Maku 7:6

Ajawyi Jesu kee e'i ijupe kõ: – Pejẽ pa'e! Janejare'e perovija rã'ãga mãe kõ! Poromoripe mãe kõ tè! Aje ywete sikõ Janejare'e e'i amãtejẽ karamoeve wayvu mojenuarà Isajasi pè tokusiwa! Kee e'i itõkõ emikusiwarerà peupewarà mõ: “Aã jane kõ, ‘Janejare'e koty rewarà mõ tè ije’, e'i tite kupa ipi. Ajamã'ẽ ojuru e'e pupe kõrijõ tè emoe'e kupa ipi! Opy'a kõ pupe rõwã! Nojipy'amogetai 'eteay ere kupa ipi!