Mateusi 2
2
Jaytata kuwaparà kõ oo Jesu sakyrerà resa remẽwarà
1Ãmẽ Jesu Perẽ taa pè isaky. Juteja yvy pè. Eroti Juteu kõ rõvijã wasu rõmõ ekoi remẽ jakatu sikaepo isaky.
Ãmẽ Janejare'e omojikuwaoka isakya. Ke'ĩrõwã wãnà kõ pè omojikuwaoka. Kwaray ẽma kytywarà kõ pè, jaytata kuwaparà kõ pè.#2.1 Jaytata kõ rè omã'ẽ tokuwa manyvotà okwa kãramõ kupa. Jaytata temisage'ã rupi omojikuwaoka. [A'e kõ Jesu isakyrĩ remẽ tè katu sikaepo yvag rè omã'ẽ imono. Jaytata temisage'ã rè omã'ẽ kupa. E'i ãmẽ kupa: “Manyvore põ ãwĩvo jaytata?” e'i kupa. Jõvijã wasu rã rõwã põkõ isaky upa? e'i ojiupe kupa.] Ajawyi ajaire jaytata rupi oo kupa. Ke'ĩrõwã oo kupa, ajaate Juteu kõ yvy pè ovãe kupa. Juteu rõvijã rena kyty rã'ĩ oo kupa, Jerusarẽ taa kyty. A'e kyty rã'ĩ oo jaytata momewa kupa.
2Ãmẽ e'i kupa:
– Mape põ penõvijã rã isaky upa? e'i kupa. Juteu kõ rõvijã rã? e'i kupa.
[– Manyvo pãwĩ pereko ikuwa? e'i a'e wãnà kõ.]
– Jaytata rupi orokuwa, kwaray ẽma kyty ojisa mã'ẽ rupi. A'e rupi tè orojo jõvijã rã resa imoe'e, e'i kupa.
3Aepo jaa ojenu jõvijã Eroti pè ky'y. Pirujẽ Juteja yvy pewarà rõvijã tè Eroti. Aepo wenu remẽ, ojimonyi enu. Emĩgwai kõ ve ojimonyi enu, Jerusarẽ taa wãnà kõ, pirujẽ. 4Ajawyi Eroti okwai Janejare'e pè oporegeta mãe kõ rõvijã kõ imuu. Ãmõ, tãmõ Moisesi remikusiwarerà rè poromo'e mãe kõ ve okwai imuu. Uu kupa remẽ, e'i jõvijã Eroti ijupe kõ:
– Mape põ Janejare'e Remimuu rã isakytà, jõvijã wasu rã? [Moma'e e'i põ Janejare'e kareta isakya rã rè?], e'i ijupe kõ.
5Ãmẽ e'i ijupe kupa:
– Perẽ taa pè isakytà, Juteja yvy pè, e'i ãmẽ ijupe kupa. Kee e'i Janejare'e ayvu mojenuarà mõ ikusiwa karamoe remẽ tijakuwa:
6“Perẽ taa wãnà kõ! Juteja yvy pewarà kõ!
Tena miti teipe penena.
Ajamã'ẽ jõvijã wasu rã tè isakytà penena pè,
eupewarà kõ Rõvijã wasu rõmõ,
Isaeu kõ Rõvijã wasu rõmõ.
A'e eupewarà kõ rerekoarà rõmõ ekoità”, e'i ojikusiwa.#Mik. 5.2
Aekwerà rupi orokuwa Perẽ taa pè isakytà, e'i Eroti pè kupa.
[– Hoõ, e'i jõvijã Eroti ãmẽ.
Ãmẽ ojivy oo Janejare'e ayvu kuwaparà kõ.]
7Ajaire jõvijã Eroti omuu mijẽ jaytata kuwaparà kõ imogeta. Teã'ã rupi tè omogeta kõ ajamã'ẽ.
– Manyvo remẽ põ jaytata ojisa ypy? e'i ijupe kõ.
Omome'u ijupe ãmẽ kupa. [Ãmẽ Eroti ojipy'amopirai tesõ upa. Ajawyi e'i vija opy'a pè:
– Ajukaokatà jõvijã rã tojimojõvijã e'ã erekovijarerà rõmõ, e'i oupe.
Aepo ne'i jaytata kuwaparà kõ pè ajamã'ẽ.] 8Ikatusa rupi rã'ãga omogeta kõ tokuwa e'ã kupa. Ajawyi kee e'i kõrijõ tè ijupe kõ:
– Pekwa awi Perẽ taa kyty esa. Mã mè põ isaky? Pemã'ẽ ee remẽ, pemome'u ikõ ije nẽ. Ije ve aatà esa imoe'e ãmẽ, e'i rã'ãga jaytata kuwaparà kõ pè.
9-10Ãmẽ ojisyry oo jõvijã Eroti rena pe wyi kupa ky'y. Jaytata rè omã'ẽ mijẽ kupa. Kõitokõ jypy remẽ kwaray ẽma kyty wyi oẽ remẽ, omã'ẽ ee kupa, aekwery vo omã'ẽ mijẽ ee kupa. Oryvay ee omãjã kupa. A'e rupi oo ovãe Perẽ taa pè ãmẽ kupa. Ajaate tetã Jesu tui mã'ẽ 'aryvo katu jaytata tui. A'e rupi tè tetã okuwa kupa.
11A'e pupe oike esa ãmẽ kupa. Aje, a'e pè jõvijã rã tui upa. Ijy ipyri ve tui upa, Maria. Ãmẽ omã'ẽ jõvijã rã rè kupa remeve, ojimoenãpa'ã ipyri ojayvy imoe'e kupa. Moma'e epy wete mãe kõ ome'ẽ ijupe imoe'ea rõmõ kupa. Iteetejẽ. Kejõ. Yvy karakuri. Ãmõ, ipije mã'ẽ. Ĩsẽsu eu a'e ipije mã'ẽ mõ pè. Ãmõ, miha ysykwerà eu ãmõ ipije mã'ẽ pè. Mokopejõ ome'ẽ jõvijã rã pè kupa.
12Ãmẽ ajaire ojivypa oo jaytata kuwaparà kõ ky'y. Nooi rã'ĩ jõvijã Eroti pè imomewa kupa ajamã'ẽ. Ãmõ pee rupi tè ojivy oo wena kyty kupa. Ji'ite Janejare'e remĩgwai yvapewarà mõ ojimoikatu ijupe kõ ikery pè. E'i ãmẽ ijupe kõ:
– Pejivy peo remẽ, tapeo e'ã Eroti rena kyty, e'i. Ãmõ pee rupi tè pejivy peo, e'i ijupe kõ ikery pè.
Ãmõ pee rupi tè ojivy oo ãmẽ kupa ky'y. Tyvija rupi tè omago iwyi okwa kupa.
Juse werojava Jesu sakyrerà remẽwarà
13Ãmẽ Jesu ruu a'u pè Janejare'e remĩgwai yvapewarà mõ ojisa pya ikery pè, Juse pè. Kee e'i yvapewarà ijupe:
– Kuise'ẽ ejãrãpõ'ã! Mãrãnai okwatà! Tõvijã Eroti osota kõ omurokatà Jesu sakyrerà reka ijuka! Ajawyi kuise'ẽ erojisyry amãtejẽ eraa iwyi kõ! Ijy ve erojisyry eraa! [Ke'ĩrõwã ikõ pekwa nẽ!] Ejitu yvy kyty erojava eraa! A'e pè tapepyta rã'ĩ, ajaate pejivya rã amojikuwaokatà pejẽ! e'i Janejare'e remĩgwai ijupe.
14Juse “aje” e'i ãmẽ aepo e'i remẽ. Werojava kõ amãtejẽ ãmẽ. Pya tè ojisyry oo kupa, tyvija rupi tè, Ejitu yvy kyty. 15A'e pè ojimoena rã'ĩ kupa. Ãmẽ ajaire Eroti omãnõtà remẽ tè ojivy tarà mijẽ uu aekwerà kyty kupa. A'evo remẽ “aje” taoty Janejare'e ayvukwerà pè, kee e'i imojenuoka maekwerà pè: “Ejitu pe wyi amojivytà era'yry imuu”, e'i maekwerà.#Ose. 11.1 [Aepo Janejare'e omotekokuwa teãmã wayvu mojenuarà pè.] A'e rupi katu tè ãmẽ.
16Ãmẽ jakatu jõvijã Eroti wãrõ jẽ tite jaytata kuwaparà kõ upa, Jerusarẽ taa pè. Wãrõ kõ ywete tite paire, e'i oupe ky'y:
– Emoripe tè sipõkõ kupa! e'i. Nonu'ãi sipõ imomewa eupe kupa! e'i oupe.
Ojimõarõay wete ãmẽ ky'y. Ajawyi sota kõ omonooka toapisi ja'y kwani kõ Perẽ taa wãnà kõ ãmẽ ky'y. Ãmõ taa miti kõ Perẽ pyri'ĩje'ẽ rupi ve ja'yry kõ wapisi kupa. Pirujẽ mõrijõ kwaray noerokwapaive mãe kõ wapisi kupa, jõvijã Eroti ayvu rupi. Jaytata kuwaparà kõ remimome'ukwerà rupi a'evo werekooka kõ. [Nokuwai mã isaky jõvijã rã mõ. Ajawyi pirujẽ wapisipaoka ja'yrerà kõ.]
17A'evoa rewarà Janejare'e ayvu mojenuarà mõ karamoe remẽ omome'u amãtejẽ, Jeremia eu ijupe mã'ẽ. A'e okusiwa amãtejẽ ijãgyoa rã kõ, Perẽ taa wãnà kõ rewarà. Kee e'i amãtejẽ ikusiwa:
18“Ramaa#2.18 Perẽ taa pè Ramaa eu teve. Jer. 31.15 taa wãnà kõ oja'o ywetetà kãramõ.
Kee e'ità kupa: ‘Moma'e rã sõ põ janeãkarãgwerà wapisi kupa,
ãwisõ tijaneãgyoay wete’, e'i titetà kãramõ kupa.
Sa'i Rakeu jeapyrerà kõ oja'o ywetetà kãramõ, opa imemyry kõ remẽ.
‘Janemopyte'uarà oiko ipetà.
Ajamã'ẽ janeãgyoay jẽtà jaiko’, e'ità kupa”, e'i amãtejẽ [Jeremia ikusiwa] maekwerà.
Aekwerà rupi katu a'evo jiapisia Perẽ taa pè, jõvijã Eroti wapisioka ja'yrerà kõ remẽ.
Juse kõ ojivy mijẽ wena kyty oo remẽwarà
19Ãmẽ kãramõ omãnõ jõvijã Eroti ky'y. Omãnõ maire, Janejare'e remĩgwai yvapewarà ojimoikatu mijẽ Juse pè ikery pè, Ejitu yvy pè tui jẽ remẽ. 20E'i ijupe:
– Age'e si ja'yry erojivy eraa, ijy reve, penena Isaeu yvy kyty ky'y, e'i. Jõvijã Eroti omãnõ ky'y, e'i ijupe.
“Hoõ” e'i ãmẽ Juse. 21A'evo wereko ãmẽ. Ja'yry werojivy eraa, ijy reve. 22Perẽ taa pè nojimoenai ajamã'ẽ kupa. Ma'e rewarà mõ. Eroti ra'yrerà Akerau Juteja yvy pè ojimojõvijã mijẽ uu rekovijarerà rõmõ. Aepo jaa ojenupa Juse pè. Ajawyi okyje jẽ. Nopotai jõvijã wasu rena pyri'ĩje'ẽ ojimoena. A'evoa Janejare'e remĩgwai yvapewarà omome'u amãtejẽ ijupe ikery pè. Ajawyi ke'ĩrõwã sa'u oo, Karireja yvy kyty. 23Nasare taa pè tè oo ojimoena kupa. A'evo Janejare'e ayvu mojenuarà mõ e'ipa amãtejẽ Jesu pewarà mõ karamoe remẽ: “Nasare taa wãnà eutà ijupe”, e'i amãtejẽ maekwerà rupi katu.#Mak. 1.24; Ruk. 2.39; Juw. 1.45
ప్రస్తుతం ఎంపిక చేయబడింది:
Mateusi 2: oymNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2013, Wycliffe Bible Translators, Inc. All rights reserved.
