Pupuꞌ 1
1
Ookara Kapoo'nanka Kumponinge Pupu'uu'na'koong Minkunaa
1Tenang tutuna' masipo' Kumponinge aa'ning paning ee'noko kansi' nkovuu'nang. 2Aung kansi' tee, emu' otoina' otoaruko'; naroomparava' otoko'; tamung domaang-po'ningmeeva otoko'. Dau-eta mutaanange daka'pui otoko' tee poonaru' baka otoko, ee'noko tee Kumponing bakaang Tanuaang tee-koo pirung-koo daue aavinuko.
3Tenang Kumponinge karoma aa'puu', “Araka, tavo'daravai,” ee'noko tenang araka oro'paru'. 4Ee'noko Kumponinge tee araka tampa' oovura dotuarara tee araka simpe'uu' mutaanang-eta. 5Ee'noko Kumponinge tee araka doonaa' tampuu' ee'noko mutaanang muung tampuu'. Teketa aa'nou' muung tankinuko tane'puu' ee'noko te'mung te'mung tutuna'na'mung.
6Ee'noko Kumponinge napo' karoma aa'puu', “Meeroo'navaro doona otoai tankaampuresi pirung boonaru' ee'noko ntong kamo'koong.” 7Tee meeroo'navaro tee, Kumponinge teing ntong meu' tankaampuree'naang nkovuu' boonaru' daunaru'keta. 8Ee'noko Kumponinge tee meeroo'navaro doona auvi'au tampuu', teketa aa'nou' muung tankinuko tane'puu' ee'noko te'mung te'mung ke'munta-na'mung.
9Teketa napo' Kumponinge aa'puu', “Aia', ntong paning-koo boong otoing naro' poontarako koverenoo' oro'paravai,” ee'noko tee' masika' nkoaru'. 10Teketa Kumponinge te' koverenoo' kansi' tampuu' ee'noko tee ntong poonaru' pirung tampuu'. Ee'noko Kumponinge tampa' oovura dotuaru'.
11Ee'noko Kumponinge napo' karoma aa'puu', “Kansi'koo baa' ee'noko koi'nanka amutemurii' dupuai, aa'noko keenavaang, ee'noko pora'kooning, ee'noko sinampuai ookara muu' amutemurii' kantena'.” Ee'noko tee' ee'na' nkoaru'. 12Kansi'koo amutemurii' baa' ee'noko koi'nanka amutemuu'na' sinampumaing dupuu', keenavaang ee'noko pora'kooning, teing-koo kuunge napo' oki'nareka' sinang nkoarikoo' amutemuu'na'. Ee'noko Kumponinge tampa' oovura dotuaru'. 13Teketa aa'nou' muung tankinuko tane'puu' ee'noko te'mung te'mung beenana'mung.
14Teketa napo' Kumponinge aa'puu', “Aia', arakananka tavo'dariai meeroo'navaro-koo meu'ke teke paning-koo doong ee'noko muung simpe'aareaing, ee'noko teke aing aa'ning taa'ni'antavaari otoromaatoai: doonanka, kaarananka ee'noko mare'nanka. 15Ee'noko teke meeroo'navaro-koo paning-koo arakavariri otoromaatoai teketa kansi'aape araka po'antavaamaatoai.” Ee'noko tee' ee'na' nkoaru'. 16Ee'noko Kumponinge tee' araka pankeng kenaanka nkovuretu', narung aa'na' araka doonaa' araka-koo miring duaa' nkovuu'. Ee'noko nii'nung baru' araka deeaung muunga araka-koo miring kaara nkovuu'. Napo' beento'nanka nkovuru'. 17Teing paning-koo meu' nkovurira sipuru' teketa kansi'aape araka po'antavaamaatoo'naang. 18Ee'noko teketa doong ee'noko muung tanatavaamaatoai, ee'noko napo' arakanaanka ee'noko mutaanang tankaampaarematoai. Ee'noko Kumponinge tee' ee'na' tampa' oovura dotuaru'. 19Teketa aa'nou' muung tankinuko tane'puu', ee'noko te'mung te'mung karenana'mung.
20Ee'noko Kumponinge napo' karoma aa'puu', “Ntong ee'noko pirung ookarai kapoo'nanka amutemurii' domantoo'nankai maanto'aavai. Ee'noko barennankai porora meeroo'navaro a'dei' auvi'au puraanaama maanto'aavai.” 21Tavi' pankenanka nkovuru' pirung-koo kuung otoromaing ee'noko ookara oki'nareka' kapoo' nanaamaing ntong-koo kuunge, ee'noko ookara bareng amutemurii'. Ee'noko Kumponinge tampa' oovura dotuaru'. 22Ee'noko Kumponinge ookara biraankevuru' aa'puma, “Ookara kapoo'nanka pirung-kooning parerima berentarima pirung maanto'eriai, ee'noko ookara barennanka tee'ke, parerima berentariai kansi'koo.” 23Teketa aa'nou' muung tankinuko tane'puu' ee'noko te'mung te'mung pa'noko'na'mung.
24Teketa napo' Kumponinge aa'puu', “Enang kansi'koo kapoo'nanka amutemurii' domantoo'nanka tavo'dariai: ookara kau'karenaumo bau'naananka, ee'noko biikoori, ee'noko ookara kapoo' kansi'koo daue nanaamaing.” Ee'noko tee' ee'na' nkoaru'. 25Kumponinge kau'karenaumo pora'kooning amutemuu' nkovuru' ee'noko napo' bau'naananka amutemuu' tee' nari' nkovuru' ee'noko napo' teing kansi'koo daue kakanaamaing tee' nari' amutemuu' nkovuru'. Ee'noko Kumponinge tampa' oovura dotuaru'.
26Teketa napo' Kumponinge aa'puu', “Aia', naning-namuu' nantoong nii' pina' oro'nuka nkoarampiai, niikaang oro'oro'noo' siompuio', ee'noko teinge ookara kapoo'nanka tanatavaariai, aa'ning: tavi' pirung-koonanka, barenanka auvi'au-kooning, kau'karenaumo datauraa'nanka, ee'noko pora'koonanka, ee'noko napo' teing ookara kapoo'nanka kansi'koo daue nanaamaing.” 27Tee'koo Kumponinge naning baka bakaang oro'oro'noo' siompuio' nkovuu'. Tee' ee'na' nari' oro' Kumponing-pina' nkovuu', aa'nou' donkaani ee'noko manikuma nkovuretu'. 28Ee'noko Kumponinge biraankevurema aa'puretu', “Dee' parerema berentareai ee'noko deurukaa'ke ookara kansi' maanto'aara ookara kapoo'nanka tanatavaariai tenairu-koo. Ee'noko dee'ke tee aa'noaing ookara tavi' pirung-kooning tanataverereriai, barenanka auvi'au-kooning ee'noko ookara kapoo'nanka kansi'koo daue nanaamaing.” 29Ee'noko Kumponinge aa'puretu', “Oovereko, ninge tee dee' arompesing ookara kapoo'nanka sinampumaing ookara-koo kansi'koo daue otorinanka; dee' deekaang taamang, ookara baa'nanka, koi'nanka, keenavaang ee'noko pora'kooning naro'ka. 30Ee'noko ookara kau'karenaumo-nanka kansi'kooning, napo' barennanka auvi'au-kooning ee'noko ookara kapoo'nanka kansi'koo daue nanaamaing, ee'noko ookara kapoo' domantoo'nanka, ninge teing ookara kapoo' dupumaung maa'koo avoronsing.” Ee'noko tee' ee'na' nkoaru'. 31Ee'noko Kumponinge ookara kapoo'nanka teie nkovuru'ning tampa' masika' oro'pariko oovura dotuaru'. Teketa aa'nou' muung tankinuko tane'puu', ee'noko te'mung te'mung ˜na'mung-taa-na'mung.
ప్రస్తుతం ఎంపిక చేయబడింది:
Pupuꞌ 1: nasNTpo
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 1994, Wycliffe Bible Translators, Inc. All rights reserved.
