Mateusi 8
8
Jesu omokatu ipisĩsĩma mã'ẽ remẽwarà
(Maku 1.40-45; Rukasi 5.12-16)
1Ãmẽ ajaire Jesu owyjy yvytyry re wyi. Ãmẽ aty wasu ve oo upi. 2Ãmẽ kwaima'e mõ uu ipyri, ipisĩsĩma mã'ẽ. Okuwa Jesu ikasi poromokatua rè. Ajawyi ojimoenãpa'ã Jesu rovake ojiporijauesaoka ijupe.
– Jõvijã! Akuwa emokatu kuwa nekasia rupi rejupa nepota remẽ, e'i Jesu pè.
3Ãmẽ Jesu opojai ojipy ee. Kee e'i ijupe:
– Hoõ! Apota! Tanekatupa awi nepirà rupi, e'i.
Ameve ipisĩsĩma okwapa iwyi. Ikatuay ipirà rupi ky'y. 4A'evo paire kee e'i Jesu ijupe:
– Teremome'u e'ã rã'ĩ nemokatuawerà erokwa. Ekwa rã'ĩ Janejare'e pè oporegeta mã'ẽ kyty, tomã'ẽ nere. Ãmõ, nemokatuawerà repy eraa ime'ẽ teve ijupe. Ma'e, tãmõ Moisesi remikusiwarerà rupi katu ikõ neky'a'oa repy eme'ẽ ikõ ãmẽ ijupe nẽ. A'e tè, “Niky'ai ãwĩ ky'y”, e'ità neupe, ãmõ kõ ve tokuwa, e'i.
Sota atyry rõvijã mõ “aje” e'i Jesu ayvukasia pè remẽwarà
(Rukasi 7.1-10)
5Ajaire Jesu oo Kapanão taa kyty. A'e pè ovãe remẽ, sota atyry rõvijã mõ uu ikoty ojiporijauesaoka ijupe. Juteu rõwã a'e. Ãmõ tè. Romã yvy pewarà tè. 6A'e kee e'i Jesu pè:
– Jõvijã, eremĩgwai mõ itekorã ywete. Nipimãrãkuwai tesõ otekorãnà pè ky'y. Ojimomorijauvay tè iko, e'i Jesu pè.
7– Aatà imokatu ãmẽ, e'i Jesu ijupe.
8Ãmẽ sota rõvijã e'i Jesu pè:
– Jõvijã, nekatu ywe'ei ije. Ajawyi nereike'ãi kuwa eretã wyry pè. Akuwa neayvukasiay wete mã'ẽ tè ene poromokatua rè, e'i. Ajawyi ike wyive emokatu neayvu rupi, a'e ene. Akuwa ikatupatà neayvu rupi, e'i. 9Akuwa ayvukasia rewarà. E'arà kyty oiko tè erõvijã mõ. Ãmõ, ewyry kyty oiko teve eremĩgwai sota kõ. Ajawyi eremĩgwai mõ pè “ekwa” a'e remẽ, “hoõ” e'i oo eayvu rupi ipi. Ma'e remẽ ãmõ pè “ejo” a'e remẽ, “hoõ” e'i ve uu eayvu rupi. Ãmõ pè, “moko ereko” a'e remẽ, “hoõ” e'i. Eayvu rupi katu ekoi ãmẽ. Ãwitõ eayvukasi sota kõ pè ipi, ãwĩvo ve ene neayvukasi tekorãnà mogwapa ipi, e'i Jesu pè.
10Ãmẽ aepo jaa Jesu wenu remẽ,
– Haa! Aepo e'i sipõ sota rõvijã? e'i.
Ajawyi e'i oupi oo mãe kõ pè:
– Aje kee a'e pejẽ. Naesaive ãwĩvo eayvukasia pè “aje ywete” e'i mã'ẽ mõ Isaeu kõ pytery pè. Emã'ẽ. Juteu rõwã mã'ẽ ipe remẽ, a'evo tesõ! 11Ajawyi kee a'e pejẽ. Kãramõ Janejare'e ojikuwa Jõvijã wasu rõmõ remẽ, jane kõ mõa'ãrõwã uu uutà ojimoena ipyri ena pupe. Yvy popy kyty wyi uu uutà kupa. Ãmõgwerà kwaray ẽma kyty wyi uutà. Ãmõgwerà kwaray 'apa kyty wyi uutà. Pirujẽ uu uutà wapytà Janejare'e pyri ojimiwa. Tãmõ Aparão reve ekoità jimi'u wasua pè, Janejare'e remĩgwai kõ rõmõ, e'i. Ãmõ, tãmõ Isaki reve. Ãmõ, tãmõ Jako reve, e'i.#Ruk. 13.29 12Janeretãrãgwerà kõ ve kuwasi eeve kõ ekoi mijã, [janeupe ypy Janejare'e ojikuwaoka rewarà mõ].#8.12 A'e kõ kee e'i tite: “Janejare'e remĩgwai kõ teãmã jane”, e'i tite. “Ajawyi ena pè jaiko karuarutà”, e'i tite kupa. Ajamã'ẽ Janejare'e nomoigeoka kõ'ãi, nomoẽokai o'arà kyty kupa rewarà mõ. Ajawyi omokuipe'e kõtà owyi pãtõmimi e'ete vo mã'ẽ gyty imono kõ. A'e pè wapukai pukutà ojawa rõmõ kupa. Ojãpikãkãima ipetà ojawa kupa upa, e'i.#Mat. 22.13; 25.30; Ruk. 13.28
13Aepo e'i paire, e'i Jesu sota rõvijã pè:
– Neremĩgwai ikatupatà ky'y, “aje” ere Janejare'e kasia pè rewarà mõ, e'i. Ajawyi ejivy eo neretã gyty ky'y, e'i tõvijã pè.
Ojivy oo ãmẽ. Ãmẽ jakatu sikaepo ikatupa emĩgwai ky'y.
Jesu omokatu Peturu tija remẽwarà
(Maku 1.29-34; Rukasi 4.38-41)
14Aja paire Jesu oo Peturu rupi etã gyty oike. A'e pè Peturu tija ikaray sikaepo upa. Okea pè o'au upa. 15Ãmẽ Jesu omã'ẽ ee remẽ, opopyy. Ameve py'awarà mõ ikaray okwapa iwyi. Opoera katu opõ'ã ky'y. Ajaire Jesu rè oja'a. [Emi'õ rã rè oposiko upa.]
16Ajaire pãtõma remẽ, a'e taa wãnà kõ weru eru ãjãg ojimoemija ee mãe kõ Jesu kyty, tomokatu kõ. Ijatyray weru kupa. Ãmẽ Jesu wayvukasia rupi tè omoisyry ãjãg kõ iwyi kõ. Itekorã e'e mãe kõ ve omokatu, ijãvijõ kõ jẽ. 17A'evo Jesu omojikuwa Janejare'e ayvukwerà, “aje” taoty ijupe. Kee e'i amãtejẽ Janejare'e ayvu mojenuarà Isajasi ikusiwa karamoe remẽ maekwerà: “Janetekorãnà omogwapatà janemokatuarà rõmõ”, e'i maekwerà.#Isa. 53.4 Aekwerà rupi katu Jesu ekoi.
“Aatà nerupi”, e'i epe Jesu pè kupa remẽwarà
(Rukasi 9.57-62)
18Ãmẽ Jesu omã'ẽ pirujẽ erokwa aty wasu kõ rè. Ãmẽ e'i wemimo'earà kõ pè:
– Ja'e jẽsi pãranã ovae kyty, e'i.
19Ojisyrytà kupa remẽ jakatu kwaima'e mõ uu Jesu kyty javo. A'e tãmõ Moisesi remikusiwarerà rè poromo'e mã'ẽ tè. A'e e'i Jesu pè:
– Poromo'earà, aatà nerupi age'e. Maipe kyty neo remẽ, aatà nerupi, awyje, e'i epe Jesu pè.
20Ãmẽ Jesu e'i ijupe:
– Neitytà sipõ nerena neo erupi? e'i. Emã'ẽ. Ena mã'ẽ tè mijarà ipi, e'i. Wena pè tè oke kupa ipi. Ãmõ, wyra kõ ojiowaitynõ oupe ipi, e'i. Ije ãmẽ nerenai mã'ẽ tè, Janejare'e Remimuurerà ajimojane mã'ẽ rõmõ, e'i. Ajawyi erupi sõ neo remẽ, mape nereju'ãi kuwa evo, e'i. Neo jẽtà põ erupi? e'i ijupe.
21Ajaire emimo'earà mõ e'i epe Jesu pè:
– Erõvijã, aa kuwa ipe age'e nerupi mijã. Ajamã'ẽ age'eveay naa'ãi rã'ĩ. Aãrõtà rã'ĩ papa, ajaate itãivĩ remẽ tokãjã. Okãjã remẽ, eãgwerà aaty rã'ĩtà. Aja paire tè aatà nerupi ky'y, e'i epe ijupe.
22Ajamã'ẽ aepo e'i remẽ e'i Jesu:
– Ãnĩ! Age'eve ja'e erupi! e'i. O'ãg pè okãjã mãe kõ, ojevote tojeaty nẽ kupa, e'i ijupe.
Jesu yvytu ai omomi remẽwarà
(Maku 4.35-41; Rukasi 8.22-25)
23Ãmẽ ajaire Jesu opo yarà pupe. Emimo'earà kõ ve opo ipupe, Jesu pyri. Pãranã ovae kyty ootà kupa.
24Ãmẽ pãranã mytery pè oo iko kupa remẽ, py'awarà mõ ijyvytu ai jirojivy jivy tesõ. Ajawyi yy opipo pipo tesõ teve. Ãmẽ yy ojeẽ jeẽ tesõ yarà pupe ky'y. Ajawyi ojipypy taray yarà ky'y.
A'evo remẽ Jesu oke upa. 25Emimo'earà kõ ãmẽ ojimonyi tesõ. Ajawyi oo imõtã kupa.
– Jõvijã! Japatà rõwã sipõkõ yy pè? Orerereko katu rejupa! [Manyvo jẽ awi ereko imomi tijamãnõ e'ã!] e'i kupa.
26Aepo e'i kupa remeve, Jesu omã'ẽ javo ijupe kõ.
– Pekyje sõ! e'i. “Aje” napejẽive sipõ eayvukasia pè? e'i.
Aepo e'i paire opõ'ã. Oporegeta kasi yvytu ai pè, pãranã pè teve.
– Epi! e'i.
Ameve py'awarà mõ opi yvytu ai ijayvu rupi. Yy nopipoi teve ky'y.
27Omoãgyo kõ tesõ a'evoa rè emimo'earà kõ omã'ẽ remẽ. Ajawyi e'i ojiupe kupa:
– Haa! Ava sipõ awi janerõvijã, ãwĩvo tesõ tijayvukasiay wete? e'i kupa. Emã'ẽ! “Epi” e'i yvytu ai pè remeve, opi! Yy a'evo ve. Omomi ve yy kasia, e'i kupa. [Ãwitõ janeremĩgwai mõ janererovija, “teene” eu ijupe remẽ, ãwĩvo yvytu ai janerõvijã pè, e'i kupa.]
Jesu omokatu ãjãg ojimoemija ee mãe kõ remẽwarà
(Maku 5.1-17; Rukasi 8.26-37)
28Yvytu ai paire oo jẽ pãranã ovae kyty kupa. [Juteu rõwã mãe kõ rena tè a'e.] Gerasa eu a'e yvy pè. A'e pè ovãema kupa remẽ, oẽ oẽ oo yarà pupe wyi kupa. Oo iko kupa jakatu sikaepo ãjãg ojimoemija ee mãe kõ mõ uu Jesu rõvaisĩ. Tyvy rena kyty wyi uu kupa, mõrijõ rõmõ. Ipojy ai tè a'e kõ. Ikasiay teve kupa. Ajawyi ava jẽ rõwã okwa kuwa a'e rupi ipi. 29A'e kwaima'e kõ omã'ẽ Jesu rè remẽ, wapuka pukai tesõ kupa. Kee e'i kupa:
– Janejare'e Ra'yry, nejo põ oremomorijau amãtejẽ! Timanyvo e'ã ikõ orerereko rejupa nẽ! e'i e'i wapukai kupa.
30Ãmẽ jakatu tajausĩ ijatyray ojimi'u iko ipyri kõ. Yvytyry yke rupi ojimi'u iko kupa.
31Ajare ãjãg kõ e'i Jesu pè:
– Oremoẽ sõ rejupa remẽ, tajausĩ atyry pupe jẽsi toroike ãmẽ! I'ete põ? e'i kupa.
32Ãmẽ Jesu:
– Hoõ, peẽ peo awi! e'i ijupe kõ.
Ameve ãjãg kõ oẽ oẽma oo ojimoemija ee mãe kõ wyi ky'y. Tajausĩ kõ pupe tè oike ike kupa. Omo'ãgai tesõ tajausĩ kõ ãmẽ kupa. Ajawyi tajausĩ kõ ojã ojãma oo vykwae kyty okukuipa oo yy pupe kupa ky'y, pãranã pupe. Oyvypypa opa kupa, pirujẽ.
33Ameve tajausĩ rãrõarà kõ ojava oo pirujẽ a'evoa mojenu jenu taa rupi erokwa. 34Ameve pirujẽ a'e taa wãnà kõ uu uu Jesu resa. Omã'ẽ ee kupa remẽ, kee e'i e'i ijupe kupa:
– Ejisyry ike wyi eo, orerena pe wyi! e'i e'i ijupe okyje rõmõ kupa.
ప్రస్తుతం ఎంపిక చేయబడింది:
Mateusi 8: oymNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2013, Wycliffe Bible Translators, Inc. All rights reserved.
