پیدایش ۱۳
۱۳
ابرام و لوط
۱ پس ابرام خو زنٚ اَمرأ و هر چی کی دأشتی و لوطم اوشأنٚ اَمرأ بوشویید نِگِب. ۲ ابرام خیلی ثروتمند بو، اون گله و رمه و نقره و طلا دأشتی. ۳ اون جٚه نِگِب، رأ دکفته بوشو، جا به جا کوچ بوکوده تا فأرسه بیت‌ایل، هو جایی کی اوّل خیمه بزه‌بو یَنی بینٚ بیت‌ایل و عای، ۴ هویه کی اوّلی بار ایتأ قربانگاه چأکوده‌بو. بَزین خوداوندَ ستایش و پرستش بوکوده.
۵ لوطم کی ابرامٚ اَمرأ ایسَه‌بو گابأن، گوسفندأن و خیمه‌یأن دأشتی. ۶ زیمین اوشأنٚ‌ره وست نوبو کی ایجا بِیسید چونکی اوشأنٚ مال و منال خیلی زیاد بو و نتأنستیدی ایجا ساکن بیبید. ۷ ابرام و لوطٚ چوپانأن میأن دعوا دکفته. او موقع کنعانیأن و فرزیأن او سرزیمینٚ میأن زندگی کودید.
۸ پس ابرام لوطَ بوگفته: «اَمی میأن، و اَمی چوپانأنٚ میأن نَوأ دعوا ببه چونکی اَمأن برأریم. ۹ مگر تومامٚ اَ سرزیمین تی جُلُو ننَه؟ خوأهش کونم می جَا سیوا بیبی. اگه تو بیشی چپ، من شم راست، اگه بیشی راست، من شم چپ.»
۱۰ هو وخت لوط خو سرَ راستَ کوده و تومامٚ اردنٚ دشتَ کی به طرف صوغر بو فندرسته و بیده کی بهشت و مصرٚ سرزیمینٚ مأنستن آبٚ جَا سرسبز بو. اَن زمانی بو کی خوداوند هنوز سدوم و عموره‌یَ خرابَ نوکوده‌بو. ۱۱ پس لوط تومامٚ اردنٚ دشتَ خوره اوسَده و شرقٚ طرف کوچ بوکوده و اوشأن کس‌کسٚ جَا سیوا بوبوستیدی. ۱۲ ابرام کنعانٚ زیمینٚ میأن بِیسه، ولی لوط او دشتٚ شهرأنٚ میأن ساکن بوبوسته و سدومٚ نزدیکی خیمه بزه. ۱۳ ولی سدومٚ مردومأن شر بید و خیلی ضدٚ خوداوند گوناه کودید.
۱۴ بَزین کی لوط ابرامٚ جَا سیوا بوبوسته، خوداوند ابرامَ بوگفته: «هسه تو سرَ راستَ کون و جٚه اویه کی ایسه‌یی شومال و جنوب و شرق و غربَ فَندر. ۱۵ چونکی تومامٚ اَ سرزیمینی کی دینی، تا اَبد ترَ و تی زأکأنَ بخشم. ۱۶ و تی نسلَ زیمینٚ گرد و خاکٚ مأنستن چأکونم، هوطو کی اگه کسی بتأنه زیمینٚ خاکَ بیشمأره، تی نسلم ایشمأره. ۱۷ ویریز زیمینٚ درازا و پهنا میأن بگرد چونکی اونَ ترَ بخشم.» ۱۸ پس ابرام خو خیمه‌یَ جمعَ کوده و بوشو، مَمری بلوطأنٚ نزدیکی، حبرونٚ میأن ساکن بوبوسته و اویه خوداوندٚ ره ایتأ مذبح چأکوده.
ప్రస్తుతం ఎంపిక చేయబడింది:
پیدایش ۱۳: گیلکی (رشتی)
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2010-2019 Gilak Media
