwaꞌ meꞌ nakanak madikiꞌ inin peggeꞌ akahante kaꞌam, meꞌ malaꞌikat mangipat siyehin luwal laꞌi si harapan Samaku si surgaꞌin. (11Aku, Anak Manusiyaꞌin, akaku mapitu si dunyahin nimbul meꞌ aꞌa matala amban Tuhanin.) 12Ine paꞌinbi? Saꞌupama, bang niyaꞌ dambuwaꞌ aꞌa taga bili-bili dahatus ekkahannen bu ne niyaꞌ dambuwaꞌ sumapeꞌ, ine enteꞌ hinangne? Bugtuꞌ ambananne siyampūꞌ duk siyamin laꞌi diyataꞌ punu, duk pī iye miha dambuwaꞌ masumapeꞌin. 13Sabennal akahante kaꞌam, bang takasuwaꞌne ne, sinna teꞌed iye. Pasōng kasinnahanne dambuwaꞌ miyaꞌan amban siyampūꞌ duk siyam manggaꞌ bakas masumapeꞌin. 14Aꞌahin gaꞌi mabayaꞌ weꞌ lepas dambuwaꞌ hayepnen. Na, sa iyan du isab Samabi si surgaꞌin, gaꞌi iye mabayaꞌ weꞌ niyaꞌ bisan dambuwaꞌ meꞌ mākanak madikiꞌ inin tumala amban Tuhan.”

Bang magduse saweꞌnun si kaꞌu

15“Bang saweꞌnun kapagduse si kaꞌu, akahanun iye salaꞌnen. Saguwaꞌ subey kaꞌam hadja duwangan. Bang tuhutne bissānun bu magsusun iye, tatabangnu ne iye duk gaꞌi du usaꞌ sandelne si Tuhanin. 16Saguwaꞌ bang gaꞌi tuhutne bissānun, moꞌo kew pī dambuwaꞌ atawa duwe saweꞌnu seddili duk niyaꞌ naksiꞌan kēmon bissābin. 17Bang gaꞌi iye pakale si siye, akahanun kēmon meꞌ aꞌa malaꞌi si langgalin. Bang gaꞌi pe iye pakale bisan naksiꞌ kēmon anak-apuꞌ langgalin, subey ne addatbi si iyehin kuweꞌ addatbi si aꞌa manggaꞌi manuhut Tuhanin atawa si meꞌ aꞌa magpāku-pāku sukeyin.”

Pamagesan duk pangandaꞌakan

18“Sabennal akahante kaꞌam, ine-ine pamagesanbi si dunya, pamagesan du isab iyan si surgaꞌ. Ine-ine pangandaꞌakanbi tuꞌu si dunya, pangandaꞌakan du isab iyan si surgaꞌ. 19Akahante du isab kaꞌam, bang niyaꞌ duwangan aꞌa amban kaꞌam magtewwaꞌ isunden sabab ine-ine batang pākude si Tuhan, asal pangurung du si siye pinākuden weꞌ Samaku si surgaꞌin. 20Peggeꞌ bang duwangan atawa tellungan aꞌa magtipun, iye sababnen, peggeꞌ nuhut siye aku, laꞌi du ku isab si siye.”

Dalilan sabab daraꞌakan gaꞌi ngampun saweꞌne

21Manjari pī si Petros pu si Isa duk paꞌinne, “O Tuwan, mimpiye ampunku saweꞌkun bang magduse iye si aku? Mimpituꞌ?” 22Paꞌin si Isa, “Dumaꞌin mimpituꞌ saguwaꞌ mimpitumpuk-pituꞌ.” 23Manjari magdalilan si Isa, paꞌinne, “Pagbayaꞌ Tuhanin kuweꞌ inin. Niyaꞌ dambuwaꞌ sultan bayaꞌ lilingne meꞌ libru daraꞌakannen bang hāp du ke pagantande sīnnen. 24Tagnaꞌne ngaliling meꞌ libruhin, niyaꞌ binoꞌo pī si sultanin dambuwaꞌ daraꞌakanne utangnen ibu-ibuhan pilak. 25Manjari gaꞌi umabut pilaknen pamayed utangnen. Hangkan dinaꞌak weꞌ sultanin pinabellihan lellahin hinang banyagaꞌ sampay andanen duk meꞌ anaknen, duk dinaꞌak pinabellihan isab kēmon alataꞌnen, supaya tabayedan utangnen. 26Magtawus daraꞌakan miyaꞌan nengge duk tuꞌutne paharap si sultanin, muyuꞌ-muyuꞌ, paꞌinne, ‘Tuwan, tangguhun ku dahuꞌ. Bayedanku du kēmon utangku si kaꞌuhin.’ 27Manjari maꞌaseꞌ sultanin si daraꞌakannen, hangkan gaꞌ ne daꞌakne binayedan utangnen, duk dinaꞌak ne iye hap lumaꞌ.

28“Pagluwas daraꞌakan miyaꞌan, niyaꞌ tasampangne pagkasine daraꞌakan taga utang si iye saguwaꞌ kulang du. Magtawus siniggew weꞌ ne bu sinekkel duk paꞌinne, ‘Bayedanun ne utangnu si akuhin.’ 29Magtawus daraꞌakan dambuwaꞌin nengge duk tuꞌutne muyuꞌ-muyuꞌ si iye, paꞌinne, ‘Tangguhun ku dahuꞌ. Asal bayedante du kew.’ 30Saguwaꞌ gaꞌi ngatu daraꞌakan miyaꞌan. Dinaꞌak weꞌ ne kinalabusu samantaꞌan gaꞌi tabayedanne kēmon utangnen. 31Manjari pagkite meꞌ daraꞌakan sinduwehin maꞌumantag miyaꞌan, gagal teꞌed siye. Hap pī siye si sultanin magaka sabab miyaꞌan. 32Hangkan daꞌak sultanin hap pī si iye balik daraꞌakan taga utang maꞌekkahin. ‘Dupang kew teꞌed,’ paꞌinne. ‘Gaꞌ ne kew hatiꞌ daꞌakku magbayed utangnun peggeꞌ magpaꞌaseꞌ-aseꞌ kew si aku. 33Subey siꞌ kew miyaꞌan maꞌaseꞌ isab si pagkasinu daraꞌakanin kuweꞌ pamaꞌaseꞌku si kaꞌuhin.’ 34Astel teꞌed sultanin duk dinaꞌak weꞌ ne kinalabusu daraꞌakan miyaꞌan pangalegga iye samantaꞌan gaꞌi tabayedanne kēmon utangnen.”

35Manjari paꞌin si Isa, “Sa iyan du isab hinang Samaku si surgaꞌin si kaꞌam bang gaꞌi ampunbi amban dem ateybi saweꞌbi makaduse si kaꞌamin.”

ప్రస్తుతం ఎంపిక చేయబడింది:

Mateo 18: yakV

హైలైట్

షేర్ చేయి

కాపీ