Sang'hano 7
7
Sitefano kolonga na wanhu wa mkitala
1Mulava nhosa mkulu kamuuza Sitefano, “Mbuli zino za ukweli?”
2Sitefano kawedika, “Tata zangu na ndugu zangu, nhegelezeni! Muhenga wetu Abulahamu yang'hali hanachola kukala isi ya Halani, Imulungu wa ukulu kamulawilila mwiisi ya Mesopotamia. 3Imulungu kamulongela, ‘Segela mwiisi yako, waleke wanhu wa lubuga lwako uchole isi yonda nikulagusile.’ 4Avo kalawanya mwiisi ya Wakalidayo kachola kukala kudibuga da Halani. Tatake Abulahamu viyafile, Imulungu kamulongela Abulahamu yeze mwiisi ino yumukala sambi. 5Imulungu hamgwelele Abulahamu hata kimhongwe kidodo kiwe chake mwenyego, lakini Imulungu kamulongela komgwaa, iwe yake na lukolo lwake. Imulungu viyamulongele avo, Abulahamu kakala kabule wana. 6Vino vivo Imulungu viyamulongele Abulahamu, ‘Lukolo lwako lokala mwiisi ya ugeni, ako okuwa watumwa na otendigwa vihile kwa miyaka magana mane. 7Lakini nowatagusa wanhu ondawawatende watumwa. Abaho lukolo lwako lolawa mwiisi iyo na onigwaa ukulu niye hanhu hano.’ 8Abaho Imulungu kamgwaa Abulahamu kihendo cha kwingila kumbi kamba kilaguso cha lagano. Avo Abulahamu kamwingiza kumbi Isaka siku ya nane toka viyavumbuke. Vivija Isaka kamwingiza kumbi mwanage, yakemigwe Yakobo, na Yakobo kawengiza kumbi waja wahenga zetu longo na wabili.”
9“Wanage Yakobo wamonela migongo mdodo wao Yusufu na wamchuuza yawe mtumwa mwiisi ya Misili. Lakini Imulungu kakala hamoja nayo, 10kamuhonya na magayo gake. Yusufu viyagaligwe kwa Falao mndewa wa Misili, Imulungu kamtenda yanogeligwe, na nzewele zake zoneka, avo mndewa wa Misili kamtenda yawe mkulu wa wakulu wa Isi, na mkulu wa wasang'hanaji wa mng'anda. 11Abaho kukala na lufilili lwa nzala mwiisi yose ya Misili na Kanaani, itendile wanhu wadununzike. Wahenga zetu wakala waduhu ndiya. 12Yakobo viyahulike ako Misili kukala na ndiya, kawatuma wanage, wahenga zetu, mwanza wa ichanduso kuvika ako. 13Viwacholile mwanza wa kabili, Yusufu kailagusa kwa ndugu zake, na mndewa Falao kalujuwa lukolo lwa Yusufu. 14Avo Yusufu kawatuma wasenga kwa tatake Yakobo, wamulongele heyo na lukolo lose weze Misili, wose kwa wose wakala malongo saba na tano. 15Abaho Yakobo kachola Misili, ako heyo na wanage wafa. 16Ng'huli zao zigaligwa Shekemu, ako wazikigwa mna gamapanga gayagulile Abulahamu kwa sente kulawa kuna ulukolo lwa Hamoli.”
17“Kipindi cha Imulungu kutenda gayamulongele Abulahamu vikikalile behi, wanhu zetu ongezeka ng'hani mwiisi ya Misili. 18Abaho mndewa iyagwe yalekile kumjuwa Yusufu kasonga kutawala mwiisi ya Misili. 19Kawatendela usede wahenga zetu na kuwatenda vihile, kawalagiza waweke kunze wanao ving'hele, ili wafe. 20Musa kavumbuka mna ikipindi acho, kakala mwana yanogile. Kaleligwa na mamake kwa miyezi midatu, 21na viyekigwe kutali na ukae, mndele wa Falao kamsola na kamulela kamba mwanage. 22Musa kafundizigwa ubala wose wa Wamisili na kawa munhu mkulu kwa kulonga na sang'hano.”
23“Musa viyavikize miyaka malongo mane, kachola kuwalola ndugu zake Waizilaeli. 24Kamona imoja wao kotendiligwa vihile na Mmisili, avo kachola kumtaza Mwiizilaeli kwa kumuliha gehile Mmisili kwa kumkoma. 25Kagesa ndugu zake Waizilaeli wahajuwile kamba Imulungu yahawakombole kubitila heyo, lakini wao hawajuwile. 26Imitondo yake kawona Waizilaeli wabili oitowa, kageza kuwagombeleza kawalongela, ‘Nhegelezeni mweye mwa ndugu habali moitowa kamba avo?’ 27Lakini ayo yakalile yomtowa miyage kamsung'ha Musa kumgwazo. Kamuuza, ‘Nani yakutendile kilongozi na mulamuzi wetu? 28Hebu kolonda kunikoma kamba viumkomile ija Mmisili jana?’ 29Musa viyahulike avo, kalawanya mwiisi ya Misili kachola mwiisi ya Midiani. Ako kapata wana wabili.”
30“Viibitile miyaka malongo mane, msenga wa kuulanga kamulawilila Musa kuna ikisolo kikalile chokwaka kuluwala behi na lugongo lwa Sinai. 31Musa kakanganya ng'hani kija kiyone, kachola behi ya kisolo yalole goya. Lakini kahulika sauti ya Mndewa, 32‘Niye na Imulungu wa wahenga zako, Imulungu wa Abulahamu na Imulungu wa Isaka na Imulungu wa Yakobo.’ Musa kagwaya kwa bwembwe na hagezile kulola kabili. 33Mndewa kamulongela, ‘Vula vilatu vako, kwavija hanhu aho hawimile hong'ala. 34Niwona wanhu zangu viwodununzigwa mwiisi ya Misili. Nihulika viwogutilila, nihumuluka niwahonye. Avo sambi nokutuma uchole Misili.’ ”
35“Musa iyo yalemigwe na wanhu wa Izilaeli, viwamulongile, ‘Nani yakutendile kilongozi na mulamuzi kumwetu?’ Musa iyo yatumigwe na Imulungu kuwalanguliza wanhu na kuwakombola kubitila msenga wa kuulanga yamulawilile hana ikisolo kikwaka. 36Kawalongoza wanhu walawe Misili, kwa kutenda unzonza na vilaguso mwiisi ya Misili na hana Ibahali ya Shamu#7:36 Shamu fambulo jake ndung'hu kwa miyaka malongo mane kuluwala. 37Musa iyo yawalongele wanhu wa Izilaeli, ‘Imulungu kowasagulileni mtula ndagu wake, kamba viyanhumile niye na kokuwa imoja wa wanhu zenu.’ 38Musa iyo yakalile na lung'husesa lwa wanhu wa Izilaeli kuluwala, kakala ako na wahenga zetu na msenga wa kuulanga yalongile nayo hana Ulugongo lwa Sinai, na kabokela mbuli za ugima wa Imulungu yatugwelele siye.”
39“Lakini wahenga zetu walema kumtogola, wamsung'ha kumgwazo na walonga yahanogile kumwao wahabweleganye Misili. 40Avo wamulongela Haluni, ‘Tutendele mulungu yonda yatulongoze. Hatujuwa kinhu gani kimulawilile Musa, yatulavile Misili.’ 41Avo watenda kinyago cha ng'ombe wa kimbigalo, wakitambikila, watenda nyimwilinyimwili kudeng'helela kija kiwatendile. 42Imulungu kawaleka na kawatenda wazigwee ukulu nhondo za kuulanga, kamba viyandikigwe mna ikitabu cha watula ndagu wa Imulungu.”
“Mweye wanhu wa Izilaeli! Si niye bule yumunichinjile wanyama na kundavila nhosa
kwa miyaka malongo mane kuja kuluwala?
43Mweye mdipapa hema da mulungu Moleki,
na kinyago cha nhondo ya mulungu wenu Lefani,
vinyago vimutendile vivo vimvitambikile, avo nowahamizila mwiisi ya Babeli.”
44“Wahenga zetu wakala na hema dilagusa kamba Imulungu kabaho ako kuluwala. Ditendigwa kamba Imulungu viyamulongele Musa yaditende, diigalile na kija kiyone. 45Abaho, wahenga zetu wadibokele ajo dihema kwa wahenga zao. Wadipapa viwacholile hamoja na Yoshua na wachola najo mna ziisi ziyawabitize Imulungu. Disigala kuko mbaka kipindi cha Daudi. 46Daudi kanogeligwa na Imulungu na kampula Imulungu yamtogolele yatende hanhu hakukala Imulungu wa Yakobo. 47Lakini Sulemani iyo yamzengele Imulungu ng'anda.”
48Lakini Imulungu yeli Uchanha Ng'hani hakala mng'anda izengigwe kwa makono ga wanhu, kamba mtula ndagu wa Imulungu viyolonga,
49“Ulanga acho kigoda changu
na isi iyo inikile magulu gangu.
Ng'anda gani yonda munizengele niye?
Hanhu gani hondanikale niye?
50Niye mwenyego iyo nhendile vinhu vose vino.”
51Abaho Sitefano kalonga, “Mweye muli na mizoyo midala, na mulekile kumjuwa Imulungu, mweye musitile magwiti genu kutegeleza usenga wa Imulungu! Mwiigala na wahenga zenu na mweye vivija momulema Loho Yang'alile! 52Vino hana mtula ndagu yoyose wa Imulungu wahenga zenu wamulekile kumdununza? Wawakoma wasenga wa Imulungu wao kulawa umwaka walongile kwiza kwa Msang'hanaji wake Yanogile. Na sambi mumuhinduka na kumkoma. 53Mweye wao mubokele malagizo ga Imulungu, gamgweleligwe na wasenga wa kuulanga, lakini hamgagogile bule!”
Sitefano kotoigwa mabwe
54Wanhu wa mkitala viwamtegeleze Sitefano, wagevuzika ng'hani, wadafuna meno gao. 55Lakini Sitefano kuno kamema Loho Yang'alile, kalola uchanha kuulanga kawona ukulu wa Imulungu na Yesu kema mwambu wa mkono wa ukudila wa Imulungu. 56Kalonga, “Loleni, nowona ulanga ugubuka na Mwana wa Munhu kema mwambu wa mkono wa kudila wa Imulungu!”
57Kwa nyangi wanhu wa mkitala wasila magwiti gao. Bahaja wanhu wose wamzumhila Sitefano, 58wamulava kunze ya dibuga, wamtowa mabwe. Waja wakalile omtowa mabwe waleka viwalo vao kwa mbwanga imoja twaga jake Sauli. 59Viwakalile omtowa mabwe Sitefano kapula, “Mndewa Yesu, ibokele loho yangu!” 60Kafugama kaguta, “Mndewa! ugele kumgongo nzambi yao ino!” Viyalongile avo kafa.
ప్రస్తుతం ఎంపిక చేయబడింది:
Sang'hano 7: King'hutu
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
NT: © 2014 Pioneer Bible Translators and The Word for the World
OT: © 2019 Pioneer Bible Translators
